Deureng er a Resanto
A deureng a okiu otireklel a llechul a Kristo, e mo mesisiich er a klengit el reng me a chelitechut lokiu Ngii, e mesiou el di uai Ngii.
A profet Enos er a Babier er a Mormon, el ngelekel a ngelekel a Lehi, a milluches er a ta er a chimo el tekoi el dilubech er a uchelel a klengar er ngii. Di ngii el tang el ngara chereomel, e a Enos a mocha melbedebek osischeklel a demal, er a Jacob. Nguluchais el kmo, “A tekoi el blek blechoel lorrenges er a demak el melekoi el kirel a diak a ulebengelel klengar, me a deureng er a resanto, a kmal silbechii er a chelsel a renguk.” Meng klengerenger er a chedaol tekoi er a rengul, e a Enos a mlo ngara nglunguuch, el ngodech el nglunguuch leng mle tal sils el mo klebesei, el ngii el nglunguuch a mlo uchul a meklou a belkul ocholt, me a kengei me a yaksok a mlo er ngii.
Ng betok a desuub er tial teletael dilubech el mo er a Enos, eng di chelechal sils e sel me duum er a uldesuek a sel uldesuel a Enos el kirel a demal el mle blechoel mengedecheduch el kirel a”deureng er a resanto.”
Edei el rak er a memong er tial ongdibel e a, President Russell M. Nelson a milngedecheduch el kirel a deureng. A tara tekoi ledilii, a kmo:
“A deureng el dolchesuar a kmal kekerei a relii er a teletael er a klengar el dengara chelsel eng di klou a belkul er a rokui el tekoi el ngii a moktek er a klengar kid.
“Se el sekum e a moktek er a klengar er kid a ngara uldasou er a mo suobel … el Jesus Kristo me a ebangkelio er Ngii, e kid a sebeched el mo melechesuar a deureng el diak el diak el iior er a ike el ngii a mla duubech—me a lechub e ng diak el bol duubech—er a klengar er kid. A deureng a mei le Ngii a uchul. … A denguu er a re Uriul-klebesei el Santo, e a Jesus Kristo a ngii a deureng!”
A re Santo a tirkel mla soiseb er a chedaol telbiil er a ebangkelio lokiu a techolbechelid e melasm loltirakl er a Kristo el tir a chedal. A leuaisei, e a “deureng er a resanto” a olchotel a deureng el di merael moua Kristo.
Ng soak el mesaod el kirel a mei el deureng sel doltirakl a Llechul, me a deureng lokiuellel a klengitelreng me a chelitechetud lokiu Ngii, me a deureng lobengkel omesiou sel dosiou el uai Ngii.
Deureng sel Doltirkal a Llechul a Kristo
Kede kiei er a chetituokel taem el betok el chad a rrau a rengrir el kirel a klou el ultutelel a llechul a Rubak me a rebebil a kuk diak lomdasou el kirel. Ng bleketakl el desang, el rechad el diak loltirakl a chedaol llach el uaia klikiid ra tekoi er a deleboes, me a bleketakl lomeruul, me a omengull er a Chedaol sils a uaia leko er a ngara deureng er a klungiaol er tial klengar, el muut lobdois er tirkel tir a bai melasm lolngesenges. A rebebil a locha mo melchedech el kmo aikal blakereng me a mo chuarm ngarngii a belkul. A rechedal a blai er a Israel er a recheuodel a mlo oumondai.
“Ng klsuul a dosiou er a Dios: e ngera kede nguu er ngii a doltirakl a tekingel, e desal ngara ringel me a klengitelreng er medal a Rubak?
“E chelecha e a remekedidai a rengrir a bai ngara deureng;choi, tirkel meruul a mekngit a ungil beserir; oi, me tirkel diak longull er a Dios a bai selbechakl.”
Di mongiil, ng dilu Rubak, er sel “sils el bok ruul a mengasireng el tekoi. … E seikid e kemiu … a mo medengelterir tirkel melemalt me tirkel mekngit, tirkel mesiou er a Dios me a tirkel diak losiou er ngii.” A remekngit a locha “mo ngara deureng el telkib el taem,” eng di kmal di kedeb el taem. A deureng er a Resanto a diak a ulebengelel.
A Dios omes a tekoi er sel meral teletelel, e Ngii omerk er tiaikid el ues el mei er kid lokiu a Llechul, lomekrael er kid er a dellas me a delluchel er tial klengar el bedul a diak a ulebengelel deureng. A Prophet Joseph Smith a milsaod: “Sel de mosisechakl ra llechul, eng osengel a diak a ulebengelel; le kid a lomes er kid a Dios el ua de ngar a diak a ulebengelel; A Dios a kiei er a diak a ulebengelel, meng diak lomes a tekoi el uaikid.”
Ng dirkak a chad el bla kisang el metik er a ebangkelio ruriul e diak loureng ulekum meng ngiluu ruchei. “Ou, aikel mekngit lomelilt me a chelbirukl el mle sebechek lodngakl,” te melekoi el uasiei. A llechul a Rubak a omekrael er kid el mo melilt er a ungil luchul a deureng ruriul. Ng meral kired el mo ngara deureng e mereng a Sulel el mla chotii er kid a ungil rael.
Sera lengeasek el dil, e a Sister Kalombo Rosette Kamwanya er a D.R. Congo, el chelechal taem e ngara Côte d’Ivoire Abidjan West Mission, a ulsengerenger e meluluuch ledei el klebesei losiik er a rael el Dios a soal a bo lobang. Chelsel a klebokel el berrusel er a klebesei, e ng mlocholt a teblo el meklou el blai, eng milsa ko er a ikelesia el uriul taem eng mlo mtebengar el kmo ng templo. Meng mocha osiik e a uriul eng miltik er a ikelesia el ngii a lilsang er a berrusel. A mle llechukl a kmo, “Ikelesia er a Jesus Kristo er a Uriul-klebesei el Santo.” A Sister Kamwanya miltecholb e a uriul e a delal me a retelolem lochedal a miltecholb. Ng millekoi a Sister Kamwanya el kmo, “Sera knguu ebangkelio, e a kulmelchesiu el uaia blek kelebus el charm mla mo mimokl. A renguk a mlo mui er a deureng. … Ak mlo medengei el kmo Dios a betik a rengul er ngak.”
A doltirakl a llechul a Dios eng rullid el mo beot er kid el mui el melchesuar er a beltkil a rengul. Sel ibutek e kekerei el rael er a llechul a Dios a ngoikid el dimelemalt el mora kerrekar er a klengar me a redechel, el merekos, “el kot el soad ra rokui el tekoi,” a olechotel a beltkil a rengul a Dios el ngii a mekekii a reng “loba imis el klou el deureng.” Ng millekoi Osobel:
“Alsekum e ko moltirakl a llechuk, e ke mo nguu a beltik el reng er ngak; el di uai ngak loltirakl a llechul a Demak, me ak nguu a beltik el reng er ngii.
“Aika el tekoi el bla kdu er kemiu, me a deureng er ngak bo lolemolem lobengkemiu, me a deureng er kemiu bol mui.”
Deureng el mo Mesisiich lokiu a Kristo
Meng uaisei el blak a rengud loltirakl a llach, eng di a ringel me a ongarm a sebechel osengur a deureng er kid. Eng di sel dolasm el mo mesisiich er a ikal ringel lultuil a ngesou er a Osobel, eng koremelii a deureng el dolchesuar chelechang me sel deureng el dolsingch el kirel. A Kristo liluut el dmu er a roltirakl er Ngii, “Ko mo chelbangel ongarm er a beluulechad: eng di bol deu a rengmiu; le ak mla mo mesisiich er a beluulechad.” Me sel dobult el mo er Ngii, e dolngesenges er Ngii e domak er kid el mo er Ngii, e a ongarm me a klengitelreng a obult el mo deureng. Ak dulii a tal okesiu.
Sera 1989, e a Jack Rushton a milesiou el merredel er a Irvive California Stake er a Merikel. Sera lengara omilil el telungalek er a chelmellel a California, e a Jack a mle ou surf e a iiuul a ngiluu el mo er eou el subechii er a bad, meng miltemall a iiklel me a chiuesel a ulekel meng kmal mle klou el metemall. A Jack a millekoi ruriul kmo, “Sera kmetemall, eak di mle medengei el kmo ak mocha chitechut.” Ng mlo diak el sebechel mengedecheduch e dirrek el diak el sebechel di ngii louteliil.
A telungalk, resechelei, me a rechedal a stake a mle iliuekl er a Brother Rushton me a bechil er a, Jo Anne, e a lmuut el bebil, e te kildmeklii a basio er a blirir meng mo sebechel soiseb a wheelchair er a Jack. A Jo Anne a mlo ulterekokl loba Jack el lluich me a edei el rak. Ng melekoi el kirel a cheldecheduch er a chelsel a Babier er a Mormon el Rubak oldingel e mesebechakl er a Rechedal er a taem lengar a ringel e kobekakl a berraod el ble lechellungel, e a Jo Anne a millekoi el kmo, “Ng ko er a mechas a renguk el kmal kebekakl a renguk er chelechal kumecheliu er a bechik.”
A botk me a ukeruul el mlo er a Jack a rirelii meng mlo sebechel muut el momengedecheduch, meng di mle chelsel a tal rak, e a Jack a mlokedong el mo sensei er a Gospel Doctrine e patriarch er a stake. Sel bo longedmokl a klengeltengat er a patriarch, e a tara oba priesthood el chad a ngmai chimal a Brother Rushton locha er a bebul a bdelul a chad el melai er a klengeltengat e olngeseu lorreked a chimal sel lomsa chad a klengeltengat. A Jack a mlo smecher er a Sils er a Kurismas er a 2012, ruriul er a lluich me a eru el rak el blak a rengul mesiou.
Chelsel a tara berrotel el cheldecheduch, e a Jack a millekoi: “A ongarm a di mei er kid el rokui; ng telengtengil a klechad er tial beluulechad. Eng di a rebebil er a rechad a omdasou el kmo a klechelid me a klaumera er a Dios a torob a mekngit meng diak lemei er kid. A kumdasou eng diak el uaisei. A kumdasou e sel kmal klou a ultutelel tekoi a kmo alsekum a klaumera er kid a mesisiich, e sel dubech ongarm, e uaisei el mo duubech, eng sebeched el obangel. … A klaumera er ngak a diak el mesim, eng di diak el belkul a kmo ng diak a ringel el mei er ngak. A kumdasou eng ketengel er a klengar ngak el ksal mlora ringel, el meral mlo diak el sebechek lobult el mor, me a kulebult el mo er a Rubak, e chelchal sils, e ak melchesuar a dmolech el deureng.”
Ng sils el bebil er a taem e ngarngii odechelakl el ngara social media me a rechad lomtok er tirkel tir osiik el mo oltirakl a llechul a Dios el kirel a teletelel a doubail, me a tekoi er a omilil, me a klikiid er a deleboes. Ng blechoel tirkel ngeasek el teloi er a Resanto, luldimukl er a redil me a rechedil, a tir a chelbangel aika lotuub me a odechelakl. Ng diak el beot el bo decheroid er a ika el mekngit lomeruul. Eng di molbedebek a tekingel a Petrus: “A omotuub er a ngklel a Kristo, e bom ngara deureng; le reng er a klebkall me a Dios obengkemiu: le tir a mekngit el chad, eng di kau a kobkellii.”
Ngar sel Sers er a Eden, e a Adam me a Eva a mle kiliei er a klikiid el klengar, “el dimlak lodengelii a deureng, leng dimlak lodengelii a klengitelreng.” Chelecha, e kid el bekongerachel el chad, a metik er a deureng sel bo demesisiich er a cherarou er a ngii di el teletelel, a le klengit, ringel, chelitechut, a lechub ngii di lolibesongel er a deureng. Tiaikid a deureng er a kuk tara dauch er a rael er a roltirakl; el deureng el “bla denguu a ngbetel a … klengit, e melchesuar a budech er a uldesued”; e deureng el melchesuar a rengud el merael mo obekeed lokiu a krasia er a Kristo.
Deureng er a Omesiou el uaia Kristo
A Osobel a metik a deureng el kirel osebeled me a diak a ulebengelel klengar el mei er kid. Sera longedecheduch el kirel a Tngakireng er a Osobel, e a President Russell M. Nelson a dilu el kmo:
El ua rokui el tekoi, el Jesus Kristo a ngii a kot el ngarbab lokesiu, “el mle medengelii a deureng me ngultekangel el mo er a ulebongel’ [Hebru 12:2]. Ka momtab er ngii! Sel uchul e Ngii a mlo sebechel lotekengelii sel kot el ngarbab el ringel er a beluulechad, e a Osobel a mle ultuil er a moktek er a deureng!
“E ngera el deureng sel Ngii a mle chelbangel er Ngii? Ng bleketakl luldimukl er ngii a deureng er a omengikiid, omekungil, me a omelisiich er kid; ng deureng er a mo mengkad a kengterir tirke el rokui el mo ouchel a rengrir er a kengterir; deureng el mo uchul e ng mo sebechel el kau me ngak el muut el mo remei—el beches e klikiid—el mo kiei lobengkel a rechad er a blid er a Babeluades me a telungalek er kid.”
Ngosisiu, el sel deureng el “ngara medad” a deureng sel dolgneseu er a Osobel er a Urerel lolsobel. Me kid lulchellel e ngelekel a Abraham, a oureor lomekngeltengat er a rokui el telungalek er a beluulechad “lolab a klengeltengat er a Ebangkelio, el ngii a klengeltengat er a mo suobel, me a diak a ulebengelel klengar.”
A tekingel a Alma a mei er a uldesuek.
“Tia urerek, el sebechek el mo dongu er a chimal a Dios el mo uchul a rechad a mo ouchel a rengrir; e tiaikid a mo deureng er ngak.
“Le sel kisterir, a rebetok lodam er ngak el meral mo ouchel a rengrir, e mei er a Ruabk el Dios er tir, e a renguk a mo mui er a deureng. …
“Eng di diak di kngara deureng er a klungiolel a urerek e merekong, a deureng er ngak a lmuut el ngarbab el lurerir a rodam er ngak a uchul, tirkel mlo er a beluu er a Nephi. …
“Chelecha, e sel kulatk a rdechel a urerir tirkal odam er ngak e a renguk a omichoech, el soal mo kakeakl ngii me a bedengek, le ng kmal, imis el mui er a deureng”
A redechel omesiunged el mo er a ta me a tang er a chelsel a Ikelesia a tebechedel tial deureng el “ngara medad.” Ngosisiu er a chelsel aikel taem el dengar berraod me a ringel, eng sebeched loba kllouelreng e oldingel alsekum a moktek er kid a ngara deureng el meruul er a rengul a Dios el mengebekakl, olngeseu, e uchul a deureng el mo er a Rengelekel, el tir a rodam me a rodos er kid.
Sera le ngara Haiti er tial mlo merek el buil el mlo olterekokl er a Port-au-Prince Temple, e a Elder David me a Sister Bednar a mlo kebetech me a tal ngeasek lodos el bechil a dirk tela el klebesei er a lemad el mle aksident. Te dilak lemangel lobengkel. A bocha le Sandei e ngkaikid lodos a mle olngeseu er a oterkeklel a templo el kmal medemdemk, e klikmechur el mengemedaol er a rechad el mle soiseb er a templo.
Ak oumerang el kmo sel kot el ngarbab el “deureng er a resanto” a mei el dodengei el kmo a Osobel a milngeluch el kirir, “e diak a sebechel mo nguu se el deureng el ngii a [mo mekeek] a delbenged [se el] bo de [rengesii a Jesus] el meluluuch el kired el mo er a Chedam.” A kubengkel a President Russell M. Nelson, e ouchais el kmo a deureng a sengk el mo er a re blak a rengrir el Santo “el tir a mla outekangel ongarm er a beluulechad” e meral “melasm el mo kiei er a melemalt el klengar, el Jesus Kristo a ulisechakl.” Bom mui er a deureng, a ngii a nglunguchek el ngara ngklel a Jesus Kristo, amen.