Vahe 38
Moʻoni mo Taʻefaʻalaua
ʻI Fēpueli 2011, naʻe ʻohovale ʻa Mākou mo Kalōtia Vilavisenisio ke maʻu ha ʻīmeili meia Sosiua Peki, ko ha ʻētita ki he ngaahi makasini ʻa e Siasí ʻi Sōleki Sití. ʻI he taʻu kimuʻá, naʻe haʻu ʻa Sosiua ki ʻEla Koka, ʻEkuatoa, ko e konga ʻo ha ngāue ke pulusi ha ngaahi fakamatala lahi ange ʻi he makasiní fekauʻaki mo e Kāingalotú fakaemāmani lahi. Naʻe feohi ʻa Sosiua mo e fāmili Vilavisenisió mo e kāingalotu kehe ʻo e koló ʻi ha ngaahi ʻaho lahi, naʻá ne ʻalu ki he ngaahi fakatahaʻanga ʻa e Siasí mo e kalasi seminelí, mo faitaaʻi ʻa e koló mo e kakai ʻoku nofo aí.
ʻI he taimi ʻo e ʻaʻahi ʻa Sosiuá, ko e toki taʻu taha pē ia hono fokotuʻu ʻa e kolo ʻo e Siasí ʻi ʻEla Koká. Ka kuo tupulaki ia mei he kau mēmipa ʻe toko uofulu mā valú ki he toko valungofulu mā tolu. Naʻe fakamālōʻia ʻe Mākou e tupulakí ko e ngaahi ngāue ʻa e koló ke tokoniʻi e tokotaha kotoa ke nau ongoʻi ʻoku fiemaʻu mo ʻofaʻi kinautolu. Naʻe talaange ʻe Mākou kia Sosiua, “ʻOku mau feinga ke fai ki he naʻinaʻi ko ia ʻa Palesiteni Kōtoni B. Hingikelií ʻoku fiemaʻu ʻe he tokotaha ului foʻou kotoa pē ke fafangaʻi ia ʻaki e folofola lelei ʻa e ʻOtuá, ke ʻi ai hano kaungāmeʻa, pea ʻi ai hono fatongia.” Naʻe poupou ki ai ʻa Kalōtia, ʻa ia naʻe kei hoko ko e palesiteni ʻo e Kau Finemuí ʻi he koló. Naʻá ne pehē, “ʻI he fuofua taimi ʻoku haʻu ai e kakaí ki he lotú, ko e meʻa ʻoku nau mahuʻingaʻia aí ko e founga hono talitali kinautolú. Ko ia ʻoku mau akoʻi ki he kau finemuí ʻa e mahuʻinga ʻo e laumālie kotoa pē ki he ʻEikí.”
Kuo vahevahe ʻe he tokolahi ʻo e kāingalotú ha ngaahi talanoa ongo moʻoni mo ha ngaahi fakamoʻoni mo Sosiua. Naʻe talanoa ʻa Loutesi Senisi, ko e palesiteni Fineʻofa ʻi he koló, ki he fiefia naʻá ne maʻu mo ʻene kau palesitenisií ʻi heʻenau tokoniʻi e kau fafine ʻi he koló. Naʻá ne pehē, “ʻOku mau ofi ange kiate kinautolu ʻi heʻenau fepaki mo e ngaahi palopalemá. ʻOku mau fakahā ange ʻoku ʻikai ke nau tuenoa, ʻoku mau maʻu e tokoni ʻa Sīsū Kalaisí pea mo e koló.”
Ko ʻeni, ʻi he ʻīmeili ʻa Sosiua ki he fāmili Vilavisenisió, naʻá ne talaange naʻá ne fakatahatahaʻi ha kiʻi vitiō nounou maʻá e ngaahi makasini ʻa e Siasí. Naʻe kau ʻa e vitioó ʻi ha ngaahi vitiō foʻou he ʻinitanetí maʻá e fānau Palaimelí. Naʻe ui ia ko e “One in a Million,” pea ʻoku fakaʻasi ai e fānau mei he funga ʻo e māmaní ʻoku nau talanoa kau ki heʻenau moʻuí mo vahevahe ʻenau fakamoʻoní. ʻI he vitiō ʻe taha, naʻe talanoa ai ha kiʻi tamasiʻi ʻi ʻIukuleini kau ki hono fakaafeʻi ia ʻe Palesiteni Tōmasi S. Monisoni ke ne ʻai ha meʻi sima ki he makatuliki ʻo e temipale foʻou ʻi Kieví. Ko ha vitiō ʻe taha, naʻe talanoa ha kiʻi taʻahine ʻi Samaika ki heʻene feinga ke hoko ko ha faʻifaʻitakiʻanga lelei ʻi hono ʻapiakó.
Naʻe meimei miniti ʻe taha mo e konga e lōloa ʻo e foʻi vitiō takitaha, pea naʻe fie ʻilo ʻe Sosiua pe ʻe fakaʻatā ʻe Mākou mo Kalōtia hona foha taʻu ono ko Saiá ke ʻasi ʻi ha vitiō. Naʻe faingataʻa kia Saia ʻa e hiki ʻo mamaʻo mei hono kāingá mo e kalasi Palaimelí. Ka ʻi he taʻu ʻe taha kuo ʻosí, ʻi he tokolahi ange e fānau ne omi ki he lotú, naʻá ne lava ʻo toe ʻalu ki he Palaimelí. Naʻe fakakaukau ʻa Kalōtia ʻe hoko e vitioó ko ha faingamālie lelei [maʻa Saia] ke ne manatuʻi hono tuʻunga fakalangí.
Naʻe ʻave ʻe Sosiua ha ngaahi fehuʻi kia Saia fekauʻaki mo e meʻa ʻokú ne saiʻia ke fakahokó, meʻatokoni, mo e ngaahi himi ʻa e Siasí ʻokú ne saiʻia aí, pea naʻe tokoni ʻa Kalōtia mo Mākou ke teuteuʻi ʻene ngaahi talí. Naʻe vēkeveke ʻa Saia ke hiki e vitioó mo Kalōtia, pea naʻe mahuʻingaʻia ʻa Kalōtia ʻi he taimi naʻá na fakaʻaongaʻi ke fakahoko ai iá.
Naʻá na ʻave ʻa e faile ʻo e hikí kia Sosiua, pea naʻe fakatahaʻi ia mo ha ʻū tā naʻá ne faitaaʻi lolotonga ʻene ʻaʻahi ki ʻEla Koká. Hili ha kiʻi taimi mei ai, ʻi he ʻosi e vitioó pea tuku hake ʻi he ʻinitanetí, naʻe tangutu ʻa e fāmili Vilavisenisió ʻi ha komipiuta ʻi honau lotofalé ke mamata ai. Naʻe fiefia ʻaupito ʻa Saia ke sio pe naʻe fēfē.
Naʻe kamata e vitioó ʻaki ha laʻitā ʻo e fāmilí. Naʻe lea mai leva e kiʻi leʻo ʻo Saiá ʻi he lea faka-Sipeiní, “Ko hoku hingoá ko Saia, pea ko ʻeku haʻú mei ʻEkuatoa.” Naʻe ʻasi hake ha ʻū tā ʻo ʻEla Koka, pea naʻe fakamatalaʻi ʻe Saia e fanga manupuna lanu fakaʻofoʻofa mo e fanga monumanu ʻi he koló pea pehē foki ki he meʻakai mo e sipoti ʻokú ne saiʻia taha aí. Naʻá ne talanoa foki kau ki heʻenau hiki ki ʻEla Koka kimuʻa pea fokotuʻu e koló. Naʻá ne pehē, “Naʻe ʻikai ke ʻi ai ha lotu ke mau ō ki ai. Ne ʻikai fuoloa ne hiki mai ha ngaahi fāmili kehe ki heni, pea tokolahi ange e kakai naʻe papitaisó.”
Naʻá ne pehē, “Ko e kau faifekau kotoa kitautolu! ʻOku tokolahi ʻaupito he taimí ni hoku ngaahi kaungāmeʻa ʻi he Palaimelí. ʻOku mau hiva fekauʻaki mo Sīsū mo e Tamai Hēvaní ʻo hangē pē ko e fānau kotoa ʻi he funga ʻo e māmaní. ʻOku ou saiʻia hono hivaʻi e ʻFānau Au ʻa e ʻOtuá.ʼ”
ʻI he tangutu ʻa Kalōtia mo hono fohá, naʻá ne ofo ʻi he lava ʻa e kakai ʻi he feituʻu kotoa pē he taimí ni ʻo mamata ki he fiefia lahi hono fāmilí ʻi he ongoongoleleí. Naʻe fakamanatu ange ʻe he vitioó kiate ia naʻe tokangaekina ʻe he ʻOtuá ʻa e ngaahi feituʻu hangē ko ʻEla Koká—mo ngāue ʻi ha kakai hangē ko ia, ko Mākou, Saia, mo e toenga ʻo e Kāingalotu ʻi he koló.
Naʻá ne fakaʻamu ʻe fakamanatu ange ʻe he vitioó kia Saia naʻá ne kau ki ha houalotu lahi mo mahuʻinga hangē ko e Palaimelí—pea naʻa mo ʻene kei siʻí, naʻá ne lava ʻo tokoni ki he ʻEikí.
ʻI he konga kimui ʻo Fēpueli 2011, naʻe ʻave fakataautaha ai ʻe ʻEma Henanitesi ha fakaafe fakaʻosi ako ki heʻene tamaí. ʻI he taʻu ʻe ono kimuʻá, naʻe fakafepakiʻi ʻe heʻene tamaí ʻene mali mo hono husepāniti ko Hekitā Tēvitá, koeʻuhí naʻá ne fakakaukau ʻe taʻofi ai ʻene akó. Ka ʻi he tokoni fakapaʻanga ʻa e Paʻanga Tokoni Fakaako Tuʻumaʻú, naʻe maʻu ʻe ʻEma ha mataʻitohi ʻi he māketí mei ha ʻunivēsiti ʻiloa ʻi Honitula.
Naʻe fiefia ʻene tamaí koeʻuhí ko ʻEma, pea naʻe laukau ʻaki ia ʻe ʻEma. Kuo fuoloa pē ʻa e liliu e fakakaukau ʻene tamaí fekauʻaki mo ʻene malí. ʻI he ofi ke fakahoko e malí, naʻe lotua ʻe ʻEma ke fakamolū e loto ʻo ʻene tamaí. Pea naʻe tokoni e faʻē ʻa ʻEmá ke ʻilo heʻene tamaí ko Hekitā Tēvitá ko ha tokotaha lelei ia maʻa hona ʻofefiné. Kimuí ni ange, naʻe hanga ʻe he ngaahi ngāue fakaetauhi ʻa ha palesiteni faivelenga ʻo e kōlomu kaumātuʻá, fakataha mo ha loto-holi fakamātoato ke haʻu kia Kalaisi ʻo fai ha ngaahi fuakava mo Iá, ʻo fakafoki mai ʻene tamaí ki he siasí hili haʻane mavahe ʻi ha ngaahi taʻu lahi.
Naʻe fiefia ʻa ʻEma ʻi he foki mai ʻene tamaí ki he Siasí. Naʻá ne lotua foki mo ʻene faʻeé ʻi ha ngaahi taʻu lahi ke liliu hono lotó kae lava honau fāmilí ʻo ʻalu fakataha ki he fale ʻo e ʻEikí. Naʻe tali e ngaahi lotú ni ʻi he pongipongi ʻaho 1 ʻo ʻEpeleli 2010, ʻi he aʻu atu ʻa ʻEma mo e konga lahi hono fāmilí ki he Temipale Kuatemala Sití ke silaʻi kinautolu ki he nofo taʻengatá. Naʻe tafitonga ʻa e langí, pea fakaʻofoʻofa e matalaʻiʻakau ne toki tō foʻou ʻi he ngoue ʻo e temipalé ʻi heʻene hū atu ki he temipalé mo ʻene tamaí, faʻeé, mo e tokouá.
Naʻe ongoʻi ʻe ʻEma ʻa e Laumālié ʻi heʻene hū atu ki he loki silá ʻo sio ki he tūʻulutui ʻene ongomātuʻá ʻi he ʻōlitá. Naʻe lōmekina kinautolu ʻe he melinó mo e ʻofá ʻi heʻenau pikinima mo fesiofakí. Hili e ouaú, naʻa nau fāʻofua ʻi he loki silesitialé mo fetāngihi ʻi he loʻimata ʻo e fiefia. Ko ha tangata fakalongolongo e tamai ʻa ʻEmá, ka naʻe lava ke ongoʻi ʻe ʻEma ʻa e ngaahi ongo hono lotó ʻi heʻena fāʻofuá.
Ko e hili ʻeni ha taʻu ʻe taha mei he silá, naʻá na fakatou aʻusia mo Hekitā Tēvita ʻena ngaahi taumuʻa fakaakó lolotonga hono faʻu ha fāmilí mo fua fatongia maʻu pē ʻi he Siasí. Naʻe ʻilo ʻe ʻEma ʻene manako ki he māketí, pea ko ʻeni naʻá ne maʻu ʻa e ʻilo mo e ngaahi meʻangāue ke ne feʻunga ai ki heʻene ngāué. ʻI he maʻu mataʻitohi ʻa Hekitā Tēvita ʻi he meʻa fakapaʻangá, naʻá na fakatou maʻu ai ha paʻanga hū mai lelei ange ke tauhi ʻaki hona fāmilí. Ko e mahuʻinga tahá, naʻe taukei ange ʻa ʻEma lolotonga ʻene akó, ʻo ne ako ai e founga ke ikunaʻi e ngaahi faingataʻá mo fakafalala ki he ʻEikí.
ʻI he kamataʻangá, naʻe lōmekina ia ʻe he akó. Naʻe ʻi ai ha taimi naʻá ne fakakaukau ai naʻe ʻikai maʻu ʻe hona fāmilí ha paʻanga feʻunga ke fakaʻosi ʻene akó. Ka naʻe toʻo e hohaʻa ko iá ʻe he Paʻanga Tokoni Fakaako Tuʻumaʻú, pea naʻe fakaivia ia ʻe he poupou ʻa hono fāmilí ke tulifua ki heʻene ngaahi fakaʻānauá mo fakaʻaiʻai ia. Naʻe tupulaki ʻene houngaʻia ki he ʻEikí, pea naʻá ne lau mo Hekitā Tēvita ʻena fua fatongia ʻi he Siasí ko ha faingamālie ke fakamālō ai mo fakahā ʻa e ʻofa ki he Fakamoʻuí. Ko e taimi ní, naʻe vēkeveke ʻa ʻEma ke fakaʻaongaʻi ʻene akó mo totongi fakafoki ʻene nō PEF. Pea naʻá ne tui ʻokú ne malava ke maʻu ha ngaahi lavameʻa lahi ange ʻi he kahaʻú.
ʻI he ʻaho 4 ʻo Māʻasi 2011, ko e ʻaho ia ne ʻosi ai ʻa ʻEma mei he akó, naʻe toe fakataha mai hono fāmilí, ko e taimi ko ʻení ki he fale vaʻinga ʻi hono ʻunivēsití ki he polokalama fakaʻosi akó. Naʻá ne ʻalu pongipongia mo hono kaungā fakaʻosi akó ke fakaangaanga ki he polokalamá, kuó ne tui ha tatā ʻuliʻuli mo ha kāuni. ʻI he aʻu atu e fāmili ʻo ʻEmá, naʻe ʻikai ngata pē ʻi heʻene fiefia ke sio kia Hekitā Tēvita mo ʻOsikā Tēvitá, ka naʻá ne fiefia foki ke sio ki heʻene faʻeé, tamaí, mo ha kāinga kehe.
ʻI he lue atu ʻa ʻEma ki he kau ʻofisiale ʻo e ʻunivēsití kuo nau tuʻu lainé, ʻo lulululu mo kinautolu mo maʻu hono tipilomá, naʻá ne fakamālō ki he ʻEikí ʻi hono ngaahi tāpuakí. Ko ʻene tamaí naʻe fuofua fāʻofua kiate ia ʻi he ʻosi ʻa e polokalamá. Naʻá ne talaange, “Mālo e ako ʻofefine,” pea hangē kuo matoʻo atu ha fuʻu kavenga mei hono umá. Naʻe fiefia ʻa ʻEma ke sio ki heʻene maʻu ha nongá.
Naʻá ne fāʻofua leva mo ʻuma kia Hekitā Tēvita, ʻi heʻene houngaʻia he poupou naʻá ne fakahoko kiate ia lolotonga ʻene akó.
Naʻá ne talaange ʻi heʻena fāʻofuá, “Mālō ʻaupito. Naʻe ʻikai ke u mei lavaʻi ʻeni ka ne taʻeʻoua koe.”
ʻI he pongipongi ʻaho 2 ʻo ʻEpeleli 2011, naʻe tuʻu ʻa Palesiteni Tōmasi S. Monisoni he tuʻunga malanga ʻo e Senitā Konifelenisí ʻo sio ki he Kāingalotu ʻe lauiafe kuo nau fakatahataha mai ki he konifelenisi lahi fakataʻu ʻa e Siasí. Naʻá ne malimali mo pehē, “ʻI he taimi ne palani ai e falé ni, ne mau fakakaukau he ʻikai ke tau lava ʻo fakafonu ia. Ka mou vakai angé ki ai he taimi ní.”
Naʻe fakaʻilongaʻi ʻe he konifelenisí ʻa e taʻu hono tolu ʻo ʻene hoko ko e palesiteni ʻo e Siasí, ko ha uiuiʻi naʻá ne femoʻuekina ange ai ʻi ha toe meʻa ne lava e kakai tokolahi ʻo fakakaukauá. Naʻá ne houngaʻia lahi ki he Kāingalotu he funga ʻo e māmaní, ʻa ia kuo laka hake he toko tahafā milioná he taimi ko ʻení. Naʻá ne pehē, “ʻOku ou fakamālō atu ʻi hoʻomou tuí mo e mateakiʻi ʻo e ongoongoleleí, pea pehē ki he ʻofa mo e tokanga kuo mou fefakahaaʻiʻakí pea pehē ki hoʻomou faifatongia ʻi homou ngaahi uōtí mo e koló, siteikí mo e vahefonuá.”
Ko ha taimi fakafiefia ia ke te hoko ai ko ha mēmipa ʻo e Siasí. ʻI he vaeua senituli kimuʻa angé, naʻe fiefia ʻa Palesiteni Tēvita O. Makei ʻi he ongoongo lelei ʻo e Siasí, tautautefito ʻi he ʻIunaiteti Siteití. Kae naʻa mo e taimi ko iá, ko e tokolahi taha ʻo e kakaí naʻe ʻikai ke nau ʻilo ki he Siasí. Naʻe ʻikai toe hoko ia he taimí ni. Naʻe hoko e ngaahi taʻu lahi ʻo e mafola ʻa e ngāue fakafaifekaú, ngaahi polokalama fengāueʻaki mo e kakaí ne ola leleí, ngaahi polōseki lalahi mo iiki ʻo e tokoni ʻofa fakaetangatá, pea mo e anga fakatōkilalo fakaʻaho ʻa e Kāingalotu fakafoʻituituí, ke ʻilolahia ange ai ʻa e Siasí ʻi ha ngaahi feituʻu lahi he māmaní.
Kimui ange foki, naʻe talanoaʻi lahi ʻa e Siasí ʻe he mītiá. Naʻe hoko e ʻasi ʻa e Siasí he mītiá lolotonga e ʻOlimipiki Faʻahitaʻu Momoko ʻi he 2002, ko ha talateu ki he ongoongoa lahi ʻi he mītiá ʻa ia ne hoko ʻi he hanga ʻe Miti Lominī, ko e taki ʻo e kōmiti fokotuʻutuʻu ʻo e ʻOlimipikí he 2002 mo ha tokotaha Siasi naʻe ʻiloa fakapolitikale, ʻo fanongonongo ʻokú ne kau he fili palesiteni ʻo e ʻIunaiteti Siteití. Neongo naʻe ʻikai ke ne ikuna e fili ʻa ʻene faʻahi fakapolitikalé ʻi he 2008, ka naʻe ʻamanaki ha kakai tokolahi te ne toe feinga fili pē ʻi he 2012.
Pea naʻe kei māʻolunga pē ʻa e mahuʻingaʻia ʻa e kakaí ʻi he Siasí. Naʻe ʻasi e Kāingalotu ʻo e Siasí he ongoongó ko e kau faʻu lao mo e kau taki fakapisinisi. Naʻe feʻauhi ha niʻihi ʻi he ngaahi faiva moʻoni he televīsoné mo e ngaahi fale faiʻanga sipoti fakapalōfesinalé. Naʻe ongoongoa ha niʻihi kehe ko e kau hiva mo e kau hiva koniseti. Ko ha niʻihi naʻa nau faʻu ha ʻū tohi talanoa manakoa, pea naʻe liliu ha ngaahi talanoa ʻe niʻihi ki ha ʻū faiva manakoa.
Naʻe ʻikai ʻuhinga e fakautuutu e mahuʻingaʻia ʻi he Siasí mo hono kau mēmipá naʻe vēkeveke ai e tokotaha kotoa ke tali e ongoongolelei kuo fakafoki maí. Naʻe maʻuhala e kakai tokolahi ki he Siasí pe ʻikai ke nau tali lelei hono ngaahi akonakí. Ko hono moʻoní, naʻe hohaʻa ʻa Palesiteni Monisoni mo e toenga ʻo e kau takí naʻa mavahe ʻa e sōsaietí mei he ngaahi ʻulungaanga faka-Kalisitiane tuʻuloá pea mo e ngaahi akonaki mo e founga ʻo e Siasí. Naʻe ʻikai ha feituʻu ʻe ʻilonga lelei ange ai e mavahe ko ʻení ka ko e ngaahi tui fekauʻaki mo e malí.
ʻI he ngaahi taʻu kimuí ni maí, naʻe feinga e kau taukapo ki he nonofo fakafefiné, nonofo fakatangatá, fakatou nonofo tangata mo fefiné, liliu tangata pe fefiné, mo e niʻihi ngalikehé (LGBTQ) ke fakalotoʻi ʻa e totonu ke femaliʻaki pē ʻa e tuʻunga tangata pe fefine tataú. Naʻe fakafepakiʻi ʻe he Siasí mo e ngaahi kautaha tui fakalotu kehé ʻa e ngaahi founga ko ʻení, ʻo fakapapauʻi ko e mali ʻi he vahaʻa ʻo ha tangata mo ha fefine ko e tuʻutuʻuni ia ʻa e ʻOtuá.
Naʻe hoko e sīpinga mahuʻinga tahá ʻi Nōvema 2008, ʻi he ʻoange ki he kakai ʻi Kalefōniá ha faingamālie ke nau fili ha lao fakakonisitūtone ʻo e siteití ʻe fakamatalaʻi fakalao ai ʻa e malí ʻi he vahaʻa ʻo ha tangata ʻe taha mo ha fefine ʻe taha. Naʻe kau fakataha e Siasí mo e ngaahi tui fakalotu kehé ʻi he feinga paʻanga ke poupou ki he fokotuʻú. Naʻe poupouʻi foki ʻe he kau taki ʻo e Siasí ʻi Sōleki Sití e kāingalotu ʻi Kalefōniá ke nau poupou longomoʻui mo taukaveʻi ia.
Neongo naʻe mālō pē hono fakapaasi ʻa e fokotuʻú, ka naʻe fakaangaʻi lahi e Siasí ʻi heʻene kau ki hono poupouʻí, ʻo iku ai ki ha fakahāhāloto ha kakai ʻe niʻihi ʻi tuʻa ʻi he ngaahi temipalé.
Naʻe kei tukupā pē ʻa Palesiteni Monisoni mo e kau taki kehe ʻo e Siasí ke pukepuke e tokāteline ʻo e malí pea mo e ngaahi tuʻunga ʻulungaanga ʻo e Siasí. Naʻa nau lea ʻo kau ki he tauʻatāina fakalotú mo e tauʻatāina ke fakamatalaʻi mo akoʻi e malí ko ha haʻi toputapu ʻi he vā ʻo ha tangata mo ha fefiné. Naʻa nau feinga foki ke fokotuʻu ha ngaahi vā fengāueʻaki mo e ngaahi kulupu kehe, hangē ko e Siasi Katolika Lomá, ʻa ia naʻa nau tui ki he meʻa tatau.
Ka naʻe fakautuutu ange ʻenau ngāue ke fai ha felotoi mo e komiunitī LGBTQ. ʻI he hokohoko atu e ngaahi tālanga ki he malí mo e totonu ʻa e kau fakafāfiné mo e fakatangatá, naʻe poupouʻi ʻe he kau taki ʻo e Siasí ʻa e Kāingalotu ʻo e Siasí ke nau ʻofa mo anga fakaʻapaʻapa ʻi he taimi ʻe hoko ai ha ngaahi fetōkehekeheʻakí pea mo taʻofi hono fakamamahiʻi e kakai LGBTQ. ʻI Nōvema 2009, naʻe kau ʻa e Siasí mo e kau faʻu lao ʻi Sōleki Sití ʻi hono poupouʻi e totonu ʻoku taau ki he fale nofoʻangá maʻá e kakai kotoa pē, ʻo tatau ai pē ko e hā honau tuʻunga tangata pe fefiné. Naʻe feinga foki ʻa e kau taki ʻo e Siasí ke ʻoange ha maʻuʻanga tokoni lelei ange mo paotoloaki ha manavaʻofa lahi ange maʻá e kau mēmipa ʻo e Siasí ʻoku nau LGBTQ, ʻa ē naʻa nau faʻa ongoʻi faingataʻaʻia ʻi he ngaahi fekīhiakí. Ne kau ʻi he ngaahi maʻuʻanga tokoni ne fakatupulaki ko ʻení ha uepisaiti foʻou ʻa e Siasí ʻoku ʻi ai ha ngaahi fakamatala mo e ʻū vitiō ʻo e Kāingalotú mo honau ngaahi fāmilí ʻoku nau vahevahe ʻenau aʻusiá mo e fakamoʻoní.
Naʻe fakamatala ʻi he taha ʻo e ngaahi vitioó kia Sūsana Pausa, ko ha mēmipa ʻo e Siasí naʻe fefaʻuhi ʻi ha ngaahi taʻu lahi ke tali kakato ʻene manako ʻi he houʻeiki fafiné. Naʻá ne ʻalu pē ki he lotú, ka naʻá ne kei ongoʻi veiveiua hono lotó ʻi ha ngaahi taimi. ʻI he fakalau ʻa e taimí, ʻi he tokoni ʻa e ngaahi kaungāmeʻa mo e fāmili ne nau poupouʻi ia ʻi heʻene fonongá, naʻá ne aʻu ki ha tuʻunga fakafiemālie ange. Naʻá ne pehē, “Ko e konga pē ʻeni hoku natulá, ʻe pehē ai pē ia, pea te u sai pē. Te u kei lava pē ʻo fiefia. Te u kei lava pē ʻo maʻu ʻa e Fakamoʻuí ʻi heʻeku moʻuí.” Naʻe hanga ʻe Heʻene ʻofa kiate iá ʻo fakafonu e ongoʻi tuenoa naʻá ne faʻa ongoʻí.
Naʻá ne maʻu foki ha kau taki ʻi he Siasí naʻa nau loto-fiemālie ke fanongo kiate ia, pea naʻe hoko ia ko ha tokoni lahi. Naʻá ne manatu ʻo pehē, “Kuó u maʻu ha kau taki lakanga fakataulaʻeiki naʻa nau loto-moʻoni ke fakafanongo.”
ʻI he tāpuni ʻe Palesiteni Monisoni ʻa e konifelenisi lahi ʻi ʻEpeleli 2011, naʻá ne tapou ki he Kāingalotú ke tuku ke ulo atu ʻenau māmá, ʻo hangē ko ia naʻe akoʻi ʻe he Fakamoʻuí. Naʻá ne pehē, “ʻOfa ke tau hoko ko ha kau tangataʻifonua lelei he fonua ʻoku tau nofo aí mo ha kaungāʻapi lelei ʻi hotau koló, pea tokoni kiate kinautolu ʻi he ngaahi tui fakalotu kehé pea pehē ki hotau kāingalotú tonu. ʻOfa ke tau hoko ko ha faʻifaʻitakiʻanga ʻo e faitotonú mo e angatonú ʻi ha feituʻu pē te tau ʻalu ki ai pe ha meʻa pē te tau fai.”
Naʻe mahino kiate ia mo e kau taki kehe ʻo e Siasí pea nau fakamamafaʻi ʻa e mahuʻinga ʻo e hoko ko e kau muimui ʻo Kalaisi ʻi he leá mo e ngāué. Neongo naʻe nofotaha e ngaahi fakamatala ʻa e mītiá kimuí ni ʻi hono fakamatalaʻi kuo fanongo ha kakai tokolahi ʻi he Siasí, ka ʻoku kei kehekehe lahi ʻa e ngaahi fakakaukau ki he tuí mo hono tefitoʻi pōpoakí. Naʻe kei misiteli pē ʻa e Siasí ki he kakai tokolahi.
Naʻe ʻiloʻi ʻe he kau taki ʻo e Siasí kuo pau ke liliu ʻeni. ʻOku ʻikai totonu ke ʻi ai ha faʻahinga veiveiua ki he muimui ʻa e Kāingalotu ʻo e Siasí kia Sīsū Kalaisí.
ʻI he ʻaho 17 ʻo ʻAokosi 2011, naʻe puna ʻa Silivia mo Sefi ʻOloleti ki Seni Salavatoa, ʻEla Salavatoa, ko e kolo ia naʻe fanauʻi mo ohi hake ai ʻa Siliviá, pea ko ha feituʻu ia ʻe fakatapui ai ha fale ʻo e ʻEikí ʻi ha ʻaho ʻe fā mei ai. Naʻe fanongonongo ʻa e temipalé hili ha taimi nounou mei hono ui ia ki he kau palesitenisī lahi ʻo e Fineʻofá, pea hoko hono ngaahi fatongia foʻoú ke taʻofi ai ia mei heʻene kau ki he tanupoú. Ka ko ʻeni, ʻi he fakaafe ʻa e Kau Palesitenisī ʻUluakí, naʻá ne maʻu e faingamālie ke kau ʻi hono fakatapuí. Naʻá ne fiefia lahi ʻaupito mo Sefi.
Naʻe faifatongia ʻa Silivia ʻi he kau palesitenisī lahi ʻo e Fineʻofá ʻi ha taʻu ʻe fā. Lolotonga e taimi ko iá, naʻe tataki ʻe he ngaahi kaveinga ʻo e tuí, fāmilí, mo e fakafiemālié ʻa e ngāue kotoa pē ʻa e houalotú. Naʻe lahi e fefolauʻaki ʻa e kau palesitenisií, ʻo fakaʻaongaʻi e Tohi Tuʻutuʻuni ʻo e Ngaahi Fakahinohino ʻa e Siasí ke akoʻi e kau taki fakalotofonua ʻo e Fineʻofá ʻi hono maʻu e fakahaá, ngāue ʻi he ngaahi fakataha alēlea ʻa e Siasí, ngāue fakaetauhi ki he faingataʻaʻiá, mo hono fakahoko ha ngaahi fatongia kehé. Naʻe ʻosi ʻaʻahi ʻa Silivia ki he kakai fefine ʻo e Fineʻofá ʻi ha ngaahi fonua ʻe uofulu ʻi he konitinēniti ʻe nima.
Naʻe ngāue foki ʻa e kau palesitenisií mo e kau mēmipa honau poaté ke faʻu ha ngaahi vitiō ne fakahoko ai ha ako vave maʻá e kau taki ne uiuiʻi foʻou ʻi he funga ʻo e māmaní. Naʻe lava ʻo maʻu e ngaahi vitiō ko ʻení mei he peesi uepisaiti ʻa e Fineʻofá pea fakakau ʻi he Laipeli Ako Fakatakimuʻá, ko ha ngaahi maʻuʻanga tokoni fakaako foʻou ʻi he uepisaiti ʻa e Siasí.
Naʻe kau ʻi he konga lahi ʻo ʻenau ngāué ʻa hono fakamālohia e faiako ʻaʻahí. Naʻe taʻu lahi hono pulusi ʻi he ngaahi makasini ʻa e Siasí ha ngaahi lēsoni faiako ʻaʻahi faingofua. ʻI he taimi ní naʻe paaki e ngaahi lēsoní fakataha mo ha fanga kiʻi tokoni mo e ngaahi maʻuʻanga fakamatala ke fakaleleiʻi e faiako ʻa e kau fefiné. ʻI he tataki ʻa Siliviá, naʻe fekumi foki e kau mēmipa ʻo e poaté ki ha ngaahi founga ke tokoniʻi e hiki mei he Kau Finemuí ki he Fineʻofá. Lolotonga e folaú, ne faʻa talanoa ʻa Silivia mo e kau taki fakalotofonua ʻo e Fineʻofá mo e Kau Finemuí fekauʻaki mo hono fakafehokotaki e vā ʻo e ongo houalotú ʻaki hono poupouʻi kinautolu ke nau fengāueʻaki lahi ange. Naʻá ne poupouʻi foki e kau Fineʻofá ke fetuʻutaki ki honau kau mēmipa foʻou tahá pea kumi ha ngaahi founga ke tokoni ai ki he kau finemuí.
ʻI hono tākiekina ʻe he hisitōlia naʻa nau maʻu meia Palesiteni Poiti K. Peeka pea mo e fatongia mei he Kau Palesitenisī ʻUluakí, naʻe teuteu ʻa e Kau Fineʻofá ke pulusi ha tohi ko e, Ngaahi ʻOfefine ʻi Hoku Puleʻangá: Ko e Hisitōlia mo e Ngāue ʻa e Fineʻofá. Naʻe fakamatalaʻi kakato ʻa e tohí mo tohi ʻi ha sīpinga faingofua ke feʻunga mo e kau laukonga ʻi he tūkunga kotoa pē. ʻE liliu foki ia ki ha ngaahi lea fakafonua ʻe uofulu mā tolu pea tufaki ki he houʻeiki fafine ʻo e Siasí. Naʻe fakaʻamu ʻa e kau palesitenisií ʻe tokoni ia ki he houʻeiki fafiné ke ako mei he kuohilí, mahino lelei ange honau tukufakaholo fakalaumālie ko e kau ākonga ʻa Kalaisí, pea mo tali e misiona ʻa e Fineʻofá kuo fokotuʻu fakalangí.
ʻI he ʻaho kimuʻa he fakatapui ʻo e Temipale Seni Salavatoá, naʻe ʻaʻahi takai holo ʻa Silivia mo Sefi ʻi he falé mo ofo ʻi hono teuteú—ʻa e tā tongitongi fakaʻofoʻofá mo e sioʻata teuteú mo e ʻū meʻa palasa ne ʻosi tā ki ai e matalaʻi iaka (yucca), ko e matalaʻiʻakau tuʻufonua ʻo ʻEla Salavatoá. Naʻe mamata ʻa Silivia ki ha tā valivali totonu ʻo e Fakamoʻuí ʻi mui ʻi he tesi lekomení ʻo ofi pē ki he hūʻangá. Naʻe hili Hono ongo toʻukupú ki ha ongo kiʻi tamaiki, taʻu valu pe hiva nai, pea hangē mai pē ha ongo kiʻi tamaiki mei ʻAmelika Lotolotó. Naʻe maʻuiʻui lanumata ʻa e ʻata mei muí, ʻo hangē ko e ʻuluʻakau ʻi ʻEla Salavatoá. Naʻe tangi ʻa Silivia, ʻi hono lōmekina ia ʻe he ʻofa ʻa e Fakamoʻuí ki hono kotoa ʻEne fānaú.
ʻI hono fakahoko e fakatapuí he ʻaho hono hokó, naʻe fakakaukau ʻa Silivia ki he kuohilí. Naʻá ne kau ʻi he taha ʻo e kau fuofua mēmipa ʻo e Siasí ʻi ʻEla Salavatoá, pea neongo naʻá ne ʻaʻahi takai ʻi māmani ʻi heʻene ngaahi folaú, ka naʻe ʻi ai ha mālohi makehe ʻi he mamata ki he tupulaki ʻa e Siasí ʻi hono fonua tupuʻangá.
ʻI heʻene tangutu ʻi he loki silesitialé, naʻá ne sio takai ki he kāingalotu fakalotofonua naʻa nau nofoʻi e ngaahi nofoʻangá. Ko e tokolahi ʻo kinautolu naʻa nau matuʻotuʻa ange, pea hangē pē ko iá, naʻa nau papitaiso ʻi he kei kamakamata ʻa e Siasí ʻi ʻEla Salavatoá. Naʻa nau tauhi faivelenga ki heʻenau ngaahi fuakavá, ʻi he uhouhonga ʻo e masivesivá mo e faingataʻá. Ko e niʻihi ʻo kinautolu te nau hoko ko ha kau ngāue ouau ʻi hono fakaava ʻo e temipalé. Naʻá ne ʻiloʻi kuo nau lotua e temipale ko ʻení ʻi ha ngaahi taʻu lahi.
ʻI he taimi naʻe kau ai ʻa Silivia ki he Siasí ʻi hono taʻu hongofulu tupú ʻi he 1959, naʻe tuʻu e temipale ofi tahá ʻi Mesa, ʻAlesona—naʻe ʻaho ʻe fā ʻa e fononga ki aí. ʻI he taimi ní kuo ʻi ai ha Kāingalotu ʻe tahakilu ʻi ʻEla Salavatoa. Kuo tupulaki ʻa e Siasí ai ʻi ha ngaahi founga naʻe ʻikai lava ʻa Silivia ʻo mafakakaukaua ʻi heʻene kei siʻí.
ʻI he hokosia e taimi ke lea ai ʻa Siliviá, naʻá ne tuʻu ki ʻolunga. Neongo naʻá ne lea faka-Pilitānia lelei, ka naʻe hoko maʻu pē ʻa e lea faka-Sipeiní ko e lea ia naʻá ne fakakaukau, lotu, mo fekumi ai ki he Laumālie Māʻoniʻoní. ʻI he fakatapui ko ʻení, te ne fakahoko ʻene leá ʻi heʻene lea fakafonuá, ʻa ia naʻe faingofua ange ai ke ne fakahaaʻi e ngaahi ongo moʻoni ʻi hono lotó. Naʻe ʻikai ngata pē ʻi heʻene lea ki he kakai ʻi he fale ʻo e ʻEikí, ka ki he Kāingalotu foki ʻe lauafe ʻi he vāhenga ʻo e temipalé naʻa nau mamata mai ʻi ha fakamafola ʻo e fakatapuí mei honau ngaahi falelotú.
Naʻá ne pehē, “ʻOku fonu hoku lotó ʻi he fiefia mo e houngaʻia he ʻahó ni. ʻOku ou fakamoʻoni atu ʻoku moʻoni mo taʻefaʻalaua ʻa e ngaahi tāpuaki ʻoku talaʻofa mai kiate kitautolu ʻi he temipalé. Ko e temipalé ko e fale ia ʻo e ʻEikí. Kuó Ne fakamāʻoniʻoniʻi ia. ʻE ʻi heni maʻu pē Hono fofongá mo Hono lotó.”
Hili ha uike ʻe ono mei ai, ʻi he ʻaho 2 ʻo ʻOkatopa 2011, naʻe fakamoʻui ha senoleita ne ʻutu penisini, ʻi he falelotu Luputá ʻi he Lepupelika Fakatemokālati ʻo Kongokoú. Naʻe ʻi loto ha Kāingalotu ʻe toko uangeau nai—kau ai ʻa Uili mo Lili Pinene—ʻo kumi honau nofoʻanga ʻi muʻa ʻi ha televīsone ʻi he falelotú. ʻI ha ngaahi momeniti siʻi, ʻe kamata ai ha fakamafola pō Sāpate ʻo e Konifelenisi Lahi Fakavaeuataʻu Hono 181 ʻo e Siasí, kuo liliu ki he lea faka-Falaniseé—ko e taha ʻo e ngaahi lea fakafonua ʻe nimangofulu mā taha naʻe lava ke fanongo ai e Kāingalotu ʻi he funga ʻo e māmaní ʻi he konifelenisí. Ko e fuofua konifelenisi lahi ia ʻe fiefia ai e kāingalotu ʻo e Siasí ʻi Luputá ʻi heʻenau hoko ko ha siteiki ʻi Saione.
Ko e fokotuʻu ʻo e Siteiki Luputá ʻi he māhina ʻe tolu kimuʻá, naʻe ʻikai fakaʻohovale ia ki ha taha pē naʻe maheni mo e tupulaki vave ʻa e Siasí ʻi he koló. ʻI he 2008, ko e taʻu tatau pē naʻe sila ai e fāmili Pinené ʻi he temipalé, naʻe nofo ha Kāingalotu ʻo e Siasí ʻe toko tahaafe uangeau tupu ʻi Luputa. ʻI he taimi ko iá, naʻe ʻikai ke ʻi ai ha kau faifekau taimi kakato ʻe ngāue ai. Ka ʻi he taʻu ʻe tolu hono hokó, naʻe ngāue ʻa Uili mo e kau taki kehe ʻo e Siasí fakataha mo e kau faifekau faivelenga fakakoló ke liunga ua e tokolahi ʻo e Kāingalotú ʻi honau vahefonuá—ko ha ngāue naʻe tokoniʻi taʻe toe fehuʻia ʻe he fatongia ʻo e Siasí ʻi hono ʻomi e vai maʻá ki he koló. Naʻe ʻave foki ʻe he vahefonuá ha kau faifekau taimi kakato ʻe toko tolungofulu mā fā ke ngāue ʻi he ngaahi feituʻu kehe ʻo e DRC, ʻAfilika, pea mo e māmaní.
Ka naʻe kei ʻohovale pē ʻa Uili ʻi hono uiuiʻi ia ʻe ʻEletā Paula E. Koelaika mo ʻEletā ʻAlifeleti Kaiungu ʻo e Kau Fitungofulú ke ne hoko ko e palesiteni ʻo e siteiki foʻoú. Naʻe ʻi ai ha kau taki lakanga fakataulaʻeiki taukei ʻo e Siasí ʻi Luputa, ʻa ia te nau lava lelei ʻo hoko ko ha palesiteni fakasiteiki. ʻIkai nai kuo taimi ke taki ha taha kehe?
ʻI he ʻaho 26 ʻo Suné, ko e ʻaho naʻe fokotuʻu ai ʻa e siteikí, naʻe tokoni ʻa Uili kia ʻEletā Koelaika mo ʻEletā Kaiungu ke tufaki ha ngaahi uiuiʻi ngāue fakafaifekau taimi kakato ki ha kau finemui mo e kau talavou ʻe toko hongofulu mā nima ʻi he siteikí. Hili iá, naʻe malimali ʻa Uili ʻi hano faitaaʻi ia mo e kulupú. ʻI he taʻu ʻe uofulu kimuʻá, naʻe fakatupu ʻe he vākovi mo e fetāʻaki fakamatakalí ke ne mavahe ai mei hono ʻapí, ʻo mole ai hono faingamālie ke ngāue fakafaifekau taimi kakato maʻá e ʻEikí. Ka naʻe tokoni ʻene faifatongia mateaki ʻi he Siasí ʻi Luputá ke maʻu ʻe he toʻu tangata kei tupu hake ʻo e Kāingalotú, ʻa e ngaahi faingamālie naʻe ʻikai ke ne maʻú.
ʻI he kamata e fakamafola ʻo e konifelenisí, naʻe tangutu ʻa Uili ʻo fanongo ki he kau leá. ʻOku angamaheni ʻaki pē ʻa hono fai e ʻuluaki lea ʻi he kamataʻanga ʻo e konifelenisí ʻe Palesiteni Monisoní, ka koeʻuhí ko ha palopalema fakaemoʻui lelei naʻá ne kiʻi tōmui ai ki he Senitā Konifelenisí. Ka ʻi he hili pē ʻa e hiva he vaeuaʻanga ʻo e fakatahá, naʻá ne lue mai ki he tuʻunga malangá ʻo talitali lelei ʻa e Kāingalotú ki he konifelenisí ʻaki haʻane “mālō e lelei” fiefia.
Naʻá ne pehē, “Hangē ʻoku vave pē ʻalu ʻa e taimí he taimi ʻoku tau femoʻuekina aí pea ʻoku pehē pē e māhina ʻe ono kuohilí.”
Naʻe lea ʻa Palesiteni Monisoni ki he fakatapui ʻo e temipale ʻi ʻEla Salavatoá kae pehē foki ki hono toe fakatapui ʻo e temipale ʻi ʻAtalanitā ʻi he fakatonga ʻo e ʻIunaiteti Siteití. Naʻá ne pehē, “ʻE kāinga, ʻoku kei hokohoko taʻeuesia atu ai pē ʻa e langa temipalé. Ko ha faingamālie ia kiate au he ʻahó ni ke u fanongonongo atu mo ha toe ngaahi temipale.”
Naʻe fakafanongo lelei ʻa Uili. Kimuí ni mai, naʻe fakakaukau maʻu pē ʻa e kau taki ʻo e Siasí ʻi Luputa ki he ngaahi temipalé. Ko hono moʻoní, ko e fuofua konifelenisi fakasiteiki ko ia ʻi he koló, naʻe tokolahi e kau leá naʻe nofotaha ʻi hono teuteuʻi e Kāingalotú ke hū ki he fale ʻo e ʻEikí. Makehe mei he fāmili Pinené, ko e niʻihi tokosiʻi pē ʻo e Kāingalotu ʻi Luputá naʻa nau lava ʻo ʻalu ki he Temipale Sōhanesipokí. Neongo naʻe faingofua ke maʻu e paasipōtí ʻi DRC, ka naʻe ʻikai faingofua hono maʻu e visa folau ki Saute ʻAfliká. Naʻe ʻuhinga ʻeni naʻe tokolahi e Kāingalotu ʻi DRC naʻa nau kei talitali, mo hohaʻa naʻa ʻosi e ʻaonga ʻenau paasipōtí kimuʻa pea lava ke maʻu haʻanau visa ke ʻalu ki he temipalé.
Ko e ʻuluaki temipale naʻe fanongonongo ʻe Palesiteni Monisoní, ko e temipale hono ua ia ki Polovo, ʻIutaá. Naʻe vela kimuí ni e tāpanekale fakahisitōlia ʻo e koló, pea kāpui ʻe he afí ʻa e meimei meʻa kotoa pē tukukehe pē hono holisi ʻi tuʻá. Ko ʻeni naʻe palani ʻa e Siasí ke toe langa mo fakaʻaongaʻi ia ko ha fale ʻo e ʻEikí.
Naʻe hoko atu ʻa Palesiteni Monisoni ʻo pehē, “ʻOku ou fiefia foki ke fanongonongo ha ngaahi temipale foʻou ʻi he ngaahi feituʻu ko ʻení. “Palanikuila, ʻi Kolomupia; Tāpani, Saute ʻAfilika; Kinisasa ʻi he Lepupelika Fakatemokālati ʻo Kongokoú; pea—”
ʻI heʻenau fanongo pē ki he “Kinisasá,” naʻe tuʻu ʻa Uili mo e tokotaha kotoa pē ne ʻi hono tafaʻakí ʻo fiefia. Naʻa nau ʻohovale ʻaupito ʻi he ongoongó. ʻE vavé ni pē ha ʻikai toe hohaʻa ʻa e Kāingalotu Kongokoú ki he visa folaú pe ko e ʻosi e ʻaonga e paasipōtí. Naʻe liliu ʻe he fanongonongo faingofua ʻa e palōfitá ʻa e meʻa kotoa pē.
Naʻe teʻeki ke sasala ha ngaahi talanoa, pe ko ha fanga kiʻi fakaʻilonga naʻe palani ʻa e Siasí ke langa ha temipale ʻi he DRC. Ko e meʻa pē naʻa nau maʻú ko e ʻamanaki lelei—ʻamanaki lelei ʻe fokotuʻu ʻe he ʻEikí Hono falé ʻi honau fonuá ʻi ha ʻaho.