Ngaahi Malanga ʻi he Tui Fakalotú (“Ngaahi Malanga ʻi he Tuí”)

Ko e Lectures on Faith ko e hingoa ʻiloa ia ki ha ngaahi malanga fakalotu ʻe fitu naʻe fakahoko ʻi he Akoʻanga ʻo e Kaumātuʻá ʻi Ketilani, ʻOhaiō, ʻi he faʻahitaʻu momoko ʻo e 1834–35. ʻOku fakafofongaʻi ʻe he ngaahi malanga ko ʻení ʻa e fuofua feinga ke faʻu ha polokalama ako fakalotu ʻa e Kau Māʻoniʻoni ʻi he Ngaahi ʻAho Kimui Ní, ʻo fakafou ʻi he Tohi ʻa Molomoná mo e ngaahi fuofua fakahā ʻa Siosefa Sāmitá. ʻOku nau fakamatalaʻi ʻa e tuí mo e ngaahi makatuʻunga ʻa ia ʻe fie maʻu ke fakamālohia ʻakí. ʻOku akoʻi ʻe he ngaahi malangá ha meʻa mahuʻinga ʻe tolu ki ha faʻahinga “meʻa moʻui pē ʻoku ʻatamai lelei” ke ne ngāueʻi e tui ki he ʻOtuá ʻe ʻaonga ki he fakamoʻuí: ʻuluakí, ko e fakakaukau ʻoku moʻui ʻa e ʻOtuá; uá, ko ha ʻilo totonu ki Hono ʻulungāngá mo e natulá; pea tolú, ko ha ʻilo ko e moʻui ʻoku tulifua ʻe ha tahá ʻoku fenāpasi ia mo Hono finangaló.¹ ʻOku fakamatalaʻi fakaikiiki ʻe he ngaahi malangá ʻa e ngaahi fakakaukau ko ʻení.

Naʻe pulusi fakaangaanga ʻa e fuofua malangá ʻi Fēpueli 1835, pea pulusi ʻa e malanga hono nimá mo e onó ʻi he nusipepa ʻa e Siasí ʻi Mē 1835. Naʻe pulusi fakataha ʻa e ngaahi malanga ʻe fitú ʻi he fuofua pulusinga ʻo e Tokāteline mo e Ngaahi Fuakavá ʻi he konga kimui ʻo e taʻu ko iá, ʻo fokotuʻu ʻe he ngaahi malangá ʻa e “tokāteliné,” pea ʻomi ʻe he ngaahi fakahā ʻa Siosefa Sāmitá ʻa e “fuakavá.” Naʻe fakakau ʻa e ngaahi malangá ʻi he tatau lea faka-Pilitānia ʻo e Tokāteline mo e Ngaahi Fuakavá pea toki maʻu ʻi he ngaahi lea fakafonua kehe ʻe niʻihi ʻi he 1921.

Naʻe ʻikai ha tangata faʻu tohi pau ʻo e ngaahi malangá, pea ʻikai mo ha tatau ʻo e ʻū lauʻi peesi ne liliú, ke ne fakapapauʻi mai ʻa e tokotaha naʻá ne tohi ʻa e ngaahi malangá. Fakatatau kia Setitaia M. Kalānite, ko ha tangata ne nofo ʻi Ketilani ʻi he 1835, naʻe hoko ʻa Siosefa Sāmita mo Sitenei Likitoni ko ha ongo faiako ʻi he akoʻangá. Naʻe fakafekiki e kau mataotao fakaako ne nau vakavakaiʻi e fakamatala fakahisitōliá ʻo pehē ko Sitenei Likitoni ʻa e tokotaha faʻu tohí pe ko ia naʻe kau lahi taha ʻi hono faʻu ʻo e ngaahi malangá.² Ko e moʻoni, naʻe ui ia ʻe Pilikihami ʻIongi ko e ngaahi malanga naʻe “teuteu ʻe Misa Siteneí.”³ ʻOku ʻikai ʻilo pē naʻe ʻi ai ha kaunga ʻa Siosefa Sāmita ki hono hiki ʻo e ngaahi malangá. Ka neongo iá, ko hono fakakau ko ia ʻo e ngaahi malangá ʻi he Tokāteline mo e Ngaahi Fuakavá he 1835, ʻokú ne fokotuʻu mai naʻe fakangofua ʻe Siosefa Sāmita ʻa e meʻa naʻe hiki ʻi he ngaahi malangá.⁴

Naʻe toe māʻolunga ange e tuʻunga ʻo e Ngaahi Malanga ʻo e Tuí ki he kau mēmipa ʻo e Siasí ʻi he taimi naʻe pulusi ai ʻi he Tokāteline mo e Ngaahi Fuakavá. Ka, ʻi he konga kimuʻa ʻo e senituli 20, naʻe fakaʻau ke hohaʻa ʻa e kau taki ʻo e Siasí fekauʻaki mo ha niʻihi ʻo e ngaahi fakamatala ʻi he Ngaahi Malanga ʻo e Tuí. Hangē ko ʻení, ne fakamatala ʻa e malanga hono nimá ʻo pehē ko e Tamaí ko ha “laumālie ia,” ʻa ia ʻoku fepaki ia mo e akonaki ʻa Siosefa Sāmita (ne fakamatalaʻi ʻi he 1843, hili ha ngaahi taʻu lahi mei hono ʻomi ʻo e ngaahi malangá) ʻoku pehē “ʻoku maʻu ʻe he Tamaí ʻa e sino ʻo e kakano mo e hui ʻoku ongoʻingofua tatau mo e sino ʻo e tangatá” (TF 130: 22).⁵ Naʻe ongoʻi ʻe ʻEletā Sēmisi E. Talamesi, ko ha mēmipa ʻo e Kōlomu ʻo e Toko Hongofulu Ma Uá ʻa ia naʻá ne taki ʻi he kōmiti ki hono toe vakaiʻi ʻo e Tokāteline mo e Ngaahi Fuakavá ʻi he 1921, ko e lelei tahá ke tau “fakaʻehiʻehi mei he puputuʻu mo e fakakikihi ʻi he konga mahuʻinga ko ʻeni ʻo e tuí.”⁶ ʻIkai ngata aí ne pehē ʻe he kōmiti ʻa Talamesí, naʻe tali pē ʻe he Siasí ʻa e ngaahi malangá ko ha ngaahi lēsoni fakalotu pē kae ʻikai ko ha toe meʻa kehe. Naʻe tupu mei he ngaahi fakamatala ko ʻení ʻa hono toʻo e Ngaahi Malanga ʻo e Tuí mei he Tokāteline mo e Ngaahi Fuakavá.

Neongo hono toʻo ia mei he Tokāteline mo e Ngaahi Fuakavá, ka ʻoku kei ako pē ʻe he kau faifekaú mo ha kau mēmipa kehe ʻo e Siasí ʻa e Ngaahi Malanga ʻo e Tuí ʻi ha ngaahi tatau kuo toe pulusi, pea ʻoku ngāue ʻaki ia he taimi ʻe niʻihi ʻi he ngaahi pulusinga ʻo e Siasí. ʻOku faʻa toutou lea ʻaki ʻo pehē, “Ko ha tui fakalotu ʻoku ʻikai fie maʻu ki ai e feilaulau ʻo e ngaahi meʻa kotoa peé, ʻoku ʻikai ke ne teitei maʻu ha mālohi feʻunga ke ne fakatupu ʻa e tui ʻoku fie maʻu ki he moʻuí mo e fakamoʻuí.”⁷

Ngaahi Maʻuʻanga Tokoni ʻa e Siasí

“Lectures on the Doctrine of the Church of Jesus Christ of Latter-day Saints,” ʻi he Tokāteline mo e Ngaahi Fuakavá, 1835, josephsmithpapers.org.

“Appendix 1: First Theological Lecture on Faith, circa January–May 1835,” in Matthew C. Godfrey, Brenden W. Rensink, Alex D. Smith, Max H Parkin, and Alexander L. Baugh, eds., Documents, Volume 4: April 1834–September 1835. Vol. 4 of the Documents series of The Joseph Smith Papers, edited by Ronald K. Esplin and Matthew J. Grow (Salt Lake City: Church Historian’s Press, 2016), 457–467.

Ngaahi Maʻuʻanga Fakamatalá

ʻOku ʻoatu ʻe he pulusinga ko ʻení ha fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he maʻuʻanga tokoni ko ʻení, ʻoku ʻikai ke mau poupouʻi pe fakapapauʻi atu e kanotohí pe ngaahi fakakaukau ʻa e kau faʻu tohí.

Larry E. Dahl, “Lectures on Faith,” in Encyclopedia of Mormonism, Daniel H. Ludlow, ed., 4 vols. (New York City: MacMillan, 1992), 2:819–21.

Larry E. Dahl and Charles D. Tate, eds., The Lectures on Faith in Historical Perspective (Provo, Utah: Religious Studies Center, Brigham Young University, 1990).

Ngaahi Tefito Fekauʻakí: Tokāteline mo e Ngaahi Fuakavá

Ngaahi Fakamatalá

1. Tokāteline mo e Ngaahi Fuakava, 1835, 36, josephsmithpapers.org.

2. Noel B. Reynolds, “The Case for Sidney Rigdon as Author of the Lectures on Faith,” Journal of Mormon History, vol. 31, no. 3 (Fall 2005), 1–41. Kuo feinga ha niʻihi kehe ke ʻilo pau ʻa e tangata faʻu tohí ʻo makatuʻunga ʻi hono ako e fakamatalá. Vakai, Alan J. Phipps, “The Lectures on Faith: An Authorship Study,” master’s thesis, Brigham Young University, 1977.

3. Brigham Young, Discourse, April 4, 1860, Pitman Shorthand Transcriptions, Church History Library.

4. “Appendix 1: First Theological Lecture on Faith, circa January–May 1835,” in Matthew C. Godfrey, Brenden W. Rensink, Alex D. Smith, Max H Parkin, and Alexander L. Baugh, eds., Documents, Volume 4: April 1834–September 1835. Vol. 4 of the Documents series of The Joseph Smith Papers, edited by Ronald K. Esplin and Matthew J. Grow (Salt Lake City: Church Historian’s Press, 2016), 457–67.

5. Tokāteline mo e Ngaahi Fuakava, 1835, 53, josephsmithpapers.org.

6. Larry E. Dahl, “Authorship and History of the Lectures on Faith,” in The Lectures on Faith: In Historical Perspective, Larry E. Dahl and Charles D. Tate Jr., eds. (Provo, Utah: Religious Studies Center, Brigham Young University, 1990), 18.

7. Tokāteline mo e Ngaahi Fuakava, 1835, 60, josephsmithpapers.org.