“Ngang Ua Ingeno, non Pusin Kapasen Fonuei”

Maria Salas Calvo, emon me nein ekkewe aewin pukutan chon Guam a choni ewe Mwichefen, ese mo anneani ewe Puken Mormon non pusin kapasen fonuan, CHamoru (itechikin me akkom “Chamorro”). CHamoru a ew me nein ekkewe ruu chok kapasen ekkewe 450 kapasen Austronesia mi fis kapasan non ewe kinikinin Pacific ese pachenong non ewe Oceanic subgroup. Ewe kapasen CHamoru nikinikin pwe a poputa seni ew mwichen aramas ra mokut seni Otiworun Asia ngeni ekkewe fonuen Marianas arapakan 3,500-4,000 ier a no.

Maria me punuwan ewe, Don, ir pwan Aramas mi Pin non Fansoun Soponon chon CHamoru, a watte ar ekieki ifa ussun an chon nukun nemenem seni ewe ew fansoun 16 pukuwen ier feinno a angawano kapasen CHamoru me oruni won Guam. “Oreni a watte pochokunan seni chok orun ekkei oreni a kawor seni ekkewe chon Spain” Maria a apasa. Nupwen non Guam, ekkewe chon Spain ra kutta ar repwe nemeni ekkewe aramasen CHamoru. “Ekkewe aramas won ekkewe fonu ra kuf.” Don a awewei.

Chochon ekkewe chon CHamoru a kukununo, ussun chok ewe oreni ren nonnomun ekkewe CHamoru me ar kapas. Non poputan ewe kinikinin fansoun ren 20th ier, fan annukun sounfiun US won Guam, ewe fosun CHamoru ese chiwen wor, me ewe muun Navy a mwo nge kenano ekkewe tiksinerin fosun CHamoru- ngeni fosun Merika. Non chok ewe poputan 1970 ewe muun a achocho poputa ne apochokuna sefani pukutan fosun Guam me oreni .

Maria a ekieki an epwe chiakuni ekkkoch kinikin seni ewe Puken Mormon ngeni fosun CHamoru. Ussun a fen affat me mwan ew chiaku epwe awora aninis ngeni ewe marinon achocho ne apochokuna sefani CHamoru won Guam. I a angei kapasen ourour seni Ann Rivera, souemwenin ewe programin kapas non an Guam ewe Putain Education, an epwe fatoch ren an ewe chiaku epwe fiti nonomun ew system ewe a karan foruta ren itechik me ititochun fosun CHamoru. Neminewe a angang won ewe chiaku non ruu ier.

“Fan ekkoch fansoun ai angangen chiaku, netipei a urono me a suur chonun mesei,” neminewe a apasa. “Ngang ua ingeno, non pusin kapasen fonuwei, pwe Samach non Nang ese watte an tingor. I a chok tingorei kich pwe sipwe tongei I ren unusen netipach me ekiekich.”

Non 1989, Maria a awesano chiakun ew puken kapasen CHamoru ekkewe kinikin seni ewe Puken Mormon: Sileksion Siha Ginen I Leblon Mormon—Otror Na Testamenton Jesu Kristo. Neminewe me ekkoch chon Mwichefen ra wano ekkewe puk ngeni ekkewe souemwen non ewe neni, pachenong Governor Joseph F. Ada. Ewe Nenien p Puk (library) an Guam a pachenong ewe chiakun CHamoru non ewe auchean ioifengenin kinikinin ewe nenien ioni fengeni taropwen uruo ika rekot.

Non November 24, 1989, ewe mwichen anepung (legislature) a etiwa ew auchean etipeew ne mwareiti an Maria Angang. A pwarano “Maria Salas Calvo, emon Mormon mi achocho nikitu ussun chok pwan emon Chamorro mi menemenoch me pusin uta won an,” ren an angang mi fetanoch me ponueta. Ewe etipeew a affata pwe chiakun ewe Puken Mormon ngeni non CHamoru “a awora ew watten ponuetan angang non auchean tumunun ewe kapasen Chamorro, a kawor non murinon Chamorro ew watten repotun ika awewen ewe kapas allimen Jises Kraist.”