Kau Palesitenisī ʻUluakí

ʻI he taimi ne fokotuʻu ai ʻe Siosefa e Siasí ʻi ʻEpeleli 1830, naʻe fokotuʻu ai ia ʻe ha fakahā “ko ha tokotaha kikite, mo ha Tokotaha Liliu Lea, mo e Palōfita, ko ha ʻAposetolo ʻo Sīsū Kalaisi, mo ha Kaumātuʻa ʻo e Siasí.”¹ ʻI heʻene peheé, naʻe poupouʻi ia ʻe he kau mēmipa ʻo e Siasí ko e fuofua kaumātuʻá mo ʻŌliva Kautele ko e kaumātuʻa hono uá, ko e fuofua lakanga ki he kau taki ʻo e Siasí. ʻI Nōvema 1831, naʻe fokotuʻu ai ʻe ha fakahā ʻe taha ʻa Siosefa Sāmita ki he lakanga ʻo e “palesiteni ʻo e lakanga fakataulaʻeiki māʻolungá.” ʻE “tatau mo Mōsese” e palesiteni ko ʻení pea hoko “ko ha Tokotaha Kikite, ko ha tokotaha maʻu fakahā, ko ha tokotaha liliu lea, pea mo ha palōfita, ʻo maʻu e ngaahi meʻafoaki kotoa pē ʻo e ʻOtuá ʻa ia ʻokú Ne foaki ki he ʻulu ʻo e siasí.”² ʻI ha konifelenisi ʻi he ʻaho 25 ʻo  Siulai, 1832, naʻe fili ai ʻa Siosefa Sāmita ko e palesiteni ʻo e lakanga fakataulaʻeiki māʻolungá.³

Fakafuofua ki ha uike ʻe ono hili hono fili ʻo Siosefa Sāmitá, naʻá ne fili ha ongo tangata ʻe toko ua—Sesi Kōsē mo Sitenei Likitoni—ko hono ongo tokoni ʻi he “ngāue ʻa e kau palesitenisī ʻo e Lakanga Fakataulaʻeiki māʻolungá.”⁴ Naʻe hoko atu ʻa Kōsē ko ha tokoni ʻo aʻu ki Tīsema 1832, he taimi ne tuʻusi ai ia mei he Siasí ʻi ha ngaahi ʻuhinga naʻe ʻikai ʻiloʻi pau.⁵ ʻI Sānuali 1833, naʻe fetongi ʻe Feletiliki G. Uiliami ʻa Kōsē ʻi he kau palesitenisií.

Hili ha māhina ʻe ua mei hono fili ʻo Uiliamí, naʻe maʻu ʻe Siosefa Sāmita ha fakahā ʻo pehē ʻoku “tuʻunga tatau” ʻa Likitoni mo Uiliami pea mo ia ʻi hono “maʻu ʻo e ngaahi kī ʻo e puleʻanga fakaʻosi ko ʻení.”⁶ Ko ia ai, ʻi ha fakataha alēlea ʻa e kau taulaʻeiki lahí ʻi Ketilani, ʻOhaiō, he ʻaho 18 ʻo Māʻasi, 1833, naʻe fakanofo ai ʻe Siosefa ʻa Likitoni mo Uiliami “ʻo tuʻunga tatau mo ia ʻi hono maʻu ʻo e ngaahi kī ʻo e puleʻanga fakaʻosi ko ʻení kae pehē foki ki he Kau Palesitenisī ʻo e Lakanga Fakataulaʻeiki māʻolungá.”⁷ Naʻe ui e kau tangata ʻe toko tolu ko ʻení ko e kau palesitenisī ʻo e lakanga fakataulaʻeiki māʻolungá pea ngāue fakatatau mo e fakahinohino ʻa Siosefa Sāmitá. Naʻe pehē ʻe ha fakahinohino ʻe taha, ʻi heʻenau hoko ko ha kau palesitenisií, ne nau maʻu ʻa e “mafai ke puleʻi … e ngaahi Ngāue kotoa pē ʻa e siasí.”⁸

ʻI he taimi ne fokotuʻu ai ʻe Siosefa Sāmita e fakataha alēleaʻanga māʻolunga ʻi Ketilani, ʻOhaiō, mo e Vahefonua Mīsulí, ʻi he 1834, naʻe maʻu ʻe he fakataha alēlea takitaha ha kau palesitenisī. Naʻe kau ʻi he kau palesitenisī ʻi Ketilaní ʻa Siosefa Sāmita, Sitenei Likitoni, mo Feletiliki G. Uiliami, ko e kau mēmipa tatau pē mo e kau palesitenisī ʻo e lakanga fakataulaʻeiki māʻolungá. Naʻe kau ʻi he kau palesitenisī ʻi Mīsulí ʻa Tēvita Uitemā, Uiliami W. Felipisi, mo Sione Uitemā. Ke fakafaikehekeheʻi e kau palesitenisī ʻo e ongo fakataha alēleaʻanga māʻolunga ko ʻení, naʻe kamata ke ui ʻe he kau taki ʻo e Siasí mo e kau mēmipá e kau palesitenisī ʻo e lakanga fakataulaʻeiki māʻolungá ko e “Kau Palesitenisī ʻUluakí.” Ko hono fuofua ui kinautolu ko e Kau Palesitenisī ʻUluakí naʻe maʻu ia mei ha fakahā naʻe pulusi ʻi he Tokāteline mo e Ngaahi Fuakava ʻo e 1835.⁹

Neongo ne pehē ʻe ha fakahinohino lakanga fakataulaʻeiki ne fai ʻe Siosefa Sāmita ʻi he 1835 ʻoku faʻu ʻe he “kau taulaʻeiki lahi pule ʻe toko tolú ha kōlomu ʻo e kau palesitenisī ʻo e siasí”, kuo ʻi ai ha ngaahi taimi kuo tokolahi ange ai he toko tolú ʻa e Kau Palesitenisī ʻUluakí.¹⁰ Hangē ko ʻení, ʻi Tīsema ʻo e 1834, naʻe fakanofo ʻa ʻŌliva Kautele ki he “lakanga ko e tokoni ki he Palesiteni ʻo e Lakanga Fakataulaʻeiki Māʻolunga mo Toputapú,” pea ʻi he ʻaho hono hokó, naʻe fakanofo ai ʻa Hailame Sāmita mo Siosefa Sāmita,  ko e Lahí. “ki he tuʻunga ʻo e Kau Palesitenisī ʻo e lakanga fakataulaʻeiki māʻolungá.”¹¹ Ne maʻu foki ʻe Pilikihami ʻIongi, Tēvita O. Makei, mo Sipenisā W. Kimipolo ha kau tokoni toko lahi ange he toko uá lolotonga ʻenau ʻi he kau palesitenisií.

Hili e mate fakamāʻata ʻa Siosefa Sāmita ʻi Sune 1844, naʻe fakamoveteveteʻi ai e Kau Palesitenisī ʻUluakí mo e tuʻunga fakataki ʻo e Siasí ki he Kōlomu ʻo e Kau ʻAposetolo ʻe Toko Hongofulu Mā Uá, pea hoko ʻa Pilikihami ʻIongi ko e Palesitení.¹² ʻI he ʻaho 27 ʻo  Tīsema, 1847, kuo laka hake he taʻu ʻe uá e mālōlō ʻa Siosefa Sāmitá, naʻe toe fokotuʻutuu ai ʻe Pilikihami ʻIongi e Kau Palesitenisī ʻUluakí, ʻo hoko ʻa Hiipa C. Kimipolo mo Uiliate Lisiate ko hono ongo tokoní. Ko e meʻa tatau pē, ne tali loua ʻa Palesiteni Sione Teila mo Uilifooti Utalafi ʻo laka hake he taʻu ʻe uá hili e mālōlō ʻa kinautolu ne na fetongí ke toe fokotuʻutuʻu e Kau Palesitenisī ʻUluakí mo tataki e Siasí lolotonga ʻena hoko ko e Palesiteni ʻo e Kōlomu ʻo e Toko Hongofulu Mā Uá. Kamate meia Lōleniso Sinou ʻi he 1898, mo hono toe fokotuʻutuʻu ʻe he Kau Palesiteni foʻoú e Kau Palesitenisī ʻUluakí ʻi he hili pē mālōlō ʻa e palōfita kimuʻá.

Ngaahi Maʻuʻanga Tokoni ʻa e Siasí

Robin Scott Jensen, “Jesse Gause: Counselor to the Prophet: DC 81,” in Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 155–57.

“Account of Meetings, Revelation, and Blessing, 5–6 December 1834,” josephsmithpapers.org.

“Minutes, 18 March 1833,” in Minute Book 1, josephsmithpapers.org.

“Note, 8 March 1832,” Historical Introduction, josephsmithpapers.org.

“Revelation, 11 November 1831–B [DC 107 (partial)],” in Revelation Book 1, 122–23, josephsmithpapers.org.

Maʻuʻanga Fakamatalá

1. Tokāteline mo e Ngaahi Fuakava 21:1; vakai foki, “Revelation, 6 April 1830 [DC 21],”in Revelation Book 1, 28, josephsmithpapers.org; spelling and punctuation standardized.

2. “Revelation, 11 November 1831–B [DC 107 partial],” in Revelation Book 1, 123, josephsmithpapers.org; naʻe fakatonutonu hono sipelá.

3. “Minutes, 26–27 April 1832,” 24, josephsmithpapers.org.

4. Vakai, “Note, 8 March 1832,” in Revelation Book 2, 10–11, josephsmithpapers.org; spelling standardized.

5. Robin Scott Jensen, “Jesse Gause: Counselor to the Prophet: DC 81,” in Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 155–57.

6. “Revelation, 8 March 1833 [DC 90],” 1, josephsmithpapers.org. ʻI he ʻaho ní, ʻoku foaki e ngaahi kī ʻo e puleʻangá ki he kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá, ka ko e Palesiteni pē ʻo e Siasí ʻa e tokotaha ʻoku fakamafaiʻi ke ne fakaʻaongaʻi kakato kotoa e ngaahi kī ʻo e lakanga fakataulaʻeikí. Vakai ki he Ngaahi Tefito fekauʻakí “Quorum of the Twelve” mo e “Succession of Church Leadership.”

7. “Minutes, 18 March 1833,” in Minute Book 1, 17, josephsmithpapers.org.

8. “Revelation, between circa 8 and circa 24 March 1832,” josephsmithpapers.org.

9. “Revelation, 1 November 1831–A [DC 68],” in “Revelations,” Evening and Morning Star, Oct. 1832 (June 1835), 73, josephsmithpapers.org.

10. “Instruction on Priesthood, between circa 1 March and circa 4 May 1835 [DC 107],” in Doctrine and Covenants, 1835, 84, josephsmithpapers.org.

11. “Account of Meetings, Revelation, and Blessing, 5–6 December 1834,” in Joseph Smith, “History, 1834–1846,” 17, 20, josephsmithpapers.org.

12. Vakai ki he Tefito fekauʻaki “Succession of Church Leadership.”