Sila

ʻOku tui ʻa e Kāingalotu ʻo e Siasí kuo toe fakafoki mai ʻe he ʻOtuá ki māmani ʻa e mālohi ne foaki ki he ʻAposetolo ko Pitá ke fakamaʻu, pe silaʻi ʻi he māmaní pea ʻi he langí. ʻOku fakaʻaongaʻi ʻa e mālohi faisila ko ʻení ʻi he ngaahi temipalé ke fakatapui ʻaki ʻa e malí pea mo silaʻi e ngaahi fāmilí ke laui toʻu tangata. Naʻe fakaʻaongaʻi ʻe he Kāingalotu ʻo e Siasí ʻa e foʻi lea sila ʻi he ngaahi founga kehekehe kae felāveʻi pē. Naʻe fakaʻaongaʻi ʻa e ngaahi sitapa ke fakapapauʻi ʻaki ʻa e ngaahi aleapaú. Naʻe fakaʻaongaʻi ʻa e ngaahi sitapa ke silaʻiʻaki e ngaahi aleapaú ke fakaʻofisiale. Naʻe hanga ʻe he ngaahi sila-sitapa ne ngaohi mei he vaitohí, teʻelangó pe sitapa kuo teuteuʻí ʻo fakapapauʻi ʻa e ngaahi fakamoʻoni ʻi ha aleapau.¹ Naʻe fakaʻuhingaʻi ʻe he kau laukonga tokolahi ʻo e Tohi Tapú ʻa e foʻi lea sila ke ʻuhinga ki hono fakamoʻoniʻi ʻo ha meʻa ʻi he ʻao ʻo e ʻOtuá. Naʻe faʻa lea ʻaki ʻe he Kāingalotu ʻo e Siasí ʻi he kuonga muʻá ʻa e sila ʻi he founga ko ʻení ke ʻuhinga ki he ngaahi lotú, fakamoʻoní, tāpuakí, paní, ouaú mo e malí ʻi hono fakatapui ʻaki ʻa e lakanga fakataulaʻeikí ke silaʻi, pe fakaʻilongaʻi ʻaki ʻa e mafai fakalangi, pea hoko leva ai ʻo ʻaonga ʻi langi.² Naʻe akoʻi ʻe he ngaahi fakahā naʻe foaki kia Siosefa Sāmita ʻi he kuonga muʻá ʻe malava ʻe he mafai, ngaahi ouau mo e fuakava kuo toe fakafoki maí ʻo silaʻi ʻa e niʻihi fakafoʻituituí ki he moʻui taʻengatá.³

Ko e Mālohi ʻo ʻIlaisiaá

ʻI he talangofua ʻa Siosefa Sāmita ki he ngaahi fakahā naʻá ne maʻú, naʻá ne fakafeʻiloaki ai ʻa e ngaahi akonaki mo e ouau foʻou ʻi Nāvū, ʻIlinoisi, ʻo fakalahi ai e mahino ʻa e Kāingalotú ki he silá. Naʻá ne akoʻi ko e “laumālie mo e mālohi ʻo ʻIlaisiaá” ʻoku kau ai ʻa e mālohi ke “fokotuʻu ʻa e ngaahi sila ʻo e Lakanga Taulaʻeiki Faka-Melekisētekí ʻi he fale ʻo ʻIsilelí.” Naʻá ne toe akoʻi foki kuo fakamafaiʻi ia ke fakaʻaongaʻi ʻa e mālohi faisila ko ʻení ke fakafofongaʻi ʻa e niʻihi naʻe ʻofa aí mo e Kāingalotu kotoa pē ʻo e Siasí ʻo fakafou ʻi he ngaahi ouau ʻo e temipalé.⁴

Naʻe kamata ʻa e ngaahi lave ko ʻeni ki he mālohi ʻa ʻIlaisiā ke faisilá mei he mata meʻa-hā-mai ʻa Siosefa Sāmita mo ʻŌliva Kautele kia ʻIlaisiā ʻi he 1836 ʻi he temipale Ketilaní. Neongo naʻe ʻikai lea ʻaki ʻe Siosefa ʻa e aʻusia ko iá ʻi he kakaí, ka ʻoku lekooti ʻi he tohinoa ʻa Siosefá ʻa e fakamatala ki he haʻu ʻa ʻIlaisiā ke “liliu ʻa e loto ʻo e ngaahi Tamaí ki he fānaú, pea mo e fānaú ki he ngaahi tamaí.” Naʻe fakahā ʻe he palōfita ʻi he kuonga muʻá kia Siosefa ʻo pehē, “ʻOku tuku ki hoʻo nimá ʻa e ngaahi Kī ʻo e kuonga ko ʻení.”⁵

Papitaiso maʻá e Kau Pekiá mo e Fāmili Taʻengatá

Ko e taimi naʻe kamata ke fakafeʻiloaki ai ʻe Siosefa Sāmita ʻa e ngaahi ouau fakatemipalé ʻi Nāvuú, naʻá ne lea kau ki honau mālohi ke haʻi, pe silaʻi fakataha e kakai ʻi he ngaahi toʻu tangatá. ʻI he ngaahi tohi ʻa Siosefa ki he Siasí ne kau ai e ngaahi akonaki fakalaumālie fekauʻaki mo e papitaiso maʻá e kau pekiá, naʻá ne lave ai ki he papitaiso fakafofongá ko ha ouau naʻá ne fokotuʻu ha “fehokotakiʻanga mālohi” ʻi he ngaahi toʻu tangatá ʻaki ʻene fakaaʻu ʻa e fakamoʻuí ki he kau pekiá. Naʻá ne toe fakamatala ʻo pehē, naʻe maʻu ʻe he ouaú ha “mālohi ke silaʻi mo haʻi.”⁶ Ko e taimi ne fou ai e Kāingalotú ʻi he ngaahi vai ʻo e papitaisó maʻa honau fāmili kuo pekiá, naʻa nau haʻi fakataha e ngaahi toʻu tangatá ʻi loto ʻi he fāmili fuakava ʻoku toe lahi ange.

ʻI ha fakahā kia Siosefa naʻe fuofua lekooti ʻi he 1843, naʻe fakamatalaʻi ai ʻa e ouau sila ʻo e malí. Naʻe folofola ʻe he ʻEikí ʻo pehē, “Ko e ngaahi fuakava, ngaahi aleapau, ngaahi palōmesi, ngaahi fatongia, ngaahi fakapapau, ngaahi lea fakapapau, ngaahi ngāue, ngaahi fetuʻutaki, ngaahi kautaha, pe ko e ngaahi ʻamanaki kotoa pē, ʻa ia ʻoku ʻikai ke fai mo fakahoko mo fakamaʻu ia ʻaki ʻa e Laumālie Māʻoniʻoni ʻo e talaʻofá, ʻo ia ʻa ia kuo paní … ʻoku ʻikai ke ʻi ai hano ʻaonga, pe ivi, pe mālohi ʻi he toetuʻú pe hili ʻa e toetuʻu mei he maté.” ʻE lava ʻe he mālohi faisilá ʻo haʻi ʻa e ngaahi nofo-malí ke taʻengata, pea ʻe toki lava pē ke “fakafou ʻi heʻeku paní” ʻa hono fakahoko ʻa e ngaahi ouau silá, ko e ʻuhinga ki he Palōfita ko Siosefa Sāmitá.⁷ Naʻe pehē ʻe he fakahaá “he ʻikai ʻaupito ka ko ha toko taha pē ʻi he māmaní” te ne maʻu ʻa e ngaahi kī ki he mālohi ko ʻení. Ko ia, kuo maʻu ʻe he niʻihi ne nau fetongi ʻa Siosefa Sāmita ʻi he lakanga ko e Palesiteni ʻo e Siasí ʻa e ngaahi kī mo e mafai ke puleʻi ʻa hono fakahoko ʻo e ngaahi ouau silá.

Hili ha meimei māhina ʻe taha mei hono fakahā ʻo e ngaahi sila ki he nofo-malí, naʻe akoʻi ʻe Siosefa ʻe lava ʻe he mālohi tatau pē ko ʻení ʻo silaʻi ʻa e fānaú ki heʻenau mātuʻá. Naʻá ne akoʻi ʻo pehē, “ʻI he taimi ʻoku silaʻi ai ha tamai mo ha faʻē, ʻokú ne maluʻi ai hona hakó ke ʻoua naʻa nau mole, ka ʻe fakahaofi kinautolu ʻe he angamāʻoniʻoni ʻo e fuakava ʻenau tamaí mo e faʻeé.”⁸ Naʻe fakapapauʻi ʻe Pilikihami ʻIongi naʻe fekauʻi ia ʻe Siosefa ke ne fakahoko ʻa e sila ko ʻení ʻi he taimi pē ʻe maau ai ʻa e Temipale Nāvuú.⁹

Silaʻi ʻo e Fānau Ohí

Hili e pekia ʻa Siosefa Sāmitá, naʻe fakaʻosi ʻe he Kāingalotú ʻa e Temipale Nāvuú koeʻuhí kae lava ke nau maʻu ʻa e ʻenitaumení mo silaʻi kinautolu. Naʻe fakahoko ʻe Pilikihami ʻIongi mo e Kōlomu ʻo e Kau ʻAposetolo ʻe Toko Hongofulu Mā Uá ha ngaahi ouau sila ʻe laui afe. Naʻa nau silaʻi ha ngaahi hoa-mali pea silaʻi e fānaú ki he mātuʻá ʻi he taimi naʻe silaʻi ai ʻa e mātuʻá hili hono fanauʻi ʻena fānaú. Ka ʻi he taimi ko ʻení, naʻe teʻeki silaʻi ʻa e Kāingalotu ʻo e Siasí ki heʻenau mātuʻa ne pekia ʻoku teʻeki ke nau kau ki he Siasí ʻi he moʻui ní. Ka naʻe kau ha Kāingalotu ʻe niʻihi ʻi he sila “ohí” ʻa ia naʻá ne haʻi ai kinautolu ki he Kāingalotu lalahi kehé, ʻo meimei lahi maʻu pē ki he kau taki māʻolunga ʻo e Siasí. Naʻe fakafehokotaki ʻe he ngaahi sila ko ʻení kinautolu ki he niʻihi naʻa nau ʻilo kuo nau tali ʻa e ngaahi fuakava ʻo e ongoongolelei kuo toe fakafoki maí. ʻI he taʻu ʻe 50 ne hoko maí, naʻe tupu ha ngaahi pīkinga kehekehe ʻo e ohí mei he ngaahi sila ʻi he temipalé, ʻo ne fakafehokotaki ai e ngaahi kaungāmeʻá mo e mahení ke hangē pē ha ngaahi fāmili kuo fakalahí.

Naʻe fai pehē pē ʻo aʻu ki he 1894, ko e taimi ia naʻe maʻu ai ʻe Palesiteni Uilifooti Utalafi ha fakahā ke fakangatangata ʻa e ngaahi sila ohí kae fakatefito pē ki he sila ki he nofo-malí mo e ngaahi fehokotaki he matuʻa mo e fānaú. Naʻe naʻinaʻi ʻe Palesiteni Utalafi ki he Kāingalotú ke nau fakatotoloʻi ʻenau tohi hohokó “ki he mamaʻo taha te nau lavá, pea fakamaʻu kinautolu ki heʻenau ngaahi tamaí mo ʻenau ngaahi faʻeé.” Naʻá ne tapou ki he Kāingalotú ke nau sila ki he ngaahi hoamali mo e mātuʻa kuo pekiá, ʻo aʻu ki he niʻihi ne ʻikai ke nau kau ki he Siasí, peá ne talaʻofa “ʻe tokosiʻi pē ha niʻihi he ʻikai ke nau tali ʻa e Ongoongoleleí.”¹⁰

Kau Faisila he Temipalé

Hili e pekia ʻa Siosefa Sāmitá, naʻe fakahoko ʻe Pilikihami ʻIongi mo e kau mēmipa ʻo e Toko Hongofulu Mā Uá ʻa e ngaahi sila ʻi he temipalé ʻi Nāvū pea kimui ange ʻi Soleiki Siti. ʻI he 1877 naʻe kole ai ʻe he palesiteni ʻo e temipale foʻou ne toki fakatapui ko e Temipale St. Siaosí, ʻa ia ko Uilifooti Utalafi, ha ngofua mei he Palesiteni ʻo e Siasí, Pilikihami ʻIongi, ke vaheʻi mo ha niʻihi kehe ke nau fakahoko ʻa e silá. Naʻe fakamafaiʻi ʻe ʻIongi ʻa Utalafi ke ne vaheʻi ʻa e tokolahi taha te ne lavá, pea naʻe ʻikai fuoloa mei ai naʻe fakahoko maʻu pē ʻe he kau faisila he temipalé ʻa e ngaahi ouau silá maʻá e kakai moʻuí mo e maté fakatouʻosi. ʻI he konga kimuʻa ʻo e senituli 20, naʻe fakaleleiʻi ai ʻe he Kau Palesitenisī ʻUluakí ʻa e ngaahi founga ki hono uiuiʻi mo vaheʻi ʻe he kau palesitenisī temipalé ʻa e kau faisilá.¹¹Naʻe kei ngāue ʻa e kau faisila ko ʻení ʻi he malumalu ʻo e mafai mo e fakahinohino ʻa e Palesiteni ʻo e Siasí.

Ngaahi Maʻuʻanga Tokoni ʻa e Siasí

“About a Temple Sealing,” LDS.org.

“Sealing,” Gospel Topics, topics.lds.org.

Ngaahi Fakamatalá

1. Vakai, Kathryn Burns, “Notaries, Truth, and Consequences,” American Historical Review, vol. 110, no. 2 (Apr. 2005), 350–79; vakai foki, Joseph Smith, “Agreement with Isaac Hale, 6 April 1829,” josephsmithpapers.org.

2. Vakai, “Seal,” josephsmithpapers.org.

3. “Revelation, 1 November 1831–A [DC 68],” in Revelation Book 1, 113, josephsmithpapers.org; vakai, Tokāteline mo e Ngaahi Fuakava 68:12. Vakai foki, Joseph Smith, Journal, 1835–1836, 147, josephsmithpapers.org; “Minutes, 25–26 October 1831,” in Minute Book 2, 11, josephsmithpapers.org.

4. Joseph Smith, “History, 1838–1856, volume E-1 [1 July 1843–30 April 1844],” 1922, josephsmithpapers.org; fakatonutonu ʻa e sipelá; Joseph Smith journal, Sept. 1, 1842, in Journal, December 1841–December 1842, 189, josephsmithpapers.org; Joseph Smith, “Letter to ‘The Church of Jesus Christ of Latter Day Saints,’ 6 September 1842 [DC 128],” josephsmithpapers.org.

5. Naʻe tānaki ʻe he kau taki ʻo e Siasí ʻa e fakamatala fakatohinoa ko ʻení ki he pulusinga ʻo e Tokāteline mo e Ngaahi Fuakavá ʻi he 1876. “Visions, 3 April 1836 [DC 110],” in Joseph Smith, Journal, September 1835–April 1836, 193, josephsmithpapers.org; vakai, Tokāteline mo e Ngaahi Fuakava 110:16.

6. Joseph Smith, “Letter to ‘The Church of Jesus Christ of Latter Day Saints,’ 6 September 1842 [DC 128],” 5, 6, josephsmithpapers.org.

7. “Revelation, 12 July 1843 [DC 132],” 1, josephsmithpapers.org; fakatonutonu ʻa e sipelá.

8. Joseph Smith, “Discourse, 13 August 1843–A, as Reported by William Clayton,” in William Clayton, Journal, 87, josephsmithpapers.org. Naʻe fakamahinoʻi ʻe ʻEletā Tēvita A. Petinā ʻo pehē “Ko e ivi tākiekina ko ia ʻo e mātuʻa angatonú, ʻoku (1){136}ʻikai ke nau fetongi ʻe kinautolu ʻi he moʻui ʻa ha taha, ʻa e fie maʻu ko ia ki he mālohi huhuʻi mo fakamālohia ʻo e Fakalelei ʻa Sīsū Kalaisí, (2){135}ʻikai ke fakataʻeʻaongaʻi ai e nunuʻa ia ʻo hono fakaʻaongaʻi taʻemāʻoniʻoni ʻo e tauʻatāina ke filí, pea ʻoku (3){140}ʻikai ke ne taʻofi ʻe ia e fatongia fakafoʻituitui ʻo ha taha ke ne ‘fili … kae ʻikai fakamālohiʻi ke ngāué’ ( 2 Nīfai 2:26  )” (TēvitaA.  Petinā, “Mātuʻa Faivelengá mo e Fānau Talangataʻá,” Ensign, March 2014, 32).

9. Brigham Young, September 4, 1873, in Journal of Discourses, 26 vols. (Liverpool: F. D. Richards, 1855–1886), 16:186–88. Vakai foki, Jonathan A. Stapley, “Adoptive Sealing Ritual in Mormonism,” Journal of Mormon History, vol. 37, no. 3 (Summer 2011), 59, note 13; vakai ki he Tefito: Temple Endowment [ʻEnitaumeni ʻi he Temipalé].

10. Wilford Woodruff and George Q. Cannon, “The Law of Adoption,” Deseret Weekly, Apr. 21, 1894, 543; Stapley, “Adoptive Sealing Ritual in Mormonism,” 108–9.

11. Dale C. Mouritsen, “A Symbol of New Directions: George Franklin Richards and the Mormon Church, 1861–1950” (PhD diss., Brigham Young University, 1982), 200–214.