Pagkaplag og Hingpit nga Kalipay sa Pagpaambit sa Ebanghelyo
Kita adunay mahigugmaon nga Amahan sa Langit, kinsa naghulat kanato nga modangup ngadto Kaniya aron sa pagpanalangin sa atong kinabuhi ug sa kinabuhi niadtong naglibut kanato.
Usa sa akong paborito nga mga kanta sa Primary nagsugod niining mga pulong:
Pagkayano ug pagkanindot nga pamahayag sa mga kamatuoran nga atong gituohan!
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, nasayud kita kon si kinsa kita. Nasayud kita nga ang “Dios mao ang Amahan sa atong mga espiritu. Kita … Iyang mga anak, ug Siya nahigugma kanato. Nagpuyo kita [uban Kaniya sa langit] sa wala pa kita [mianhi] dinhi sa yuta.”
Nasayud kita sa plano sa Dios. Didto kita uban Kaniya samtang mipresentar Siya niini. “Ang tibuok katuyoan sa atong Langitnong Amahan—ang Iyang buhat ug ang Iyang himaya—mao ang paghimo sa kada usa kanato nga makatagamtam sa tanan Niyang mga panalangin. Siya … mihatag og usa ka perpekto nga plano sa paghimo sa Iyang katuyoan. Kita nakasabut ug midawat niining plano … sa kalipay, … katubsanan, ug … kaluwasan” sa wala pa kita mianhi sa yuta.
“Si Jesukristo maoy pinakamahinungdanon sa plano sa Dios. Pinaagi sa Iyang Pag-ula, si Jesukristo mipatuman sa katuyoan sa Iyang Amahan ug mihimo niini nga posible nga ang kada usa kanato makatagamtam og pagka-imortal ug kahimayaan. Si Satanas, o ang yawa, kaaway sa plano sa Dios” ug kana gikan pa sa sinugdanan.
“Ang kabubut-on [agency], o ang abilidad sa pagpili, usa sa pinakamahinungdanon nga mga gasa sa Dios ngadto sa Iyang mga anak. … Kinahanglan kita nga mopili kon mosunod ba kang Jesukristo o mosunod kang Satanas.”
Kini yano nga mga kamatuoran nga atong mapaambit sa uban.
Sultihan ko kamo sa higayon nga mipaambit ang akong inahan sa maong yano nga mga kamatuoran pinaagi lamang sa pagpakigsultihanay ug pag-ila og usa ka oportunidad.
Daghang katuigan na ang milabay, mouliay ang akong inahan ngadto sa Argentina aron mobisita uban sa akong igsoong lalaki. Ang akong mama dili gayud ganahang mosakay og eroplano, busa mihangyo siya sa usa sa akong mga anak nga lalaki nga hatagan siya og panalangin alang sa kahupayan ug proteksyon. Mibati siya nga giaghat nga panalanginan ang iyang lola og espesyal nga giya ug direksyon gikan sa Espiritu Santo aron sa paglig-on ug pagtandog sa mga kasingkasing sa daghan nga matinguhaong makakat-on sa ebanghelyo.
Sa airport sa Salt Lake, ang akong inahan ug igsoong lalaki nakahimamat og 7 anyos nga batang babaye nga mouliay na sa ila gikan sa biyahe sa pag-ski uban sa iyang pamilya. Ang iyang mga ginikanan nakabantay kon unsa kadugay siyang nakig-istorya sa akong mama ug igsoong lalaki ug nakahukom nga moapil nila. Ilang gipaila-ila ang ilang kaugalingon ug ang ilang anak nga babaye nga si Eduardo, Maria Susana, ug Giada Pol. Adunay natural ug mahigalaong koneksyon sa akong pamilya ug niining buotan nga pamilya.
Ang duha ka pamilya mahinamon nga magkadungan og biyahe sa samang flight ngadto sa Buenos Aires, Argentina. Samtang nagpadayon ang ilang panagsultihanany, ang akong inahan nakabantay nga hangtud nianang gutloa, wala pa gayud sila makadungog mahitungod sa gipahiuli nga Simbahan ni Jesukristo.
Usa sa unang mga gipangutana ni Susana mao ang “Pwede ba ko nimong sultihan bahin nianang nindot nga museyo nga dunay bulawang estatuwa sa ibabaw?”
Gipasabut sa akong inahan nga ang nindot nga edipisyo dili museyo apan templo sa Ginoo diin kita mohimo og mga pakigsaad ngadto sa Dios aron makabalik kita sa pagpuyo uban Kaniya sa umaabut nga adlaw. Miangkon si Susana sa akong mama nga sa wala pa ang ilang biyahe ngadto sa Salt Lake, nag-ampo siya alang sa usa ka butang nga makapalig-on sa iyang espiritu.
Atol sa flight, mihatag ang akong mama og yano nga pagpamatuod sa ebanghelyo ug gidapit si Susana sa pagpangita sa mga misyonaryo diha sa lungsod nga iyang gipuy-an. Gipangutana ni Susana ang akong mama, “Unsaon man nako sila pagkakita?”
Mitubag ang akong mama, “Dali ra nimo silang makit-an; duha sila ka mga batan-ong lalaki nga nagsul-ob og puti nga polo ug nagkurbata o duha ka nindot og sinul-oban nga mga batan-ong babaye, ug kanunay silang nagsul-ob og name tag nga nagpakita sa ilang ngalan ug usab ‘Ang Simbahan ni Jesukristo sa mga Santos sa Ulahing mga Adlaw.’”
Nagbinayloay ang mga pamilya og mga numero sa telepono ug nanamilit diha sa airport sa Buenos Aires. Si Susana, kinsa sukad niana nahimo nakong suod nga higala, misulti nako sa daghang higayon nga naguol kaayo siya nga mobiya sa akong mama diha sa airport. Miingon siya, “Ingon sa malipayon kaayo ang imong mama. Dili ko makapasabut niini, apan aduna siyay kasanag nga dili ko gustong mobiya.”
Pagkauli gayud ni Susana sa lungsod nga iyang gipuy-an, siya ug ang iyang anak nga babaye, si Giada, miadto aron mopaambit niining kasinatian ngadto sa mama ni Susana, kinsa nagpuyo pipila lang ka eskina gikan sa ilang panimalay. Samtang nagsakay sila sa sakyanan, nakit-an ni Susana ang duha ka mga batan-ong lalaki nga naglakaw sa dalan nga nagsul-ob sama sa gihulagway sa akong mama. Iyang gipahunong ang iyang sakyanan diha sa tunga sa dalan, migawas, ug nangutana niining duha ka mga batang-ong lalaki, “Gikan ba mo sa Simbahan ni Jesukristo?”
Miingon sila, “Oo.”
“Mga misyonaryo?” nangutana siya.
Mitubag silang duha, “Oo!”
Miingon dayon siya, “Sulod sa akong sakyanan; mokuyog mo nako sa amo aron tudloan ko.”
Duha ka bulan human niana, nabunyagan si Maria Susana. Ang iyang anak nga babaye, si Giada, nabunyagan usab sa dihang nag-9 anyos na siya. Nagtudlo gihapon mi kang Eduardo, kinsa among gimahal bisan unsa pay mahitabo.
Sukad niana, si Susana nahimong usa sa labing bantugan nga mga misyonaryo nga akong nahimamat sukad. Sama siya sa mga anak nga lalaki ni Mosiah, nagdala og daghang kalag ngadto kang Kristo.
Sa usa sa among mga panagsultihanay, gipangutana nako siya, “Unsa man ang imong sekreto? Giunsa man nimo pagpaambit ang ebanghelyo ngadto sa uban?”
Gisultihan ko niya, “Yano ra kaayo. Kada adlaw sa dili pa ko mobiya sa akong balay, mag-ampo ko, mangayo sa Langitnong Amahan nga giyahan ko ngadto sa tawo nga nagkinahanglan sa ebanghelyo sa ilang kinabuhi. Usahay magdala ko og Basahon ni Mormon nga ikapaambit ngadto nila o mga pass-along card gikan sa mga misyonaryo—ug kon magsugod na ko sa pagpakigsulti sa tawo, ako ra silang pangutan-on kon nakadungog na ba sila bahin sa Simbahan.”
Miingon usab si Susana, “Sa ubang higayon igo lang kong mopahiyum samtang naghulat sa tren. Usa ka adlaw dunay lalaki nga mitan-aw nako ug miingon, ‘Unsa may imong gipahiyuman?’ Siya ingon og nakapasurprisa kanako.
“Mitubag ko, ‘Nagpahiyum ko kay malipayon man ko!’
“Dayon miingon siya, ‘Ug unsa may gikalipay nimo?’
“Mitubag ko, ‘Usa ko ka miyembro sa Ang Simbahan ni Jesukristo sa mga Santos sa Ulahing mga Adlaw, ug mao kana ang nakapalipay nako. Nakadungog ka na ba niana?’”
Sa dihang miingon siya nga wala, gihatagan niya siya og pass-along card ug gidapit siya nga motambong sa umaabut nga mga tulumanon sa Dominggo. Pagkasunod Dominggo, iya siyang gitimbaya diha sa may pultahan.
Si Presidente Dallin H. Oaks nagtudlo:
“Adunay tulo ka butang nga mahimo sa tanang miyembro aron makatabang sa pagpakigbahin sa ebanghelyo. …
“Una, tanan kita mahimong mag-ampo alang sa usa ka tinguha aron makatabang niining importanting bahin sa buhat sa kaluwasan. …
“Ikaduha, kita mismo makahimo sa pagtuman sa mga sugo. … Ang matinud-anong mga miyembro makabaton kanunay sa Espiritu sa Manluluwas … nga magauban kanila sa paggiya kanila samtang sila naninguha sa pag-apil sa talagsaong buhat sa pagpakigbahin sa gipahiuli nga ebanghelyo ni Jesukristo.
“Ikatulo, kita mahimong mag-ampo alang sa inspirasyon kon unsay atong mahimo … sa pagpakigbahin sa ebanghelyo ngadto sa uban … [ug] mag-ampo uban ang pasalig nga lihukon ang inspirasyon nga [atong] nadawat.”
Mga igsoong lalaki, mga igsoong babaye, mga bata, ug kabatan-onan, pwede ba kita nga mahisama sa akong higala nga si Susana ug mopaambit sa ebanghelyo ngadto sa uban? Mahimo ba kitang modapit og usa ka higala nga dili miyembro sa atong simbahan nga moadto sa simbahan uban nato sa Dominggo? O mahimo ba kaha kitang mopaambit og kopya sa Basahon ni Mormon sa usa ka paryente o higala? Mahimo ba kitang motabang sa uban sa pagpangita sa ilang mga katigulangan diha sa FamilySearch o mopaambit sa uban sa unsay atong nakat-unan atol sa semana samtang nagtuon kita sa Dali, Sunod Kanako? Mahimo ba kita nga mas mahisama sa atong Manluluwas, nga si Jesukristo, ug mopaambit sa uban sa unsay nakahatag kanato og hingpit nga kalipay sa atong kinabuhi? Ang tubag sa tanan niining mga pangutana mao ang oo! Mahimo nato kini!
Sa mga kasulatan atong mabasa nga ang mga miyembro sa Simbahan ni Jesukristo gipadala ‘sa paghago diha sa iyang ubasan alang sa kaluwasan sa mga kalag sa mga tawo’ (Doktrina ug mga Pakigsaad 138:56). Kini nga buhat sa kaluwasan naglakip sa miyembro nga misyonaryo nga buhat, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug sa pagtudlo sa ebanghelyo.”
Akong minahal nga mga higala, ang Ginoo nagkinahanglan nato sa pagpundok sa Israel. Diha sa Doktrina ug mga Pakigsaad, miingon Siya, “Ni kamo maghunahuna sa wala pa unsa ang inyong isulti; apan mahala sa kanunay diha sa inyong mga hunahuna ang mga pulong sa kinabuhi, ug kini ihatag kaninyo niini nga takna kana nga bahin nga igahin ngadto sa matag tawo.”
Agi og dugang, misaad Siya kanato:
“Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!
“Ug karon, kon ang imong hingpit nga kalipay dako tungod sa usa ka kalag nga imong gidala ngari kanako diha sa gingharian sa akong Amahan, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!”
Ang kanta sa Primary sa akong pagsugod mitapos pinaagi niining tulukibon nga pamahayag:
Mosaksi ko nga kining mga pulong tinuod ug nga kita adunay mahigugmaon nga Amahan sa Langit, kinsa naghulat kanato nga modangup ngadto Kaniya aron sa pagpanalangin sa atong kinabuhi ug sa kinabuhi niadtong naglibut kanato. Nga unta kita adunay tinguha sa pagdala sa atong mga kaigsoonan ngadto kang Kristo mao ang akong pag-ampo sa ngalan ni Jesukristo, amen.