“Mifala I Bin Mekem Bes blong Mifala”

Long taem blong Wol Wo Tu mo long ol yia 1950, ol Lata-dei Sent blong Yunaeted Stet, Tonga, Samoa, Niu Silan, mo Ostrelia oli bin kam laef long Vanuatu (we fastaem oli singaotem Niu Hebridis). Samfala famli blong Tonga oli bin statem Port Vila Branj, we i fom long Julae 15, 1973, wetem Lanipotu Fehoko olsem presiden. Afta we Lanipotu i bin go wok long wan nara ples, Saikem Jackson i bin lidim lokol grup blong ol Sent. Long Jenuware 1975, oli bin sendem tu ful-taem misinari blong Tonga blong kam stat tijim gospel. Fas man blong joenem Jos long Vanuatu hem i Joel Busai, we i bin baptaes long Novemba 20, 1976.

Long Julae 30, 1980, Vanuatu i winim indipenden mo niufala nem blong hem. Wan Praem minista i lidim niufala gavman mo hem i stopem ol ful-taem misinari blong Lata-dei Sent blong kam long kantri.

Long semmak taem ia, yangfala Edwin Basil i bin stap planem kabis long garen blong famli blong hem long Port Vila taem hem i harem nius ia. Ol brata mo sista blong hem oli stap traem blong kamaot long haos afta we mama blong hem i lokem olgeta insaed blong oli no save go luk ol Lata-dei Sent misinari aotsaed. Taem oli luk se papa blong olgeta i stap toktok wetem ol misinari, oli kamaot tru long doa we i stap long fored.

Papa blong Edwin i talem long ol misinari i se olgeta oli Angliken be hem i agri blong lisin long mesej blong olgeta. Long taem blong fas lesen, mama blong Edwin “hem i stap sidaon nomo mo wajem olgeta, wetem wan fes we i fulap wetem kros.” Mo tu hem i no bin joenem nambatu mo nambatri lesen. Long dei ia we bae i gat nambafo lesen, papa blong Edwin i kam long haos mo i luk se tebol i klin mo i gat ol naes flaoa. “Ol misinari oli stap kam,” mama blong Edwin i talem. Hem i tekpat long lesen. Long en blong evri seven lesen ia, ol misinari oli askem papa mo mama blong Edwin olsem wanem tufala i filim. “Evri samting i gud,” mama blong hem i talem.

Edwin mo ol famli blong hem oli bin baptaes long Ogis 1981, long stret taem we bae ol misinari blong ovasi bae oli gobak long kantri blong olgeta. Ol misinari oli trenem ol lokol memba, we i gat tu Timothy Proveau, Fred Massing, Edwin, mo wan narafala yangfala we i jes baptaes, Paul Hilliman, blong prijim gospel.

“Oli bin tijim mi olsem wanem blong kipim gud faenens mo ol rekod blong jos. Oli bin tijim hemia long mi wan taem nomo, mo oli singaotem mi kam olsem klak blong branj,” Paul i tingbaot. “Mo afta oli aot long Vanuatu. I no moa bin gat misinari long spes blong 10 yia. Mifala i bin mekem bes blong mifala.”

Wetem smol kontak wetem intanasonol Jos ova long ol nekis ten yia, ol Sent long Vanuatu oli karem responsabiliti blong lidasip. Evri naet afta long wok, branj presiden Jack Taso Hokau i bin oganaesem ol memba blong visitim wanwan long olgeta wetem hariken laet. “Evri wik. Mandei kasem Fraedei. Evri naet,” Paul i tingbaot. Ol Sent oli developem wan strong frensip wetem wanwan long olgeta.

Long 1991, wetem niufala gavman, Edwin mo wan narafala memba i mit wetem Serge Vohor, minista blong forein afea, we i bin agri blong akseptem ol ful-taem misinari blong kambak mo gohed blong mekem wok ia long kantri. Edwin i glad tumas mekem se i ron i go long maket long taon, long ples we waef blong hem Wendy i stap salem kaekae long hem, mo hem i bin haggem hem. “?From wanem?” waef blong hem i askem. “!Oli akseptem ol misinari blong oli kam nao!” hem i talem.

Edwin i bin kolem misin presiden long Fiji mo askem sapos i save sendem sam misinari. Presiden i askem se wetaem nao bae i oraet blong oli sendem. “Sendem olgeta enitaem,” Edwin i talem. “Tedei, tumoro.” Long semmak wik nomo, faef misinari oli kam.

Edwin i gaedem gud ol misinari blong mekem se oli save luk olgeta olsem ol lokol man blong help, be i no olsem ol man blong nara kantri. Hem i oganaesem olgeta blong mekem seves long evri priperesen dei blong olgeta, we oli go long wanwan haos blong Mele vilej blong katem faea wud blong olgeta we oli olfala. Wendy, we hem i blong Mele, i go long jif blong Mele mo eksplenem wanem nao ol misinari i stap mekem.

Tru long ol hadwok mo ol traehad blong ol Sent long Vanuatu, sid blong gospel i tekem rus mo i kam antap nomata long ol jalenj we i bin hapen bifo.