Blechoel e Mesisiich el Oumerang
Oumerang er a Rubak uldimukl a oumerang er a temel a ulsbechall a kllou el reng me a blakel reng el ochit a ses el eolt er a klengar.
A ngelekam el sechal er a Dan a mlo imis el smecher ra le ngara le misionari ra Africa meng milengai el mora blil a ukeruul el diak a kmal ngera er ngii. Sera kim chiuii sel kot el babilengel mer kemam ruriul ra secherel, e a ki ulemdasu el kmo ng ual dikea ra rengul, eng di bai milluches el, “Ngii me se er ak bechiuaiu er a ospitar, e ak ulmechesiu er a budech. Ng dirkak a tang mek sal blechoel el di ngara deureng er a klengar er ngak.”
A bechik me a ngak er sera kim chuiu aikal tekoi, e ng meral rirtechii a rengmam. Melemolem e mesisiich er a deureng. Ng dirkak ki mrengesii a deureng el mesaod el uaisei, eng di tekingel a mle klemerang. Aki mle medengei el uase a deureng losaod er ngii a diak el dil deuil a reng domelchesiu ng bai budech me a deureng el mei sel dotireklii a soal a Dios e dotilii a klaumera er kid er Ngii er a rokui el tekoi. Kid me kede dirrek el mla soiseb er a uaitang er a klengar er kid er sera Dios longedecheduch er kid lokiu a budech el mera rengud e meskid a urunguled er a Kristo ngii mesel klengar a le meringel e diak dodengei el kmo ng mo ua ngerang.
A Lehi olisechakl el kmo omko Adam me a Eva dimlak el rebet, “e te di millemolem el diak a ngeral lodengei, diak loudeureng, e leng dimlak lodengei klengit er reng. …
“Engdi mesang, a rokui el tekoi a mla mekedmokl lokiu a llemesel ngikei el medengei a rokui el tekoi.
“A Adam a rirebet meng mo sebechel mo er ngii a chad; e a chad a uaisei, meng mo sebechel mo er ngii a deuil a rengul.”
Ng ngodech el teletael, le ringel me a klengit el reng a kudmeklid el mo nguu a deureng alsekum me ke doumerang er a Rubak me a uldesuel el kired. Tial klemerang a kmal ungil mesaod er sel olachitnger er a 13th century: “A klengitelreng a kudmeklau el kirel a deureng. Ng mesisiich lotobed a rokui el ngara blim, meng sebechel a deureng el metik ra basio el bel siseb er ngii. Ng meririau a bibrurk el llel a kerrekerum er a rengum, me a beches, el chemadech el llel a sebechel mukeroul el mtechei. Ng madel a mechut el risel, me a beches el blart er cheungel a morngii a basio er ngii el mukeroul. Ngii dil bedengel a klengit el reng a mengetengtik ra rengum, ea lmuut el ungil tekoi a momtechei.”
A President Russell M. Nelson a ulisechakl, A deureng el Osobel a [meskid] … a di blechoel, el mekletkid el kmo a ringel el dolab a di telkib el taem [Doctrine and Covenants 121:7] e mo chachisois el klungioled. A ongarm me a rignel el ngara kid a sebechel rulii a basio el kirel a ngarbab el deureng.
A ungil chais er a ebangkelio a diak el yaksok ra klengar el diak a klengit er reng me a uldikel ng bai mui er a ngarngii el moktek er kid me a belkul—ng klengar el kngtil a rengud me a ringel a sebechel “loberkakl er a deureng er a Kristo.” A Osobel a ulechais, “Ko mo chelbangel a ringel er a beluulechad: e ng di bom ngara deureng; le ak mla mo mesisiich er a beluulechad.” A ebangkelio er Ngii a klumech er a oureng. A klengit el reng lobengkel a oureng el ngara Jesus Kristo a urekodel er a telbilel a melemolem el deureng.
A chisel omerolir a re Jeradite el mora beluu er a telbiil a sebchel olachitnger er a omeroled er tial klechad. A Rubak a mle yaksok er a ochellel a Jared me a rechedal el kmo Ngii a mo “okiu a [mederir] el mora basio el ngi a ngellitel er a rokui el basio.” Ng uldercheterir el mo melasech a bilas, tulerrenges me te mloureor el meleketek lokiu a longedereder a Rubak. Engdi, a ureor ra lorael el mong, e a obekul a Jared a mlo er ngii a sebekreng er ngii er a llecheklel Rubak el kirel a ikal bilas a dimlak el ungil besul. Ng lilangel:
“Rubak, ak mla kudmeklii a ureor el kau a mileskak, me ak mla remuul a bilas lokiu a ikel omdilu er ngak.
“Mesang, e Rubak, ng diak a llomes er a chelsel.”
“Rubak, kau ke mechikemam me ak ki mo imuul er tial klou el daob el di milkolk?”
Mla tal mouchais aikal ngar er a rengum el mo er Dios er tial omeruul? Sel dolasem el kiei loltirakl a le dilu er kid a Ruak e a melemalt el urunguled a diak de ngai, kau ke mlo melchedech el kmo ke mo soiseb er tial kelngar el di ngara ilkolk?
A obekul a Jared a mle ouchais er a klou el sebekreng er ngii el kirel a techellir el mo suobel er a chelsel tia el bilas. Ng lilangel, “A ki dirrek el mol mad, leng diak el sebechemam louteliil, dil merekmo le borngii a eolt ra chelsel.” A ringelel a klengar ng rirellau el meringel louteliil me ke melchedech el kmo keleng sebechem el nguu a tal sils, el muut te kung ng sebechem el lmuut el mora blim ra babeluades?
A uriul er a Rubak a uluureor lobengkel a obekul a Jared el mo kudmokl a ikel sebekreng er ngii, “Ng diak el sebechiu el mo imuul er tial kmal dmolech dil merekmo kedmeklii a rael [el] mo omtok aikal chedesaoch, me a eolt el mla mo er ngii, ma ieleb el merael mei.”
A Rubak a mle bleketakl el re Jaredites a diak el sebechir el mora beluu er a telbiil a lak Ngii. Ng dimlak el tir oungerachel, ma dita el rolel el iull er tial daob a lengai a klaumera er tir el msa Rubak. Aika le siliseb ra chelsel me a osisechakl el mlara Rubak a ual blel smisichii a obekul a Jared er a klaumerang er ngii e oumerang er a Rubak.
Momtab a nglunguchel el mle ker e obult el mo sebekreng er ngii el mocha klaumerang e oumerang:
“Ak medengei, E Rubak, el kmo kau a olab a rokui el klisiich, meng sebechem el remuul a rokui el ngii a mo klungiolel a chad; …
“Mesang, E Rubak, kau a sebechem el rulli tiang. Aki medengei el kmo kau a sebechem locholt a klisichem, el ngii a lomes a chad eng mekekerei lokiu a klemedengei er ngii.”
Ngellechukl el kmo a re Jeredite a “ngilasech ra … bilsengir, e merola el bedul a klou el daob, e mechititerir el mora Rubak el Dios er tir.” Sel mo oldurch a belkul a kmo ko kerkeklii malechub e ke mo chemoit a rokui. A re Jaredite a dimlak el siseb ra bilas le tir el ungil medengei aikel mo mekedmokl er a omerollir. Te ngilasech e le te mla subii el mo oumerang er a klisichel a Rubak, klungiolel a rengul, me a klechubech er ngii, me te mle beot er tir el chemoit a rokui el omededenger ma dakt el lullab el mora Rubak.
A ngelekel a ngelekam er a Abe a dirk mle medakt el ngara omotsia el uos lomoik el mo er bab e me riou. Ng bai mle soal a ikel diak longitengtik. A delal mechas a uremelii el kmo ng diak el mekesakl, meng, mlo oumerang, er ngii e ngilasech. Ng mle klikmechur e melekoi el kmo, “Ng diak kumelchesiu el selbechakl, eng di ak selbechakl. Tiaikid a locha lulmelchesiu er ngii a re Jaredites. A oumerang er a Dios a sebeched el diak desal omelchesiu el selbechakl, eng di deureng okiuellel.
A omerael a dimlak el beot er a re Jaredites. “Betok el taem el blara chelsel a daob, e le a meklou el iuull el ua rois el mlar bebrir.” Eng di ng lluches el kmo “tial eolt a di millokou er [tir] el bedul a beluu er a telbiil.” Ng ual meringel el bo dungil medengelii, tokuni a ikel taem er a klengar er kid el medal a eolt a mesisiich me a daob a meringel, eng sebeched el mo mededaes a rengud el medengei el kmo a Dios er a diak a ulebengelel klungiolel a di blechoel melokou er kid el bedul a blid.
Ng millemolem a llechukl, “Te millemolem el bedul uchei; e dimlak a meklou el charm ra daob el tilmelterir, me a kuzira meng dimlak el temelleterir; e mla rengii olbdelir, er a lengar bebul me a lengar chelsel a daob.” Kid a kiei er a beluulechad el meklou el iull er a kodall, bedenged me a ulesued, ringel me a ongarm el bek bedengel a tomellid. Eng di, ng okiu a klaumerang er a Jesus Kristo el dolilt el mo oumerang er Ngii, e kid a dirrek a sebeched el di mo oba llomes a dengara bebul malechub a de ngara chelsel a daob. Kid a sebechel mo ulterkokl el merkid el kmo a Dios a diak lolengull el melokou er kid el bedul a beluu er a telbiil.
Me sera lomteuat er a lengara bilas, e a re Jaredites “milngitakl loldanges ra Rubak; … me [tir] a ulureng a sulel e oldanges er a Rubak el ta el sils; me sera bol kebesengei, meng dimlak lolengull loldanges er a Rubak.” Te ulmechesiu ra deureng ma omereng el saul ngii mesera le ngara chelsel a ringel. Meng dirkak le bo er a beluu er a telbiil, eng di temla er a deureng er a klengeltengat le tir el mle blak a rengir e mesisiich loumerang er Ngii.
A re Jaredites a ulmekall el bedul uchei er a bebul a daob el 344 el klebesei. Ng sebechem el mesa tiang? Oumerang er a Rubak uldimukl a oumerang er a temel a ulsbechall a kllou el reng me a blakel reng el ochit a sesel eolt er a klengar.
Meng uaisei el, re Jaredites “a mlo omak er a beluu er a telbiil. Me sera le serechii a chetemel a beluu er a telbiil e te mlo osus el mera chutem, e ngila rengrir el meriour er medad a Rubak, e lmangel era deureng er medal a Rubak, le a ikal imis el betok el klechubebuch er ngii el mo er tir.”
Alsekum me kede kerekikl loltirakl a telbiled, e kid el dirrek a mo sebeched el mo remei e mo osus er medal a Rubak e lmangel er a deureng el kirel a imis el betok el klechubechub er Ngii er a klengar er kid, uldimukl a klengit el reng el ngii a kudmokl a basio er a betok el deureng.
A kuuchais el kmo sel dolilt el mo blechoel e mesisiich loumerang er a Jesus Kristo me a chedaol moktek er Ngii ra klengar er kid, e Ngii a odngelid loba klouelreng, meskid a budech er a rengud, e rullid el mo “oureng el mo mikokl lokiu ngii.”
Ak sioning el kmo a Jesus a Kristo. Ngii a uchul a rokui el deureng. A krasia er Ngii a medeel, e Ngii a mesisiich losebelid. Ngii a llomes, e klengar, e urungulel a beluulechad. Ng diak el bechikid me bo de riid. El ngara a ngklel a Jesus Kristo, amen.