“Fuofua Fakataha ʻo e Siasi ʻo Kalaisí,” Ngaahi Tefito ʻo e Hisitōlia ʻo e Siasí.
“Fuofua Fakataha ʻo e Siasi ʻo Kalaisí”
Fuofua Fakataha ʻo e Siasi ʻo Kalaisí
ʻI he ʻaho Tūsite, 6 ʻEpeleli 1830, naʻe fakataha ai ʻa Siosefa Sāmita, ʻŌliva Kautele, mo ha niʻihi kehe ke fokotuʻu ʻa e Siasi ʻo Kalaisí. Kuo fuoloa ʻenau tatali ki he fakataha ko ʻení talu mei he faʻahitaʻu māfana ʻo e 1829, ʻi hono maʻu ʻo ha ngaahi fakahā fakahangatonu ʻe Siosefa mo ʻŌliva ke fokotuʻu ha siasi ʻi he vave tahá, hili hano pulusi ʻo e Tohi ʻa Molomoná mo hano fakatahatahaʻi ʻo e kakai tuí.1 Naʻe ʻikai maʻu ha miniti ʻo e fakatahá, ka naʻe ʻi ai ha ngaahi maʻuʻanga tokoni, kau ai ha fakahā ne maʻu ʻi he taimi ko iá, ʻokú ne fakahaaʻi ha niʻihi ʻo e meʻa ne hokó. Naʻe fakaava ʻa e fakatahá ʻaki ha lotu, pea naʻe poupouʻi ʻe he kau fakatahá ʻa Siosefa mo ʻŌliva ko ha ongo kaumātuʻa mo e faiako ʻi he Siasí. Naʻe takitaha fakanofo leva ʻe Siosefa mo ʻŌliva kinaua ko ha kaumātuʻa, pea naʻe maʻu ʻe he kau fakatahá ʻa e sākalamēniti ʻo e ʻOhomohe Fakaʻosi ʻa e ʻEikí, pea hilifakinima ʻe Siosefa mo ʻŌliva ʻa kinautolu kuo papitaisó ke foaki kiate kinautolu ʻa e meʻafoaki ʻo e Laumālie Māʻoniʻoní mo fakamaʻu kinautolu ko ha kau mēmipa ʻo e Siasí, pea naʻe maʻu ʻe Siosefa ʻa e fakahā ʻa ia ʻoku maʻu ʻi he Tokāteline mo e Ngaahi Fuakavá 21
Ko ha kiʻi fale ʻakau papa ʻi he faama ʻa Pita Uitemā ko e Lahí ʻi Feieti, Niu ʻIoke.
ʻI he vahaʻa ʻo e ʻaho 6 ʻo ʻEpelelí mo e ʻaho 9 ʻo Suné, ʻa ia naʻe fakahoko ai ʻa e fuofua konifelenisi ʻa e Siasí, naʻe fokotuʻu ai ʻe Siosefa mo ʻŌliva ha ngaahi kolo ʻi Feieti, Manisesitā, mo Kolesivile, Niu ʻIoke. ʻOku ʻi he konga kimuʻa ʻo fakamatala ko ʻeni ha puputuʻu he feituʻu ko ʻeni ʻo e ngaahi fakataha ko ʻení, ʻokú ne fokotuʻu mai naʻe hoko ʻi Manisesitā, kae ʻikai ʻi Feieti ʻa e fakataha ʻo e 6 ʻo ʻEpelelí. ʻOku kau ʻi he tatau kimuʻa ʻo e ʻū lauʻi peesi ʻo e Tokāteline mo e Ngaahi Fuakavá 21, ha ngaahi fakamatala ʻokú ne fokotuʻu mai naʻe ʻomi ʻa e fakahaá ʻi Manisesitā. Naʻe fakaʻaongaʻi ʻe Uiliami W. Felipisi ʻa e fakamatala ko ʻení ʻi heʻene teuteuʻi ʻa e fakahaá ke pulusi ʻi he Tohi ʻo e Ngaahi Fekaú ʻi he 1833. ʻOku ʻomi foki ʻe ha ngaahi lēkooti kehe ʻoku kaunga kia Felipisi mo ʻOasoni Palati—ʻa ia naʻe ʻikai ke na ʻi he fakataha ʻo hono fokotuʻu [ʻo e Siasí]—ʻa Manisesitā ko e feituʻu ia ne fai ai e fakataha ʻo e ʻaho 6 ʻo ʻEpelelí. Ka neongo ia, ʻoku lahi ha ngaahi fakamatala fakapepa kimuʻa naʻe faʻu ʻe Siosefa mo ʻŌliva, fakataha mo ha ngaahi paaki kimui ange ʻo e Tokāteline mo e Ngaahi Fuakavá, ʻoku fakahā ai naʻe fakahoko ʻa e fakatahá ʻi Feieti pe ʻikai kau ai ha fakamatala ia ki Manisesitā. ʻOku pehē foki ʻa e poupou e tokolahi taha ʻo e kau faihisitōliá ki he ongo faʻu fakamatalá mo pehē ko e fuofua fakatahá naʻe fakahoko ʻi Feieti.
Ngaahi Tefito Fekauʻakí: Palemaila mo Manisesitā