Lea ʻo e Potó (TF 89)

‘I he 1833, naʻe maʻu ʻe Siosefa Sāmita ha fakahā ʻoku ui ko e Lea ʻo e Potó, ʻa ia kuo fakamafaiʻi ko e Tokāteline mo e Ngaahi Fuakava 89. ʻOku ʻiloa taha ʻa e fakahā ko ʻení ki hono fokotuʻu ʻo e ngaahi founga ʻa e Kāingalotu ʻi he Ngaahi ʻAho Kimui Ní kuo ʻiloa fakamāmani lahi, ʻa e ʻikai maʻu kava mālohí, tapaká, mo hono fakaʻaongaʻi e faitoʻo konatapú, kae pehē foki ki he kofí mo e tií.¹

Puipuituʻa ki he Fakahaá

Naʻe ʻomi e Lea ʻo e Potó ʻi ha taimi ʻo e fakakikihi lahi fekauʻaki mo e moʻui lelei fakalūkufua fakaesinó kae tautautefito ki hono ngaohikovia ʻo e kava mālohí. ʻI he ʻIunaiteti Siteití, ne tokolahi ha kakai lalahi ʻi he 1830 tupu ne ohi hake ʻi ha ngaahi fāmili ne hoko e inu kava mālohí ko ha konga ʻo ʻenau maʻu meʻatokoni pongipongi, hoʻatā, mo e efiafí. Ne hohaʻa ha tokolahi fekauʻaki mo e ngaahi nunuʻa fakasōsiale mo moʻui lelei ʻo e fakaututu e maʻu kava mālohí. Ne fokotuʻu ʻe he kau fokotuʻu lotu foʻoú ʻo kamata ʻi he 1810 tupú ke fakaʻehiʻehi mei he kava ne fuʻu mālohi ʻaupitó; pea toe fakalahi atu ki ai ʻenau kau fanongó, ʻo fai ha tukupā ke taʻofi e inu kava mālohi kotoa pē, ʻo kau ai e piá. ʻI he taimi tatau, ne lea ha niʻihi ʻo e kau fokotuʻu lotu foʻoú ʻo fakafepakiʻi e mama tapaká mo fokotuʻu atu e kofí ko ha fakafetongi ki he kava mālohí, he naʻe ʻikai maʻu maʻu pē ha vai maʻa.²

Lolotonga e hoko e ngaahi fakakikihi ko ʻení, ne ʻalu atu ai ʻa ʻEma Sāmita ki hono husepānití ʻi haʻane hohaʻa fekauʻaki mo e ʻātakai ʻi he Akoʻanga ʻo e Kau Palōfitá. Ko e feituʻu tatau pē naʻe fakaʻaongaʻi ʻe Siosefa ke lekooti e ngaahi fakahaá mo ngāue ki heʻene liliu fakalaumālie ʻo e Tohi Tapú, naʻe toe fakaʻaongaʻi ki he loki akó, ʻa ia ne faʻa ifi, mo mama, pea ʻaʻanu tapaka ai e kau akó. Naʻe fehuʻi ʻe Siosefa ki he ʻEikí peá ne maʻu e Lea ʻo e Potó. Naʻe tokoni e fakahaá ki he Kāingalotú ke nau vakaiʻi e ngaahi tefito kehe ne fakakikihiʻi ʻe he kau fokotuʻu lotu foʻoú mo tali foki e ngaahi meʻa pau ne hohaʻa ki ai ʻa ʻEmá. Naʻe pehē ʻe he fakahaá “ʻoku ʻikai maʻá e keté ʻa e ngaahi inu mālohí.” Pehē pē foki ki he tapaká, ʻa ia naʻe ʻaonga ange ko ha ʻakau faitoʻo ki he fanga pulu mahamahakí.³ ʻOku hā mahino ʻi ha ngaahi maʻuʻanga fakamatala naʻe maʻu ʻe he Kāingalotu ʻo e Siasí ʻi he kuonga muʻá ʻa e mahino ko e “inu velá” ko e ʻuhinga ki he kofí mo e tií.⁴ Naʻe akonaki ʻe ha ngaahi kulupu ʻe niʻihi hangē ko e Sieká ke taʻofi hono maʻu ʻo e kakanoʻi manú kae ʻikai taʻofi ia ʻe ha niʻihi kehe. Naʻe tuʻu tauʻatāina pē ʻa e Lea ʻo e Potó ʻo pehē naʻe fakangofua ʻe he ʻEikí hono fakaʻaongaʻi ʻo e kakanoʻi manú kae maʻu “fakasiʻisiʻi” pē.⁵ Naʻe taukaveʻi foki ʻe he Lea ʻo e Potó ʻa hono fakaʻaongaʻi ʻo e kēlení mo e fuaʻi ʻakaú.

Ko Hono Tauhi e Lea ʻo e Potó

ʻI he toʻu tangata ʻe ua ka hokó, naʻe akoʻi ʻe he kau taki ʻo e Siasí e Lea ʻo e Potó ko ha fekau mei he ʻOtuá, ka naʻa nau fakaʻapaʻapaʻi ha ngaahi fakakaukau kehekehe ki he founga ke tauhi ʻaki e fekau ko ʻení. Ne hokohoko atu e inu kofi mo e tī ʻa ha Kāingalotu tokolahi, pea mama tapaka ha niʻihi. ʻI he vahefonua ʻIutaá, naʻe taʻofi ʻe he kau taki ʻo e Siasí e konā ʻi he feituʻu fakapuleʻangá mo e inu uasikeé ka naʻe ʻikai ke nau faʻa lea ki hono fakaʻaongaʻi fakapotopoto ʻo e inu ne ʻikai fuʻu mālohí. Naʻe hoko hono fakaʻapaʻapaʻi ʻení ke ʻoange ai ha taimi ki he Kāingalotú ke nau fakatupulaki ʻenau tukufakaholo pē ʻanautolu ki he fakaʻehiʻehi mei he ngaahi meʻa ʻoku maʻunimaá.

Ka neongo iá, ne ʻamanaki mai e kau taki ʻo e Siasí ki ha taimi ʻe tauhi ai ha tuʻunga moʻui maʻolunga ange. ʻI he 1860 mo e 1870 tupú, naʻe fokotuʻu ai ʻe Pilikihami ʻIongi ki he Kāingalotú ke taʻofi hono fakaʻaongaʻi kotoa ʻo e tī, kofi, tapaka, mo e kava mālohí.⁶ Naʻe toutou akoʻi e fānaú ke moʻui ʻaki e Lea ʻo e Potó ʻo lelei ange ʻi heʻenau mātuʻá. Ko hono ola ʻo e akoʻi ko ʻení ko ha tupu hake ha toʻu tangata kei talavou ʻo e Siasí ʻo tauhi e Lea ʻo e Potó pea nau lava ʻo talangofua ki he tuʻunga moʻui ʻo e taʻofi kakató.

Naʻe hoko e fakautuutu ʻo hono fakamamafaʻi e Lea ʻo e Potó mo e hōloa hono fakahoko e mali tokolahí hili e 1890, ko ha fakaʻilonga makehe ia ki he Kāingalotu ʻo e Siasí. ʻI he konga kimuʻa ʻo e 1900 tupú, naʻe fakafetongi ʻe he Kāingalotú e uainé ʻaki e vai ki he sākalamēnití. ʻI he 1919, naʻe tali lelei ʻe he Kāingalotu ʻi he Ngaahi ʻAho Kimui ní ha fakalelei ki he Konisitūtone  ʻo ʻAmeliká ne tapuʻi ai hono ngaohi mo fakatau ʻo e kava mālohí, ko ha ikuna ia ki he faʻahinga ʻo e tangatá.⁷ ʻI he 1921, ne ueʻi ʻe he ʻEikí ʻa Palesiteni Hiipa J. Kalānite ke fie maʻu e Kāingalotu kotoa pē ke fakaʻehiʻehi mei he kava mālohí, tapaká, kofí, mo e tií kae lava ʻo maʻu ha lekomeni temipale.

ʻI he faifai pea hoko hono maʻu ʻo e kava mālohí mo e tapaká ko ha meʻa angamaheni ʻi he ʻIunaiteti Siteití, naʻe ʻiloa e Kāingalotu ʻi he Ngaahi ʻAho Kimui ní ʻi heʻenau tuʻu maʻu ʻi hono fakaʻikaiʻi ke inu pe ifi lolotonga hono maʻu ia ʻe ha kau Kalisitiane tokolahi kehé. ʻOku faʻa fakaʻaongaʻi ʻe he kau taki ʻo e Siasí he senituli 20, ʻa e ngaahi fika fakasitetisitika ke lave ki he faikehekehe ko ʻení ʻoku hā ai e moʻui fuoloa ange mo siʻisiʻi ange e faingataʻa fakaemoʻui lelei ʻa e Kāingalotú ʻo hangē ko e talaʻofa ʻo e Lea ʻo e Potó ʻe “lele pea ʻikai ongosia, pea ʻalu ʻo ʻikai pongia” ʻi he fakaʻehiʻehi mei aí.⁸

ʻI hono ʻoatu ʻo e Lea ʻo e Potó mo hono puipuituʻa ʻo e kuonga muʻá ʻi ʻAmeliká, ne ʻikai ha ʻamanaki pe fakamatala pau ki he ngaahi meʻa lahi kuo hoko ʻo angamahení. Kuo fakamamafaʻi ʻe he kau taki ʻo e Siasí ʻi he fakalau ʻa e taimí, e ngaahi tefitoʻi moʻoni ʻo e fakahaá, hangē ko e tokanga ki he moʻui lelei ʻa e sinó mo e fakaʻehiʻehi mei he ngaahi meʻa maʻunimaá. ʻI ha ngaahi meʻa ʻe niʻihi, kuo ʻomi ha ngaahi fakahinohino pau. Hangē ko ʻení, ko e faitoʻo kona tapú ʻoku tapu ia ʻi he Lea ʻo e Potó, ka ko hono fakaʻaongaʻi ʻo e foʻi ʻakau faitoʻó ʻoku ngofua ia. Ko hono fakaʻaongaʻi ʻo e ngaahi meʻa kehe hangē ko e kēfiní, kuo tuku ia ki he fakamaau ʻa e Kāingalotu fakafoʻituituí pea ʻikai ko ha fie maʻu ia ki hono maʻu ʻo e lekomeni temipalé.

ʻOku vakai e Kāingalotu ʻo e Siasí ki he Lea ʻo e Potó ko ha meʻa ʻoku laka hake ʻi ha tuʻutuʻuni fakaemoʻui lelei. ʻOku ʻikai ngata pē ʻi heʻenau taau ke moihū he temipalé ʻi heʻenau fakaʻehiʻehi mei aí, ka ʻoku nau ʻomi ha ngaahi lelei fakalaumālie, ʻo kau ai hono maʻu lahi ange ʻo e fakahā fakatāutahá.

Ngaahi Maʻuʻanga Tokoni ʻa e Siasí

Jed Woodworth, “The Word of Wisdom: DC 89,” ʻi he Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 183–91.

“Revelation, 27 February 1833 [DC 89],” ʻi he Sidney Gilbert, Notebook, 113–15, josephsmithpapers.org.

Boyd K. Packer, “The Word of Wisdom: The Principle and the Promises,” Ensign, May 1996, 17–19.

“Word of Wisdom,” Gospel Topics, topics.lds.org.

Ngaahi Fakamatalá

ʻOku ʻoatu ʻe he pulusinga ko ʻení ha fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he maʻuʻanga tokoni ko ʻení, ʻoku ʻikai ke mau poupouʻi pe fakapapauʻi atu e kanotohí pe ngaahi fakakaukau ʻa e kau faʻu tohí.

Steven C. Harper, Setting the Record Straight: The Word of Wisdom (Salt Lake City: Millennial Press, 2007).

Paul H. Peterson and Ronald W. Walker, “Brigham Young’s Word of Wisdom Legacy,” BYU Studies, vol. 42, nos. 3–4 (2003), 29–64.

Maʻuʻanga Fakamatalá

1. “Revelation, 27 February 1833 [DC 89],” ʻi he Sidney Gilbert, Notebook, 113–15, josephsmithpapers.org.

2. Ki ha fakamatala lahi ange ki he ngāue ki he fakaʻehiʻehi ʻi ʻAmelika he kuonga muʻá, vakai, Ian Tyrrell, Sobering Up: From Temperance to Prohibition in Antebellum America, 1800–1860 (Westport, Conn.: Greenwood Press, 1979).

3. “Revelation, 27 February 1833 [DC 89],” ʻi he Sidney Gilbert, Notebook, 113; vakai foki, Tokāteline mo e Ngaahi Fuakava 89:7–9.

4. Hyrum Smith, “The Word of Wisdom,” Times and Seasons, June 1, 1842, 800.

5. “Revelation, 27 February 1833 [DC 89],” ʻi he Sidney Gilbert, Notebook, 114; vakai foki, Tokāteline mo e Ngaahi Fuakava 89:12–13.

6. Ngaahi Akonaki ʻa e Kau Palesiteni ʻo e Siasí: Pilikihami ʻIongi (Salt Lake City: The Church of Jesus Christ of Latter-day Saints, 1997), 212.

7. Naʻe lotomamahi ʻa Palesiteni Kalānite ʻi he fili ʻe he kau fili ʻo ʻIutaá—ko e lahi tahá ko e Kāingalotu ʻo e Siasí—ke taʻofi e liliu ke Tapú ʻi he 1933. Vakai, Gordon B. Hinckley, “Loyalty,” Ensign pe Liahona, May 2003, 60.

8. “Revelation, 27 February 1833 [DC 89],” ʻi he Sidney Gilbert, Notebook, 115, spelling standardized; vakai foki, Tokāteline mo e Ngaahi Fuakava 89:20.