Kōtoni B. Hingikelī
Naʻe hoko ʻa Kōtoni B. Hingikelī ko e Palesiteni hono 15 ʻo e Siasí mei he 1995 ki heʻene pekia ʻi he 2008. Naʻe fāʻeleʻi ia ʻi he ʻaho 23 Sune 1910, ko e lahi taha ʻo e fānau ʻa ʻAita mo Palaieni Hingikelií, ʻa ia naʻá na ohi hake ia ʻi ha fāmili tokolahi mo vāofi ʻi Sōleki Siti, ʻIutā, pea fakatōkakano ʻiate ia ha ʻofa ki he akó mo e tui taʻeueʻiá. ʻI heʻene kei siʻí, naʻe ʻikai ke fuʻu kaukaua ʻa Kōtoni (naʻe pehē ko ha “tamasiʻi tutue ʻaupito mo vaivai” ia), ka naʻá ne ako ke faivelenga mo ngāue mālohi lolotonga ʻene fekumi mo ngāue ʻi he faama hono fāmilí ʻi he feituʻu Mili Kiliki Hahaké ʻo e Teleʻa Sōlekí. Naʻá ne ʻosi mei he akoʻanga māʻolungá ʻi he 1928 peá ne hū leva ki he ʻUnivēsiti ʻo ʻIutaá. Hili e tō-lalo ʻa e māketi fefakatauʻaki ʻa e ʻIunaiteti Siteití ʻi he 1929, naʻe fakautuutu ʻaupito ʻa e taʻemaʻu ngāué ʻi he feituʻu Sōlekí, ka naʻá ne kei lava pē ʻo tauhi haʻane ngāue ko ha taha ngāue monomono pea hokohoko atu hono fakapaʻanga ʻene akó. Ko e meʻa fakamamahí, he naʻe mālōlō ʻene faʻē ko ʻAitá mei he kanisaá hili ha taʻu ʻe taha mei ai, ʻi he taʻu 20 ʻa Kōtoní, ʻo kamata ai ha vahaʻataimi ʻo e “ongoʻi moʻoni ʻo e molé.” Naʻá ne ʻosi mei he akó mo ha mataʻitohi ʻi he lea faka-Pilitāniá ʻi he 1932 pea naʻá ne ʻamanaki atu ki ha ngāue ʻi he faiongoongó.
Neongo naʻe siʻisiʻi ʻaupito ha kau talavou naʻe uiuiʻi ke nau ngāue fakafaifekau taimi kakato lolotonga e Tō-lalo Lahi Fakaʻekonōmiká, ka naʻe talanoa ʻa e pīsope ʻa Kōtoní kiate ia mo ha “fokotuʻu fakaʻohovale,” ʻo hangē ko ia naʻe manatuʻi ʻe Kōtoní, ke ne fakakaukau ki he ngāue fakafaifekaú. Naʻe tāpuni ʻa e pangikē naʻe ʻi ai ʻa e ʻakauni tānaki paʻanga ʻa Kōtoní kimuí ni mai, ka naʻe tukupā ʻa e tamai ʻa Kōtoní ko Palaieni ke “mau fai e meʻa kotoa te mau lavá” ke fakapaʻanga ʻaki ʻa e misioná. Naʻe fakafaingamālieʻi ʻa e foungá kia Kōtoni ke ne tali ha uiuiʻi ʻi he fakamālō ki ha kiʻi paʻanga naʻe tuku mai ʻe heʻene faʻeé ko e paʻanga ne tātānaki mei he toenga ʻo ʻene ʻū fakataú. Naʻá ne leʻohi ‘a e ʻū koini ‘ene faʻeé, naʻá ne pehē, naʻá ne fakaʻaongaʻi “lelei ia.” Naʻá ne mavahe ki ha ngāue ʻi he Misiona European naʻe ʻuluʻi ʻofisi ʻi Lonitoni, ʻIngilani. ʻI heʻene ʻuluaki loto-siʻi ʻi he ngaahi pole ʻo hono vahevahe ʻo e ongoongoleleí lolotonga ha taimi faingataʻa fakaʻekonōmika fakaemāmani lahí, naʻe fakamālohia ʻa e fakapapau ʻa Kōtoní ʻe he fakahinohino naʻá ne maʻu mei heʻene tamaí ke “fakangaloki koe pea ʻalu ʻo ngāue.” Naʻe ueʻi ia ʻe he meʻá ni ke ne fakatapui kakato ia ki heʻene misioná, ʻo iku ai ki ha liliu lahi ʻi heʻene vakaí. Naʻe fakahiki ia ʻi he konga kimuʻa ʻo e 1934 ke ngāue ʻi he ngaahi ʻōfisi ʻo e misioná fakataha mo ʻEletā Siosefa F. Mēlili ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻa ia naʻá ne tokangaʻi ʻa e misioná. ʻI he toenga ʻo ʻene ngāue fakafaifekaú, naʻá ne fehangahangai mo ha ngaahi fehuʻi ʻa e kau faiongoongó pea pehē ki hono ʻoatu ʻene ngaahi tohi, ngaahi ʻētita, mo e ngaahi tohi fakamatala ki he ngaahi nusipepá ʻi he ʻamanaki ke ne fakafepakiʻi e ngaahi lipooti hala fekauʻaki mo e Kāingalotu ʻi he Ngaahi ʻAho Kimui Ní mo e Siasí.
Ko Kōtoni B. Hingikelī ʻi heʻene hoko ko ha faifekaú, ʻi heʻene malanga ʻi Paaka Haití, Lonitoni, ʻi Siulai 1934.
Hili ha taimi nounou mei heʻene foki ki ʻapi mei heʻene ngāue fakafaifekaú ʻi he 1935, naʻe fakaafeʻi ʻa Kōtoni ke fakataha mo e Kau Palesitenisī ʻUluakí ke aleaʻi e ngaahi founga ke fakaleleiʻi ai e ngaahi maʻuʻanga tokoni mo e naunau maʻá e kau faifekaú. Naʻe iku ʻene fakamatalá ki hono fakanofo ia ko e sekelitali pule ʻo e Kōmiti ki he Letioó, Tuʻuakí, mo e Naunau ki he Ngāue Fakafaifekau ʻa e Siasí naʻe toki fokotuʻú, ko ha lakanga naʻe fiemaʻu ke ngāue taimi kakato ko ha tokotaha ngāue ʻa e Siasí. ʻI hono toloi ʻene ngaahi palani ke hū ki he akoʻanga māʻolunga angé, naʻá ne tali ʻa e lakangá pea kamata ke ne faʻu ha ngaahi polokalama letiō mo ha fanga kiʻi tohi fakafaifekau, pea pehē ki hono fakaava ha ngaahi hoa ngāue ʻi he mītiá mo fakatotoloʻi ʻa e hisitōlia ʻo e Siasí. Naʻe hanga ʻe heʻene ngāue ʻi he kōmití ʻo ʻai ia ke ne fengāueʻaki fakaʻaho mo e kau taki matuʻotuʻa ʻo e Siasí lolotonga ha taimi ʻo e fakalahi ʻo e ngaahi misioná mo e mītia fakamafolá ʻi he funga ʻo e māmaní.
ʻI he 1937, naʻe mali ai ʻa Kōtoni mo Māsilī Pei, ko ha kaungāʻapi mei he tafaʻaki ʻe taha ʻo e halá lolotonga ʻena tupu haké. Naʻá na hiki ki he fale faʻahitaʻu māfana ʻo e fāmili Hingikelií ʻi Mili Kiliki Hahaké, ʻa ia naʻá na ohi hake ai ʻena fānau ʻe toko nimá. ʻI heʻena hoko ko e ongomātuʻá, naʻá na feinga ke faʻu ha ʻātakai ʻofa ʻa ia ʻe lava ke fakamoʻoni ai ʻena fānaú ki he tui mo e faivelenga ʻenau ongomātuʻá. Naʻe tui ʻa Māsilī ki he falala ki heʻene fānaú mo tali “ʻio” ʻi he lahi taha ʻe ala lavá, ʻo fokotuʻu ha ngaahi tuʻutuʻuni siʻisiʻi kae kei tauhi pē ha ngaahi ʻamanaki māʻolunga. Naʻe mataʻikoloa ʻaki ʻe he fāmilí ʻa e katá, ʻo nau feinga ʻi he ʻaho kotoa pē ke maʻu ha ngaahi meʻa fakafiefia mo ha ngaahi feohi fiefia.
Hili ha taimi nounou lolotonga ʻa e Tau Lahi Hono II ʻa Māmaní ko ha tokoni pule ki he Kautaha Lēlue ʻa Tenivā mo Lio Kalanité, naʻe toe hoko atu ʻa Kōtoni ʻi hono ngaahi fatongia kimuʻá ʻi he ʻuluʻi ʻōfisi ʻo e Siasí pea ʻikai fuoloa kuo fakanofo ia ke ne puleʻi ʻa e kamataʻanga ʻo e meʻa naʻe hoko kimui ange ko e Potungāue Fakafaifekaú. Naʻá ne taki fakataha mo ʻEletā Henelī D. Moili mo ʻEletā Sitīveni L Lisiate pea mo Palesiteni Tēvita O. Makei ha feinga ke fakaleleiʻi e ngaahi ngāue fakafaifekau ʻa e Siasí mo fakaleleiʻi e ngaahi founga ki hono fakatupulaki e kau teuteu ngāue fakafaifekaú, poupouʻi e kau palesiteni fakamisioná, mo hono ʻomi e kau faifekaú ki ʻapi ʻi he ʻosi ʻenau ngāué.
ʻI he 1958, naʻe fakahoko ai ʻe Palesiteni Tēvita O. Makei kia Kōtoni ʻa e uiuiʻi ke hoko ko ha Tokoni ki he Toko Hongofulu Mā Uá, ko ha uiuiʻi naʻá ne hoko ai ko ha Taki Māʻolunga ʻi he Siasí. Naʻe ʻave ʻe he ngaahi fatongia ʻo ʻEletā Hingikelií ia ki ʻĒsia, ko ha vahefonua naʻe siʻisiʻi ʻene ʻilo ki aí. Naʻe vave ʻene fakatupulaki ha ʻofa lahi ki he kakai ʻi aí mo tauhi ha vā fetuʻutaki vāofi mo e kau faifekaú, ʻo ne fakakaukauloto atu ki ha ngaahi faingamālie maʻongoʻonga ki he tupulaki ʻa e siteikí ʻi he kahaʻú. Hili ha taʻu ʻe tolu ʻi he uiuiʻi ko ʻení, naʻe kole ʻe Palesiteni Makei kia ʻEletā Hingikelī ke ngāue ʻi he Kōlomu ʻo e Kau ʻAposetolo ʻe Toko Hongofulu Mā Uá. Na‘á ne hokohoko atu ke tokanga‘i ‘a e ngāue ‘i ‘Ēsiá ‘i he ta‘u ‘e fitu hono hokó, pea hoko atu ki he ngaahi ngāue tatau ne vahe ia ki ai ‘i ‘Amelika Tonga mo ‘Iulope.
ʻI he 1981, naʻe ui ai ʻe Palesiteni Sipenisā W. Kimipolo ʻa ʻEletā Hingikelī ke ne hoko ko ha tokoni hono tolu ʻi he Kau Palesitenisī ʻUluakí, naʻe kehe ia mei he ongo tokoni angamahení koeʻuhí ko e ngaahi faingataʻaʻia fakaemoʻui lelei ʻa e kau palesitenisií. Naʻe toʻo ʻe Palesiteni Hingikelī ha ngaahi fatongia mahuʻinga, kau ai e ngāue fakaʻaho ʻa e Kau Palesitenisī ʻUluakí mo e ngaahi feinga lalahi ke langa mo fakatapui e ngaahi temipalé. Naʻe ʻomi ʻe he kuonga ʻo e mītiá ha toe fakaanga lahi ange mei he kakaí, ka naʻe naʻinaʻi ʻa Palesiteni Hingikelī ki he kāingalotu ʻo e Siasí ke kei nofotaha pē ʻenau tokangá ʻi he meʻa ʻoku mahuʻinga angé. Naʻe fakalalahi ʻa e vave ʻo ʻene fefonongaʻakí ʻi he fakaʻau ke kovi ange e moʻui lelei ʻa Palesiteni Kimipolo mo e ongo tokoni kehé, pea naʻe vave ʻene ʻiloʻi ʻa e fiemaʻu ke vahe atu e ngaahi fatongiá ki he kau taki fakavahefonuá. Naʻá ne tokoni lahi ʻi hono faʻu ʻo e Kau Palesitenisī Fakaʻēliá pea mo hono faʻu ha ngaahi liliu fakavahaʻapuleʻanga ki he ngaahi polokalama ʻa e Siasí.
Mei he 1981 ki he 1985, naʻe faʻa tokangaʻi toko taha pē ʻe Kōtoni B. Hingikelī ʻa e konifelenisi lahí koeʻuhí ko e ngaahi faingataʻaʻia fakaemoʻui lelei ʻa e kau mēmipa kehe ʻo e Kau Palesitenisī ʻUluakí.
Hili e pekia ʻa Palesiteni Hauati W. Hanitā ʻi he 1995, naʻe vaheʻi ʻa Palesiteni Hingikelī ko e Palesiteni ʻo e Siasí. Naʻe ʻiloa ʻene tuʻunga fakapalesitení ʻi heʻene fakalakalaka mālohí mo ʻene founga ngāue foʻoú. Naʻe fakamuʻomuʻa ʻe Palesiteni Hingikelī hono fakaleleiʻi ʻa hono ʻiloʻi ʻo e Siasí ʻi he mītiá pea fakahoko ha ngaahi ʻinitaviu ʻi he televīsone fakafonuá mo fakahoko ha ngaahi fakataha mo e kau faiongoongó ʻi he funga ʻo e māmaní. Naʻá ne tali ʻa e tekinolosiá mo fakahinohinoʻi ʻa e ngaahi potungāue ʻa e Siasí ke nau fakaʻaongaʻi ʻa e ngaahi faingamālie ʻinitaneti mo e mītia naʻe toki kamataʻí ke fakalakalaka ʻaki ʻa e ngāue ʻo e ongoongoleleí, ʻo fakatefito ki he fakakau ʻa hono fakamafola ʻo e ngaahi fakatahá mo hono fakaleleiʻi ʻo e ngaahi meʻangāue ki he hisitōlia fakafāmilí. ʻI he 1995, naʻá ne fakafeʻiloaki ai ʻa e “Ko e Fāmilí: Ko ha Fanongonongo ki Māmani” peá ne poupouʻi ʻa e ngaahi fengāueʻaki mo e ngaahi siasi mo e ngaahi kautaha kehé ke toe lahi ange ʻa e poupou fakasōsiale ki he fāmilí. ʻI he 1997, naʻe tataki ai ʻe Palesiteni Hingikelī ha kātoanga ʻi he Siasí fakakātoa ʻo e taʻu ʻe 150 ʻo e aʻu mai ʻa e kau paioniá ki he Teleʻa Sōlekí, ʻo fakamamafaʻi ai ʻa e fakavaʻe faivelenga naʻe fakatoka ʻe he fuofua Kāingalotu ko ia ʻi he Ngaahi ʻAho Kimui Ní maʻá e Kāingalotu kotoa ʻo e Siasí, ʻo tatau ai pē pe ko e hā e tohi hohoko fakafoʻituituí.
Naʻe fakamamafaʻi ʻe Palesiteni Hingikelī ʻo ʻikai ngata pē ʻi hono kumi ha kāingalotu foʻou ʻo fakafou ʻi he ngāue fakafaifekau fakamātoató ka ke tanumaki mo tauhi kinautolu ʻaki ha tokanga mo ha poupou fakafoʻituitui. ʻI hono ueʻi fakalaumālie ʻa Palesiteni Hingikelī ʻe he Paʻanga Tokoni Hikifonua Tuʻumaʻú ʻa ia naʻá ne tokoniʻi e kau paionia tokolahi ke nau fononga ki ʻIutaá, naʻá ne fakahinohinoʻi hono kamataʻi ʻo e Paʻanga Tokoni Fakaako Tuʻumaʻú ke ʻoange ha paʻanga ki he fānau ako ʻa e Kāingalotu naʻe feinga ki ha ako māʻolunga angé. Ko e langa temipalé ko ha toe meʻa tefito ia naʻe fakamuʻomuʻa, tautautefito mo ha vīsone ke ʻomi ʻa e ngaahi temipalé ke ofi ange ki he kāingalotu ʻo e Siasí ʻi he funga ʻo e māmaní. Naʻá ne faʻu mo fakahoko ha ngaahi palani ki ha ngaahi temipale iiki ange, pea ʻi he fakaʻosinga ʻo e taʻu 2000, kuo laka hake ʻi he temipale ʻe 100 ʻo e Siasí naʻe lolotonga ngāué. ʻI heʻene takí, naʻe langa ʻa e Senitā Konifelenisí ʻi he loto kolo ʻo Sōleki Sití, pea ʻi he taimi naʻe fakatapui ai ʻi he 2000, ko e taha ia ʻo e ngaahi fale fakatahaʻanga lahi taha ʻi he māmaní.
Hili ha ʻaho ʻe ua mei he konifelenisi lahi ʻi ʻEpeleli 2004, ne mālōlō ʻa Māsilī Hingikelī. Naʻe fakahaaʻi ʻe Palesiteni Hingikelī ki he kakaí ʻene loto-mamahí peá ne fakahoungaʻi e “ʻofa, fakalotolahi, mo e tui” ʻa Māsilií. ‘I he ta‘u ‘e fā hono hokó, na‘á ne kei ngāue longomo‘ui pē ʻo aʻu ki he taimi naʻe hōloa māmālie ‘a ‘ene mo‘ui leleí. ʻI Sānuali ʻo e 2008, naʻá ne mālōlō fakalongolongo pē ʻi ʻapi, ʻo ʻātakaiʻi ʻe heʻene fānau ʻe toko nimá mo honau ngaahi hoá. ʻI heʻene ngaahi fefonongaʻaki lahí mo e founga fakatakimuʻá naʻe ʻofaʻi ai ia ʻe he kāingalotu ʻo e Siasí, kau taki fakapuleʻangá, mo e ngaahi haʻofanga fakalūkufua ʻi māmani lahí.
Ki ha fakamatala lahi ange fekauʻaki mo e moʻui ʻa Kōtoni B. Hingikelií, vakai ki he ngaahi vitiō Prophets of the Restoration ʻi he history.ChurchofJesusChrist.org pe ʻi he polokalama Gospel Library.
Ngaahi Tefito Fekauʻakí: Ko e Langa Temipalé, Fakamafola ʻi he Mītiá, Tupulaki ʻa e Ngāue Fakafaifekaú, Ngaahi Kolo ʻo e Kau Sōtiá