Saione/Selusalema Foʻoú

ʻOku fakatou hā ʻa e foʻi lea Saioné mo e Selusalema Foʻoú ʻi he Tohi Tapú. ʻI he Fuakava Motuʻá, ʻoku angamaheni ʻaki hono ngāue ʻaki e foʻi lea Saioné ki he kolo ko Selusalemá mo hono temipale moʻungá. Naʻe tomuʻa hā ʻi he ngaahi kikite ʻo e Fuakava Foʻoú ʻe ʻi ai ha ʻaho ʻe fakatupu foʻou ai ʻe he ʻEikí e ngaahi langí pea mo e māmaní. ʻE kau he fakatupu foʻou ko ʻení, ha kolo ʻo e ʻOtuá ʻe ui ko ha “Selusalema foʻou” ʻe ʻalu “hifo mei he ʻOtuá mei langi.” ¹ Naʻe ʻikai tui e kau tangata malanga ʻi he kuonga ʻo Siosefa Sāmitá ki he fakaʻuhinga ʻo e ngaahi foʻi lea ko ʻení. Naʻe fakaʻaongaʻi ʻe ha niʻihi ʻa e kupuʻi lea “ngāue ʻo Saioné” ko ha hingoa ki hono fakamafola ʻo e tui faka-Kalisitiané.²

ʻOku fakamatalaʻi ʻe he Tohi ʻa Molomoná mo e ngaahi fuofua fakahā ʻa Siosefa Sāmitá ha kolo ʻi he kahaʻú ko Saione ʻa ia ʻe hoko ko ha potu tānakiʻanga ʻo e hako ʻo ʻIsilelí ʻi he ngaahi ʻaho fakaʻosí. Naʻe ʻomi ʻe hono toe vakaiʻi fakalaumālie ʻe Siosefa Sāmita e tohi ʻa Sēnesí ha talanoa ʻo ha “Kolo ʻo e Māʻoniʻoni” ne ui ko Saione ʻa ia naʻe langa ʻe he palōfita kuonga muʻa ko ʻĪnoké. Naʻe fakangata ʻe kinautolu ne tānaki ki he Saione ʻo ʻInoké ʻa e masivesivá pea nau faaitaha, anga māʻoniʻoni mo loto-maʻa. Naʻe faifai, pea hiki hake ʻa ʻĪnoke mo e kakai ʻo Saioné ki he langí.³ Naʻe fekumi e kāingalotú, ʻo kamata ʻi he 1831, ke fokotuʻu ha kolo ko Saione ʻa ia te nau lava ai ke teuteu ki he Hāʻele ʻAnga Ua Mai ʻa Sīsū Kalaisí. Naʻe ui ʻe ha fakahā ʻe taha ʻa e koló ni ko e “Selusalema Foʻoú.”⁴ Naʻe pehē ʻe ha taha ko Saioné ko ha kakai ia ʻoku nau “loto-maʻa.”⁵

Ngaahi Fuofua Feinga ke Langa ʻa Saioné

Naʻe maʻu ʻe Siosefa Sāmita ha fakahā ʻi he 1831 fekauʻaki mo e potu ki he kolo ko Saioné ʻi he feituʻu ofi ki Tauʻatāina, ʻi he Vahefonua Siakisoni,Mīsulí.⁶ Naʻe kamata ke fakatau mai ai ʻe Pīsope ʻEtuate Pātilisi ha ngaahi konga kelekele mo tokoni ki hono fakanofonofo e kau mēmipa foʻoú ʻi heʻenau tūʻuta maí. ʻI he faʻahitaʻu māfana ʻo e 1833, naʻe fekumi ai ʻa Siosefa Sāmita mo hono ongo tokoní ki ha fakahinohino fakalangi ʻi heʻenau fokotuʻutuʻu ha palani ki he koló, ʻa ia naʻe kau ai ha ngaahi hala mo ha ngaahi fale fakapuleʻanga ʻe 24 mo ha ngaahi fale ʻo e Siasí naʻe fakatapui ko ha “ngaahi temipale” ki ha ngaahi taumuʻa kehekehe.⁷ Ka, ʻi he faʻahitaʻu māfana ko iá, naʻe hanga ʻe he kakai ʻi he Vahefonua Siakisoní ʻo tuli e kāingalotú mei ai, fakamālohiʻi kinautolu ke siʻaki honau kelekelé mo e ngāue ki hono langa ʻo e kolo ko Saioné.

ʻI ha holongā ʻo e ngaahi fakahā ne muimui mai aí, naʻe fakahinohinoʻi ʻe he ʻEikí e Kāingalotú fekauʻaki mo e ngaahi ʻulungaanga fakalaumālie naʻe ʻikai ke nau maʻu ka ne fie maʻu ki ha faʻahinga kakai pē ne nau loto ke langa ʻa Saione, pea ʻoange mo ha fakahinohino he founga ke nau tupulaki aí.⁸ Naʻe kamata teuteu e Kāingalotú ki he “huhuʻi ʻo Saioné,” ko ha taimi te nau toe foki mai ai ʻo maʻu honau tofiʻa ʻi Misulí mo hoko atu hono langa ʻo e kolo māʻoniʻoní.⁹

Ko ha Mahino ne Hoko Mai

Naʻe ʻikai ke ola lelei mo fakatokangaʻi e totonu ʻa e Kāingalotú ke fakamoʻui ʻa Saioné pē ko ʻenau foki fakavavevave ki he Vahefonua Siakisoní, kau ai mo ʻenau tangi ki he potungāue faka-lao ʻa e ʻIunaiteti Siteití. ʻI ha fakahā ʻi Sanuali 1841, fekauʻaki mo e taʻe lava ko ia ʻenau feinga ke langa ha temipale-Saione ʻi he uhouhonga ʻo e Vahefonua Siakisoní, naʻe fakahā ai ʻe he ʻEikí “ʻOku taau mo au ke ʻoua naʻá ku toe ʻekeʻi ʻa e ngāue ko iá … ka ke tali ʻa ʻenau ngaahi feilaulaú.”¹⁰ Naʻe fekauʻi e Kāingalotú ʻe he fakahā tatau ke nau langa ha temipale ʻi Nāvū, ʻIlinoisi, mo fokotuʻu ha kolo ko ha feituʻu foʻou ki he tānakí.

Naʻe akonaki ʻa Siosefa Sāmita ʻi Nāvū,ko Saioné “ʻoku kau kotoa ki ai ʻAmelika Tokelau mo ʻAmelika Tonga,” peá ne toe pehē, ʻoku ʻuhinga tatau ia mo e hoko, “ha toe feituʻu pē ʻe tānaki ki ai e Kāingalotú ko Saione.”¹¹ Naʻá ne toe fakamamafaʻi foki e mahuʻinga ʻo e temipalé ki Saione mo hono tānakí, ʻo fakahā “ko e feituʻu ko iá, ʻa e potu te tau toumuʻa lava ke langa ai ha temipalé.”¹² Naʻe ʻamanaki ʻa Siosefa ʻe hoko e kolo ʻe tuʻu ai e temipalé, hangē ko Nāvuú, ko e uho ʻo e tānakiʻangá, pea ʻe fokotuʻu e ngaahi siteiki ʻo Saioné ʻi ha ngaahi feituʻu lahi, ʻo hoko ko ha maluʻanga ki he kau māʻoniʻoní.¹³

Naʻe hokohoko atu e ʻamanaki ʻa e Kāingalotú ke nau toe foki ki he Vahefonua Siakisoni, Misulí. ʻI he taimi tatau, naʻe akonaki e kau taki ʻo e Siasí, hangē ko Pilikihami ʻIongí, fekauʻaki mo e mahuʻinga hono langa ʻo Saione ʻi ha potu pē ʻoku ʻi ai e Kāingalotú. Ne ʻikai fuoloa mei heʻenau nofoʻi e Teleʻa Sōlekí, naʻe lea ʻa Palesiteni ʻIongi ki hono fakatupulaki honau koló ko ha Selusalema Foʻou pea hoko e Temipale Sōleki ʻoku langa haké ko e uho ʻo e tānakiʻangá.¹⁴

ʻI he taʻu 1950 mo e 1960 tupú, naʻe kamata ke fokotuʻu ʻe he Siasí ha ngaahi Siteiki ʻi Saione ʻi ha ngaahi feituʻu kehekehe ʻi he māmaní. ʻI hono fakamatalaʻi ʻo e ngāue ko ʻení, naʻe pehē ʻe ʻEletā Sipenisā W. Kimipolo ʻoku “vakai e Kau Palesitenisī ʻUluakí mo e Tokohongofulu Mā Uá ki he poto fakaofo ʻi ha ngaahi Saione lahi, ngaahi potu tānaki lahi ʻa ia ʻe lava e Kāingalotú ʻi honau ʻulungaanga fakafonuá mo e puleʻangá ke nau hoko ko ha meʻa ngāue ki hono fakatupu mo langa ʻo e puleʻangá.”¹⁵ ʻI he ʻahó ni, ʻoku tānaki e Kāingalotú ki he ngaahi siteiki fakalotofonua ʻo Saioné pea langa mo ha ngaahi temipale ʻi ha ngaahi fonua lahi, pea ʻoku fakamamafaʻi ʻe he kau taki ʻo e Siasí e mahuʻinga ʻo ʻenau hoko ko ha kakai ʻoku moʻui ʻo fakatatau mo e ngaahi tuʻunga ʻo e Saioné—faaitahá, ʻulungaanga faka-ʻOtuá mo e ʻofa faka-Kalaisí.¹⁶

Ngaahi Maʻuʻanga Tokoni ʻa e Siasí

“Saione,” Ngaahi Kaveinga ʻo e Ongoongoleleí, topics.lds.org.

“Saione,” josephsmithpapers.org.

D. Todd Christofferson, “Haʻu ki Saione,” Ensign, Nōvema. 2008, 37–40.

Jed Woodworth, “The Center Place: DC 52, 57, 58,” ʻi he Matthew McBride mo James Goldberg, eds., Revelations in Context: The Stories behind the Sections of the Doctrine and Covenants (Sōleki Siti: Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 2016), 122–29.

Fekauʻaki mo e Ngaahi Tefitó: Tānaki ʻo ʻIsilelí, Jackson County Violence

Maʻuʻanga Fakamatalá

1. Fakahā 3:12; 21:2.

2. E. Brooks Holifield, Theology in America: Christian Thought from the Age of the Puritans to the Civil War (New Haven: Yale University Press, 2003), 49.

3. Mōsese 7:18–23; vakai foki “Old Testament Revision 1,” 16, josephsmithpapers.org.

4. ʻEta 13; 3 Nīfai 20–21; Tokāteline mo e Ngaahi Fuakava 29; Tokāteline mo e Ngaahi Fuakava 45; “Fakahā, 20 Siulai 1831 [TF 57],” ʻi he Revelation Book 1, 93–94, josephsmithpapers.org; see also related Topic “Gathering of Israel.”

5. “Revelation, 2 August 1833–A [DC 97],” ʻi he Revelation Book 2, 64, josephsmithpapers.org.

6. “Revelation, 20 July 1831 [DC 57],” ʻi he Revelation Book 1, 93.

7. “Plat of the City of Zion, circa konga Kimuʻa Sune–25 Sune 1833,” Historical Introduction, josephsmithpapers.org.

8. “Revelation, 16–17 Tīsema 1833 [DC 101],” josephsmithpapers.org; “Revelation, 24 Fepueli 1834 [DC 103],” josephsmithpapers.org; “Revelation, 22 Sune 1834 [TF 105],” josephsmithpapers.org.

9. “Revelation, 22 Sune 1834 [TF 105],” 98, josephsmithpapers.org.

10. “Revelation, 19 Sanuali 1841 [TF 124],” ʻi he Book of the Law of the Lord, 7, josephsmithpapers.org; tuʻunga pau ʻo e sipelá.

11. “Discourse, circa 19 Siulai 1840, as Reported by Unknown Scribe–A,” 1, josephsmithpapers.org.

12. Joseph Smith journal, ʻEpeleli 8, 1844, ʻi he Tohinoa, Tīsema 1842–Sune 1844; Book 4, 1 Māʻasi–22 Sune 1844, 73, josephsmithpapers.org; tuʻunga pau ʻo e fakaʻilonga leá.

13. Joseph Smith discourse, ʻEpeleli 8, 1844, Addresses 1844, Joseph Smith Collection, Church History Library, Salt Lake City.

14. Brigham Young discourse, Sepitema 11, 1853, ʻi he Journal of Discourses, 26 vols. (London: LDS Booksellers Depot, 1854–86), 1:78; Franklin D. Richards discourse, ʻOkatopa 6, 1853, in Journal of Discourses, 1:321.

15. Spencer W. Kimball, Ngaahi Akonaki ʻa Sipenisā W. Kimipolo, ed. Edward L. Kimball (Salt Lake City: Deseret Book, 1982), 440.

16. D. Todd Christofferson, “Haʻu ki Saione,” Ensign, Nōvema 2008, 37–40.