Kabwarabwaraana

Kamaiuakiia natin te Atua ni kabane bon boton Ana euangkerio. E berita bwa “a na bane botanaomatan aonaba [ni] kabwaia” rinanon ana kariki Aberaam (Karikani Bwai 22:18), ao nakon taan kawakin tiibu aika a mangori iaon Iuta, e katanoataaki bwa te “rongorongo ae raoiroi” ibukin te euangkerio bon “nakoia aomata ni kabane” (Ruka 2:10). Ni moan baan ana Boki Moomon, e katanoata Nibwaai, “bon akea te bwai ae kakaraoia ma ti bwaai aika a na kawaka te aonaaba; bwa e tangira te aonaaba, n te aro are e anga oin maiuna bwa e aonga ni kairia aomata ni kabane [ao aine] nakoina” (2 Nibwaai 26:24; e kairaki ma te kairara).

N te tai ae waekoa imwiin tein Ana Ekaretia Iesu Kristo ibukiia Aika Itiaki ni Boong aika Kaitira, te Uea e anga ana kaetieti nakoia aika Itiaki bwa a na taetaekina te euangkerio ni kabuta te aonaaba: “Bwa e na a kaota baina ae tabu i mataia botanaomata ni kabaneia,,” e taku te Uea n 1831. “Mangaia are, katauraoingkami, katauraoingkami, O au botanaomata. … Waaki nako takaruaia i buakoia aomata ni kabaneia:” (Reirei ao Berita aika Tabu 133:3–4, 10). N aron riaina, a tia ni butimwaai wewete aika Itiaki aika kakaonimaki ni kabwarabwara ni kabuta te aonaaba, e a tia n rairaki ana Boki Moomon (n ae bwanin ke n aki bwanin) n ae riaon 110 taian taetae, ao taan taromauri a tia ni katea ao ni kanakoraoa te aonaaba.

Ngkai angiina aika Itiaki ni Boong aika Kaitira ake a ataia bwa te Ekaretia bon te onimaki ni kabuta te aonaaba, rongorongon te Ekaretia n angiin mwakoron te aonaaba e tuai n rangi n ataaki. Rongorongon te Aonaaba aikai a ukera ni kan tibwa te karaki ae riinga te nano bwa e kanga rongorongon Kaokan te Euangkerio ni mwaneaki, n tibwaaki ni kabuta te aonaaba.

Rongorongo n tatabeua iai inanona karakinan te onimaki, rongorongon bwai inanon taia n riki. rongorongon te ware, ao bwai n ibuobuoki riki tabe ake a na kona taan wareware ni karekei buokaia iai. A boboto taian karaki iaoia membwa ake a ongo ao a ira nanon ana wewete te Tia Kamaiu “n taekina te taeka n taabo nako ake a uakaan nakoia”(Reirei ao Berita aika Tabu 52:39) ao ake a tia ni kamwakura aia onimaki n tokanikai iaon taian kaangaanga aika a onoti n riki bwa aika Itiaki ni Boong aika Kaitira n abaia.