Pōpoaki Fakafeʻiloakí
ʻOku tau fakaʻapaʻapaʻi ʻa e ngaahi ʻofefine ʻo e ʻOtuá ʻi he fakatahaʻanga makehe ko ʻení ʻaki ʻetau fakatefito ʻi he ngaahi meʻa ʻoku nau tokanga ki aí pea mo ia ʻi heʻenau houalotú.
Siʻoku ngaahi tuofāfine, ʻi heʻetau kamata ʻa e fakatahaʻanga makehe ko ʻeni ʻo e konifelenisi lahí maʻá e houʻeiki fafiné, ʻoku ou fiefia ke fakahoko ʻa e pōpoaki fakafeʻiloaki ko ʻení mei he Kau Palesitenisī ʻUluakí.
ʻOku maʻu ʻe heʻetau ngaahi fakatahaʻanga ʻo e Tokonakí ha hisitōlia ʻo ha ngaahi taumuʻa kehekehe mo ha ngaahi haʻofanga kehekehe. ʻI he efiafí ni, ʻoku tau tānaki atu ki he hisitōlia ko iá ʻi heʻetau kamataʻi ha taumuʻa mo ha founga foʻou ki he kahaʻu ka hoko maí. ʻOku ʻikai feliliuaki ʻa e ongoongolelei ʻo Sīsū Kalaisí. ʻOku ʻikai liliu ʻa e tokāteline ʻo e ongoongoleleí. ʻOku ʻikai liliu ʻetau ngaahi fuakava fakatāutahá. Ka ʻi he fakalau ʻa e taʻú, ʻoku liliu ʻa e ngaahi fakatahaʻanga ʻoku tau fakahoko ke fakaaʻu ai ʻetau ngaahi pōpoakí pea hangehangē ka hokohoko atu ke feliliuaki ʻi he ngaahi taʻu ka hoko maí.
ʻI he taimi ní, ko e fakatahaʻanga efiafi Tokonaki ko ʻení ko ha fakatahaʻanga ia ʻo e konifelenisi lahí, ʻoku ʻikai ko ha fakatahaʻanga ʻo ha faʻahinga houalotu. Hangē ko e kotoa ʻo e ngaahi fakatahaʻanga ʻo e konifelenisi lahí, ʻoku fakahoko ʻe he Kau Palesitenisī ʻUluakí ʻa hono palani mo filifili ʻo e kau leá mo e mūsiká.
Kuo mau kole kia Palesiteni Sini B. Pingihemi, Palesiteni Lahi ʻo e Fineʻofá, ke ne tataki ʻa e fakatahaʻangá ni. ʻE lava ke tataki ʻa e ngaahi fakataha ʻo e efiafi Tokonakí ʻi he kahaʻú ʻe ha taha ʻo ʻetau kau ʻŌfisa Māʻolunga kehe ʻi he Siasí, hangē ko e kau mēmipa ʻo e kau Palesitenisī ʻo e Fineʻofá, Finemuí mo e Palaimelí, ʻi hano fili ʻe he Kau Palesitenisī ʻUluakí.
ʻI he fakataha ʻo e efiafi Tokonaki ko ʻeni ʻo e konifelenisi lahí, ʻe fakatefito ia ʻi he ngaahi meʻa ʻoku tokanga ki ai ʻa e houʻeiki fafine ʻo e Siasí. ʻE kau heni ʻa e tokāteline ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ko e ngaahi tuʻutuʻuni ʻo e Siasí ʻoku tautefito ʻene fekauʻakí mo e houʻeiki fafiné, pea mo e ngaahi fatongia mo e ngāue fakalūkufua ʻo e ngaahi houalotu ʻoku kau ki ai ʻa e houʻeiki fafine mo e fānau fefine ʻo e Siasí. Neongo ʻoku fakamafola atu ʻa e fakatahá ni ki ha haʻofanga fakaemāmani lahi ʻo hangē ko e ngaahi fakatahaʻanga kotoa ʻo e konifelenisi lahí, ka ko e haʻofanga ʻoku fakaafeʻi atu ki he Senitā Konifelenisí ki he fakatahaʻanga ko ʻení ko e houʻeiki fafiné mo e fānau fefine taʻu 12 ki ʻolungá. Kuo mau fakakau mai ha niʻihi ʻo e kau taki lakanga fakataulaʻeiki ʻoku nau tokangaʻi ʻa e ngaahi houalotu ʻoku kau maí.
Ko e meʻa ʻoku tau kamataʻi ko ʻení ʻoku fekauʻaki ia mo e ngaahi maʻuʻanga tokoni fakafetuʻutaki ʻoku lolotonga ʻatā ki he tuʻunga fakatakimuʻa mo e mēmipasipi ʻi he Siasi fakaemāmani lahi ʻo e ʻEikí. Ko e tokāteline ʻo e ongoongolelei ʻo Sīsū Kalaisí ʻoku maʻá e tokotaha kotoa pē ia, pea ko ʻetau tefitoʻi taumuʻá ia mo e ʻuhinga hono fakamafolá. ʻOku tau fakaʻapaʻapaʻi ʻa e ngaahi ʻofefine ʻo e ʻOtuá ʻi he fakatahaʻanga makehe ko ʻení ʻaki ʻetau fakatefito ʻi he ngaahi meʻa ʻoku nau tokanga ki aí pea mo ia ʻi heʻenau houalotú.
ʻOku mau houngaʻia kuo fakafaingamālieʻi ʻeni ʻe he tekinolosia fakamafolá ʻa e kau taki ʻo e Siasí ke nau lava ʻo fakahoko ha ngaahi ako fakaikiiki ʻaki ʻenau akoʻi ha ngaahi haʻofanga pau ʻoku kau mai mei he ngaahi feituʻu mamaʻó. ʻOku mau fiefia foki ʻi he fakaʻau ke lahi ange ʻa e ngaahi faingamālie ki he fefolauʻakí. ʻOku mau lava ai ʻo tuku atu ha kau taki ʻo e Siasí ke fakahoko ha ngaahi ako fakatakimuʻa mata-ki-he-mata ʻoku fie maʻu ke fakahoko ʻi he ngaahi feituʻu mamaʻó.
Ko e ngāue ʻeni ʻa e ʻEiki ko Sīsū Kalaisí. Ko ʻEne kau tamaioʻeiki kitautolu, ʻoku tataki ʻe Hono Laumālie Māʻoniʻoní. ʻOku mau kolea ʻa e ngaahi tāpuaki ʻa hotau ʻEikí ki he kau taki ʻo e ngaahi houalotu ko ʻení pea ki he kau fafine mo e fānau fefine faivelenga ʻoku ngāue maʻá e ʻEikí ʻi he ngaahi houalotu ko ʻení pea ʻi heʻenau ngaahi moʻui fakafoʻituituí. ʻI he huafa ʻo Sīsū Kalaisí, ʻēmeni.