O Le Paia ma le Fuafuaga o le Fiafia
E oo mai le fiafia sili mai le paia faaletagata sili atu.
O’u uso e ma tuafafine pele, sa ou tatalo mo le mana e fesoasoani ia te outou i la outou sailiga patino mo le fiafia. Atonu e lagonaina e nisi le lava o le fiafia, ae e mautinoa lava e leai se tasi e teenaina le ofa o le tele atu o le fiafia. E naunau soo se tasi e taliaina se ofa mautinoa o le fiafia tumau.
O le mea lena ua ofo mai e le Tama Faalelagi, Lona Alo Pele, o Iesu Keriso; ma le Agaga Paia i fanau agaga uma a le Tama Faalelagi o loo soifua nei, o le a soifua mai, ma sa soifua i lenei lalolagi. O lena ofa e ta’ua i nisi taimi o le fuafuaga o le fiafia. Sa ta’ua ai e le perofeta o Alema a o ia aoao atu lona atalii o lē sa oo i le tiga o le pagatia o le agasala. Sa silafia e Alema e le mafai ona avea le amioleaga ma fiafia mo lona atalii—pe mo soo se tasi o fanau a le Tama Faalelagi.1
Sa ia aoao lona atalii o le faateleina o le paia e na o le pau lea o le auala i le fiafia. Sa ia faamanino mai o le paia silisili ua mafaia ona o le Togiola a Iesu Keriso lea ua faamamaina ma faaatoatoaina ai i tatou.2 E na o le faatuatua ia Iesu Keriso, salamo faifai pea, ma le tausiga o feagaiga e mafai ai ona tatou maua le fiafia tumau lea tatou te naunau ia lagonaina ma faatumauina.
O la’u tatalo mo le asō ina ia mafai ona ou fesoasoani ia te outou ia malamalama, e oo mai le fiafia sili mai le paia faaletagata sili atu lea e te faatino ai e tusa ma lena talitonuga. Ona ou faasoa atu lea o mea ua ou iloa mo a’u lava e uiga i mea e mafai ona tatou faia e agavaa ai mo lena meaalofa o le avea ia paia atili.
Ua aoao mai tusitusiga paia ia i tatou e faapea, faatasi ma isi mea, e mafai ona faapaiaina i tatou pe sili atu ona paia pe a tatou faatinoina le faatuatua ia Keriso,3 faaalia lo tatou usiusitai,4 salamo,5 ositaulaga mo Ia,6 mauaina o sauniga paia, ma le tausia o a tatou feagaiga ma Ia.7 O le agavaa mo le meaalofa o le paia e manaomia ai le lotomaualalo,8 agamalu,9 ma le onosai.10
O se tasi o aafiaga o le manao atili ina ia paia na oo mai mo a’u i le Malumalu o Sate Leki. Sa ou ulu atu i le malumalu mo le taimi muamua ae sa itiiti mea sa ta’u mai o mea sa faamoemoeina. Sa ou vaai i upu i luga o le maota: “E Paia i le Alii” ma le “O Le Maota o le Alii.” Sa ou lagonaina se lagona maoae o le naunauta’i. Ae sa ou mafaufau pe ua ou saunia ea e ulufale atu i ai.
Sa savavali atu lo’u tina ma lo’u tama i o’u luma a o matou ulufale atu i le malumalu. Sa talosagaina i matou e faaali atu a matou pepa faataga, e faamaonia ai lo matou agavaa.
Sa iloa e o’u matua le tamā sa i ai i le laulau o pepa faataga. O lea na la tutu ai mo sina taimi e talanoa ma ia. Sa ou alu atu na o a’u i totonu o se nofoaga telē lea sa feilafi papa’e ai mea uma. Sa ou tilotilo a’e i se faaalo matua maualuga lava i o’u luga a’e na foliga mai o se lagi o loo matala. I lena taimi, na oo mai se lagona manino ia te a’u sa ou i ai muamua iina.
Ona ou, faalogoina lea o se siufofoga malũ lava—e lē o lo’u leo. O upu lemu ia na tautalagia: “E te le’i i ai muamua lava iinei. O loo e manatuaina se taimi ae e te le’i fanau. Sa e i ai i se nofoaga paia e pei o lenei nofoaga. Ua e lagonaina o le afio atu le Faaola i totonu o le nofoaga o loo e tu ai. Ma sa e lagonaina le fiafia ona sa e naunau e vaai ia te Ia.”
O lena aafiaga i le Malumalu o Sate Leki sa na o sina taimi lava na tupu ai. Ae o le manatuaina e aumaia ai pea le filemu, olioli, ma le fiafia toafimalie.
Sa ou aoaoina le tele o lesona i lena aso. O se tasi [o na lesona], e fetalai mai le Agaga Paia i se leo itiiti, ma le filemu. E mafai ona ou lagonaina o Ia pe a i ai le filemu faaleagaga i lo’u loto. Na te aumaia se lagona o le fiafia ma le faamautinoaga ua faasolo ina ou paia atili. Ma o lena mea e aumaia pea le fiafia na ou lagonaina i na taimi muamua i totonu o se malumalu o le Atua.
Ua e matauina i lou lava olaga ma i olaga o isi le vavega o le fiafia e sau mai le faatupulaia o le paia, i le avea atili e faapei o le Faaola. I vaiaso talu ai nei, sa ou asiasi ai i tagata mama’i o ē sa ono feagai ma le oti faatasi ai ma se faatuatua atoatoa i le Faaola ma foliga fiafia.
O se tasi [o ia tagata], o se alii na siomia e lona aiga. Sa la talatalanoa lemu ma lona toalua a o ma ulufale atu ma lo’u atalii. Sa ou iloaina i laua mo le tele o tausaga. Sa ou vaaia le Togiola a Iesu Keriso o loo galue i o la olaga ma i olaga o tagata o o laua aiga.
Sa la filifili faatasi e faamuta taumafaiga faafomai e faaumiumi ai lona soifua. Sa i ai se lagona filemu a o ia saunoa mai ia i ma’ua. Sa ia ataata a o ia faailoa mai le lotofaafetai mo le talalelei ma ona aafiaga mamā ia te ia ma le aiga na ia alofa i ai. Sa ia talanoa e uiga i ona tausaga fiafia o auaunaga i totonu o le malumalu. I le talosaga a lenei alii, sa faauu ai e lo’u atalii lona ao i le suauu paia. Sa ou faamauina le faauuga. A o ou faia, sa ou maua se uunaiga manino o le a le pine ae vaai o ia i lona Faaola, faafesagai.
Sa ou folafola atu ia te ia o le a ia lagonaina le fiafia, alofa, ma le faamaoniga a le Faaola. Sa ia ataata ma le alofa a o ma tuua [o ia]. O ana upu mulimuli ia ia te a’u “Ta’u atu ia Kathy ou te alofa ia te ia.” O lo’u toalua, o Kathleen, i le tele o tausaga na uunaia ia augatupulaga o lona aiga e talia le valaaulia a le Faaola e o mai ia te Ia, osia ma tausia feagaiga paia, ma ia agavaa mo le fiafia lea e oo mai o se taunuuga o lena paia sili atu.
Sa maliu o ia i ni itula mulimuli ane. I totonu o ni nai vaiaso talu lona maliu, na aumai ai e lona faletua se meaalofa mo lo’u toalua ma a’u. Sa ataata o ia a o matou talatalanoa. Sa ia fai mai ma le fiafia, “Sa ou faamoemoe o le a ou lagona le faanoanoa ma le tuuatoatasi. Ua ou lagonaina le fiafia tele. E te lua manatu e lelei lena mea?”
O le iloaina o le tele o lona alofa i lana tane ma le auala e iloa ai e i laua uma, alolofa, ma auauna atu i le Alii, sa ou fai atu ai ia te ia, o ona lagona o le fiafia o se meaalofa folafolaina aua sa paia atili o ia, e ala i lana auaunaga faamaoni. O lona paia na agavaa ai o ia mo lena fiafia.
Atonu o nisi o loo faalogologo mai i le asō o loo mafaufau: “Aisea ou te le lagonaina ai le filemu ma le fiafia na folafola mai ia i latou o ē faamaoni? Sa ou faamaoni i faigata matautia, ae ou te lē lagonaina le fiafia.”
E oo lava i le Perofeta o Iosefa Samita na feagai ma lenei tofotofoga. Sa ia tatalo mo le toomaga ina ua taofia o ia i se falepuipui i Liperate i Misuri. Sa ia faamaoni i le Alii. Sa ia tuputupu ae i le paia. Ae sa ia lagonaina le lē mauaina o le fiafia.
Sa aoaoina o ia e le Alii i le lesona o le onosai, lea tatou te manaomia uma i nisi taimi, ma atonu mo ni vaitaimi uumi, i la tatou tofotofoga faaletino. O le savali lenei a le Alii i Lana perofeta faamaoni ma mafatia:
“Ma afai e lafo oe i totonu o le lua, po o lima o e fasioti tagata, ma tuu mai le faaiuga o le oti i ou luga; afai e lafo oe i le loloto; afai e taupulepule galulolo o le sami e faasaga mai ia te oe; afai e avea matagi malolosi ma ou fili; afai e faapotopoto e le lagi le pogisa, ma aufaatasi elemene uma e pupuni le ala; ma i luga o mea uma, afai e tatala faamaga lautele mai e auvae lava o seoli le gutu ia te oe, ia e iloa, loʼu atalii e, o nei mea uma e te maua ai le poto masani, ma o le a avea mo ou lelei.
“Na afio ifo le Atalii o le Tagata i lalo o i latou uma. Ua sili atu ea oe ia te ia?
“O lea, piimau i lou ala, ma o le a tumau le perisitua ia te oe; ona ua faatapulaaina o latou tuaoi, e le mafai ona latou sopo mai. Ua iloa ou aso, ma o ou tausaga o le a lē faitauina itiiti mai; o lea, aua le mataʼu i mea e mafai ona fai e tagata, aua o le a faatasi le Atua ma oe e faavavau ma faavavau lava.”11
O le lesona aoga lava lea e tasi na tuuina atu e le Alii ia Iopu, o lē sa totogiina se tau mamafa ina ia mafai ai e le Togiola ona faia o ia ia paia atili. Ua tatou iloa o Iopu sa paia, mai le folasaga ua tatou maua e uiga ia te ia: “Sa i le nuu o Usa le tasi tagata, o lona igoa o Iopu; na sa’o le amio a lea tagata ma le amiotonu, sa mata’u foi o ia i le Atua, ma ‘alo’alo ese i mea leaga.”12
Ona aveesea lea mai ia Iopu o lona tamaoaiga, lona aiga, e oo lava i lona soifua maloloina. Atonu e te manatuaina sa masalosalo Iopu i lona paia tele, na maua mai e ala i faigata sili atu, na agavaa ai o ia mo le fiafia sili atu. Sa foliga mai ia Iopu o le paia na aumaia ai le faanoanoa.
Ae sa tuuina atu e le Alii ia Iopu le lesona lava lea e tasi o le a’oa’iga lea na Ia tuuina atu ia Iosefa Samita. Na Ia tuu Iopu e vaai i lona tulaga lotonutimomoia i ona mata faaleagaga. Sa Ia fetalai mai:
“Ina fusi ia lou sulugatiti e pei o le tagata malosi; ou te fesili atu foi ia te oe, ina e faailoa mai ia ia te au.
“O i fea sa e i ai ina o ou faavaeina le lalolagi? ina faaali mai ia pe afai ua e iloa mafaufau.
“O ai ea na ia fuafuaina ai, pe afai ua e iloa? o ai foi ua na faataoto i ai le fua?
“Ua tuuina ea ona faavae i luga o le a? o ai ea foi na na tuuina ifo lona maa tulimanu;
“Ina o pepese faatasi fetu o le taeao, ma alalaga fiafia atalii uma o le Atua?”13
Ma, ina ua uma ona salamo Iopu i le valaauina o le Atua e manatu faapito, sa faatagaina Iopu e vaai i ona tofotofoga i se auala maualuga atu ma paia atu. Sa salamo o ia.
“Ona tali atu ai lea o Iopu ia Ieova, ua faapea atu,
“Ua ou iloa e te mafaia mea uma, e le mafai foi ona vaoia se mea e te finagalo i ai.
“O ai ea lenei ua na faapouliuligia lau pule ma le le iloa? aua ua ou tautala atu ma lo’u le mafaufau, o mea ua sili ona faigata ia te au, na ou le iloa lava.
“Ia e faafofoga mai, o a’u ou te tautala atu ai; ou te fesili atu ia te oe, a ia e faailoa mai ia te au.
“Sa ou faalogo ia te oe i le faalogo o o’u taliga; a o lenei, ua vaai atu o’u mata ia te oe.
“O le mea lea ua ou ‘ino’ino ai ia te au, ua ou salamo foi i le efuefu ma le lefulefu.”14
Ina ua uma ona salamo Iopu ma oo ina toe paia atili, sa faamanuiaina o ia e le Aliii i mea e sili atu i lo mea na aveesea mai ia te ia. Ae masalo o le faamanuiaga pito sili mo Iopu o le faateleina lea i le paia e ala i faigata ma le salamo. Na agavaa o ia e maua le fiafia sili atu i aso na totoe e ola ai.
O le paia sili atu o le a le oo mai i le tau na ona ōle atu. O le a oo mai i le faia o mea e manaomia mo le Atua e suia ai i tatou.
Sa tuuina mai e Peresitene Russell M. Nelson le mea e foliga mai ia te au o le fautuaga aupito sili lea o le auala e agai atu ai i le ala o feagaiga i le paia sili atu. Sa tuuina mai e ia le taiala ina ua ia fautua mai:
“O le lagonaina o le mana faamalosiau o le salamo i aso taitasi—o le faia ma le avea ma se tagata lelei teisi atu i aso taitasi.
“A tatou filifili e salamo, ua tatou filifili e sui! Ua tatou faatagaina le Faaola e suia i tatou i o tatou lava ituaiga tagata silisili. Tatou te filifili e tuputupu a’e faaleagaga ma maua le olioli—le olioli o le togiolaina ia te Ia. A tatou filifili e salamo, ua tatou filifili ia avea atili e faapei o Iesu Keriso!”
Sa faaauau pea Peresitene Nelson i le tuuina mai ia i tatou o lenei faamalosiauga i a tatou taumafaiga ina ia paia atu: “E le o faamoemoeina e le Alii se atoatoa mai ai i tatou i lenei taimi. … Ae ua Ia faamoemoeina i tatou ia faateleina lo tatou mamā. O le salamo i aso taitasi o le ala lea i le mamā.”15
Na fesoasoani foi ia te a’u se lauga a Peresitene Dallin H. Oaks i se konafesi na muamua atu, e iloa manino atili ai le ala tatou te tuputupu ae ai i le paia ma le auala e mafai ai ona tatou iloa o loo tatou agai atu i ai. Na ia saunoa mai: “E faapefea ona tatou ausia le faaleagaga? E faapefea ona tatou maua lena vaega o le paia, lea e mafai ona tatou maua ai le mafutaga tumau o le Agaga Paia? E faapefea ona tatou vaai ma iloiloina mea o lenei lalolagi mai se vaaiga o le faavavau?”16
O le tali a Peresitene Oaks e amata i le faatuatua sili atu ia Iesu Keriso o lo tatou Faaola alofa. Lea e taitai atu ai i tatou ia saili le faamagaloga i aso uma ma ia manatua o Ia e ala i le tausia o Ana poloaiga. O lena faatuatua sili atu ia Iesu Keriso e oo mai a o tatou taumamafa fiafia i Lana afioga i aso taitasi.
O le viiga “Faapa’ia Mai Au” ua fautuaina mai ai se auala e tatalo ai mo se fesoasoani ina ia avea atili ma tagata paia. Ua fautua mai ma le atamai e le fatupese, o le paia tatou te sailia o se meaalofa mai se Atua alofa, ua tuuina mai i le aluga o taimi, pe a mavae mea uma e mafai ona tatou faia. Tou te manatua le fuaiupu mulimuli:
Ia ou mamā tele,
Malosi, mālō ai,
Ia ‘ou lē ponā i,
Mea o le ola.
Ia ou agava’a,
Ma ‘ia ‘ou aoga,
Ia ‘ou pa’ia tele—
Pei o le Fa’aola.17
Po o a lava o tatou tulaga faaletagata lava ia, po o fea lava o tatou i ai i luga o le ala o feagaiga i le aiga, tau ina ia tali mai a tatou tatalo mo le paia sili atu. Ou te iloa a o tuuina mai mea tatou te ole atu ai, o le a faateleina lo tatou fiafia. Atonu e telegese mai, ae o le a oo mai lava. Ua ou maua lena faamautinoaga mai se Tama Faalelagi alofa ma Lona Alo Pele, o Iesu Keriso.
Ou te molimau atu o Iosefa Samita o se perofeta a le Atua, o Peresitene Russell M. Nelson o lo tatou perofeta soifua i aso nei. O loo soifua le Atua le Tama ma e alofa ia i tatou. E finagalo o Ia ia tatou o atu i le aiga ia te Ia o ni aiga. Ua valaaulia i tatou e lo tatou Faaola alofa e mulimuli atu ia te Ia i la tatou malaga iina. Ua uma ona La saunia le ala. I le suafa paia o Iesu Keriso, amene.