Tatalo, O Loo I Ai o Ia Iina

Saunia e Peresitene Susan H. Porter

Peresitene Aoao o le Peraimeri

Ou te valaaulia outou ia tatalo ia iloa o loo i ai le Tama Faalelagi iina, tatalo ia tuputupu a’e e avea e faapei o Ia, ma tatalo ia faaalia Lona alofa i isi.

Uso e ma tuagane, ou te lagona le olioli a o ou tali atu i se uunaiga e lauga atu i tamaiti!

Teineiti ma tama, po o fea lava o tou i ai i le lalolagi, ou te fia faasoa atu se mea ia te outou.

E alofa lo tatou Tama Faalelagi ia te outou! O oe o Lona atalii po o le afafine. Na te silafia outou. E finagalo o Ia e faamanuia outou. Ou te tatalo ma lo’u loto atoa ina ia outou lagonaina Lona alofa.

Tou te fia mananao e maua ni meaalofa? Ou te fia talanoa atu ia te outou e uiga i se meaalofa faapitoa ua tuuina mai e le Tama Faalelagi ia te outou e fesoasoani ia te outou. O le meaalofa o le tatalo. Oka o se faamanuiaga lava le tatalo! E mafai ona tatou talanoa i le Tama Faalelagi i soo se taimi, ma i soo se mea.

Ata

Iesu ma tamaiti.

Ao i ai Iesu i le lalolagi, sa Ia aoao i tatou e tatalo. Na fetalai o Ia, “Ole mai, ma o le a outou maua ai.”¹

O a ni meaalofa e mafai ona e tatalo ai? E tele, ae o le asō ou te fia faasoa atu le tolu:

Tatalo ia iloa.
Tatalo ia tuputupu ae.
Tatalo ia faaalia.

Sei o tatou talanoa e uiga i mea taitasi.

Muamua, Tatalo ia Iloa

O le a se mea e tatau ona e iloa?

O loo i ai se pese e uiga i le tatalo e usuina e tamaiti Peraimeri i le lalolagi atoa. E amata i se fesili. E te iloa po o le a le pese? Ana faapea ou te matua toa lava, ou te usuina mo outou!

“Le Tama e, o e i ai iina? Pe o lagona mai tatalo uma?”²

E mafai faapefea ona e iloa o loo i ai moni lava le Tama Faalelagi iina, e tusa lava pe le mafai ona e vaai ia te Ia?

Ua valaaulia outou e Peresitene Russell M. Nelson ia “liligi atu lou loto i lou Tama Faalelagi. … Ona faalogo lea!”³ Faalogo i mea e te lagonaina i lou loto ma mafaufauga e oo mai i lou mafaufau.⁴

E i ai se tino faamamaluina o le Tama Faalelagi o aano ma ivi ma o le Tama o lou agaga. Talu ai ua i ai i le Tama Faalelagi le mana uma ma ua silafia mea uma, e mafai ona Ia silafia Ana fanau uma⁵ ma e mafai ona faafofoga ma tali mai i tatalo uma. E mafai ona e iloa mo oe lava o loo i ai o Ia iina ma e alofa o Ia ia te oe.

A e iloa e moni le Tama Faalelagi ma e alofa o Ia ia te oe, e mafai ona e ola ma le lototele ma le faamoemoe! “Ole Ia te Ia; Na te faafofoga oe.”⁶

Pe sa e lagonaina ea lou tuua toatasi? I se tasi aso ina ua ono tausaga o le afafine o le ma atalii o Ashley, sa na o ia lava e leai se uo la te taaalo i le malae taalo i le aoga. A o ia tu ai iina, ma lagonaina le lē taua ma le lē iloa atu e se isi, sa oo mai se manatu patino i lona mafaufau: “Faatali la! E le o tuua na o a’u! O loo ia te a’u Keriso!” Sa tootuli ifo Ashley i le ogatotonu o le malae taalo, piilima ona lima, ma tatalo i le Tama Faalelagi. O le taimi lava na pupula ai ona mata, sa tu ai iina se teineitiiti la te tupulaga ma fesili atu ia te ia pe fia taalo. Na oo ina iloa e Ashley, “E taua i tatou i le Alii, ma e le o tuua lava na o i tatou.”

O nisi taimi atonu e te fia iloa pe aisea ua tupu ai se mea faigata i lou olaga pe aisea foi e te lei mauaina ai se faamanuiaga sa e tatalo ai. E masani lava o le fesili aupito sili e fesili atu ai i le Tama Faalelagi e le o le aisea ae o le a.

E te manatua le taimi na fiaaai ai Nifae ma lona aiga a o latou malaga i le vao? Ina ua o atu Nifae ma ona uso e saili ni meaai, sa gau le aufana a Nifae. Sa lei fesili o ia pe aisea.

Ata

Sa fesili atu Nifae ia Liae po o fea e maua ai meaai.

Sa fai e Nifae se aufana fou ma fesili atu i lona tama, o Liae, po o fea e mafai ona alu i ai e aumai ai ni meaai. Sa tatalo Liae, ma sa faaali atu e le Alii ia i latou le mea e mafai ona alu i ai Nifae.⁷ O le a taiala oe e le Tama Faalelagi pe a e ole atu ia te Ia po o le a le mea e mafai ona e faia ma mea e mafai ona e aoaoina.

Lua, Tatalo ia Tuputupu A’e

E finagalo le Tama Faalelagi e fesoasoani ia te oe ia tuputupu a’e! E alofa tele o Ia ia i tatou lea na Ia auina mai ai Lona Alo, o Iesu Keriso, e faaali mai ia i tatou le ala e ola ai.⁸ Na puapuagatia Iesu, maliu, ma sa toetu mai ina ia mafai ona faamagaloina a tatou agasala ma tuputupu a’e ia avea atili e faapei o Ia.

E te manao e tuputupu a’e i le onosai po o le faamaoni? E te manao e tuputupu a’e i se tomai? Atonu e te matamuli ma manao e tuputupu a’e i le lototele. “Tatalo, o loo i ai o ia iina”!⁹ E ala mai i Lona Agaga, e mafai ai ona suia lou loto, ma e mafai ona e maua le malosi.

Sa tusia e la’u uo fou o Iona: “E masani ona ou lagona le popole i lo’u agai atu i le aoga i le taeao. Ou te popole i mea e pei o le tuai, galo o se mea, ma le sueina o suega. Ina ua 10 o’u tausaga, sa amata ona ou faia ni tatalo i le taavale i le aveina atu o a’u e lo’u tina i le aoga. Ou te ole atu mo le fesoasoani ou te manaomia, ma ou te tatalo foi mo lo’u aiga. Ou te mafaufau foi i mea ou te faafetai ai. [O le tatalo i le Tama Faalelagi ua] fesoasoani ia te a’u. O nisi taimi ou te le lagonaina le to’a a’o ou aluese mai le taavale, ae e oo atu i le taimi ua ou i ai i lo’u potuaoga, ua ou lagona le toafilemu.”¹⁰

Ua tuputupu a’e le faatuatua o Iona a o ia tatalo i aso uma ona agai ai lea i luma.

Tolu, Tatalo ia Faaalia

E mafai ona e tatalo mo se fesoasoani ia faaalia le alofa o le Tama Faalelagi i isi.¹¹ E ala i Lona Agaga, o le a fesoasoani le Tama Faalelagi ia te oe e matau se tasi e faanoanoa ina ia mafai ona e faamafanafanaina i latou. E mafai ona Ia fesoasoani ia te oe e faaalia Lona alofa e ala i le faamagaloina o se tasi. E mafai ona ia tuuina atu ia te oe le lototele e auauna atu ai i se tasi ma faasoa atu ia i latou o i latou o se atalii po o le afafine o le Atua. E mafai ona e fesoasoani i isi ia iloa ma alolofa ia Iesu ma le Tama Faalelagi e pei ona e faia.¹²

Sa ou tatalo mo lo’u olaga atoa ina ia avea lo’u tama ma se tasi o Le Ekalesia a Iesu Keriso o le Au Paia o Aso e Gata Ai. E oo lava i le avea ai ma se teineitiiti, sa ou iloa le tele o faamanuiaga e mafai ona ia maua. E mafai ona maua e lo matou aiga faamanuiaga o le faamauina mo le faavavau. Sa matou tatalo soo ma lo’u aiga ma uo mo ia, ae sa lei auai o ia i le Ekalesia. E le faamalosia e le Tama Faalelagi se tasi e faia se filifiliga.¹³ E mafai ona Ia auina mai ia i tatou tali i a tatou tatalo i isi auala.

Ata

O Peresitene Porter faatasi ma ona matua ma ona tei.

Ina ua lava lo’u matua, sa ou mauaina lo’u faamanuiaga faapeteriaka. I le faamanuiaga na ta’u mai ai e le peteriaka ia te a’u le mea sili e mafai ona ou faia e fesoasoani ai i lo’u aiga ia faatasia i le lagi o le avea lea ma se faataitaiga o le talalelei a Iesu Keriso. O le mea lena e mafai ona ou faia!

Sa soifua lo’u tama ina ia 86. O le lima o aso talu ona maliu o ia, sa ou maua ai se lagona paia o le olioli. Na faailoa mai e le Tama Faalelagi ia te au e ala i Lona Agaga sa manao lo’u tama ia maua faamanuiaga o le talalelei a Iesu Keriso! O le a le galo lava ia te au le aso na ou tootuli faataamilo ai i le fatafaitaulaga i le malumalu faatasi ma lo’u uso ma tuagane ina ia faamauina i o’u matua. Sa amata ona ou tatalo mo lenei faamanuiaga a o ou i ai i le Peraimeri, ma sa ou mauaina a o avea au ma se tinamatua.

Atonu o loo e tatalo mo faamanuiaga mo lou aiga ma isi e te alofa i ai. Aua le fiu! O le a faaali atu e le Tama Faalelagi le mea e mafai ona e faia.

Faasoa atu i le Tama Faalelagi le mea o loo i totonu o lou loto.¹⁴ A o e ole atu ma le faamaoni mo Lana fesoasoani, o le a e maua Lona Agaga e taialaina oe.¹⁵ O le tatalo i aso uma o le a faatumulia ai oe i le alofa mo le Tama Faalelagi ma Iesu Keriso. O le a fesoasoani lenei mea e te manao ai e mulimuli ia i La’ua i lou olaga atoa!

Vaai faalemafaufau pe o le a le mea o le a tupu pe afai e tatalo uma tamaiti i Aferika, Amerika i Saute, Asia, Europa, Amerika i Matu, ma Ausetalia i aso uma. O le a faamanuiaina le lalolagi atoa i le tele o le alofa o le Atua!

Ata

O tamaiti i le lalolagi atoa o loo tatalo.

Ou te valaaulia outou ia tatalo ia iloa o loo i ai le Tama Faalelagi iina, tatalo ia tuputupu a’e e avea e faapei o Ia, ma tatalo ia faaalia Lona alofa i isi. Ou te iloa o loo soifua o Ia ma e alofa ia te outou. “Tatalo, o loo i ai o ia iina.” I le suafa paia o Iesu Keriso, amene.