O Le Faamoemoe o le Atua ia Aumai Oe i le Aiga
O mea uma e faatatau i le fuafuaga a le Tama mo Lana fanau pele ua mamanuina e aumai ai tagata uma i le aiga.
Ou te fia faailoa atu le agaga faafetai mo a outou tatalo a o ou amatalia ai le faagasologa o le faamasani i le valaauga, e ala mai ia Peresitene Nelson, e auauna atu o se Aposetolo a le Alii o Iesu Keriso. Atonu e mafai ona outou vaai faalemafaufau lelei i le lotomaualalo o le lagonaina o lenei valaauga, ma o se taimi o suiga tulaga ese ma le iloiloga loloto faaletagata lava ia. Peitai, e moni lava o se faamamaluga maoae le auauna ai i le Faaola, i soo se matafaioi, ma ia auai faatasi ma outou i le faasoaina atu o le tala fiafia e uiga i Lana talalelei o le faamoemoe.
E ese ai la mai lena, fai mai o tua atu o soo se Aposetolo fou lava, o loo tu ai se tina faaletulafono ua matuai ofo lava. Ou te le iloa pe na fai atu moni lena faaupuga, ae i le tulaga lenei, o le mea moni lava lena. Ou te masalo, o le mea moni, o le fai i lagi o lo’u tina faaletulafono, e le tuuitiitia ai lona maofa.
O ni nai masina talu ai, a o ma asiasi atu ma lo’u toalua i se isi atunuu mo ni tofiga eseese faaleEkalesia, sa ou alapo lava i se tasi o taeao ma taupulapula atu i fafo o le faamalama o le faletalimalo. I lalo ifo i le auala pisi, sa ou vaaia ai sa faatulaga se poloka i le auala ma se alii leoleo na tu latalata ane e toe faafoi taavale a o latalata atu i le poloka. I le taimi muamua, e tau leai ni taavale sa o atu ma toe faafoi i tua. Ae a o alu pea le taimi ma faateleina taavale, sa amata ona uumi laina taavale.
Mai le faamalama i luga a’e, sa ou autilo ifo ai, sa foliga mai le alii leoleo sa faamalieina i lona malosiaga e poloka ai le feoai o taavale ma toe faafoi atu tagata. O le mea moni, sa foliga mai na tai pei e osooso lana laa, e pei o le a amata ona siva siva, a o latalata atu taavale taitasi i le poloka. Afai ae le fiafia se avetaavale i le poloka o le auala, sa foliga mai sa le’i fia fesoasoani pe popole i ai le alii leoleo. Sa na ona lulu faafia o lona ulu ma toe faasino i le isi itu.
A’u uo e, o’u uso a soo i luga o le ala o le olaga faaletino, o le fuafuaga matagofie a lo tatou Tama, o Lana fuafuaga “matagofie”,1 ua mamanuina e aumai ai i tatou i le fale, e lē ia taofia ai i tatou i fafo.2 E leai se tasi na faia se poloka auala ma tuu ai se tagata iina e toe faafoi oe ma auina ese atu oe. O le mea moni, o le faafeagai tonu lava. E le o malolo le Atua i le tulituliloaina pea o oe. E finagalo o Ia i Ana fanau uma ina ia filifili e toe foi atu ia te Ia,3 ma ua Ia faaaogaina auala uma e mafai ai ona toe aumai ai oe ma foi atu.
Sa faamalumalu lo tatou Tama agaalofa i le foafoaga o lenei lava lalolagi mo le faamoemoega faapitoa, o le tuuina mai o se avanoa mo oe ma mo a’u ia maua ni aafiaga e tuputupu a’e ai ma faaleleia ai i le olaga faitino, le avanoa e faaaoga ai lo tatou faitalia mai le Atua e filifili ai o Ia,4 e aoao, e tuputupu a’e, e fai ai ni mea sese, e salamo, e alofa i le Atua ma o tatou tuaoi, ma toe foi atu ai i se aso i le aiga, ia te Ia.
Na Ia auina mai Lona Alo Pele faapelepele i lenei lalolagi pa’ū ina ia soifua i le poto masani atoa o se tagata soifua, ina ia saunia ai se faataitaiga mo Ana fanau uma ia mulimuli ai, ma ia togiola ma faaola. O le meaalofa silisili o le togiola a Keriso, ua aveesea uma ai poloka o auala o le oti faaletino ma le faaleagaga lea o le a tuu eseese ai i tatou mai lo atou aiga e faavavau.
O mea uma e faatatau i le fuafuaga a le Tama mo Lana fanau pele ua mamanuina e aumai ai tagata uma i le aiga.
O le a le ta’uga e avefeau a le Atua, o Ana perofeta o lenei fuafuaga i mau o le Toefuataiga? Latou te ta’uina o le fuafuaga o le togiola,5 o le fuafuaga o le alofa mutimutivale,6 o le fuafuaga sili o le fiafia,7 ma o le fuafuaga o le faaolataga lenei mo tagata uma, “e ala i le toto o la’u Toatasi na Fanaua.”8
O le faamoemoega o le fuafuaga sili o le fiafia a le Tama o lo tatou fiafia, iinei, i le taimi nei, ma i le faavavau. E lē ina ia taofia ai lo tatou fiafia ma faatupu lo tatou popole ma le fefe.
O le faamoemoega o le fuafuaga o le togiola a le Tama o le mea moni o lo tatou togiola, o le laveaiina o i tatou e ala i puapuaga ma le maliu o Iesu Keriso,9 faasaolotoina mai le pologa o le agasala ma le oti. E lē ina ia tuua ai i tatou e pei ona tatou i ai.
O le faamoemoega o le fuafuaga o le alofa mutimutivale a le Tama, o le tuuina mai lea o le alofa mutimutivale pe a tatou toe liliu atu ia te Ia ma faamamalu la tatou feagaiga o le faamaoni a’ia’i ia te Ia. E lē ina ia teena ai le alofa mutimutivale ma tuu mai tiga ma faanoanoaga.
O le faamoemoega o le fuafuaga o le faaolataga a le Tama, o le mea moni o lo tatou faaolataga i le malo selesitila pe a tatou maua “le molimau ia Iesu”10 ma ofo atu o tatou agaga atoa ia te Ia.11 E lē ina ia taofia ai i tatou i fafo.
O lona uiga la e alu lava soo se mea i le auala tatou te ola ai i o tatou olaga? Ma e le afaina le ala tatou te filifili e faaaoga ai a tatou faitalia? Ma e mafai lava ona tatou tausi pe tuu foi poloaiga a le Atua? Leai, e leai lava. E mautinoa lava o le tasi o valaaulia sili ona faifai pea ma faatauanau a Iesu i le taimi o Lana auaunaga i la le tino o le, ia tatou sui ma salamo ma o mai ia te Ia.12 E taua ma atoatoa i Ana aoaoga uma le ola i se tulaga maualuga atu o amioga mama,13 o se valaau mo le alualu i luma faaletagata lava ia, mo se faatuatua ia liua ai ia Keriso, mo se suiga tele o le loto.14
E finagalo le Atua ia tatou faia se suiga tele i o tatou manaoga manatu faapito ma le faamaualuga, ia aveesea le tagata natura,15 mo i tatou ia “alu ia, ma aua le toe agasala.”16
Afai tatou te talitonu o le faamoemoega o le fuafuaga alualu mamao a le Tama o le laveai o i tatou, togiola i tatou, tuuina mai o le alofa mutimutivale ia i tatou, ma faapea ai ona aumaia le fiafia ia i tatou, o le a la le faamoemoega o le Alo lea e ala mai ai ia te Ia le faataunuuga o lenei fuafuaga maoae?
Ua ta’u mai ia e le Alo ia i tatou Ia Lava: “Aua ou te lei alu ifo mai le lagi e fai lo’u lava loto, a o le finagalo o le ua auina mai a’u.”17
O le finagalo o Iesu o le finagalo agalelei lea o le Tama! E finagalo o Ia ia mafai e tagata mulimuli o fanau uma a Lona Tama ona maua le sini tupito o le fuafuaga—o le ola e faavavau faatasi ma i La’ua. E leai se tasi e tuuesea mai lenei gafatia faalelagi.
Afai e te popole faapea o le a le ausia le tulaga, pe faapea o le aapa alofa o le Togiola le iu a Keriso e aofia ai ma le alofa mutimutivale isi tagata uma, ae leai oe, o lona uiga la e te le o malamalama. Lē iu o lona uiga e lē iu. Lē iu e aofia oe ma i latou e te alofa i ai.18
Ua faamalamalama mai e Nifae lenei upumoni matagofie: “E lē faia e ia se mea vagana ai ua mo le manuia o le lalolagi; ona ua alofa o ia i le lalolagi, e oo ina tuu ai lava e ia i lalo lona lava soifua ina ia mafai ona ia aumai o tagata uma ia te ia. O le mea lea, ua lē poloaia ai e ia se tasi ia latou lē taumamafa i lana olataga.”19
O loo femaliua’i le Faaola, le Leoleo Mamoe Lelei, i le sailiga o Ana mamoe leiloloa se’ia oo ina Ia maua i latou.20 E “le finagalo o Ia e tatau ona fano se tasi.”21
“Ua faaloaloa atu ia te outou lo’u lima alofa mutimutivale, ma o soo se tasi e sau, o ia lea o le a ou taliaina.”22
“E i ai ea ni isi o ia te outou ua mama’i? Ia aumai i latou iinei. O i ai nisi ua pipili, pe tauaso, pe setu, pe manua, pe lepela, pe mamae, pe tutuli, pe puapuagatia i soo se mea? Ia aumai i latou iinei ma o le a ou faamaloloina i latou, ona ua ou agaalofa tele ia te outou”23
Sa le’i tuliesea e Ia le fafine sa ma’i punatoto, sa le’i aluese mai o Ia mai le lepela, sa le’i teena e Ia le fafine na molia atu i le mulilua; sa le’i tetee atu o Ia i le tagata salamo—tusa lava po o le a le agasala. Ma o le a Ia le teena lava oe po o i latou e te alofa i ai pe a outou aumai ia te Ia o outou loto momomo ma agaga salamo. E le o Lona faanaunautaiga po o Lana mamanu lena, po o Lana fuafuaga, faamoemoega, moomooga, po o le faamoemoe.
Leai, Na Te le tuuina i luga ni poloka auala ma ni papupuni; o Ia na te aveesea. Na Te le taofia oe i fafo; O Ia Na te faafeiloai ia te oe i totonu.24 O Lana auaunaga atoa o se tautinoga ola lea o lenei faamoemoega.
E moni foi, o loo i ai Lana taulaga togiola lava ia, lea e faigata atu ia i tatou ona malamalama i ai, i tua atu o o tatou gafatia faaletagata e malamalama a’i. Ae, ma o se “ae” taua lenei, tatou te malamalama i ai, ma mafai ona malamalama i ai, o le faamoemoega paia laveai o Lana taulaga togiola.
Na saeluaina le ie pupuni o le malumalu ina ua maliu Iesu i luga o le satauro, ua faatusa ai, o lena ala toe foi atu i le afioaga o le Tama ua saeluaina vatele—ia i latou uma o ē o le a liliu atu ia te Ia, faatuatua ia te Ia, lafo atu a latou avega ia te Ia, ma ave i o latou luga Lana amo e ala i le fesootaiga o feagaiga.25
I se isi faaupuga, o le fuafuaga a le Tama e le faatatau i poloka o auala. Sa le’i [faatatau] lava i ai; ma o le a le faatatau lava i ai. O i ai ea ni mea e tatau ona tatou faia, ni poloaiga e tausi, ni vaega o o tatou natura e sui? Ioe. Ae faatasi ai ma Lona alofa tunoa, o na mea e gafatia ona tatou faia, e le o mamao mai la tatou aapa.
O le tala fiafia lea! Ou te matuai faafetai lava mo nei upumoni faigofie. O le mamanu a le Tama, Lana fuafuaga, Lona faamoemoega, Lona faanaunautaiga, Lona moomooga, ma Lona faamoemoe, o mea uma ia e faamalolo ai oe, o mea uma ia e te maua ai le filemu, o mea uma ia e toe aumaia oe, ma i latou e te alofa i ai, i le aiga. O a’u o se molimau i nei mea i le suafa o Iesu Keriso, Lona Alo, amene.