Vahe 8
Mahuʻinga Hono Fakahaofi ʻo e Ngaahi Laumālié
Naʻe fakafalala lahi ʻa Telia Lokihoni, ko e palesiteni Palaimeli foʻou ʻi Kolonia Suisa, ʻUlukuaí, ki heʻene tohi lēsoní. Kuo faʻu ʻe he Siasí ʻa e tohi tuʻutuʻuní ʻo fakatefito ki he kau faiako mo e kau takimuʻa ʻo e Palaimelí ʻoku nau nofo ʻi he ngaahi misioná, pea naʻe lotua maʻu pē ʻe Telia fekauʻaki mo e founga lelei taha ke fakaʻaongaʻi ai iá. Naʻe faʻu ʻa e tohi lēsoní kimuʻa pea kamata vakaiʻi mo fakafaingofuaʻi ʻe he Kōmiti Fakafekauʻaki ʻa e Siasí ʻa e ʻū naunau kotoa ʻa e Siasí, pea naʻe peesi ia ʻe 300. ʻI he taimi tatau, naʻe houngaʻia ʻa Telia ʻi he ngaahi fakakaukau lahi ki he ngaahi ʻekitivitií mo e ngāue fakameaʻa naʻe ʻomi aí. Neongo naʻe longoaʻa ʻa e fānau Palaimelí ʻi he taimi ʻe niʻihi lolotonga ʻene fai lēsoní, ka naʻe faʻa kātaki ʻa Telia. Kapau naʻa nau pauʻu, te ne lava maʻu pē ʻo ʻomai ʻenau mātuʻá ke tokoni.
ʻI hono teuteu ʻa e ngaahi lēsoni Palaimelí, naʻe ongoʻi ʻe Telia ko ha fatongia ia ke muimuiʻi pau ʻa e ngaahi naunau fakaʻofisiale ʻa e Siasí. ʻI he ʻaho ʻe taha naʻá ne fakatokangaʻi ai ʻa e fakahinohino ki hono fai ha feinga paʻanga fakataʻu maʻá e Falemahaki ʻa e Fānau Palaimeli ʻi Sōleki Sití. Naʻe fakaʻaiʻai ʻe he feinga paʻangá, ʻa ia kuo fai fakataʻu talu mei he taʻu 1922, ʻa e fānau Palaimeli kotoa pē ke tānaki ha koini ke tokoni ki he fānau kehe ʻoku nau faingataʻaʻiá. Kuo teʻeki mamata ʻa Telia ki ha sēniti ʻe taha ki muʻa, pea naʻe ʻikai ke ne fuʻu ʻilo lahi ki he falemahakí. Pea naʻe ʻikai foki fiemaʻu ke ne fekumi ki he fānau ʻoku faingataʻaʻiá—naʻe ʻosi tokolahi pē ia ʻi heʻene kalasi Palaimelí. Ka naʻá ne kei ongoʻi pē mo e palesiteni fakakolo ko Vikitā Solalí ʻoku totonu ke fai ʻa e feinga paʻangá maʻá e falemahakí.
Naʻe ʻikai ke nau fai ʻa e feinga paʻanga sēniti ʻe tahá, ka naʻe kole ʻe Telia ki he fānaú ke foaki ʻa e vintenes, ko e koini siʻisiʻi taha ia ʻi ʻUlukuaí. Naʻe faʻu ʻe he taha ʻo e mātuʻá ha kiʻi puha papa tānakiʻanga paʻanga, ʻa ia naʻe tautau ʻe Telia ʻi ha holisi ʻi he falelotú. Naʻá ne talaange ki he Palaimelí ʻe tokoni ʻa e paʻangá ki he fānau naʻe puké, ka naʻá ne tokanga ke ʻoua naʻa fakamālohiʻi ʻene kalasí. Naʻe ʻikai ke ne loto ke nau tānaki ha vintenes naʻe ʻikai ke nau lava ʻo maʻu ke foaki.
ʻI he ngaahi māhina hono hokó, naʻe ʻikai ke vakaiʻi ʻe Telia ʻa e kiʻi puhá pe fakahoko mai ko hai naʻe tokoní mo hai naʻe ʻikaí. Taimi ʻe niʻihi naʻe haʻu ʻa e fānaú mo e vintenes, pea ʻi he ngaahi taimi ʻe niʻihi naʻe foaki ʻe he mātuʻá ha ngaahi koini ke tokoni ki he Palaimelí. ʻI he taimi ʻe niʻihi, naʻá ne fanongo ki he tō ha koini ki loto, pea pasipasi ʻa e fānaú ʻi heʻenau fanongo ki he ongó.
ʻI he ʻaʻahi ʻa e kau takimuʻa fakamisioná ki he Kolo Kolonia Suisā, naʻe fakakaukau ʻa Telia ke fakaava ʻa e puhá. Naʻe fonu ange ia ʻi he meʻa naʻá ne ʻamanaki ki aí. ʻI heʻene lau ʻa e koiní, naʻe tānaki ʻe he fānaú ha meimei paʻanga ʻAmelika ʻe ua. ʻI he nima ʻo Teliá, naʻe hangē ʻa e koiní ha koloa mahuʻingá.
Makehe mei aí, naʻá ne fakatokangaʻi, naʻe fakafofongaʻi ʻe he vintenes ʻa e tui mo e feilaulau ʻa e fānau Palaimelí—pea mo e fāmili ʻo e fānaú. Ko e koini kotoa pē ko ha kiʻi paʻanga ia ʻa e fefine uitoú, kuo foaki ʻaki ʻa e ʻofa ki he niʻihi kehé mo e Fakamoʻuí.
ʻI he ʻaho ʻe ua kimuʻa ʻi he ʻaho Kilisimasi ʻo e 1964, naʻe heka tailiili ai ʻa Susi Tausei ʻi ha lēlue. Naʻe ʻosi ʻene ngāue fakafaifekau ʻi he ʻŌfisi ʻo e ʻĒlia Pilitāniá ʻi he Potungāue Langa Fale ʻa e Siasí. Pea naʻá ne foki atu leva eni ki Pevalī. Naʻe fiefia ʻene mātuʻá ʻi he faifai peá ne foki ange ki ʻapí, ka naʻá na kei ʻita pē heʻene fili ke fakaʻosi ʻene ngāue fakafaifekaú kae ʻikai fai ki hona lotó. Naʻe siʻisiʻi ke nau fetalanoaʻaki ʻi ha māhina ʻe hiva.
Naʻe ʻikai fakatomala ʻa Susi ʻi he fili naʻá ne fakahokó. Kuo hoko ʻene ngāue ʻi he Potungāue Langá ke ne ʻomi ai ha kau finemui mo e kau talavou ʻe laungeau ke nau ofi ange ki heʻenau Tamai Hēvaní, pea kuo nau foki ki ʻapi mo e tui ʻoku mālohi ange mo e aʻusia mahuʻinga ʻi he ngāué. Kuo tokoni ʻenau ngaahi ngāué ki hono fakakakato ʻo e ngaahi ngāue langa ʻe meimei tolungofulu ʻi he ʻOtu Motu Pilitāniá, kau ai ha falelotu fakaʻofoʻofa ʻi Pevalī. Pea ʻoku ʻi ai mo ha ngaahi ngaūe langa ʻe fāngofulu tupu kehe ʻoku lolotonga fakahoko. ʻI he fakakaukau ʻa Susi ki heʻenau ngāué, naʻá ne toutou fakakaukau ki ha kaveinga ʻi he ngāue fakafaifekaú: “ʻI heʻetau langa ʻa e ngaahi falelotú, ʻoku tau langa hake ai ʻa e kakaí.”
ʻI he ʻosi ko ʻeni ʻa e ngāue fakafaifekau ʻa Susí, naʻe lava ke ne sio atu ki ha tafaʻaki foʻou ʻi heʻene moʻuí. ʻI he taʻu ʻe taha kuohilí, kuo fakaʻatā ia mo e kau faifekau langa fale kehé ʻe he kau taki fakamisioná ke nau foki ki ʻapi ʻi he faʻahitaʻu Kilisimasí. ʻI ha hulohula Fakaʻosi Taʻu, naʻe fakafeʻiloaki mai ki ai hono kaungāmeʻa mo e kaungāmēmipa ʻo e koló ko Sefo Taningí ke na hulohula uōlosi. ʻI heʻene ʻiloʻi ko ha mēmipa ia ʻo e kōmiti fakafeohi ʻi he koló, naʻá ne fakamataliliʻi ia. Naʻá ne talaange, “Sefo, ʻoku ʻikai fiemaʻu ia ke fuʻu fakamātoato peheni hoʻo fakafeohí.”
Hili iá, naʻá na kamata fetohiʻaki fakakaumeʻa, pea naʻá na fakamaʻu hili pē ha ngaahi māhina siʻi. Naʻe meili foki ʻe Sefo ha foʻi mama taiamoni ke fai ʻaki ʻena fakamaʻu [mo Susí], pea ʻi he taimi naʻe tiliva ai ʻe he tangata tufa meilí [ʻa e foʻi mamá] naʻá ne tūʻulutui ʻo ʻave ia [kia Susi]. Naʻá na palani ke sila ʻi he Temipale Lonitoní hili ʻa e ngāue fakafaifekau ʻa Susí. Ka koeʻuhí ko e tuʻutuʻuni ʻe he laó ke na ʻuluaki mali fakalaó, ʻe ʻuluaki fai leva ʻena kātoanga malí ʻi he falelotu Pevalií.
ʻI he kole ʻa Susí, naʻe toutou ʻaʻahi ai ʻa Sefo ki he ongomātuʻa [ʻa Susí], ko e ʻamanaki ʻe fakavaivai hona lotó [kia Susi] pea mo e Siasí. ʻI he kamataʻangá, naʻe ʻikai tali ʻe he faʻē ʻa Susí ʻa e ngaahi feinga ʻa Sefó, ka naʻe ʻikai fuoloa kuó ne tali lelei ia.
ʻI he tūʻuta ʻa Susi ʻi Pevalií, naʻe talitali lelei ia heʻene mātuʻá ki ʻapi. Ka naʻá na talaange kiate ia he ʻikai ke na ʻalu ki heʻene malí he koeʻuhí ʻe fai ia ʻi he ʻapisiasi ʻo e koló. ʻI he loto-mamahi ʻa Susí, naʻá ne lotua ai mo Sefo ke liliu ʻa e loto ʻene ongomātuʻá.
ʻI he liliu ʻa Susi ki he moʻui hili ʻa e ngāue fakafaifekaú, naʻá ne ʻilo kuo liliu hono koló lolotonga ʻene mamaʻó—pea naʻe ʻikai koeʻuhí ko e falelotu foʻoú. ʻI Pilitāniá, naʻe fakaʻaongaʻi ʻe he kau faifekaú ʻi he taimi ko ʻení ha taimi lahi ange ki hono akoʻi ʻa e kau teuteu papi uluí, pea nau akoʻi ʻa e foʻi fāmilí kotoa ʻi he taimi naʻe malava aí. Kuo mole atu ʻa e vave hono fai ʻo e ngaahi papitaisó, vaʻinga peisipoló, pea mo e ngaahi taumuʻa ngāue fakafaifekau tōtōivi naʻá ne fakaʻaiʻai [ʻa e kau faifekaú]. Kuo hokohoko atu ʻa e ʻikai tali ʻe Palesiteni Makei ʻa e faʻahinga founga ko iá peá ne fakahinohino ki he kau takimuʻa fakalotofonuá ke nau tokoni ki he toʻu tupu naʻe uesia [ʻe he ngaahi founga ko iá], ʻo fakahoko ʻa e meʻa kotoa pē ke poupouʻi ʻa e kau papi ului ko ʻení ke nau nofo maʻu ʻi he Siasí.
Naʻá ne talaki ʻo pehē, “Ko e kāingalotu kinautolu, pea kuo pau ke tau tauhi kinautolu. ʻOku mahuʻinga ʻa hono fakahaofi ʻo e ngaahi laumālié kae ʻikai ko e sitētisitiká. Kuo pau ke tau ngāue fakataha mo e kau talavou mo e kau finemui ko ʻení.”
ʻI he ʻaho ʻe hongofulu kimuʻa pea fai e malí, naʻe tali ai ʻa e lotu ʻa Susi mo Sefó. Naʻe loto ʻa e mātuʻa ʻa Susí ke na haʻu ki he kātoangá. Naʻe loto ʻene tamaí ke ne fakafeʻao ia ʻi he falelotú, pea loto ʻene faʻeé ke ne fokotuʻutuʻu ʻa e maʻu meʻatokoni ʻo e malí ʻi he falelotú.
ʻI he ʻaho 6 ʻo Māʻasi 1965, naʻe tokolahi ha ngaahi kaungāmeʻa ʻo Susi mei he Potungāue Langa Fale ʻa e Siasí naʻa nau omi ki Pevalī ki he malí. Hili ha uike ʻe taha, naʻe fononga atu ʻa Susi mo Sefo ki he Temipale Lonitoní ke silaʻi kinaua. Lolotonga ʻena ʻi he temipalé, naʻe fakamaʻa ʻe he faʻē ʻa Susí ha kiʻi ʻapi siʻisiʻi naʻe fakatau ʻe he ongomeʻa malí maʻanaua ʻi Pevalī.
ʻI he fakakaukau ʻa Susi ki he ngaahi faingataʻa kuó ne ikunaʻí, naʻá ne manatuʻi ʻa e meʻa naʻe talaange ʻe heʻene palesiteni misioná lolotonga ʻa e ngaahi ʻaho faingataʻa ko iá—“ʻE teuteu ʻe he ʻEikí ha founga”—pea naʻá ne ʻiloʻi he taimí ni kuó Ne fakahoko ia.
ʻI he māhina hono hokó, ʻi Sōleki Siti, naʻe fakatahatahaʻi mai ʻe Lute Fangu mo e kōmiti naunau fakalēsoni maʻá e kakai lalahí ha kau takimuʻa ʻe toko uofulu-mā-fā mei he ngaahi houngalotu kehekehe ʻo e Siasí ke fokotuʻu ha palani ki hono akoʻi ʻo e Fineʻofá, lakanga fakataulaʻeikí, mo e ngaahi kalasi Lautohi Faka-Sāpaté. Ko e fokotuʻú ko e ola ia ʻo e ako taʻu ʻe tolu ʻa e kōmití ʻo e ngaahi palani lēsoni ʻa e Siasí ʻi he kuohilí. Naʻe tataki ʻa e fakatahá ʻe he sea ʻo e kōmití ko Tōmasi S. Monisoni, ʻa ia kuo uiuiʻi ki he Kōlomu ʻo e Kau ʻAposetolo ʻe Toko Hongofulu Mā Uá ʻi he taʻu ʻe taha mo e konga kuo ʻosí.
Kuo ʻosi fakafeʻiloaki ʻe he Fakataha Alēlea Fakafekauʻaki ki he Ngaahi Meʻa Kotoa ʻa e Siasí, ʻa ia naʻa nau tokangaʻi ʻa e polokalama fakafekauʻaki foʻoú, ha ngaahi liliu lahi ne mahuʻinga ki he Siasí. Naʻe kau ai ʻa hono faʻu ʻo e ngaahi kōmiti pule ki he lakanga fakataulaʻeikí mo e ngaahi fakataha alēlea fakauōtí ke tokoni ki he kau taki fakalotofonuá ke nau ngāue fakataha mo lelei ange. Ke tokoni ki he ngaahi hohaʻa fekauʻaki mo e tuʻunga lelei ʻo e ʻapí mo e fāmilí, kuo fakamamafaʻi foki ʻe he fakataha alēlea fakafekauʻakí ha polokalama ʻe ua, ko e faiako fakaʻapí mo e efiafi fakafāmili ʻi ʻapí, ke fakamālohia ʻa hono ako ʻo e ongoongoleleí.
Kuo tuʻuloa ʻa e ongo polokalama ko ʻení ʻi he Siasí. Talu mei he taimi ʻo e palōfita ko Siosefa Sāmitá, kuo toutou ʻaʻahi ʻa e kau faiako ʻi he uōtí pe kau faiako ʻo e poloká ki he ngaahi ʻapi ʻo e Kāingalotú ke tokoni ki heʻenau tuʻunga lelei fakalaumālié mo fakatuʻasinó. Naʻe liliu ʻe he polokalama faiako fakaʻapí ʻa e founga ko ʻení, ʻo kole ai ki he kau maʻu lakanga fakataulaʻeikí ke nau ʻaʻahi ki he ngaahi ʻapi ʻo e Kāingalotú ʻi he māhina kotoa ke fai ha ngaahi ngāue tokoni faka-Kalaisi pea fakahoko mo ha pōpoaki fakafekauʻaki mei he Siasí.
Naʻe tatau pē foki ia mo hono fakahoko ʻe he Kāingalotú ʻa e ngaahi efiafi fakafāmili ʻi ʻapí talu mei he taʻu 1915, ʻi hono poupouʻi ʻe Palesiteni Siosefa F. Sāmita mo hono ongo tokoní ʻa e Kāingalotú ke nau fakaʻatā ha efiafi ʻe taha pe lahi ange ʻo e māhiná ke fakahoko ai ha ngaahi lēsoni mo e ngaahi ʻekitivitī ʻo e ongoongoleleí ʻi ʻapi. ʻI he taimi ní, kuo tuku mai ki he Kāingalotú ke nau fai ʻa e efiafi fakafāmili ʻi ʻapí ʻi he uike kotoa pē pea fakaʻaongaʻi ha tohi lēsoni kuo toki pulusi ʻe he Siasí.
Neongo ia, ka kuo hokohoko atu ʻa hono fakatoloi ʻa e naunau fakalēsoni fakafekauʻaki ʻa e Siasí. ʻI he kamatá, naʻe fakakaukau ʻa ʻEletā Hāloti B. Lī kuo faʻu ʻe he ngaahi kōmiti fakafekauʻaki kehekehé ha ʻū palani lēsoni ki he toʻu kotoa pē ʻi he taʻu 1963, ka naʻa nau toloi ʻa e taimi ke ʻosi aí ki he taʻu 1966 kae lava ke faʻu ha ngaahi lēsoni maʻá e polokalama efiafi fakafāmili ʻi ʻapí.
ʻI hono fakafeʻiloaki ʻe ʻEletā Monisoni ʻa e fokotuʻu ki he naunau fakalēsoní ki he kau takimuʻa kuo fakatahataha maí, naʻá ne fakahaaʻi ʻa e faingataʻa ʻo hono faʻu ʻa e ngaahi lēsoni foʻoú, tautautefito he kuo angamaheni ke faʻu pē ʻe he ngaahi houalotú ʻenau naunau fakalēsoni pē ʻanautolu ʻi he kuohilí.
Naʻá ne pehē, “He ʻikai faingofua ʻa e felotoí. ʻOku totonu ke tau fakaʻaongaʻi ʻa e fakahinohino ʻi he folofolá ʻi he 3 Nīfaí ʻa ia naʻe folofola ai ʻa e ʻEikí, ‘ʻOua naʻa fai foki mo ha ngaahi fakakikihi ʻiate kimoutolu.’”
Lolotonga ʻa e fakatahá, naʻe fakahoko mai ai ʻe Lute ʻa e ngaahi palani ʻa e kōmití ki he naunau fakalēsoni maʻá e houʻeiki fafiné. ʻI hono faʻu fakaangaanga ʻe he kōmití ʻenau fokotuʻú, naʻa nau talanoa ai mo e houʻeiki fafine ʻi he ngaahi tūkunga kehekehe—mali, teʻeki mali, vete-mali, pe uitou. Naʻe fakamahino mai ʻe he fokotuʻú ʻa e ngaahi faingataʻa kehekehe ʻoku fehangahangai mo e houʻeiki fafiné ʻi he māmani ʻo onopōní pea fakamamafaʻi ʻenau taumuʻa ʻi he palani taʻengata ʻa e ʻOtuá.
Hangē ko hono fakamatalaʻi ʻe Luté, ʻe fakamamafaʻi ʻe he naunau fakalēsoni foʻou maʻá e houʻeiki fafiné, hangē ko e naunau fakalēsoni maʻá e houʻeiki tangata ʻi he Siasí, ʻa e mahuʻinga ʻo e lakanga fakataulaʻeikí mo e fatongia ʻo e hoko ʻa e ʻapí ko e uho ʻo hono ako ʻo e ongoongoleleí. Ko hono ngaahi taumuʻa tefitó ke ueʻi ʻa e houʻeiki fafiné ke nau moʻui ʻaki mo akoʻi ʻa e ongoongoleleí, fai ʻa e ngaahi ngaūe ʻofa ki he niʻihi kehé, maʻu ʻa e ʻilo lelei ki he tauhiʻapí, pea fakatupulaki ha ongoʻi ola lelei ʻo e moʻuí ʻo fakafou ʻi he ngaahi akonaki ʻa Kalaisí.
ʻI he ngaahi māhina hili hono fakaʻaliʻali ʻo e fakamatalá, naʻe tanganeʻia ʻa Lute ʻia Pele Sipāfooti mo e kau takimuʻa kehe ʻo e Fineʻofá ʻa ia naʻa nau fengāueʻaki fakataha mo e kōmití. Ka naʻe ʻikai loto-vēkeveke ʻa e tokotaha kotoa pē fekauʻaki mo e ngaahi liliu ʻe hoko maí. ʻI hono fokotuʻu ʻe Lute mo e kau mēmipa kehe ʻo e kōmití ʻa e ngaahi liliu ki he naunau fakalēsoní, naʻe ʻikai tali ʻe ha kau mēmipa ʻe niʻihi ʻo e poate Fineʻofá ʻenau ngāué.
Naʻe tokoni ʻa e tui ʻa Lute ki he fiemaʻu ke ʻi ai ha fakafekauʻakí ke ne loto-vilitaki ai neongo ʻa e ngaahi palopalema ko ʻení. Naʻá ne lava ʻo vakai ki hono fakamālohia ʻe he fakafekauʻakí ʻa e Siasí mo hono kāingalotú. Ko e polé ko hono kumi ha founga ke tokoni ai ki he niʻihi naʻe taʻe-tui ki he polokalamá ke nau maʻu ha mahino kakato ki he palaní fakalūkufua.
ʻI he taimi tatau ko ʻení, naʻe kei feinga pē ʻa Lamā Viliami ke maʻu ha visa taʻe-fakangatangata ki Naisīlia. Naʻá ne hanganaki atu ke fakakakato hono ngaahi fatongia ko e kaumātuʻa pule ʻo e fonuá, ka te ne fakahoko fēfē nai ia kapau ʻoku ʻikai loto ʻa e puleʻangá ke ne folau ange?
Talu mei heʻene folau ki Naisīlia ʻi he taʻu 1961, kuó ne lava pē ʻo maʻu ha visa taimi nounou ʻe taha naʻe fakangofua ai ia ke ne folau ki he fonuá ʻi ha uike ʻe ua ʻi Fēpueli 1964. ʻI he taimi ko iá, kuó ne feinga mo hono ongo kaungāmeʻa ko Sālesi ʻAku mo Tiki ʻOpotá ke tohi tangi ki he puleʻangá ke fakaʻatā ʻa e kau faifekaú ki Naisīlia, ka naʻe ʻikai tali ʻe he tokotaha fakapuleʻanga naʻe faituʻutuʻuni ki heʻenau keisí ke fakataha mo kinautolu.
Naʻe foki loto-mamahi ʻa Lamā ki ʻIutā ʻi he ʻikai ke ola lelei ʻene feingá, ka naʻe ʻikai ke ne loto ke liʻaki hono ngaahi kaungāmeʻa ʻi ʻAfilika Hihifó. ʻI heʻene tokoní, naʻe fokotuʻu ai ha paʻanga sikolasipi ke lava ha fānau ako Naisīlia ʻo ako ʻi he ʻUnivēsiti Pilikihami ʻIongí. Naʻe aʻu mai ʻa e fānau akó ʻi he konga kimuʻa ʻo e 1965, pea ko ha toko ua ai ko ʻOsikā ʻUto mo ʻAtimi ʻEkipeniongo, naʻa na kau ki he Siasí.
ʻI he taimi tatau ʻi Naisīlia, naʻe ʻilo ʻe Tiki ʻOpota kuo maʻu heʻene kulupu lotú—ʻa ia naʻe ʻiloa fakalotofonua ko e “Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní”—ha fakalāngilangi mei he puleʻangá, ʻo fakahā mai ai kuo kamata ke leleiʻia ha niʻihi ʻi Naisīlia [ʻi he Siasí]. Naʻe ʻikai ke taʻe-fakatokangaʻi ʻa e ngaahi ngāue ʻa Lamā ke ʻomi ha ngaahi faingamālie fakaako maʻá e fānau ako Naisīliá, fakataha mo hono toutou taukapoʻi ia ʻe hono ngaahi kaungāmeʻa ʻi Naisīliá. Neongo naʻe ʻikai tali ʻe he puleʻanga Naisīliá ke ʻoange haʻane visa taʻe-fakangatangata, ka naʻá ne toe maʻu ha visa folau taimi nounou ʻi ʻAokosi 1965. ʻI he fakangofua mo e poupou ʻa Palesiteni Makeí, naʻe toe foki ai ʻa Lamā ki Naisīlia ʻi ʻOkatopa.
Hili ʻa e tūʻuta ʻa Lamā ʻi Lākosí, naʻá ne fakataha mo ha loea naʻe fakatuʻamelie ki hono fakatou maʻu ha visa taʻe-fakangatangata mo hano fakalangilangiʻi ʻo e Siasí. Hili ha ʻaho ʻe ua, naʻe talanoa ʻa Lamā mo ha kau faiongoongo fakaʻofisiale ʻe meimei toko hongofulu-mā-ua fekauʻaki mo e Siasí. Naʻá ne folau leva ki ʻEnuku, ko e kolomuʻa ʻo Naisīlia ʻi he Vāhenga Hahaké, pea feohi ai mo e minisitā ʻo e vahefonuá, ʻa ia naʻe ʻikai ke ne tali ʻa e kofí, tií mo e kava mālohí ʻi he taimi naʻe ʻi ai ʻa Lamaá ko ʻene fakaʻapaʻapaʻi ʻa e tui [ʻa Lamaá].
ʻI he feituʻu kotoa pē naʻe ʻalu holo ai ʻa Lamaá, naʻe fehuʻi ange ʻe ha kakai foʻou pe ʻe lava nai ke nau hoko ko ha mēmipa ʻo e Siasí. Naʻe fakapapauʻi ange ʻe Lamā kapau ʻe fokotuʻu ʻa e Siasí ʻi honau fonuá, ʻe lava pē ke papitaiso kinautolu. ʻI ha ʻaho Sāpate ʻe taha, naʻe fakatahataha mai ha kakai ʻe toko fāngeau tupu ke fanongo ki heʻene leá.
ʻI he ʻaho 6 ʻo Nōvemá, naʻe hoko ʻa e ʻaʻahi ki he ʻōfisi palēmia ʻi ʻEnukú, ke fakalōloa ʻaho ʻe hivangofulu ai ʻa e visa ʻa Lamaá, pea naʻe kamata ngāue leva ha tokotaha ngāue fakapuleʻanga ki hono lesisita ʻo e Siasí ʻi Naisīliá. Naʻe foki ʻa Lamā ki hono loki ʻi he hōtelé mo ha ʻuhinga lelei ke fiefia ai. Hili ʻa e ngaahi taʻu lahi ʻo e fakafeʻātungiá mo e fāifeinga holó, kuo hangehangē ʻe faifaiange peá ne maʻu ʻa e ngofua naʻá ne fiemaʻu ke kamataʻi ʻa e ngāué.
Naʻá ne fanongo ki ha tukituki ʻi he matapaá. Naʻe ʻomi ʻe he sekelitali fakataautaha ʻa e minisitā ʻo e vahefonuá ha mākoni kiate ia mei he ʻuluʻi ʻōfisi ʻo e Siasí.
Naʻe hā ai, “Taʻofi ʻa e ngaahi alea ʻi Naisīliá. Foki mai ki ʻapi ʻi he vave tahá.” Naʻe fakamoʻoni hingoa ai ʻa e Kau Palesitenisī ʻUluakí, pea naʻe ʻikai ha toe fakamatala kehe ʻe ʻomi ai.
ʻI he taimi naʻe mavahe ai ʻa Lamā Viliami mei Naisīliá, naʻe nofo ʻa Kīsepa ʻOliva ʻi Palemou, ʻĪtali, ʻo ne falala ki he talaʻofa ʻe ʻi ai e ʻaho e aʻu mai ai ʻa e Siasí ki he koló. ʻI ha senituli ʻe taha kimuʻa ai, naʻe feinga ha kau faifekau ke fokotuʻu ʻa e Siasí ʻi ʻĪtali, ka naʻe ʻikai fuoloa ʻenau ngāué. Ko e tokolahi ʻo ʻenau kau papi uluí ko e kau Uolotenisiani Palotisani mei he tokelau-hihifo ʻo ʻĪtalí, ʻa ia naʻa nau hikifonua mai ki ʻIutā kimuʻa pea mavahe ʻa e kau faifekaú mei he fonuá ʻi he 1860 tupú. Neongo ia, ka ko Kīsepá naʻe ʻikai ko ha taha ia ke nofonoa ʻo tali ke foki ange ʻa e kau faifekaú. Hili ha taimi nounou ʻo ʻene tūʻuta mei ʻAsenitiná, naʻá ne kamata ke vahevahe ʻa e ongoongoleleí mo hono kāingá, kaungāʻapí, mo e ngaahi kaungāmeʻá.
Naʻe kiʻi momou ha niʻihi koeʻuhí ko ʻene vēkeveké, pea nau tāpuni ʻenau matapaá pe fekau ke ne mavahe mei honau ʻapí. Ka ʻi he ʻaho ʻe taha, naʻe fehuʻi ange ʻe hono tuongaʻane ko ʻAnitonino Kiulinitanó pe ko e hā e ʻuhinga ʻoku ʻikai ke ne ʻalu ai ki he Misa ʻa e Katoliká. ʻI heʻene talanoa ange fekauʻaki mo e Siasí, Siosefa Sāmita mo e Tohi ʻa Molomoná, naʻe kamata ke tokanga [ʻa hono tuongaʻané]. Kuo ʻaʻahi [ʻa ʻAnitonino] ʻi ha ngaahi taʻu lahi ki ha ngaahi siasi kehekehe ka naʻe ʻikai pē ke ne ongoʻi fiemālie ai.
Hili iá, naʻe talanoa ange ʻe Kīsepa fekauʻaki mo e ongoongolelei kuo fakafoki maí ʻi he meimei ʻaho kotoa pē. Naʻe fuʻu fiefia [ʻa Kīsepa] ʻi he vave ʻa e kole ange [ʻe ʻAnitonino] ke papitaiso iá. Ka koeʻuhí ko e ʻikai ha kau faifekau ʻi Sisilií, naʻe ʻikai ha taha ke ne fakahoko ʻa e ouaú.
ʻI he taimi ko iá, naʻe tokangaʻi ʻe he Misiona Suisalaní ʻa ʻĪtali mo e ngaahi fonua kaungāʻapi kehekehe, pea naʻe fuʻu femoʻuekina ʻa e kau faifekaú ʻo ʻikai ai ke lava ʻo fakakakato ʻa e meʻa kotoa pē. Neongo naʻe ʻi ai ha ngaahi haʻofanga lotu tokosiʻi ʻe niʻihi ʻi he ngaahi ʻapitanga tau maluʻi fonua ʻAmelika ʻi ʻĪtali, ka naʻe toki maʻu pē ʻe he Siasí ʻa e fakangofua ke malangaʻi ʻa e ongoongoleleí ʻi he fonuá. Naʻe meimei ke ʻi he tafaʻaki fakatokelaú ʻa e kau faifekau ʻe toko tolungofulu pe fāngofulu naʻe ngāue ʻi ʻĪtalí, ʻo nau mamaʻo ai mei he motu ʻo Kīsepa mo ʻAnitoninó. Ka, naʻe kei faitohi pē ʻa ʻAnitonino ki he ʻuluʻi ʻōfisi ʻo e misioná, pea naʻe meili mai leva ʻe he palesiteni misiona ko Lenitolo Mapeí ha ʻū tohi ʻe niʻihi ʻo e Siasí mo ha tatau ʻo e Tohi ʻa Molomoná.
Pea ʻi he efiafi ʻo e ʻaho 22 ʻo Nōvema 1965, naʻe fakaʻohovale kia Kīsepa ʻa e ʻaʻahi ange hono tuongaʻané. Naʻe fakahoko ange ʻe ʻAnitonino kuo haʻu ha ongo tangata mei he Siasí. Naʻe ui leva ʻe Kīsepa hono husepānití mo e fohá, pea nau muimui atu ʻia ʻAnitonino ki hono ʻapí.
Naʻe toki ʻilo ʻe Kīsepa ko e taha ʻo e ongo tangata naʻe ʻaʻahi maí ko Palesiteni Mapei. Ko ha tangata ʻAmelika ia naʻe tupu lōloa mo fiefia, pea naʻe ʻikai poto ʻi he lea faka-ʻĪtalí. Ko e tangata ʻe tahá ko Vinisenisiō ti Falanisesikā, ko ha tangata ʻĪtali ʻo e Kau Māʻoniʻoni ʻi he Ngaahi ʻAho Kimui Ní ʻoku nofo ʻi he motú ʻi ha houa nai ʻe fā ʻene mamaʻo [meia Kīsepa mo hono tuongaʻané]. ʻI he 1910, naʻe maʻu ai ʻe Vinisenisiō ha tatau taʻe-takafi ʻo e Tohi ʻa Molomoná lolotonga ʻene ako ke hoko ko ha faifekau Palotisani ʻi Niu ʻIoke Sití. Naʻá ne loto-vēkeveke ke lau ia peá ne tali lelei ʻa e pōpoaki ai fekauʻaki mo Sīsū Kalaisí. Naʻá ne faʻa malanga mei he tohí he taimi ʻe niʻihi, pea ʻi heʻene foki ki ʻĪtalí, naʻá ne ako lahi ange ki he Siasí pea fetuʻutaki leva ki ai. Hili ha ngaahi taʻu lahi ʻo e tatali ki ha taha ʻokú ne maʻu ʻa e mafai ʻo e lakanga fakataulaʻeikí ke haʻu ki Sisilií, naʻe faifai pea papitaiso ia ʻi he taʻu 1951.
Naʻe talanoa ʻa Kīsepa mo hono fāmilí mo Vinisenisiō pea mo Palesiteni Mapei ʻi ha ngaahi houa lahi. Pea naʻe pehē leva ʻe he palesiteni misioná kuo mateuteu ʻa ʻAnitonino ke papitaiso.
ʻI he hengihengi hokó, naʻe fakatau ai ʻe Kīsepa, ʻAnitonino, Palesiteni Mapei mo Vinisenisiō ha ʻū vala hina pea heka tekisī atu ki ha matāfanga naʻe ʻikai kakaiʻia ʻa ia naʻe lava ke nau fakahoko ai ʻa e ouaú. Naʻe hoko ha kiʻi tafaʻaki ūū ko ha loki fetongi, pea naʻe hoko e fanga fuʻu maka ʻi he matāfangá ko ha feituʻu ia ke tangutu ai ʻa Vinisenisiō ʻo hoko ko ha fakamoʻoni ki he papitaisó.
Naʻe lue fetākinima atu ʻa Palesiteni Mapei mo ʻAnitonino ʻi he funga makamaka iiki mo māsila ʻo e matātahí. ʻI he feinga ʻa Palesiteni Mapei ke matuʻuaki ʻa e momokó mo e fasi ʻa e peaú, naʻá ne lea ʻaki ʻa e lotu ʻo e papitaisó pea fakauku hifo ʻa ʻAnitonino ʻi he vaí. Naʻe foki mai leva ʻa e ongo tangatá ki he matātahí ʻo fetongi ki ha vala mātuʻu, pea naʻe hilifakinima ʻe Vinisenisiō ʻa ʻAnitonino ke ne hoko ko ha mēmipa ʻo e Siasí.
Naʻe ongoʻi moʻoni ʻe Kīsepa ha fiefia mo e ʻofa ʻi heʻene mātā ʻa e ouaú. Kimui angé, naʻá ne meili ha tohi ongo moʻoni ki hono ʻofefine ko Maliá, ʻa ē naʻá ne kei nofo pē ʻi ʻAsenitiná. Naʻá ne fakahā ʻi he loto-vēkeveke, kuo kau ʻa ʻAnitonino ki he Siasí. Ko ia ʻa e fuofua tokotaha ke papitaiso talu mei he foki mai [ʻa Kīsepa] ki Palemoú.