Tej Kev Sib Tham Tseem Ceeb
Peb tos tsis tau saib peb cov me nyuam puas lam tau lam hloov siab los ntseeg. Qhov uas lam tau lam hloov siab los ntseeg tsis yog ib txoj ntsiab cai ntawm Yexus Khetos txoj moo zoo.
Nej puas tau xav paub yog vim li cas peb hu lub Koom Haum Me Nyuam Yaus ua lus Askiv hu ua “Primary”? Txawm hais tias lub npe ntawd hais txog tej kev kawm ntawm sab ntsuj plig uas cov me nyuam txais thaum ntxov, rau kuv lo lus ntawd kuj qhia ib qho tseeb muaj hwj chim ntau heev. Rau peb Leej Txiv Saum Ntuj Ceeb Tsheej, cov me nyuam yeej tsis yog qhov thib ob—lawv yeej los yog qhov “thib ib.”1
Vajtswv tso siab rau peb saib lawv rau nqi, hwm lawv, thiab pov hwm lawv ua Vajtswv cov me nyuam. Qhov no txhais tau tias peb yeej tsis ntaus lawv, hais lus phem lus qias rau lawv, los yog luag thuam lawv li cas, txawm tias qee zaum muaj tej kev hais tsis sib haum uas ua rau peb xav ua li ntawd. Peb tsis ua li ntawd peb saib me nyuam rau nqi thiab peb ua txhua yam peb ua tau kom tawm tsam kev ua phem rau me nyuam yaus. Txoj kev saib xyuas lawv yog qhov thib ib rau peb—ib yam li yog rau Vajtswv.2
Muaj ib khub niam txiv hluas zaum ua ke sib tham saib lub hnub mus zoo li cas. Nkawd txawm hnov dab tsi nrov cuag dab tsi poob. Leej niam nug tias, “Yog dab tsi na?”
Ces nkawd txawm hnov lub suab quaj yau yau los ntawm nkawd tus tub plaub xyoos chav pw. Nkawd rawm maj mus tom nws chav. Nkawd tus tub nyob ntawd, pw rau hauv pem teb nyob ntawm nws lub txaj ib sab. Leej niam khawm tus me nyuam tub thiab nug saib tau muaj li cas.
Nws teb tias, “Kuv poob txaj as.”
Leej niam nug tias, “Yog vim li cas koj thiaj poob txaj?”
Nws tshoom xub pwg thiab hais tias, “Kuv tsis paub. Tej zaum kuv tsis nkag rau hauv txaus.”
Twb yog hais txog qhov uas “nkag rau hauv txaus” uas kuv xav hais lus rau nej txog tag kis no. Twb yog peb lub cib fim thiab lub luag hauj lwm kom pab me nyuam yaus “nkag rau hauv“ Yexus Khetos txoj moo zoo txaus. Thiab kuj tsim nyog peb pib sai li sai tau.
Yeej muaj ib lub sij hawm tshwj xeeb hauv ib tug me nyuam twg lub neej thaum Vajtswv pov hwm lawv tawm ntawm Ntxwg Nyoog tej kev haub kev ntxias. Yog ib lub sij hawm thaum lawv tsis muaj txim txhaum.3 Yog ib lub sij hawm dawb ceev rau niam txiv thiab me nyuam. Yuav tsum qhia cov me nyuam, los ntawm yus cov lus thiab yus tus yam ntxwv, ua ntej thiab tom qab uas lawv “muaj hnub nyoog paub tab rau ntawm Vajtswv.”4
Thawj Tswj Hwm Henry B. Eyring qhia tias: “Peb muaj ib lub cib fim loj kawg nkaus nrog rau cov hluas. Lub sij hawm zoo tshaj qhia lawv yog thaum ntxov, thaum cov me nyuam raug tsis tau tej kev haub kev ntxias ntawm tus yeeb ncuab, thiab ua ntej lawv tej kev nyuaj siab yuav ua rau lawv hnov tsis tau cov lus tseeb yam meej meej li.”5 Qhia lawv thaum ntxov yuav pab tau kom lawv paub tias lawv los saum ntuj los, lawv lub ntsiab ua nej yog li cas, thiab saib tej koob hmoov zoo li cas thaum lawv nrog Vajtswv sib khi lus thiab txais tej kab ke rau ntawm txoj kev khi lus.
Peb tos tsis tau saib peb cov me nyuam puas lam tau lam hloov siab los ntseeg. Qhov uas lam tau lam hloov siab los ntseeg tsis yog ib txoj ntsiab cai ntawm Yexus Khetos txoj moo zoo. Kev rais los mus ua zoo li peb tus Cawm Seej yuav tsis lam tau lam muaj. Thaum txhob txwm hlub, qhia, thiab ua tim khawv rau peb cov me nyuam thaum ntxov, lawv yuav pib hnov tau tus Vaj Ntsuj Plig Dawb Huv tshoov lawv lub siab. Tus Vaj Ntsuj Plig Dawb Huv yeej tseem ceeb heev rau peb cov me nyuam zaj lus tim khawv txog thiab kev ntseeg rau ntawm Yexus Khetos; peb xav kom lawv “nco ntsoov txog nws, kom lawv thiaj muaj nws tus Ntsuj Plig nrog lawv.”6
Xav saib tsev neeg tej kev sib tham txog Yexus Khetos txoj moo zoo tseem ceeb npaum li cas, tej kev sib tham tseem ceeb heev, uas caw tau tus Ntsuj Plig los. Thaum peb nrog peb cov me nyuam sib tham li ntawd, peb pab lawv tsim ib lub hauv paus khov kho, “uas yog ib qho chaw ruaj nrees, ib qho chaw cuab zog uas yog neeg cog rau saud lawm yuav vau tsis tau.”7 Thaum peb txhawb ib tug me nyuam lub dag zog, peb txhawb nws tsev neeg lub dag zog.
Tej kev sib tham tseem ceeb no coj tau me nyuam los:
-
To taub txoj lus qhuab qhia ntawm txoj kev hloov siab lees txim.
-
Muaj siab ntseeg rau ntawm Khetos, Vajtswv Leej Tub.
-
Xaiv kom ua kev cai raus dej thiab txais lub txiaj ntsim Vaj Ntsuj Plig Dawb Huv thaum muaj yim xyoo.8
-
Thiab thov Vajtswv thiab “taug kev ncaj rau tus Tswv”.9
Tus Cawm Seej yaum tias, “Yog li ntawd kuv muab lus txib rau nej, kom muab tej yam no qhib lug qhia rau nej cov me nyuam.”10 Nws xav kom peb qhib lug qhia dab tsi rau peb cov me nyuam?
-
Adas txoj Kev Poob
-
Yexus Khetos txoj Kev Theej Txhoj
-
Kev yug dua tshiab11
Txwj Laug D. Todd Christofferson hais tias, “Tus yeeb ncuab yeej zoo siab thaum cov niam tsev txiv tsev tsis qhia lawv cov me nyuam kom lawv muaj kev ntseeg Khetos thiab rov qab yug dua tshiab los ntawm sab ntsuj plig.”12
Qhov fab ntxeev, tus Cawm Seej xav kom peb pab cov me nyuam “tso siab rau tus Ntsuj Plig uas coj [lawv] los mus ua tej yam zoo.”13 Kom ua tau li ntawd, peb pab tau cov me nyuam pom thiab to taub thaum lawv hnov tus Ntsuj Plig thiab kom paub tias tej yam twg ua rau tus Ntsuj Plig khiav. Yog li ntawd lawv kawm hloov siab lees txim thiab rov qab los rau qhov kaj dhau ntawm Yexus Khetos txoj Kev Theej Txhoj. Ua li no pab kom lawv sab ntsuj plig muaj zog tiv tau kom yeej.
Peb muaj kev lom zem tau pab peb cov me nyuam ntxiv dag zog rau lawv sab ntsuj plig txawm tias lawv muaj hnub nyoog li cas los xij. Yeej tsis tas nyuaj los yog siv sij hawm ntev. Tej kev sib tham me me coj tau peb cov me nyuam kom paub saib lawv ntseeg dab tsi, thiab tsis tas li ntawd, qhov tseem ceeb tshaj yog saib, yog vim li cas lawv thiaj ntseeg. Tej kev sib tham me me no, uas tham raws caij thiab thaum lub sij hawm tsim nyog, yuav coj tau cov me nyuam kom to taub zoo dua thiab tau lus teb txog lawv cov lus nug zoo dua. Cia peb tsis txhob cia tej tshuab khoom hluav taws xob ua rau peb qhia thiab mloog peb cov me nyuam tim ntsej tim muag.
Lwm cov kev sib tham tseem ceeb yeej muaj tau dhau ntawm txoj kev xyaum. Cov neeg hauv ib tse neeg ua yeeb yam tau hais txog qhov uas raug ntxias ua dab tsi los yog xaiv qhov tsis zoo. Ua li no yuav pab cov me nyuam npaj rau txoj kev ntxias ntawd thaum muaj tiag hauv lawv lub neej. Piv txwv hais tias, peb ua yeeb yam tau thiab tom qab ntawd sib tham thiab nug cov me nyuam saib lawv yuav ua dab tsi:
-
Yog tias lawv raug ntxias kom ua txhaum Txoj Lus Txawj Ntse.
-
Yog tias lawv pom duab liab qab.
-
Yog tias lawv raug ntxias kom dag, nyiag khoom, los yog khib lav.
-
Yog tias lawv hnov dab tsi los ntawm ib tug phooj ywg los yog ib tug xib hwb tom lub tsev kawm ntawv uas tawm tsam lawv txoj kev ntseeg los yog kev cai coj.
Thaum lawv ua yeeb yam thiab sib tham txog, ces thaum lawv nrog lawv cov phooj ywg koom ua ke thiab muaj kev haub ntxias, lawv thiaj yuav “tuav txoj kev ntseeg thaiv [nej] ib yam li nej tuav daim hlau thaiv hniav ntaj. Yog nej ua li ntawd, nej yuav tua tau tag nrho Dab Ntxwg Nyoog xib xub hluav taws uas nws tua tuaj.”14
Kuv muaj ib tug phooj ywg uas kawm txoj lus qhia no thaum nws muaj 18 xyoo. Nws sau npe koom Teb Chaws Amelikas pab tub rog thaum muaj kev tsov rog ntawm Teb Chaws Amelikas thiab Teb Chaws Nyablaj. Nws raug txib kom mus kawm ua ib tug tub rog. Nws qhia kuv tias tej kev cob qhia ntawd yeej nyuaj kawg nkaus li. Nws piav hais tias nws tus kws qhia yeej nyaum heev thiab siab phem.
Muaj ib hnub thaum nws pab me nyuam tub rog hnav ris tsho tsov rog tag nrho, lawv tab tom taug kev es lub hnub ntaiv ntaiv. Ces tus kws qhia txawm txib kom lawv sawv daws pw rau hauv pem teb thiab tsis txhob nti hlo li. Tus kws qhia ntsia ntsoov saib puas muaj leej twg nti ib nyuag qho li. Nti li cas ces yuav raug txim tom qab ntawd. Pab tub rog ntawd yuav tsum nyiaj kom dhau ob teev tag nrho thaum sov sov heev es lawv tab tom npau taws rau lawv tus thawj coj ntawd thiab tsis nyiam nws.
Ntau lub hlis tom qab ntawd, kuv tus phooj ywg tab tom coj nws ib pab tub rog mus dhau tej hav zoov hauv Nyablaj teb. Zaum no yog qhov tiag tiag, tsis yog xyaum xwb. Txawm muaj leej twg pib tua tua lawv los ntawm tej ntoo ib ncig lawv. Tag nrho pab tub rog ntawd pw rau hauv pem teb.
Tus yeeb ncuab nrhiav pom dab tsi? Leej twg nti. Nti li cas ces lawv yuav tua tuag. Kuv tus phooj ywg ntawd hais tias thaum nws pw ntawd tawm fws lug thiab tsis nti hlo li, tos kom tsaus ntuj, nws pheej xav txog lub sij hawm uas nws kawm ua tub rog. Nws nco tias nws tsis nyiam nws tus kws qhia nyaum nyaum ntawd. Nim no nws ris nws tus kws qhia ntawd txiaj heev—vim tej yam nws qhia tau npaj peb tus phooj ywg rau lub sij hawm muaj xwm txheej no. Tus kws qhia tau ua tib zoo qhia peb tus phooj ywg thiab nws pab tub rog kom paub saib lawv yuav tsum ua li cas thaum muaj xwm txheej tsov rog li ntawd. Tiag tiag, tus kws qhia tau cawm peb tus phooj ywg txoj sia.
Peb yuav ua li cas ua ib yam rau peb cov me nyuam sab ntsuj plig? Ua ntej lawv nkag rau hauv tshav rog ntawm lub neej no, peb yuav ua li cas qhia lawv, ntxiv dag zog rau lawv, thiab npaj lawv kom zoo?15 Peb yuav ua li cas caw lawv kom “nkag rau hauv txaus?” Puas yog peb xum cia lawv “tawm fws lug” hauv qhov chaw kawm yam nyab xeeb li hauv lub tsev, tsis xum lawv los ntshav rau ntawm tej tshav rog ntawm lub neej no?
Thaum kuv xav mus xav los, yeej muaj tej lub sij hawm thaum kuv tus txiv thiab kuv zoo li tus kws qhia tub rog ntawd vim peb xav xav kom peb cov me nyuam ua raws li Yexus Khetos txoj moo zoo. Tus yaj saub Yakhauj hais txog tej kev xav no thaum nws hais tias: “Kuv xav kom nej tej ntsuj plig tau nyob zoo. Muaj tseeb tiag, kuv txhawj txog nej heev; thiab nej yeej paub hais tias kuv yeej ib txwm txhawj txog nej.”16
Thaum cov me nyuam kawm thiab loj hlob tuaj, yuav muaj neeg tawm tsam lawv tej kev ntseeg. Tiam sis yog tias lawv npaj lawm, lawv yuav loj hlob tuaj muaj siab ntseeg, siab tuab, thiab siab loj, txawm tias muaj kev tawm tsam loj heev.
Amas qhia peb kom “npaj [cov me nyuam] tej kev xav.”17 Peb tab tom npaj tiam me nyuam no loj hlob tuaj ua cov uas tiv thaiv txoj kev ntseeg nyob rau yav tom ntej, kom to taub hais tais “[lawv] muaj kev ywj pheej xaiv ua rau [lawv] tus kheej—xaiv txoj kev tuag uas kav mus ib txhis los sis xaiv txoj sia nyob mus ib txhis.”18 Tsim nyog cov me nyuam to taub qhov tseeb no hais tias: lub neej nyob mus ib txhis yog ib yam uas yus tsis xav yuam kev ncav tsis cuag.
Thov kom peb tej kev sib tham tseem ceeb nrog peb cov me nyuam pab lawv “muaj kev xyiv fab rau tej lus ntawm txoj sia nyob mus ib txhis” tam sim no, xwv kom lawv yuav muaj kev xyiv fab txais “txoj sia nyob mus ib txhis nyob hauv sim neej yuav los, uas yog lub yeeb koob tsis txawj tuag.”19
Thaum peb yug thiab npaj peb cov me nyuam, peb cia lawv muaj kev ywj siab xaiv, peb hlub lawv kawg siab kawg ntsws, peb qhia Vajtswv cov lus txib rau lawv thiab Nws lub txiaj ntsim ntawm kev hloov siab lees txim, thiab peb yeej tsis, yeej tsis, tso tseg kav liam lawv. Thaum kawg, tus Tswv coj li ntawd rau peb thiab, puas yog?
Cia peb “txiv mus lawm tom hauv ntej nrog txoj kev ntseeg Khetos khov kho,” paub tias peb yuav muaj “ib txoj kev cia siab uas ci kawg nkaus”20 dhau ntawm peb tus Cawm Seej.
Kuv ua tim khawv hais tias nws yeej yog lo lus teb. Los ntawm Yexus Khetos lub npe dawb ceev, amees.