Kuo Tāpuekina ʻe he Ngāue Fakafaifekaú ʻEku Moʻuí ʻo Taʻengata
ʻOku ou lotua kimoutolu kau talavou mo e kau finemui mo hoʻomou mātuʻá ke mou sio mo ʻiloʻi e founga ʻe tāpuekina ai ʻe he ngāue fakafaifekaú hoʻomou moʻuí ʻo taʻengata.
Fakamālō atu, Palesiteni Nalesoni, ki hono toe vahevahe mai e faleʻi fekauʻaki mo e ngāue fakafaifekaú.
Kāinga, lolotonga haʻaku lea ʻi he konifelenisi lahí he ngaahi taʻu lahi kuohilí, ne fakaʻohovale e kamata ke nenefu ʻeku sió he foʻi mata toʻohemá ʻa ia ko ha faʻahinga mahaki ʻo e matá, ʻe fakaʻau ke kovi ange ʻo aʻu ki he ʻikai ke toe lava ʻo sio ʻaki e foʻi mata ko iá.
ʻI heʻeku fetakai mo e faingataʻa ko iá, ʻoku ou fakamālō lahi ki he ngaahi visione kehe, ʻo kau fai ha fakakaukau foʻou ki he ngaahi meʻa he kuohilí. ʻI heʻeku vakai ki hoku kuohilí, ʻoku ou lava ke sio ki ha ngaahi aʻusia pau ne hoko ai ha meʻa makehe matuʻaki mahuʻinga. Ko e taha ʻo e ngaahi aʻusia ko iá ko e hanga heʻeku ngāue fakafaifekau taimi kakato ʻi ʻIngilaní, ʻi heʻeku kei talavoú, ʻo tāpuekina ʻeku moʻuí mo tākiekina hoku ikuʻanga fakalaumālié.
ʻOku ou fakakaukau ki he hanga ʻe he ngaahi faingataʻa fakapaʻanga ʻo e Tō Lalo Lahi Fakaʻekonōmika ʻo e 1930 ʻo liliu e tūkunga hoku fāmilí ki ha tuʻunga fakaʻofa. Naʻe fuʻu tokanga ʻeku tamaí ke fakahaofi ʻene pisinisi meʻalelé mo tokoniʻi e fāmilí he taimi faingataʻa ko ʻení ʻo aʻu ki ha tuʻunga ne ʻikai lava ai ʻeku ongomātuʻá ʻo ʻalu ki he lotú.
Neongo ne ʻikai ke mau faʻa maʻulotu fakafāmili, ka naʻá ku faʻa lava ʻo ʻalu mo hoku ngaahi kāungameʻá ki he lotú he taimi ʻe niʻihi.
ʻI he ngaahi ʻaho ko iá, naʻá ku loto pē ke u ʻalu ʻo ngāue fakafaifekau, ka naʻe ʻikai fai hano talanoaʻi mo ʻeku ongomātuʻá.
Ne u loto mo haku ngaahi kaungāmeʻa tokolahi lolotonga ʻemau ako he ʻunivēsití ke mau ʻalu ʻo ngāue fakafaifekau. Ne u ʻalu ki heʻeku pīsopé ʻo fakafonu ʻeku foomu ngāue fakafaifekaú, lolotonga ia ʻoku mavahe ʻeku ongomātuʻá mei homau koló. ʻI he foki mai ʻeku ongomātuʻá, ne u fakaʻohovaleʻi kinaua ʻaki e ongoongo kuo ui au ke u ngāue ki Pilitānia. ʻOku ou houngaʻia ʻi heʻena poupou lelei ki he fili ko ʻení, mo ha ngaahi kaungāmeʻa lelei ne nau tokoniʻi au ke u ʻalu ʻo ngāue fakafaifekaú.
Ne teuteuʻi au heʻeku ngāue fakafaifekaú ke u hoko ko ha husepāniti, tamai, mo ha tangata pisinisi lavameʻa mo lelei ange. Naʻá ne toe teuteuʻi au ke u tokoni ki he ʻEikí mo Hono Siasí ʻi he toenga ʻo ʻeku moʻuí.
Ne vahe mai ʻi he konifelenisi lahi ʻo ʻEpeleli 1985 ke u lea he fakataha ʻo e lakanga fakataulaʻeikí. Ne fakatefito ʻeku leá ki he kau talavoú. Ne u lea ʻo kau ki he teuteu ke ʻalu ʻo ngāue fakafaifekaú. Ne u pehē ange, “ʻI he ngaahi ako kotoa ne u maʻu ʻi hoku ngaahi fatongia he Siasí, ne fuʻu mahuʻinga e ako ne fai mai kiate au ko ha faifekau kei talavou taʻu hongofulu mā hiva ʻoku ngāue fakafaifekau taimi kakato.”1
ʻOku ʻafioʻi koe ʻe he ʻEikí. ʻI hoʻo ngāue fakafaifekaú, te ke aʻusia ha ngaahi meʻa te ne tokoniʻi koe ke ke ʻiloʻi lelei ange Ia. Te ke tupulaki fakalaumālie ʻi hoʻo tauhi kiate Iá. ʻE fekauʻi atu koe ʻi Hono huafá ke fai ha ngāue ke tokoniʻi ai e niʻihi kehé. Te Ne foaki atu haʻo ngaahi aʻusia ʻaki ha ngaahi ueʻi mei he Laumālie Māʻoniʻoní. ʻE fakamafaiʻi koe ʻe he ʻEikí ke ke faiako ʻi Hono huafá. Te ke lava ʻo fakahā kiate Ia te Ne lava ʻo falala kakato atu kiate koe.
ʻI he māhina ʻe nima kuo hilí, ne u kau fakataha mo ʻEletā Sefilī R. Hōlani mo ʻEletā Kuenitini L. Kuki, naʻá na fakatou ngāue fakafaifekau ʻi he ʻOtu Motu ʻo Pilitāniá, ke mau ʻaʻahi ki he kāingalotu mo e kau faifekau ʻo e fonua fakaʻofoʻofa ko iá. ʻI heʻeku ʻi aí, ne u nofo ʻo fakakaukau ki heʻeku ngaahi aʻusia ko ha faifekau kei talavoú. ʻOku ou fakamoʻoni ne u ʻilo ʻi heʻeku ngāue fakafaifekaú ʻoku ʻafioʻi mo ʻofaʻi au heʻeku Tamai Hēvaní mo hoku Fakamoʻui ko Sīsū Kalaisí.
Ne tāpuekina ʻaki au ha ongo palesiteni misiona fakaʻofoʻofa, ko Selivoi J. Poea mo Siteina Lisiate, fakataha mo hona ongo hoa faivelengá ko Kelētisi Poea mo Seini Lisiate. ʻOku lava ke mahino lelei ange kiate au he taimí ni, naʻá na falala mo ʻofa ʻiate au. Naʻá na akoʻi kiate au ʻa e ongoongoleleí. Naʻá na ʻamanaki mai ki ha meʻa lahi meiate au. Naʻá na tuku mai kiate au ha ngaahi fatongia faingataʻa mo ha ngaahi faingamālie fakatakimuʻa ke tokoniʻi au ke u tupulaki mo teuteu ki he ngāue he toenga ʻeku moʻuí.
Ne u toe fakakaukau ki hono ui au ʻe Palesiteni Sipenisā W. Kimipolo ke tokangaʻi e Misiona Kānata Tolonitoó mo hoku hoa ʻofaʻanga ko Pāpulā fakataha mo ʻema fānaú. Naʻe ui au ʻe Palesiteni Kimipolo ki he fatongiá ni ʻi ʻEpeleli 1974, hili ia ha kiʻi taimi nounou mei heʻene pōpoaki fakalaumālie ki he kau faifekaú ne ʻiloa ko e “ʻI he Taimi ʻe Fakaului ai e Māmaní.”2 Ne fakamatalaʻi ʻe Palesiteni Kimipolo ʻi heʻene pōpoaki ko iá e founga ʻe ʻave ai e ongoongoleleí ki he māmaní hono kotoa. Naʻá ne ui mai ki ha kau faifekau tokolahi ange mei he funga ʻo e māmaní. Naʻá ne fakamanatu mai kiate kitautolu e finangalo ʻo e ʻEikí “ko e tangata kotoa pē ke … hiki hake ha leʻo fakatokanga ki he kakai ʻo e māmaní.”3 Ne hoko e akonaki ʻa Palesiteni Kimipolo ki hono fie maʻu e kau talavoú ke ʻalu ʻo ngāue fakafaifekaú, ko ha kaveinga ia ke kamata talanoaʻi ʻe he ngaahi fāmilí he māmaní. Kuo teʻeki ai ke liliu e fie maʻu ia ko iá. ʻOku ou fakamālō ʻi hono toe fakamamafaʻi mai ʻe Palesiteni Nalesoni e fie maʻu ko ia ʻa e ʻEikí ʻi he pongipongi ní.
Kuo meimei taʻu ʻeni ʻe 10 mei hono fakahā ʻe Palesiteni Tōmasi S. Monisoni hono tukuhifo e taʻu motuʻa ʻo e ngāue fakafaifekaú maʻá e kau talavoú mo e kau finemuí.4 Te u pehē, ko e taumuʻa tefito ki he liliu ko ʻení, ke maʻu ʻe hotau toʻu tupú ha faingamālie lahi ange ki hano liliu ʻenau moʻuí ʻi haʻanau ʻalu ʻo ngāue fakafaifekau.
ʻI heʻeku hoko ko ha ʻAposetolo ʻa e ʻEiki ko Sīsū Kalaisí, ʻoku ou ui atu ai he taimí ni ki he kau talavoú—mo e kau finemui ʻoku mou loto ke ʻalu ʻo ngāue fakafaifekaú—ke mou kamata talanoa leva he taimí ni mo hoʻomou mātuʻá ki he ngāue fakafaifekaú. ʻOku ou toe fakaafeʻi atu ke ke talanoa mo ho kaungāmeʻá kau ki he ʻalu ʻo ngāue fakafaifekaú, pea kapau ʻoku kei veiveiua ha taha ho ngaahi kaungāmeʻá ki he ngāue fakafaifekaú, fakalotolahiʻi ke nau ʻalu ʻo talanoa mo ʻenau pīsopé.
Fakapapauʻi kiate koe mo e Tamai Hēvaní te ke ʻalu ʻo ngāue fakafaifekau pea mei he taimí ni ʻo faai atu, te ke feinga ke maʻa mo taau hoʻo fakaʻamú, tōʻonga moʻuí, mo e fakakaukaú. ʻOku ou fakaafeʻi atu ke ke maʻu ha fakamoʻoni mālohi ki he ongoongolelei ʻo Sīsū Kalaisi kuo fakafoki maí.
Ngaahi tamai mo e faʻē ʻa e toʻu tupu lelei ko ʻení, ʻoku ʻi ai homou fatongia mahuʻinga ʻi he teuteu ko ʻení. Kamata talanoa he ʻahó ni mo hoʻo fānaú ki he ngāue fakafaifekaú. ʻOku tau ʻiloʻi ko e fāmilí ʻa e ivi tākiekina mālohi taha ki hono tokoniʻi ʻetau kau talavoú mo e kau finemuí ke nau teuteú.
Kapau ʻokú ke ʻi he taʻu motuʻa ki he ngāue fakafaifekaú ka kuo teʻeki ai ke ke ngāue koeʻuhi ko e mahaki fakaʻauhá pe ngaahi ʻuhinga kehe, ʻoku ou fakaafeʻi koe ke ke ngāue he taimí ni. Talanoa ki hoʻo pīsopé, pea teuteu ke ngāue maʻá e ʻEikí.
ʻOku ou poupouʻi kimoutolu kau pīsope ke tokoniʻi e kau talavoú mo e kau finemui kotoa pē ʻoku ofi ki he taʻu ngāue fakafaifekaú ke nau teuteu ke ngāue, pea ʻoku ou toe poupouʻi atu kimoutolu kau pīsope ke ʻiloʻi kinautolu kuo taʻu motuʻa feʻunga ka naʻe teʻeki ai ke ngāue fakafaifekaú. Fakaafeʻi e talavou kotoa ke hoko ko ha faifekau, pea pehē foki ki he kau finemui kotoa pē ʻoku loto ke ngāué.
ʻOku mau fakamālō atu ki he kau faifekau ʻoku lolotonga ngāue he taimi ní. ʻOku mou lolotonga ngāue he taimi ʻo e mahaki fakaʻauha fakamāmanilahí. Pea ko ai ai, ko hoʻo aʻusia he ngāue fakafaifekaú ʻoku ʻikai tatau ia mo ʻeku aʻusiá he taimi ne u ngāue aí pe ko ha aʻusia ʻa ha faʻahinga faifekau pē ne ngāue kimuʻa ʻi he 2020. ʻOku ou ʻiloʻi ʻoku ʻikai ke faingofua. Ka neongo e ngaahi taimi faingataʻá ni, ne ʻi ai ha ngāue ʻa e ʻEikí ke ke fai, pea kuó ke fakahoko lelei ʻaupito ia. Hangē ko ʻení, kuó ke fakaʻaongaʻi e tekinolosiá ʻi ha ngahi founga foʻou ke kumi ʻa kinautolu kuo mateuteu ke ako ʻo kau ki Ongoongolelei ʻo Sīsū Kalaisi kuo fakafoki maí. ʻOku ou ʻiloʻi ʻoku hoifua mai e ʻEikí ʻi hoʻo ngāue faivelenga ʻo fakatatau ki he meʻa ʻokú ke malavá. ʻOku ou ʻiloʻi ʻe tāpuekina koe ʻe hoʻo ngāué.
ʻI hono tukuange koe mei hoʻo ngāue fakafaifekaú, manatuʻi ke kei hokohoko atu pē hoʻo mālohi ʻi he Siasí. Fakatupulaki e ngaahi tōʻonga lelei naʻá ke ako ʻi hoʻo ngāue fakafaifekaú, hokohoko atu hono fakamālohia hoʻo fakamoʻoní, ngāue mālohi, lotu, pea talangofua ki he ʻEikí. Tauhi e ngaahi fuakava kuó ke faí. Hokohoko atu hono tāpuekina mo tokoniʻi e niʻihi kehé.
ʻOku ou lotua kimoutolu kau talavou mo e kau finemui mo hoʻomou mātuʻá ke mou sio mo ʻiloʻi e founga ʻe tāpuekina ai ʻe he ngāue fakafaifekaú hoʻomou moʻuí, ʻo taʻengata. Fakatauange ke mou ʻiloʻi ʻi homou ʻatamaí mo ongoʻi ʻi homou lotó e mālohi ʻo e fakaafe naʻe fai ʻe he ʻEikí ki he kau faifekau maʻongoʻonga ko e ngaahi foha ʻo Mōsaiá. Naʻá Ne folofola ange ʻo pehē, “ʻAlu atu … ʻo malanga ʻaki ʻeku leá; ka ke mou faʻa kātaki ʻi he kātaki fuoloa mo e ngaahi mamahi, koeʻuhi ke mou fakahā atu ha ngaahi sīpinga lelei … ʻiate au, pea te u ngaohi ʻa kimoutolu ko ha meʻangāue ʻi hoku nimá ʻa ia ʻe fakamoʻui ai ha kakai tokolahi.”5
ʻOfa ke tāpuekina ʻe he ʻOtuá e toʻu tupu ʻo e Siasí ke nau fakaʻamu ke teuteu mo tauhi kiate Ia pea ko ʻeku lotú ia ʻi he loto fakatōkilalo, ʻa ia ʻoku ou fakahoko atu ʻi he pongipongi ní, ʻi he huafa toputapu ʻo e ʻEiki ko Sīsū Kalaisí, ʻēmeni.