Meskii a Reng me Lomtebechel a Bedenged
A tara kot el klou a ututelel tekoi el sebeched el subii er tial klengar a mo meketeklii a diak a ulebengelel chedaol teletael e mo olsarech a rengud er a mekngit el blekerdeled.
Rodam me a rodos er ngak, sel mlo merek el klou ongidbel er a Ongeteruich el buil tial mlo merek el rak, e ak lilechesii a cheldechedechak el kirel sel 100 anniversary el kirel a ues er a beluulechad er a redeleb el mlocholt el mo er a President Joseph F. Smith sera October 3, 1918.
Sesei klebesei er ak lolia a cheldechedechak me bol loliuid er ngii, e a betik er a rengulkel keldemek er a, Barbara, mlo lomelemii a klengar er ngii er tial beluulechad e mocha er a beluulechad er a redeleb.
Me sera klebesei el bo lolai a sandei, el mocha buil, me a chelechang mla mo tal rak sera Babara a lebo ledibus, e ak miltik er ngak el kmal mui el mereng a saul el kirel tial chedaol llechukl: Me kom dmak el kiei loubeltik el reng, me ke mo lemangel kirir tirkel mad. A Barbara me a ngak a mle mukngeltengat el “dmak el kiei loubeltik el reng” el mlo melai a okolem me a euid el rak. Eng di ngak a mla subi el kmo ngera belkul sel mo “lemangel” kirir tirkel mad el beitk a rengud er tir. Ak meral betik a renguk er ngii e di melatk er ngii!
Ng locha betok er kid a diak el mui mereng a saul el kirel a rebebil el meruul a reuoll el merkid ra bai remekmo el bo le dibus. Ak mle medengei el kmo a Barbara a mle blechoel mechesang, e ng di dimlak ungil medengei aikel ngerachel blechoel el mla er ngii er a telungalek, Ikelesia, me a bouai. Ng ngerachel er a bek el sils el omelekl el bekord el telael el taem er a chelsel a rak el ngii a uchul me a telungalek er kemam a oureor. Ea chelsel rokir, e ng diak a ngidil chad er a telungalek er kemam el rirngesii el mo klou a ngerel malechub el lolekoi a mekngit el tekoi.
Ng betok el uldasou el ble kulbedebek a mler ngak er tial mlo merek el rak. Ak kulmedasou el kirel a meringel omeruul er a tech el ngii a tilbir el mo chedil er a reteuid el ngalek. Ngii a kmal di mle soal el homemaker, e kmal mle semmong er ngii.
Ak blechoel lou medednger el kmo ng milkerang e oungerachel er a rengelekam me a ngak. Omeruul el kall a kmal mle meringel el ngerachel, e diak dobes el lomasech a bebil er a reuoll el uai a betok el selkelir a telungalek er kemam er a bek el sandei e medengei a sisel a orcherir me a bilir a rengelkam. Aki mo er ngii lolab a bebil er a mondelengam el ngii a mle meklou ututelel merkemam. E leng mle meklou a ututelel merkemam, ngdirrek el mle meklou a ututelel mo er ngii. Ngii a mle, sel tekoi, meringelchad—el bechiil el redil, chedil, sechelil, tonari, e ngelekel a Dios el redil.
Me chelechang e ngii a mla merael, e ng ungil a renguk el ngak a tilbir mo dengchokl e ra bita er ngii sel bek rei er a ikel ulebongel buil er a klengar er ngii, el mo chorkedii a chimal e omes aikel soal el katsudo er a chelitakl—el di omelekl e leng mle Alzheimer uchul meng diak el sebechel lematk el kmo ng mla mes aikang er a uchei er a ieta sils. sel klatk aikel tokubets el taem el kim kaiuereked el chim a kmal, kmal mekreos taem el mer ngak.
Rodam me a rodos, a kulengit melak mochebir a techall el mo omes a mederir a telungalek er kau loba beltikelreng. Rengalek me a roungalek, bo mouchais a beltkil a rengmiu me a omereng el saul el mo er a tang me a tang. El uai ngak, e a rebebil er kmeiu a mo mekiis er a tara klebesei e metik el kmo sel klou a ututelel el temel a cheldecheduch a mla mo diak. Mdak el kiei er a bek el sisl loba reng el mui er a omereng saul, bekedebedebek, omesiou, me a betok el beltikelreng.
Tial mlo merek el rak, e ak meral mle meringel lomedasou el kirel a moktek er uchei el kirel a udesual a Chedam er a Babeluades. Sera lolsisechakl er a ngelekel sechal er a Corianton, e a Alma a ulmekedong er ngii el “klou luldasu el kirel a deuel reng.”
Sel tekoi el di lemuut el mei er a uldesuek sel kumdasou er tial moktek a “lemuut el mo dmak.” Ng moktek, el chedechuul lokiu a betik er a rengud el Chedam er a Babeluades, el chedul sel klou e klebokel el techall el telungalek a lemuut el mo dmak—ra diak a ulebengelel mo kebetech a re bechiil, roungalek me a rengalek, me a re telcheroll er a telcheroll el ngara blil a Dios.
Tial uldasou a olodii a renguk e meskak a kellou el reng el kmo ngak a lemuut el mo obengkel a Barbara. Malta e a bedengel me a uldesuel a mlora ringel er tial ulebengelel a klengar er ngii, e a rengul a mle mesisiich, melemalt, e klikiid. Ngii a kildemklii a rokui tekoi mesel taem, a lemei el ngii a mo dechore er a medal a Dios,” e ng mui er a klaumerang me a budech. Me ngak ke tiang, el chelsel a erul klebesei, e ng mo oketiu a rekik, e ak dirk omedednger el kmo, “Ngak ak keldmokl? Ngak a meruul a rokui el ngak a kirek el remuul me bol sebechek el lemuut el mo orkedii a chimal[a Barbra]?”
Sel kot el beot, e medengelii er a klengar a tiang: Kid rokui a mo mad. Alta kede mad sel dechuodel malechub e kede ngeasek, beot malechub e ng meringel, merau malechub e ng chebuul, ngarngii a betik er a rengud malechub e ng sabisi, ng diak a chad el diak lemad.
Sesei el rak er a memong, e a President Gordon B. Hinckley a mla rengii a le dilii el ngar ngii a belkul el kirel tiang: “Ng ungil kellou el reng, ungil omengelaod el budech el mei el mlara klemedengei el kmo alsekum kede mo ungil bechiil e kiei loba lemalt, , e a deleuill er kid a mo melemolem, el diak el ior er a kodall me a taem el chengelakl.”
Ng meral mle melemalt a chebechielek. E diak a rau el reng el kirel. E ng diak el dil tiang el merekong, el kdmung a President Hinckely . Ng kirek el mo kiei loba llemalt.
Chelechal taem e a “kiei loba llemalt” a sebechel mo rau el reng el teletael, el tokuni alsekum ke blechoel el ngara social media, el ngidil ngor a sebechel louchais a meral klemerang malechub e ng cheleblad el tekoi el kirel a Dios me a moktek er Ngii el mo er a Rengelekel. Omereng el saul, e a rechad er a Ikelesia a oba diak a ulebengelel klemerang el osisechklel a ebangkelio el mo medengei el kmo ke mekerang el kiei me bol sebeched el mo ungil keldmokl sel demad.
Sesei el buil er a uchei rak bechell, e a Apostol demak el rubak ra, Elder Melvin J. Ballard, a milngedecheduch el kmo, mora rebebil er a rechad, a nguu el belkul ng mekerang e ke de kiei el melmalt. A ngklel a “Ringel era Deleb,” e a cheldechedechal a omdalem er sel mekemad el melemolem el ngara delongelel a bedenged er a tech me a diak ulebengelel redeleb.
Ng dilung, “Sel klou el mondai el ngidil sechal malechub e ng redil a mo er ngii … a sel ultok el ngar kau,” e mesaod el kmo a Diablong, “el cherarou er a reng,” a melengel er kid lokiu “laok el reng, medeues, me a ducherreng er a tech.” Ma leuaisei e sel meral el ultok a ngara delongelel a chedaol el teletael me a teletael ra chad er a tech Rodam me a rodos, molatk, ng sebeched el ngmai chedaol ngesou lokiu odbechel Chedaol reng el ngii a “osischeklid a rokui el tekoi.” A ngesou a dirrek el sebechel mei lokiu a klengeltengat er a priesthood.
Me chelechang, a kuker, Ng mekerang tial ultok el ngar dersta er kemiu?
A President David O. McKay a dilung: “A chad a ngara beluulechad a mo skeng el kmo ng mo omdasou a klisichel, uldesuel, rengul, el mo olngeseu er a ongelodel e olsiich er a rengul er a teletael er a tech, malechub e ng rulii a [moktek] er a klengar er ngii el melai a chedaol teletael.”
Tial ultok er a delongelel a bedenged er a tech me a chedaol teletael a diak el beches el tekoi. Sel ulebongel el osisecheklel el mo er a rechedal, e a King Benjamin a ulsisechakl el kmo “klechad er a tech a cheraro el mo er a Dios, e di mla uaisei er a rebetel a Adam el mei, el diak a ulebengelel, ng di merekmo bo loltirakl er a okedongel Edaol Reng, e bol becherei a di klechad e bol santo, lokiu a tngakireng er a Kristo el Rubak.”
A Apostol Paul a ulisechakl “tirkel oltirakl er a di klechad er a klengar er tir a lomesiur a rengrir er a klechad; e tirkel oltirakl er a Reng er a klengar er tir a lomesiur a rengrir a Reng.
“A lomesiur a rengud a di klechad, e ng mekrolid el mor a kodall; e a lomesiur a rengud a Reng, e ng mekrolid el mor a klengar ma budech.”
Meng bleketakl el mer ngak el kmo a tara kot el klou a ututelel tekoi el sebeched el subii er tial klengar a mo meketeklii a diak a ulebengelel chedaol teletael e mo olsarech a rengud er a mekngit el blekerdeled. Tiang a diak el kirel meringel. Leuaisei, reng er kid, el kuk kmal meketeketang er a bedenged er a tech, a kmal mla mo ungil melilt er a llemalt er sel klengar ruchei. A uchei er tial beluulechad a lobeob, e kid a mle kiei er a belurir a redeleb el rengelekel a Chedam me a Chedil er a Babeluades, el tir mle betik a rengrir rekid e melemolm el betik a rengrir rekid er chelechang.
Choi, kid a riruul a telbiil el mo mengodech a klengar er kid er sel uchei el beluulechad. Rokui el chad el tir mle kiei malechub e te mo kiei er tial beluulechad a rirelii a klou a ututelel omelilt el mo kongei er a moktek er a Chedam er a Babeluades el kirel a mo osobeled. Solang e kid a mlei er a beluulechad el mle ungil a rekord er kid er a chedaol teletael me a diak a ulebengelel bekesel ochid.
Momdasou er tial telkib el taem. Tiang a meral kau e ngkel ngii a kirem el blechoel uai ngii; el ngelekel a Dios el sechal malechub eng redil, el ngar ngii a chedaol risem er a diak a ulebengelel me a ngar medam el taem el betok a diak a ulebengelel techall. Kau a—kot, ngarbab el chad, e blechoel—el chedaol el chad. Maleuaisei e sel dolilit el mo rulii a teletael er a klechad el moruchei er a chedaol klechad, e kid a melilt er sel ngii a omtok er sel meral, klemerang, el chedaol teleteled.
Di, ng diak a ker el kmo a tech me a omerolel a beluulechad a omekringel a omelib- el teletael. Mesel kateng er a obes a ngara delongelel a beluulechad er a redeleb me a tial klengar er tial beluulechad, e ng sebeched lobes er sel deluill er kid lobengkel a Dios me a chedaol klechad, e a teletael er a klechad er a tech a bai ngmai ututelel aikel soad er a chelechal taemel mo ngaruchei. Mesuub el mo melilt a teletael er a Chedaol el mo ngaruchei er a teletael er a tech a kot el ngarbab el uchul e tial teletael er a beluulechad a tebedechel sel moktek er a Chedam er a Babeluades. Ng dirrek el uchul e tial moktek a dechor er a mesisiich, el uchetemel a Tngakireng er a Rubak me a Osobel el Jesus Kristo el kirel a kengtid, luldimukl er a mekngit el deruul sel doltirakl er a tech, a sebechel mo diak sel blechoel ouchel a rengud e mo kiei el di oltirakl er a chedaol tekoi. Chelechang e ng taem el kid a omesiul a soal a bedenged el mo oltirakl a chedaol osisecheklel a Kristo. Sei a uchul meng diak el kired el mengeteket er a sils er a ouchel el reng.
Ouchel el reng, seikid, a klou a ututelel donguu er tial ultok el ngarkid. Tial mlo merek el klou el ongdibel, e a President Russell M. Nelson a milekoi kirel tial ultok e ulmeklatk er kid el kmo “sel de tibir el mo ouchel a rengud, e kede tibir el mo mengodech er kid! Kede kongei er a Osobel el mo ngodechid el mo er sel kmal ungil kid. Kede melilt el mo mukeroul er a chedaol tekoi e mo nguu a deureng— sel deureng er a mo suobel lokiu Ngii. Sel dolilt el mo ouchel a rengud, e kid a melilt el mo uaia Jesus Kristo!”
Bek el klebesei e sel kumasech aikel kuruul er sel sils el loba nglunguuch lobengkel a Chedam er a Babeluades, e ak kulengit a klasubes alsekum mla er ngii a chelbirukl el krirelii e yaksok el mo melasm el mo ungil sel bol kukuk. Ak oumerang el kmo tial ouchel reng er a bek el sils a ngosukii a renguk lomeklatk er a bedengek el kmo ngtechang a oungerachel er ngak.
A tara donguu sel techall er a bek el sandei el mo omekbeches a chedaol teleteled sel dolai er a sakrament el mo melatk er a Tngakireng me a beltkil a rengul a Rubak me a Osobel, el Jesus Kristo, el mei er kid.
Rodam me a rodos, ak kulengit er kemiu el mo telkib el soro e molatk el kmo kom ngar ker er a klechad er kemiu e molisiich er a chedaol klechad, sel chedaol klechad er kemiu me sel mei sel sils el dorael mo er a belurir a redeleb e bo dengar deureng lobengterir a rebetik er a rengud—a ngii a kuchais loba ngariou el reng nglungulech el ngara chedaol el ngklel a Jesus Kristo, amen.