Fakatonutonu Faka-Siasí

ʻOku fakamatalaʻi ʻe he Ngaahi Tefitoʻi Fakamatala mo e Ngaahi Fuakava ʻo e Siasí, kuo fakamafaiʻi ko e Tokāteline mo e Ngaahi Fuakava 20 he taimi ní, ʻa e ngaahi founga ngāue ki hono tokangaʻi ʻo e ngāue ʻa e Siasí, kau ai e founga ke fakatonutonu ʻaki ʻa e “kau maumaufono” ʻi he Siasí. Naʻe maʻu ʻa e ngaahi fakahinohino ko ʻení ʻi he fakahā kia Siosefa Sāmita pea ʻoatu ʻi he fuofua konifelenisi ʻa e Siasí ʻi Sune ʻo e 1830, ʻa ia ʻoku ʻuhinga ʻa e ngaahi fakahinohino ko ʻení ki he ngaahi lotu ʻo e sākalamēnití mo e ngaahi founga ʻo e papitaisó mo e fakanofó ʻoku ʻi he Tohi ʻa Molomoná. ʻI he founga tatau pē, ʻoku nau tataki ʻa e kau taki ʻo e Siasí ke nau fekumi ki he folofolá ʻi hono tokangaʻi ʻo e ngaahi fakatonutonu faka-Siasí.¹ ʻOku fakamamafaʻi ʻe he Tohi ʻa Molomoná ʻa e mahuʻinga ʻo e faʻa fakamolemolé, ‘oange ki he kau taki ʻo e Siasí ʻa e fatongia ke fakamāú, mo fakamatalaʻi ʻa e “ʻilonga ia ʻe ʻikai te ne fakatomala mei heʻene ngaahi angahalá ʻe ʻikai lau ia fakataha mo hoku kakaí.”²

Fakatatau ki he Ngaahi Tefitoʻi Fakamatala mo e Ngaahi Fuakavá, naʻe pau ke fai e ngaahi meʻa ʻa e Siasí, kau ai e ngaahi tuʻutuʻuni fekauʻaki mo e fakatonutonú, ʻi he ngaahi konifelenisi ʻa e Siasí pe ngaahi fakataha ʻa e kaumātuʻá pe kāingalotú. Naʻe aleaʻi ʻe kinautolu naʻe kau ʻi he ngaahi konifelenisi ko ʻení ha ngaahi tukuakiʻi naʻe fai ki he kāingalotu ʻo e Siasí, fanongo ki he ngaahi fakamoʻoní mo e ngaahi vetehiá, pea toki fai ha ngaahi tuʻutuʻuni fekauʻaki mo e tuʻunga ʻo e fakaʻiloá. Naʻe ʻi ai ha ngaahi meʻa ʻe niʻihi naʻe fakaleleiʻi ʻi he ngaahi konifelenisi kimuʻá, ʻo kau ai ʻa e fakamamahi ʻi ʻapí, fakafepakiʻi e Siasí ʻi he kakaí, mo e ngaahi hia kehe.³

Naʻe fakamatalaʻi ʻe ha fakahā kia Siosefa Sāmita ʻi Nōvema 1831, ha ngaahi founga pau ki hono fakatonutonu ‘o e kāingalotu ʻo e Siasí. Naʻe fakamatalaʻi ʻe he fakahaá ko e pīsopé “ko ha Fakamaau ʻi ‘Isileli” ʻa ia ʻoku fakafatongia ʻaki hono fakahoko ʻa e ngaahi tuʻutuʻuni ki he fakatonutonú ʻaki ʻa e poupou mei hono ongo tokoní. Naʻá ne fakaʻatā foki ke ʻoatu ʻa e ngaahi fakatonutonu faingataʻá ki he “palesiteni ʻo e Lakanga Fakataulaʻeiki Māʻolungá,” pe Palesiteni ʻo e Siasí, ʻa ia te ne lava ke ui ha kau taulaʻeiki lahi kehe ʻo ʻikai lahi hake ʻi he 12 ke tokoni kiate ia.⁴

Naʻe fokotuʻutuʻu ʻe Siosefa Sāmita ʻa e ʻuluaki fakataha alēlea māʻolungá ʻi Ketilani, ʻi ʻOhaiō, ʻi Fēpueli 1834, ʻo muimui ʻi he sīpinga tatau mo ia naʻe fakamatalaʻi ʻi he fakahā ʻi Nōvema 1831. Hili ha ngaahi māhina siʻi mei ai, naʻá ne fakamafaiʻi hono fokotuʻu ha fakataha alēlea māʻolunga hono ua ʻi Mīsuli. Naʻe fakaleleiʻi ʻe he ongo fakataha alēlea ko ʻeni ʻe uá, ʻa ia naʻe puleʻi ʻe he Kau Palesitenisī ʻUluakí mo e kau palesitenisī ʻo e Siteiki Mīsulí, ʻa e ngaahi fetaʻemahinoʻaki mo e fakatonutonu kotoa pē ʻa ia naʻe ʻikai lava ke fai ʻe he kau pīsopé. Naʻe hoko foki ʻa e ongo fakataha alēleá ko ha fakamaauʻanga ʻi he taimi naʻe taʻefiemālie ai ha taha ki he tuʻutuʻuni naʻe fai ʻe he fakataha alēlea ʻa e pīsopé. Naʻe hā ʻi he ngaahi miniti ʻo e ʻuluaki fakataha alēlea māʻolungá, ʻa ia ʻoku fakakau he taimí ni ʻi he Tokāteline mo e Ngaahi Fuakavá, ha fakahinohino fakaikiiki ki he founga ne pau ke fakahoko ai e fakatonutonú ʻe he ngaahi fakataha alēleá. ⁵

Naʻe fakangatangata ʻe he ngaahi fakahā kimuʻá ʻa e mafai ʻo e ngaahi fakataha alēlea fakatonutonu ʻa e Siasí. Hangē ko ʻení, neongo naʻe iku e ngaahi fakapoó ki he fakamavaheʻi mei he feohiʻangá, ka naʻe ʻave ʻa e ngaahi hia ko iá ki he kau maʻu mafai fakalaó ke fakamaauʻi. Naʻe fakamahinoʻi ʻe ha fakamatala ʻa e Siasí ʻi he 1835 ʻa e ʻikai maʻu ʻe he ngaahi fakamaauʻanga faka-Siasí ʻa e mafai ke fakamaauʻi ʻa e kakaí ki heʻenau moʻuí pe koloá ka te nau lava ke “tuʻusi kinautolu mei heʻenau kautahá pea fakamavaheʻi mei heʻenau feohiʻangá.” ⁶

ʻOku ʻi ai ha niʻihi ʻo e ngaahi natula ʻo e fakatonutonu faka-Siasí kuo liliu ʻi he taʻau ʻo taimí pea fakatatau mo e maʻu fakahā hokohokó. ʻI he Siasi he kuonga muʻá, naʻe fakahāhā ʻa e ngaahi tuʻutuʻuni fakatonutonú, pea naʻe faʻa ʻomi ʻa e ngaahi vetehia ʻa e mēmipá ʻo fakahoko ʻi he ngaahi fakataha ʻa e Siasí. ʻI he fakamahuʻingaʻi ʻe he ngaahi ʻulungaanga fakafonua lahi ʻa e totonu fakatāutahá, kuo fakahoko ʻe he Siasí ʻa e ngaahi fakatonutonú ʻaki ʻa e tuʻunga ʻoku ʻikai fakahāhā holo. ʻIkai ngata aí, ʻi he hisitōlia ʻo e Siasí kimuʻá, naʻe faʻa tukuakiʻi ʻe he kāingalotú ʻa e niʻihi kehé ʻi he ʻao ʻo e ngaahi fakamaauʻanga Siasí ki hono fakahoko ʻo e ngaahi hia hangē ko e “ʻulungaanga taʻefakakalisitiané.” ʻI he ʻalu pē ʻa e taimí, kuo fai ʻe he Siasí ha ngaahi fakahinohino pau ange ki he kau taki fakalotofonuá. ʻI he ʻaho ní ʻoku kau ʻi he ngaahi fakatonutonú ʻa e ngaahi maumauʻi mamafa ʻo e ngaahi tuʻunga moʻui naʻe fokotuʻu ʻe he Siasí, pe, ʻi ha ngaahi tūkunga ʻe niʻihi, ko hono fakafepakiʻi e kau takí pe ngaahi tuʻutuʻuni ʻo e Siasí.

Kuo liliu foki mo e lea naʻe ngāue ʻaki ki he fakatonutonu faka-Siasí. ʻI he Siasi he kuonga muʻá, naʻe lava ʻe he ngaahi fakataha alēlea fakatonutonú ke “taʻofi” ha mēmipa pe fakataʻeʻaongaʻi e “laiseni” ʻo ha kaumātuʻa, ʻo taʻofi ai ia mei he ngāue fakafaifekaú, malangá, pe ngāue ʻi ha ngaahi fatongia kehe. ʻI he ngaahi hia lalahi angé, naʻe hanga ʻe he ngaahi fakataha alēleá ʻo “motuhi atu” ha mēmipa, ʻa ia ko hono fakataʻeʻaongaʻi hono mēmipasipí. ʻI he ʻaho ní ʻoku fili ʻe he ngaahi fakataha alēlea fakatonutonú mei ha taha ʻo e ngaahi ola ko ʻeni ʻe faá: (1) fai e faleʻí kae ʻikai fekumi ki ha fakatonutonu; (2) fakahoko ha tuʻutuʻuni maluʻi, ʻa ia ʻoku taʻofi fakataimi ia mei ha ngaahi ngāue ʻe niʻihi, ʻo hangē ko e maʻu sākalamēnití; (3) ko hono fakamavaheʻi, ʻa ia ʻokú ne fakaʻatā ʻa e fakafoʻituituí ke tauhi pē hono mēmipasipí kae taʻofi fakataimi ia mei haʻane kau ki ha meʻa lahi lolotonga e fakatomalá; pe (4) ko hono tuʻusi, ʻa ia ʻoku fakataʻeʻaongaʻi ai ʻa e mēmipasipi ʻo e tokotahá.

ʻOku ʻi ai ha ngaahi tefitoʻi tuʻunga ʻo e fakatonutonu faka-Siasí kuo tauhi mai pea ʻoku kei tatau pē. ʻOku ʻi ai e ʻamanaki ʻe hanga ʻe he kāingalotu ʻo e Siasí ʻo fokotuʻu kinautolu ki he ngaahi tuʻunga ʻulungaanga māʻolungá ʻi heʻenau moʻuí ko ha kau ākonga ʻo Sīsū Kalaisi. Ko kinautolu ʻoku ʻikai ke nau fakahoko e fakatonutonu fakatāutaha ko ʻení ʻe malava ke fakangatangata e meʻa ʻoku nau kau ki aí pe toʻo ʻenau mēmipasipi ʻi he Siasí.⁷ Ka neongo iá, ʻoku ʻikai ke aofangatuku ha tautea ʻi he māmaní: ʻe lava e kāingalotu ʻoku fakatomalá ke toe foki mai ki he Siasí mo fakafoki mai honau ngaahi tāpuakí. ʻOku fakapapauʻi ʻe he fakatonutonu faka-Siasí ʻa e tuʻunga ʻo ha taha ʻi he Siasí. Ka, ʻi he taimi ʻe niʻihi, ʻoku ʻi ai e ngaahi hia ʻoku ʻave ki he ngaahi fakamaauʻanga fakapuleʻangá, ʻo hangē ko e taimi ʻoku fie maʻu ai ʻa e ngaahi fakahinohino fakalaó pe ko e malu ʻo e niʻihi naʻe uesiá. ʻI he ngaahi hiá kotoa, ʻoku fakahoko ʻa e ngaahi tuʻutuʻuni ʻa e ngaahi fakataha alēleá ʻi he hili hono fai e faleʻí, ʻi he fakahinohino ʻa e Laumālié, ʻi ha tōʻonga fakakaukau ʻo e manavaʻofá, pea mo e tokanga ki he ngaahi fie maʻu ʻa e fakafoʻituituí mo e Siasí fakatouʻosi. Naʻe pehē ʻe ʻEletā M. Lāsolo Pālati, “ʻOku ʻikai fakataumuʻa ʻa e fakatonutonu faka-Siasí ke hoko ko e ngataʻanga ia ʻo e ngāué—ka, ʻoku fokotuʻutuʻu ia ke hoko ko e kamataʻanga ʻo ha faingamālie ke toe foki ki he feohiʻanga kakató pea mo e ngaahi tāpuaki kakato ʻa e Siasí.”⁸

Ngaahi Maʻuʻanga Tokoni ʻa e Siasí

“Church Disciplinary Councils,” Gospel Topics, topics.lds.org.

Related Topics: Dissent in the Church

Maʻuʻanga Fakamatalá

1. “Articles and Covenants, circa April 1830 [DC 20],” josephsmithpapers.org.

2. Vakai, Mōsaia 26:8–37.

3. Vakai, “Minutes, 21 October 1831,” ʻi he Minute Book 2, 9, josephsmithpapers.org; “Minutes, 6 September 1831,” ʻi he Minute Book 2, 6, josephsmithpapers.org. Naʻe fakamatalaʻi ʻe ha fakahā naʻe fai ʻi Fēpueli 1831 ʻa e founga ngāue ki ha ngaahi faihia pau, ʻo hangē ko e fie maʻu ha kau fakamoʻoni ʻe toko ua pe lahi ange ʻi he ngaahi tukuakiʻi ki he tonó. “Revelation, 23 February 1831 [DC 42:74–93],” josephsmithpapers.org.

4. “Revelation, 11 November 1831–B [DC 107 (partial)],” in Revelation Book 1, 122–23.

5. “Revised Minutes, 18–19 February 1834 [DC 102],” josephsmithpapers.org.

6. “Appendix 4: Declaration on Government and Law, circa August 1835 [DC 134],” ʻi he Doctrine and Covenants, 1835 ed., 253, josephsmithpapers.org.

7. Ko e lahi taha ʻo e ngaahi fakatonutonú kuo fakahoko ia ʻi he fakamaauʻanga ʻa e pīsopé pe fakataha alēlea māʻolungá. ʻI he hisitōlia ʻo e Siasí he kuonga muʻá, naʻe fakafatongia ʻaki foki e Fineʻofá ke “tokangaʻi ʻa e ngaahi tōʻonga moʻuí—pea ke tokanga makehe ki he ʻulungaanga mo e ongoongo—ʻa [hono] kau mēmipá” (Emma Smith, ʻi he Relief Society Minute Book, Māʻasi 17, 1842, 13, Church History Library, Salt Lake City; Jill Mulvay Derr, Carol Cornwall Madsen, Kate Holbrook, pea mo Matthew J. Grow, eds., The First Fifty Years of Relief Society: Key Documents in Latter-day Saint Women’s History [Salt Lake City: Church Historian’s Press, 2016], 36). ʻI he fenāpasi mo e fatongia ko iá, naʻe ngāue ʻaki ʻe he kau taki ʻo e Fineʻofá ʻa e mafai fakatonutonú ke fakafisingaʻi hono tali ʻo ha niʻihi ke hoko ko ha kau mēmipa pe ke tukuange kinautolu koeʻuhi ko ha ngaahi ʻuhinga fakatonutonu.

8. M. Russell Ballard, “A Chance to Start Over,” Ensign, Sept. 1990, 16.