Oltirakl a Yaksok me a Telbiled
Ak sioatai er kau el mo omtab a ikel yaksok me a telbiil el mriruul lobengkel a Rubak, me a rebebil, loba klou el klaumerang, el medengei el kmo a tekingem a klemerang.
Rodam me a rodos, me chelechang e dongesimer er tial ongdibel, e kid bo doreked er a chelsel a rengud el sioning er a chelechal sils a klemerang er a ebangkelio er a Jesus Kristo. Kede ngeltengat el ngar ngii tial chedaol taem el dedak el mo melisiich a yaksok er kid el mo er a Rubak el Jesus Kristo el kmo kid a Mesiungel e Ngii a Osobeled.
Sel ututelel a omeruul me a oltireklel a yaksok me a telbiil a kmal omekberaod er a uldesuek. Ng mekerang e klou a ututelel sel kau a oltirakl a tekingem? oumerang? el mo meruul aikel kau a dilu ke mo meruul? mo melasm el menguul a chedaol telbilem? e mo ngar ngii a klaumerang? Me sel de kiei loba klemerang el mo er a yaksok er kid el mo er a Rubak me a rebebil, e kid a oiak er sel rael er a telbiil el lemuut el mo er a Chedam er a Babeluades e mo omelechesiu er a beltkil a Rengul el ngara chelsel a klengar er kid.
A Osobeled, el Jesus Kristo, a kot el ungil okesiu el kirel a omeruul me a otireklel a yaksok me a telbiil. Ngii a mlei er a beluulechad el yaksok el mo meruul a moktek er a Chedam. Ngii a ulisechakl a osisechakl er a ebangkelio loba omelekoi me a omeruul. Ngii a melngakireng a kengtid me bo el sebeched el lemuut el mo kiei. Ngii a mla remuul a bek el yaksok er Ngii.
Ng sebechel tial osisiu el medung el mera dersta er kid? Ngerang a telmellel alsekum kid a rulii a kekekerei el cheleblad, rulii a telbik el mekngit, malechub eng diak desal loltirakl a ikel telbiled? Ng mekerang alsekum kede mo cheroid er a telbiled? A rebebil te mo er a Kirsto er a dichel a ocholt er kid? A tekingem ng klemerang? Otireklel a yaksok a diak el kse er a chad; ng bai blekerdelel a mesiungel a Jesus Kristo.
Aikel klechitechetud er tial klengar ea Rubak a mle yaksok el uasei, “Bo el ungil a rengum, e lak ko medakt, ele Ngak el Rubak a obengkem, e mo dechor er a bita er kau.” Ak mla omelchesuar er Ngii se er a kusbech a kellou el reng, omengelaod, mecha lechub a klou el chedaol uldasou malechub eng klisiich, meng kmal mlo ngariou a renguk e oureng a saul el Ngii a chedaol el chelmengek.
A Rubak a dilu el kmo, “Rokiu el chad el chemoit a kengtil e mei er ngak, e omekedong er a ngklek, e orrenges a tekingek, e oltirakl a llechuk, a mo mesang a medak e mo medengei el kmo Ngak ki ngii.” Tiang locha sel ngarbab el yaksok er Ngii.
Ak silubii el klou a ututelel sel ngak a oltirakl a tekingek serak ngeasek. A tara a okesiu se er ak dechor el mo melekoi er sel Scout Oath. A ureled lobengekl a Boy Scouts of America, el ngii a mochu merek, a mo blechoel klou a ututelel el merngak me a Ikelesia. Mo er a chelechad er a Scout, mo er a rebetok el resechal me a redil el milesiou el merredel er a re Scout, mo er a rechedil—el meral chetengakl a mo er tir—me a tirkel ngeasek el resechal el mla er a Scouting, Aki dulang el kmo, “Ko mesulang.”
Chelsel tial ongdibel, ea profet er kid el, President Russell M. Nelson, me a Elder Quentin L. Cook a mla ouchais omesebech el teletael el ngii a kirir a rengeasek e mo omeklemalt a chelechad er kid loba mla mocholt el klemerang. Uldimukl er tiang, e tial mlo merek el Sandei, ea President Nelson me a President M. Russell Ballard a silodii sel beches el brokuram er a Rengalek me a Rengeasek er a Ikelesia er a Jesus Kristo er a Uriul-klebesei el Santo el brokuram el mo er a rokir el Ikelesia. Ng beluulechad rokir a mo meruul er ngii el motkek a kirel a Rubak me a Osobled, el Jesus Kristo. A First Presidency me a Chelechad er a Teruich me a teung el Apostol a dmak er tial beches el rael, e soak el sioning el kmo a Rubak a mle mengetikaik er kemam er a bek el bekesel tial rael. Ng dmeu a renguk el kirel a rengalek me a rengeasek er a Ikelesia el mo meruul er tial teletael el kirir a lengara blai me a ikelesia—lokiu a omesubel a ebangkelio, omesiou me a omilil, me a ukurulir.
Sel moktek er a rengeasek er tial mei el rak er a, 2020, a melekoi er sel yaksok er a Nephi el kmo ak “mong e meruul.” Ngii a milluches , “Mi tia el bochal temel, e ngak, el Nephi, a dilu er a demak el kmo: Ak mo meruul aikel tekoi el Rubak a mla meskemam, a llach el kirel, le kmedengei el kmo a Rubak a diak le besterir a rengalek el chad a ngii di le llach, alsekum eng diak le kedmeklii a mo rolel eng mo sebechel mo motirakl a llechul.” Maltang mildung er a ngaramong el taem, e kid el chedal a Ikelesia a ngar tial yaksok er a chelechal taem.
A “mo e meruul” a belkul a mo olngesechekl el mo rebab er a omerolel a beluulechad, e mo melai e meruul a ocholt, e kiei el melemalt loba urungulel me a klaumerang er a ngar medal taem, e mo meruul a telbiil el oltirakl er a Jesus Kristo, e menglou a beltkil a rengud el mo er Ngii, el Osebelel a beluulechad.
A telbiil a erul-rael el yaksok er a delongeled me a Rubak. Sel dechad er a Ikelesia, e ke de tilbir er sera de metecholb el mo nguu a ngklel a Jesus Kristo el mo obang, e mo kiei el uai Ngii sera le kiei. Uai tirkel miltecholb er a ralm er a Mormon, e ke de tilbir el mo Rechedal, “el mo ngosuir a tang me a tang er a chelngelel, me bol kebekakl; … el mo lmangel lobengterir a re ngara klengit el reng; … e mengelaod er a ngara klengit el reng, e mo dechor el sioning er a Dios er a rokui el taem me a rokui el tekoi, me a ngii dile basio.” Sel omesiou er kid el mo er a tang me a ta er a chelsel a Ikelsia a olechotel a dechal a rengud el menguul aikel yaksok.
Sel dolai er a sakrament, e kede omekbeches er sel telbiil el mo obang a Ngklel e meruul a lemuut el bebil er a yaksok me debo dungil. A uldesued me a teleteled er a bek el sils, a le klou me a le kekerei, a olechotel a dechal a rengud el mo er Ngii. Sel chedaol yaksok er Ngii el mei er kid a uase, “E alsekum e ko mo blechoel melatk er Ngak eng mo er ngii a Reng er Ngak lobengkemiu.”
A kerik er a chelechal sils a uasei, kid kede oltirakl a yaksok me a telbiled malechub a lebebil er a taem eng diak a rengud el meruul, e ouralm me sils sel doruul meng sebechel di beot el metemall? Sel dolekoi el mo er a chad el uase, “Ak mo meluluuch el kirem,” e kede rulii? Sel dolekoi el uase, “Ak mo ekong e ngosukau,” e kede mong? Sel dolekoi el mo harau a belsed, e kede rulii? Sel do dersii a chimad el kongei el mo oldubech er a rechad er a ikelesia el kirel a beches el okedong, el belkul a kmo ke de mo olngeseu, e ke de rulii?
A tara klebesei se er ak ngeasek, e a delak a dilengchokl lobengkek er a dukellel e mle blak a rengul mesaod er a ututlel sel de kiei loltirakl er a Llach er a Ulekerreuil a Bedenged. “Ak medengei eleng teletelir a rebebil, er a mla memong el rak,” ng dilung “ng mo dibus a chedaol blekeradel me a lomelchesuar el kirel e leng diak otireklel a Llach er a Ulekerreuil a Bedenged.” Ng ngulmes a medak, me ngak a kmal ulmelchesiu aikal tekingel el soisb er a renguk: “Ke yaksok er ngak, e Ronnie, chelechal sils [ngulmekedong er ngak el Ronnie], el mo blechoel kiei lotirakl er a Llach er a Ulekerreuil a Bedenged.” Ak rirelii tial yaksok lobengkel, e ngak a mla oltirakl er ngii el mo melai a rak.
Tial dechal a renguk a meral ngilsukak serak ngeasek lobengterir a resechelik me aikel rak el blek chad er a siobai el mekngit el kar a mla er ngii. Ak rirelli a klou a telbiil er a uchei el mo oltirakl er a llechul a Dios, meng dimlak luut el mo omdasou el kirel. A Rubak a dilu el kmo, “Ngak, el Rubak, a mo omekngeltengat er kau sel omruul aikel kulekoi; eng di alsekum ngdiak moruul aikel kulekoi, eng diak a yaksok el mo er kau.” Ngii ngerang melekoi el mo er tirkel loltirakl er a Llach er a Ulekerreuil a Bedenged? Ng yaksok el merkid el mo mesisiich a bedenged, klisiich, llomeselreng, klemedengei, me a reanghel el mo mengeluolu er kid.
Bebil el rak ra mla memong, ea Sister Rasband me a ngak a mlara Templo er a Salt Lake el kirel a omerenged er a chimo er a ngelekam el redil. Sera kim dechor rikl er a templo lobengkel a kekerei ngelekam redil el ngii dirrekak el sebechel mo er tial seremoni, ea ki milsaod kirel a kmo ng klou a ututelel sel omerenged er a chelsel a templo er a Dios. Di uaise er a delak lulsisechakl er ngak el betok el rak ra uchei, aki mdilung el mo er a rengelekam el redil, “Somam kau a mo merenged er a chelsel a templo, e somam kau a omyaksok er kemam el kmo sel obetik er ngkel diak ulebengelel kldemem, e ko mo rulii a sils lobengkel el mo merenged er a chelsel a templo .” Ng kilngei er kemam.
Ng mla melekoi el kmo sel cheldechedemam me a yaksok er ngii a milngeluolu er ngii e omeklatk er ngii el kmo “ngerang a kmal kot el klou a ututelel.” Uriul er tiang eng rirelii a chedaol telbiil el mlo merenged el mo er a bechil er a chelsel a templo.
A President Nelson a ulsisechakl: “Kid … a menglou a klisichel a Osobel er a chelsel a klengar er kid sel doruul a chedaol telbiil e oltirakl aikal telbiil loba llemalt. A telbiled a omak er kid el mo er Ngii e mo meskid a klisiich.”
Sel doruul a yaksok el mo er a tang me a tang, e kid a bai sebeched urrekodel aikel yaksok el mo er a Rubak. Bo molatk a tekingel a Rubak: “Sel mrirellii el mora ta er tirikel kmal uriul lodam er ngak, cho mrirellii el mer ngak.”
Momdasou lobengkek er a okesiu er a yaksok el ngara chelsel a chedaol llechukl. Ammon me a rengelekel a Mosiah er a chelsel a Babier er a Mormon a tebiil el “mo olisechakl a tekingel a Dios.” Sera Ammon a lemudemch er a re Lamanite, e te ngiluu el mo mesang a Lamoni el King er a re Lamonite. Ngii a mla er ngii er a rengul el mo mesiungel a ngkal king, “Ngak a mesiungem.” Mesei a lemei a remerechorech el mo merechorech a sib el cheremel a king, ea Ammon a tiluk a chimorir. Ng kmal mlo mechas a rengul ngkal king, me ngulerrenges a osisecheklel Ammon el kirel a ebangkelio e mlo obult a rengul.
A Ruth, el ngara chelsel a Chuodel el Testament, a mle yaksok er a delal a bechil, “Sel bor ngii, a kbor ngii.” Ngii a ultirakl a tekingel. Ngkel ungil chad er a Samaria, el sel cheldecheduch el ngara Beches el Renged, a mle yaksok er a oungerachel er a ngiil blai el kmo alsekum eng omekerreu er ngikal telemall el chad, “E a bo le betok ra ikal udoud a mechoit er ngii, e a ltel chomerolek, e ak kokad.” A Zoram, el ngara chelsel a Babier er a Mormon, a mle yaksok el mo er a chereomel lobengkel a Nephi me a rubekul. A Nephi a uluuchais, “Me tia le kengei a Zoram er tial mesisiich el telbiil el kmo ng mo ta er kemam, eng mlo diak ki bekikl er kirel.”
Ngera er a ikel yaksok er a ngara er a mong el taem “el mora rechedam” el mesaod er a chedaol llechukl el kmo “a rengrir a rengalek a kirel el obult el mora demerir”? Chelsel a klengar ruchei er a beluulechad e kede ngileltii a Uldesuel a Dios, e kede rirellii a yaksok el mo olengeseu el mengudel er a Israel er a eru el bitang er a kateng. “Ke de mlo chedal a Rubak,” el Elder John A. Widtsoe a silodii ra mla mo merek el betok el rak. “Sel urerel tial moktek a mlo diak el dil urerel a Chedam, me a urerel a Osobel, ng dirrek el mlo urered.”
“[A] cheldellel a kot el klou a ututelel el mo er ngii er a beluulechad er a chelechang,”A President Nelson a milekoi se ra loldingel a beluu er a beluulechad. “Sel dolekoi el kirel a cheldellel, e kid a melekoi er a beot el klemerang: bek el ngelekel a Chedam er a Babeluades, el ngara bitang ma bitang er a kateng[veil], a kmal kirir el mo rongesii a osisecheklel a mloluut el ebangkelio er a Jesus Kristo.”
Me sel ngak a Apostol er a Rubak Jesus Kristo, eak mo mengesimer loba siotai me a yaksok. Kot, a siotai: Ak siotai er kau el mo omtab a ikel yaksok mea telbiil el mriruul lobengkel a Rubak, me a rebebil, loba klou el klaumerang, el medengei el kmo a tekingem a klemerang. Ongerung, Ak yaksok er kau, sel moruul aikang, ea Rubak mo omekdubech a tekingem e kongei a omerolem sel molasm el blak a rengum el meleketek er a klengar er kau, telungalek er kau, me a Ikelesia er a Jesus Kristo er a Uriul-klebesei el Santo. Ngii a mo obengkem, kemiu rodam me a rodos er ngak, e kau a sebechem, loba klaumerang, el mad el tmuill el “mengai el mora bableuades, ma leuaisei e [kau] a mo kiei lobengkel a Dios er a diak a ulebengelel deureng … le Rubak el Dios a mla dmung.”
Aikang a kuuchais e yaksok loba ngklel a Jesus Kristo, amen.