Pasiuna

Ang kaluwasan sa tanang anak sa Dios mao ang sentro sa Iyang ebanghelyo. Siya misaad nga “ang tanang mga nasod nga [ma]panalanginan” pinaagi sa binhi ni Abraham (Genesis 22:18), ug ang ubos nga mga magbalantay sa mga karnero sa Judea, gipahayag kini nga ang “maayong balita” sa ebanghelyo alang sa “tanang katawhan” (Lucas 2:10). Sa unang mga pahina sa Basahon ni Mormon, si Nephi mipahayag nga ang Ginoo “dili siya maghimo og bisan unsa gawas kon kini alang sa kaayohan sa kalib[o]tan; kay siya nahigugma sa kalib[o]tan, gani siya mitugyan sa iyang kaugalingon nga kinabuhi aron siya makadani sa tanan nga mga tawo ngadto kaniya” (2 Nephi 26:24).

Wala madugay human nga Ang Simbahan ni Jesukristo sa mga Santos sa Ulahing mga Adlaw natukod, ang Ginoo misugo sa mga Santos sa pagsangyaw sa ebanghelyo nadto sa tibuok kalibotan: “Kay siya mopakita sa iyang balaan nga bukton diha sa mga mata sa tanan nga mga nas[o]d,” ang Ginoo miingon pagka 1831. “Busa, pag-andam kamo, pag-andam kamo, O akong mga katawhan. … Himoa, nga ang pahayag mopaingon ngadto sa tanan nga mga katawhan” (Doktrina ug mga Pakigsaad 133:3–4, 10). Busa, ang matinud-anon nga mga Santos midawat sa mga tawag sa pagsangyaw sa tibuok kalibotan, ang Basahon ni Mormon nahubad (sa kinatibuk-an o sa usa ka bahin) ngadto sa kapin sa 110 nga pinulongan, ug ang mga kongregasyon naestablisar ug milambo sa tibuok kalibotan.

Samtang ang kadaghanan sa mga Santos sa Ulahing mga Adlaw nakasabot nga ang Simbahan usa ka tibuok kalibotan nga tinuohan, ang kasaysayan sa Simbahan sa daghang bahin sa kalibotan dili kaayo ilado. Kining Tibuok Kalibotan nga mga Kasaysayan nagtingoha sa pagpakigbahin sa makadasig nga sugilanon kon giunsa pagdawat ug pagpakigbahin sa mensahe sa Pagpahiuli ngadto sa tibuok kalibotan.

Ang matag kasaysayan naglangkob og mubo nga kinatibuk-ang pagpasabot, usa ka pinili nga mga sugilanon sa hugot nga pagtuo, usa ka han-ay sa panghitabo, impormasyon sa estatistika, ug dugang nga mga kapanguhaan nga mahimong konsultahon sa mga magbabasa. Ang mga sugilanon nagtutok sa lokal nga mga miyembro kinsa nakadungog ug naminaw sa tawag sa Manluluwas nga “mopahayag sa pulong sa mga palib[o]t nga rehiyon diha kanila” (Doktrina ug mga Pakigsaad 52:39) ug kinsa nagpakita og hugot nga pagtuo sa pagbuntog sa talagsaon nga mga hagit sa pagkahimong mga Santos sa Ulahing mga Adlaw diha sa ilang yutang natawhan.