Vā Fengāueʻaki mo e Kakaí

Naʻe fokotuʻu ʻa e Siasí ʻi ha taimi naʻe tupulaki vave ai ʻa e paaki ongoongó ʻi he ʻIunaiteti Siteití, pea naʻe tākiekina e fakakaukau ʻa e Kāingalotu ʻi he Ngaahi ʻAho Kimui Ní ʻe ha kautaha paaki ne faʻa fakaanga ki he Siasí.¹ Naʻe fakatokangaʻi ʻe Siosefa Sāmita mo e kau taki ʻo e Siasí he kamatá ʻa e fiemaʻu ke fakahā ki he kakaí e fakamatala tonu fekauʻaki mo e Siasí, pea naʻa nau faʻa fakaʻaongaʻi e nusipepá ke fakahoko ia. Ko e fuofua hisitōlia lahi ʻo e Siasí, ne tohi ʻi he fakahinohino ʻa Siosefá pea ʻuluaki pulusi hokohoko ʻi he ngaahi nusipepa ʻa e Siasí, naʻe tautautefito hono fakahokó “ke fakatonutonu e fakakaukau ʻa e kakaí” ki he ngaahi tukuakiʻi hala fekauʻaki mo e Siasí pea ke fakahoko ha fakamatala tonu ki he aʻusia ʻa e Kāingalotu ʻi he Ngaahi ʻAho Kimui Ní.²

Hili hono tuli fakamālohi e kāingalotu ʻo e Siasí mei Mīsulí, naʻe faitohi e Palōfitá mei he Fale Fakapōpula Lipetií ʻo fakalotolahiʻi e Kāingalotú ke nau fakahoko ha “fatongia vivili” ke fakahā ki he kakaí ʻaki hono tānaki mo pulusi ha ngaahi fakamatala ki he meʻa kotoa pē kuo nau fouá.³ Aʻu ki he ʻikai ke ola lelei ʻenau kole ha tokoni fakapuleʻangá, naʻe kei hokohoko atu pē e Kāingalotú ke pulusi ʻenau ngaahi aʻusia ʻi Mīsulí ʻi he ngaahi fakamatala, talanoa, lea, mo e fanga kiʻi tohi tufa. ʻI he kotoa ʻo e senituli 19, ʻi he hiki ʻa e Kāingalotú ki ʻAmelika Hihifó, ʻo kole ke fokotuʻu honau vahefonuá ko ha siteiti ʻAmeliká, pea fehangahangai mo e fakafepaki lahi ki he mali tokolahí, naʻe feinga e kau taki ʻo e Siasí ke fakaleleiʻi e ongoongo lelei ʻo e Siasí ʻo fakafou ʻi he ngāue fakafaifekaú, ngaahi ngāue ne pākí, tala pōpoakí, mo e ngaahi fakataha mo e kakai mahuʻingá.

ʻI he aʻu ki he senituli 20, ne kamata ha ngaahi kautaha lalahi mo e ngaahi pisinisi lalahi kehe ke kau ʻi he ngaahi founga foʻou mo maau ange ʻo hono tuku ha fakamatala ki he kakaí. Naʻe fakangāueʻi ʻe he ngaahi kautaha kehekehe ha kau tuʻuaki fakapalofesinale ke faʻu ha ngaahi polokalama mo e kemipeini ki he vā mo e kakaí. Naʻe fokotuʻu ʻe he ngaahi ʻunivēsití, falekoloa fakatāutahá, mo e ngaahi siasí ha ngaahi vaʻa fakamatala ki he kakaí, senitā ki he kau ʻaʻahí, mo ha ngaahi fakaʻaliʻali.⁴ Naʻe fakaava ʻe he Siasí ʻi Sōleki Siti ʻa e Vaʻa Fakamatala ki he Temipale Sikueá ʻi he 1902 ke tufaki e naunaú mo tali e ngaahi fehuʻi ʻa e kau ʻaʻahí.⁵

ʻI he hoko ʻa Kōtoni B. Hingikelī ko ha faifekau ʻi Pilitānia Lahi ʻi he 1930 tupú, naʻá ne fakakaungāmeʻa ki ha kau faiongoongo tokolahi, ʻo tokoni ke holoki e laukovi ki he Siasí mo fakahaaʻi ha talēniti ki he vā fengāueʻaki mo e kakaí. Hili pē ha taimi nounou ʻi heʻene foki ki ʻIutaá, naʻe fakaafeʻi ia ʻe he kau taki ʻo e Siasí ke kau ʻi he Kōmiti foʻou ki he Letiō, Tuʻuaki, mo e Naunau Fakafaifekau ʻa e Siasí pea tokoni ʻi hono faʻu e ngaahi naunau mītia ke fakaʻaongaʻi ʻi he ngaahi misioná. ʻI he 1935 naʻá ne kamata fakakau mai ha kau mataotao he mītiá ke fakatupulaki ha fengāueʻaki lelei ʻi he vā ʻo e Siasí mo e kakaí fakalūkufua.⁶

Naʻe ngāue ʻa e kau taki ʻo e Siasí mo e kau faifaleʻi ki he vā fengāueʻaki moe kakaí ʻo kamata ʻi he 1950 tupú ke tohoakiʻi mai ha kau faiongoongo lelei ki he ngaahi meʻa hangē ko e Hill Cumorah Pageant mo e tukuange foʻou mai e ngaahi hiva ʻa e Kuaea Tāpanekalé. ʻI he 1957, naʻe fakangāueʻi ʻe he Siasí ha kau palofesinale ʻi he vā fengāueʻaki mo e kakaí pea fokotuʻu ai ʻa e Vaʻa Fakamatala ʻa e Siasí, pe ko e CIS. Ko e taumuʻa ʻo e kulupú ni ke tufaki ha fakamatala totonu fekauʻaki mo e ngaahi ʻekitivitī ʻa e Siasí ʻe mahuʻingaʻia ai e kakaí fakalūkufua.

ʻI he ngaahi taʻu lahi hono hokó, naʻe tataki ʻe he CIS, ʻa ia naʻe hoko ko e Potungāue Fengāueʻaki mo e Kakaí ʻi he 1991, ha ngaahi ngāue lavameʻa, kau ai ʻa e Mormon Pavilion at World’s Fairs ʻo kamata ʻi he 1964, ko ha ngaahi pōpoaki ʻi he letioó mo e televīsoné fekauʻaki mo e fāmilí naʻe ui ko e Homefront ʻi he 1970 tupú, mo e ngaahi polokalama ki he kakaí hangē ko e “I’m a Mormon” ʻi he 2010 tupú. ʻI he 1990 tupú, naʻe fokotuʻutuʻu ʻe he potungāué ʻa e ngāue tokoni ʻa ha kau talēkita fengāueʻaki mo e kakaí ʻe toko 3,500 ʻi he ngaahi siteitki mo e misiona he funga ʻo e māmaní ke vahevahe ha fakamatala ki he ngaahi ʻekitivitī fakalotofonuá. ʻI he tupu tokolahi fakatuʻapuleʻanga ʻa e Siasí pea tupulaki vave e tekinolosia ki he mītiá ʻi he senituli 21, naʻe lahi ha ngaahi ngāue mo e kakaí, hangē ko e vā fakakoló mo fakasiasí, mītiá mo e fepōpoakiʻakí, mo e puleʻi e ongoongó, ne ʻave ia ki he Potungāue Fetuʻutaki ʻa e Siasí ne fokotuʻu foʻoú. ʻI he ʻahó ni, ʻoku hokohoko atu e kau palofesinalé ʻi he fengāueʻaki mo e kakaí ke faʻu ha ngaahi fanongonongo ki he kakaí, fakamatala ki he tuʻungá, mo e pōpoaki kehe ʻi he ʻinitanetí maʻá e Siasí.

Ngaahi Maʻuʻanga Tokoni ʻo e Siasí

Church Newsroom, newsroom.ChurchofJesusChrist.org.

Maʻuʻanga Fakamatalá

ʻOku ʻomai ʻe he ngaahi pulusinga ko ʻení ha fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he ngaahi maʻuʻanga tokoni ko ʻení, ʻoku ʻikai ke mau poupouʻi pe fakapapauʻi atu e kanotohí pe ngaahi fakakaukau ʻa e kau faʻu tohí.

Reid L. Neilson, Exhibiting Mormonism: The Latter-day Saints and the 1893 Chicago World’s Fair (New York: Oxford University Press, 2011).

Nathaniel Smith Kogan, “The Mormon Pavilion: Mainstreaming the Saints at the New York World’s Fair, 1964–65,” Journal of Mormon History, vol. 35, no. 4 (Fall 2009), 1–52.

J. B. Haws, The Mormon Image in the American Mind: Fifty Years of Public Perception (New York: Oxford University Press, 2013).

Ngaahi Tefito Fekauʻakí: Columbian Exposition of 1893, Fakamafola ʻi he Mītiá, Hetikuota ʻo e Siasí, Kuaea Tāpanekalé

1. Vakai, Jack Larkin, “‘Printing is something every village has in it’: Rural Printing and Publishing,” in Robert A. Gross and Mary Kelley, eds., A History of the Book in America, vol. 2, An Extensive Republic: Print, Culture, and Society in the New Nation, 1790–1840 (Chapel Hill: University of North Carolina Press, 2010), 145–60; vakai foki, Tefitó: Fakafepaki ki he Siasí ʻi he Kamataʻangá.

2. Joseph Smith, “History, 1838–1856, volume A-1 [23 December 1805–30 August 1834],” 1, https://www.josephsmithpapers.org/paper-summary/history-1838-1856-volume-a-1-23-december-1805-30-august-1834/1; vakai foki, Joseph Smith, “Church History,” Times and Seasons, vol. 3, no. 9 (Mar. 1842), 706–10, https://www.josephsmithpapers.org/paper-summary/times-and-seasons-1-march-1842/4; Joseph Smith, “Letter to Noah C. Saxton, 12 February 1833,” in Letterbook 1, 27–28, https://www.josephsmithpapers.org/paper-summary/letter-to-noah-c-saxton-12-february-1833/1.

3. Joseph Smith, “Letter to Edward Partridge and the Church, circa 22 March 1839,” 6, https://www.josephsmithpapers.org/paper-summary/letter-to-edward-partridge-and-the-church-circa-22-march-1839/6.

4. Scott M. Cutlip, The Unseen Power: Public Relations, A History (Hillsdale, New Jersey: Lawrence Erlbaum Associates, 1994), 10–26; Cayce Myers, Public Relations History: Theory, Practice, and Profession (New York: Routledge, 2021), 76–90.

5. Edward H. Anderson, “The Bureau of Information,” Improvement Era, vol. 25, no. 2 (Dec. 1921), 131–39.

6. Sheri L. Dew, Go Forward with Faith: The Biography of Gordon B. Hinckley (Salt Lake City: Deseret Book, 1996), 86–105.