Sramsram Mahtuh ke Alu uh fin acn

Guam

Ahkfototoyelah

Ke sahflahiyacn Mweun Luhlahp Ahk 2, Mwet Luhlahlfongi in Lwen-sahflah ma kuhlwacnsap fin acn Macrike ke solse ac ma muhta fin acn Guam muhtacwacack in aetuhilac toeni in u. Ke pacl ke 1950, oreklac pracns nuh ke enenuh luhn sie solse, sucu lalos, ac kuhtuh Mwet Luhlahlfongi sahyac ma muhta fin acn Guam. Ke kahsruh luhn misineri ke Japan Mission, mempucrs muhtacwacack in akacsruhi wosasuc nuh sin mwet tuhlan lalos. Ke sahflahiyacn yac sac, nien toeni miting se emeet fin acn Guam kihsackihnyucklac in karihgihn kapwack luhn pracns inge.

Mwet Luhlahlfongi fin acn Guam elos fototo nuh yurin mwet tuhlan lalos. Ke inlfulwen ahkfuhlwact se, puhluhn pacl ah, ac ma ahksasucyeyuck ke facsin, sang nuh sin mempucrs in kahsruh ke kuhlwacnsap, luti, ac lweng. Ke yac 1970, mwet CHamoru na pwacye ah, suc kahs ac facsin la tiac pahtokyuck tukun fihl, muhtacwacack in ohsun nuh sin mempucrs ac misineri. Tukun eklac luhn mwet CHamoru se emeet, Maria ac Donald Calvo, elos pacptaislac ke May 1977, Maria el muhtwacwacack in luhngas Puk luhn Mormon nuh ke kahs CHamoru. Maria el finsraki tuh lweng se inge kuh in kahsruh kuhtuh CHamoru sahyac in eklac lutlut ke wosasuc ke kahs lalos ac in mwe sang pac sruokyac kahs lalos uh. Ke ahksahfyeyucklac lweng ac oreklac nuh ke puk ke yac 1989, mwet orekma ke masap Guam oraclah masap se akihlen lwenglah luhn Puk luhn Mormon ekihn sie “mwe kuhtanglah luhlahp” in sruokyacna kahs luhn mwet CHamoru.

Fine mweun sac salkeack in oraclah kain in pracns fin acn Guam, Mwet Luhlahlfongi elos moniyuck in “karingin inse sefanna suc Ngun el asot nu suwos, ke misla se su kaprikowosi nu sie” (Ephesus 4:3) ke elos tuhkweni orekma wi mwet tuhlan lalos.