19:3

Falfalaen’um ko Tawa’ath ko fapi Kiy ko Priesthood

Keb rok President Russell M. Nelson

President ko Fare Galasia Ku Yesus Kristus ni Fan ko Gidiiʼen Got ko Tin Tomur e Rran

Fapi kiy ko priesthood e ma gagiyeg nag rogon ni ngan fanay fare priesthood rok’ Got ni ngan fanay ko tin nifan e muruwel rok’ Somoel nge urngin e pi’in nira thapeg fare gospel nikan sulwegyarmen.

Pi walageg, daba’ e reb e cheppin e rran ngay nifan nigeg nge President Dallin H. Oaks. Ke gaman 40 e duw iyan, ko napan e April 7, 1984, nikan pining mow ni nggu mangew reb chonggin fare Quorum ko fare Ragag nga L’agruwi Apostles. Ke falfalaen’ mow ko urngin e general conference napan e ngeyal’ nem, nge mada’ ko biney e ran. Makun tawa’ath nagdaed biyay ko fare Thothup ni yibe po’og nga daken daed. Gube athapeg ni gamedra ul’ul’ ngam filed fapi milwol ko biney e mo’olung ko tin ba’aray e pul ni bayib nga mm’on.

Napan nin gargeleg, ma karimus nibay nel’ e temple ulan e Galasia—nta’areb nibay u St. George, Logan, Manti, nge Salt Lake City, Utah; nib mu’un Cardston, Alberta, Canada; nge Laie, Hawaii ngay. L’agruw e temple ni’i moy ni somm’on nibay reb u Kirtland, Ohio, nge Nauvoo, Illinois. Napan ni milekag e Galasia ni kar bad ko ban ni ngael, ma gidii’en e Galasia e ni towasoriy raed ni ngar piged e gali temple ney.

Ma bin ni Temple u Nauvoo e ni gathay ni bee’ e urufiy. Fani ta’aboch riy makun toey biyay makan yibliy biyay ni President Gordon B. Hinckley e ii yibliy. Ma fare bin ni Temple u Kirtland ni gathay ni gidii’en e toqogor ko Galasia era gathayed. Boch e rran nga tomuren ma fare Temple u Kirtland e fanay reb e Galasia ni kanog e Community ku Kristus ngay, nira fanayed ni bukun e duw.

Bin ba’aray e pul nike thumer ma Fare Galasia ku Yesus Kristus ni fan ko Gidii’en Got ko Tin Tomur e Rran e kar chuwi’iyed fare Temple u Kirtland, nge ku boch e binaew u Nauvoo nib sug mornga’agen e chep riy nib kakrom. Ke magar mab falfalaen’ maed ko thin nike yean u thilmad e pi tiyuang’ ko fare galasia ko Community ku Kristus ni pii’ mat’won e biney ni yag ni ngan rrin’.

Fare Temple u Kirtland baga’ fan ko fare Sulyarmen ko gospel rok’ Yesus Kristus. Boch ban’en ni buch u rom e ni profecy nag nike pag e millenia ma rib ga’fan ko fare Galasia rok’ Somoel nike sulyarmen ni nge polo’ nag fare muruwl ko gidii’en e galasia e daba’.

Reb e pi n’ey ni buch e buch ko ngiyal’ ni Madnom ko Easter, ko April 3, 1836. Roffen nem, manib ngan guy Joseph Smith nge Oliver Cowdery ni gathi ta’ab biyay nib nigu’ row. Somm’on riy, me yibi m’ug Somoel Yesus Kristus. Me yoloy fare Profet mornga’agen Somoel ni owchen ea boed ea nifiy; fare piyen lolugen ea ke wechwech ni boed ea snow nib bi’ech; Ya’an ea be pu’oeg ea tamilang nib gel ko yaal’; me lungun ea boed lingan ea rran nib gaa’ ni be yaen nib papay.

Napan e ngiyal’ ney, me micheg Somoel ni’ir i Somoel. Me ga’ar, I gag ea som’on nge tomur; I gag ea ir ni be fos, i gag ea ir ni kan lii’; I gag ea en nira non ni pa’am ngak Chitimangiy.

Me yog Yesus Kristus nira fanay fare temple ni nge mang e na’un rok’ me michmicheg: “Ma baygu dageg iyaen ko gidii’ rog u fithik ea runguy u lan ea biney ea na’un.”

Biney ni michmicheg e rayag ko gubin e temple ni bay ni yibliy e daba’. Gube pining med ni ngam tafneyed ere michmicheg ney rok’ Somoel nge rogon nib sor fan ngom.

Tomuren ni yibi m’ug Somoel, me migid e Moses. Me yibi pii’ Moses fapi kiy ngak Joseph Smith nifan fare ulunguy rok’ piyu Israel nge fare fulweg ni bayi tay fare ragag i ganong.

Napan nin mu’ nag e biney e mada’, Me yibi m’ug Elias, me yibi micheg nag ngak Joseph fare mfen ko gospel rok’ Abraham.

Ma bin migid ngay e fare profet Elijah e yibi m’ug. M’ug ni yibi tay e polo’ nag fare micheg ni tay Malaki ni u mm’on ko bin Migid e Wub, ma Somoel ere l’og Elijah ni nge “fulweg e pi matam nge pi bitir nga ta’bang bayay.” Me yibi pii’ Elijah fapi kiy ko gelngin e sealing nga dakaen Joseph Smith.

Ra dalip i kiy ney nikan fulweg biyay nga daken e fayleng nike yib u daken e tamal’og nu tharmiy nike yib u tan pa’ Somoel e ri dabiyag ni ngan fekyathin nag. Fapi kiy ko priesthood e bay gelngin nge mat’won fapi presidency riy. Fapi kiy ko priesthood e ma gagiyeg nag rogon ni ngan fanay fare priesthood rok’ Got ni ngan fanay ko tin nifan e muruwel rok’ Somoel nge urngin e pi’in nira thapeg fare gospel rok’ Yesus Kristus nikan sulwegyarmen.

Fal’ ni ngan nangfan ni u mm’on nin yarmiy fare Galasia, make mu’ i pii’ e tamal’og nu tharmiy fare Aaronic nge Melchizedek priesthood ngak fare Profet Joseph Smith nge fapi kiy nifan ngorow ko priesthood. U daken e pi kiy ney me yag mat’won Joseph Smith ni nge yarmiy fare Galasia ko 1830.

Ma napan e Temple u Kirtland ko 1836, napan nin pii’ era dalip i kiy ney ko priesthood—ni fithingan, fapi kiy ko ulunguy rok’ pi u Isreal, fapi kiy ko fare gospel rok’ Abraham, nge fapi kiy ko gelngin e sealing—ya fin irerram e ngiyal’ nike t’uf. Pi kiy ney e pi’ mat’won Joseph Smith—nge gubin e President nibe yib u tomuren nifan fare Galasia rok’ Somoel—ni nge ulunguy e pi u isreal ulan l’agruw raba’ fare veil, min tawa’ath nag urngin e gidii’ nibay u tan fare m’ag rok’ Abraham, min micheg fare seal nibe yib ko fapi gam’ing nge m’ag ko priesthood, nge seal nag e tabinaew nga ta’abang nib manechubog. Gelngin e pi kiy ney ko priesthood e dariy bi’id memus ma bugi ban’en nib fal’el’.

Mu tafney nag rogon e yafos rom ni fa’anra dariy fapi kiy ko priesthood riy ni dawrin fulweg biyay nga daken e fyaleng. Fa’anra dariy fapi kiy ko priesthood, ma dabiyag ni ngan endow nigem ko fare gelngin Got. Ya fa’anra dariy fapi kiy ko priesthood, ma Galasia e kemus nibay nifan e nge machib me pii’ e ayuw makemus rogon array. Ya fa’anra dariy fapi kiy ko priesthood, ma dariy bagdaed nrayag ni nge thapeg fapi gam’ing nge m’ag nib t’uf ni nge m’ag daed ko tabinaew rodaed min par rok’ Got biyay.

Fapi kiy ko priesthood e irreram e ran’en nib thil nibay ko Fare Galasia ku Yesus Kristus ni Fan ko Gidii’en Got ko Tin Tomur e Rran u dakean e fayleng. Bo’or boch e ulung nrayag ma kuma pii’ e ayuw ko yafos rom u fayleng. Machane dariy reb e ulung ngay nrayag ma fal’ag wo’en e yafos rom u tomuen nikam m’um’.

Fapi kiy ko priesthood e ma pii’ mat’won daed ni ngan pii’ fapi tawa’ath nikan micheg nag ngak Abraham ngak urngin gubin e pi’in ni yaed be fol ko fapi m’ag roraed. Muruwel u temple e mayag nag e pi tawa’ath ney ni fal’el’ ngak gubin pi fak Got, ni demuturug ko gin ni yaed bay riy fa wi’in e yaed bfos fa yaed bay ni yaed fos chiney. Da falfalaen’ gaed nikan fulweg fapi kiy ko priesthood biyay nga daken e fayaleng!

Gube pinning med ni ngam tafney niged e pi thin ni ba’aray:

Fare ulunguy rok’ pi u Isreal e pow riy ni Got e bt’uf pi fak rok’ ni gubin ndemuturug e gin ni yaed bay riy.
Fare gospel ku Abraham e kureb e pow riy ni Got e bt’uf pi fak rok’ ni gubin ndemuturug e gin ni yaed bay riy. Ke pining ni gubin ni ngar baed Ngakʼ—“tin ni talimor nge wechwech, ni kalbus nge de kalbus, ni pumoʼon nge ppin; … ma gubin ma taʼareb rogon rokʼ Got.”
Fare gelngin e sealing e ba pow riy ko gelngin e Got ni gadaed ba t’uf rok’ ni gubin yang ma ba’adag ni gadaed gubin ni ngaed me’elegned ni ngad suled ngak.

Fapi kiy ko priesthood nikan sulweg yarmen u daken fare Profet Joseph Smith e ke bing wo’en urngin e pi’in nibe fol nibay u tan fare m’ag ni nge thapeg me falfalaen’ ko urngni e pi tawa’ath riy nib thothup nifan ngoraed nib fel’. Biyay u roy, bo’or ban’en nrayag ni ngan fil ni mornga’agen e tin nike buch ko fare Temple u Kirtland.

Meybil ku Joseph Smith napan ni yibliy fare Temple u Kirtland e wod rogon nima pii’ e temple gelngiy nifan ngom nge gag ko pin’en ni gadaed be magawon riy ulan e pi rran ney. Gube pii’ e athamgil ngom ni ngam fil mornga’agen ere meybil ney nibay ulan e Doctrine nge Covenants section 109 Re meybil nem, ni yib nikan thogthog nag, e be machib nag ni “ba na’un ni tigil’ e meybil, ba na’un ko balaynag e abich, ba na’un ni toffen e mich, ba na’un ni tigil’ e machib, ba na’un nifan ko tin ni fla’ab, ba na’un nib sug ko yalen, ma kuba na’un rok Got.”

Gathi kemus rogon mornga’agen e temple array. Ya ban’en nikan micheg nira buch rok’ e pi’in nibe pigpig ma be yean ngalan e na’un rok’ Somoel. Ya rayag ni ngar athapaged ni yira fulweg taban e meybil roraed, thogthog nifan ngoraed nib thothup, gelnag e mich, pii’ gelngin, gapas, ga’nag e llowaen’, me ga’nag gelngiy.

Yean nga temple era ayuweg nem ngam laem ni bod e celestial me yag ni bing owchen ngam guyem ko gur mini’, ko rogon nrayag ni ngam mang, nge rogon e yafos ni ga’abadag ni ngeyag ngom ni manemus. Yean nga temple ni gubin ngiyal’ e rayag ni nge ga’nag e changar rom ngam guyem nge rogon ni gara par ulan fare wo’en Got ni rib fel’. Gube micheg nag e ran’ey ngom.

Makun micheg nag ngodaed ulan e temple nrayag ni “gadaedra thapeg fare Kan ni Thothup nib polo’.” Mu tafney nag rogon ere n’ey nikan micheg nag ni yira bing e tharmiy ngak e en nibe gay e tin nib riyul’ nib manechubog.

Ma kunog ngodaed ni pi’in nima liyor ulan e temple e napan ni yaedra chuw ma bay fare gelngin Got roraed nge fapi angel nibe “ayuwegraed.” Uw gelngin nibe pii’ e biney e athamgil ngom, ni pi’n nikar endow gaed ulan e temple nibay fare gelngin Got roraed, e bay Somoel roraed ko biney e yafos? Mang athamgil e be pii’ ngom ni gamanang ni bay fapi angel ni yaedra ayuwegnem?

Bin tomur ngay, kan micheg nag ngodaed ni “dariy mit e denen” nira yib nga daken e pi’in nima yean ngalan e na’un rok’ Somoel.

Nangfan e pi tawa’ath ney nib thothup ni rayag ni ngan rrin’ ulan e temple e rib ga’fan ngodaed ko daba’.

Pi walageg, ba’aray e n’en ni nggu michmicheg. Dariy ban’en nib ga’ ngay ni rayag ni nge ayuwegnem ni nge chichi’iy pa’am ko fare wasay nib iron makemus ni liyor ulan e temple ni gubin ngiyal’. Dariy ban’en nib ga’ ngay ni rayag ni nge yiroriyem napan nira yib e lumor nu fayleng ngom. Ma dariy ban’en nira ga’ nag me gel nag e mich rom ngak Somoel ni’ir Yesus Kristus nge fare Bayul rok’ nira ayuwegnem ngam nangfan fare wo’en e tonom ku Got nge boch. Dariy ban’en nira munguy nag e amith rom ni yo’or makemus ni fare thothup. Dariy ban’en ngay nira bing wo’en e tharmiy nib yo’or makemus ni biney. Dariy!

Temple e ir fare langan e garor ko fapi tawa’ath ni th’abi ga’ nike tay Got ni fadaed, ni temple e karimus e ggin nrayag ni ngaed thapagned gubin fapi tawa’ath riy nikan michmicheg nag ngak Abraham. Irreray fan ni gamaed be rrin’ u gelngin nrayag romaed, utan pa’ Somoel, ni ngan moem nag fapi tawa’ath ko temple ngak e gidii’en e Galasia. Ere, falfalaen’maed ngay ni nggu goged ni bay ni toey boech e temple nib be’ech ko yungin ni ba’aray ni 15 yang:

Uturoa, French Polynesia
Chihuahua, Mexico
Florianópolis, Brazil
Rosario, Argentina
Edinburgh, Scotland
Brisbane, Australia south area
Victoria, British Columbia
Yuma, Arizona
Houston, Texas south area
Des Moines, Iowa
Cincinnati, Ohio
Honolulu, Hawaii
West Jordan, Utah
Lehi, Utah
Maracaibo, Venezuela

Pi Walageg nib t’uf rog, gube micheg ni irreray Fare Galasia ku Yesus Kristus ni fan ko Gidii’en ko Tin Tomur e Rran. I’ir e ba suwey. Gadad e pi gachalpen.

Nge falfalaen’daed ko fapi kiy ko priesthood nikan sulweg yarmen nike bing wo’en ngom nge gag ni ngad thapagnew urngin fapi tawa’ath nib be’ech ni gadaed ba’adag ma gadaed be’ech ni ngad thapegned. Gube micheg u dakean fithngan Yesus Kristus nib thothup, amen.