ʻAita Hani ʻUtala

Naʻe fāʻeleʻi ʻa ʻAita Hani ʻi he ʻaho 8 ʻo Māʻasi 1858 ʻi ha loto saliote ne ʻufiʻufiʻi ʻi he lotolotonga ʻo ha afā sinou ofi ki Sita Siti, ʻIutā.¹ Naʻe ohi hake ʻe heʻene ongomātuʻá, Sione mo Loisi Hani, ʻa ʻAita ʻi Piva, ʻIutā ʻo ofi ki heʻene kuifefine ko Luʻisa Pānisi Pālatí. ʻI he taʻu hongofulu tupu ʻa ʻAitá, naʻá ne hiki mo hono fāmilí ki Niu Mekisikou pea kimui ange ki he fakahahake ʻo ʻAlesoná. Naʻá ne talēniti hiva pea naʻá ne faʻa ngāue ko ha tauhitohi pe faiako. Naʻá ne hoko ko e fuofua palesiteni ʻo e Houalotu Fakalakalaka ʻo e Mutuale ʻa e Kau Finemui ʻa e Siteiki Sinoufeleikí pea naʻá ne akoʻi ʻa e kau finemuí ʻi he 1882 ke nau fekumi ki ha fakahā fakalangi. Naʻá ne pehē, “Kuo pau ke tau ngāueʻi hotau fakamoʻuí pea ʻoua naʻa fakafalala ki ha taha ka ko e ʻEikí pē.”²

ʻI he ʻaho 26 ʻo Mē 1882—ko ha māhina pē ia ʻe ua mei hono fakapaasi ʻo e Lao ʻEtimaní (Edmunds Acts), ʻa ia ne fakahā ai ko e mali tokolahí ko ha hiá—naʻe silaʻi ʻa ʻAita kia Tēvita K. ʻUtala ko hono uaifi hono uá.³ Naʻá ne faingataʻaʻia ʻi heʻene fili ko iá he naʻá ne ʻiloʻi kuo pau ke ne vahevahe ʻa Tēvita mo e ʻuluaki uaifi ʻo Tēvita ko ʻElá, ʻa ia naʻá ne fononga fakataha mo kinaua ʻi he fononga ki he temipale Seni Siaosí ʻi ʻIutaá. Ne hoko ʻa e fakafepakiʻi ʻe he puleʻanga ʻIunaiteti Siteití ʻa e mali tokolahí ke ne ueʻi ʻa ʻAita ke ne mavahe ai mei hono husepānití, mei he 1883 ki he 1892. Ne faʻa fehikitaki holo ʻa ʻAita ke fakaʻehiʻehi mei hono fakatokangaʻi iá, pea naʻá ne mahamahaki. Naʻá ne tuenoa, manavahē ki he fakatangá, pea naʻá ne hohaʻa ki hono vā mo ʻElá, he naʻá na fetāufehiʻaʻaki he taimi ʻe niʻihi. Ka ʻi he fakalau ʻa e taimí, ne fakaʻau pē ke na feohi vāofi.⁴ Ne tohi ʻe ʻAita fekauʻaki mo ʻene aʻusia ʻi he mali tokolahí ʻo pehē, “ʻI heʻeku feinga ke talangofua ki he ngaahi fekau ʻa e ʻOtuá, naʻá ku maʻu ʻa e meʻa kotoa pē ne u fie maʻú ʻi ha taumuʻa haohaoa. Neongo e faingataʻa ʻo e ʻahiʻahí, ka ko ha monū ke foua ia ʻi ha ngāue nāunauʻia.”⁵

Ne foua ʻe he fāmili ʻUtalá ʻa e masiva ʻangoʻangó ʻi ʻAlesona, pea naʻe lahi e taimi ne mavahe ai ʻa Tēvita, ʻa ia naʻá ne hoko ko e palesiteni ʻo e Siteiki Seni Sioné, koeʻuhí ko e ngāue ki he Siasí mo e puleʻangá. Ne maʻu ʻe ʻAita ha fānau ʻe toko ono, ʻa ia naʻá ne tokoni ke tauhi ʻo fakafou ʻi he ngoué, fakalele ha falekoloa fetokoniʻaki, ngaohi ha ʻū koloa maʻana pē, pea mo moʻui fakapotopoto.⁶ ʻI he 1908, ko e taʻu 50 ia ʻa ʻAitá, naʻá ne pā kālava (ko hono tuʻo tolú) pea naʻe mamatea fakafaʻahitaha ai ʻa hono sinó. Naʻe tauhi ia ʻe hono ʻofefine ko Pauline ʻUtala Sāmitá pea mo hono foha-ʻi-he-fono ko ʻAsaeli Sāmitá ʻi he taʻu ʻe fitu ne hoko aí ʻo aʻu ki heʻene pekia ʻi he ʻaho 26 ʻo ʻEpeleli, 1915.⁷

Ngaahi Maʻuʻanga Tokoni ʻa e Siasí

Leonard J. Arrington, “Latter-day Saint Women on the Arizona Frontier,” New Era, Apr. 1974, 42–50.

Maʻuʻanga Fakamatalá

ʻOku ʻomai ʻe he pulusinga ko ʻení ha toe fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he ngaahi maʻuʻanga tokoni ko ʻení, ʻoku ʻikai ke mau fakamoʻoniʻi pe fakapapauʻi atu e kanotohí pe ngaahi fakakaukau ʻa e kau faʻu tohí.

“Ida Hunt Udall,” in Roberta Flake Clayton, Catherine H. Ellis, and David F. Boone, eds., Pioneer Women of Arizona, 2nd ed. (Provo, Utah: BYU Religious Studies Center, 2017), 741–47.

Ngaahi Tefito Fekauʻakí: Antipolygamy Legislation, Louisa Barnes Pratt

Ngaahi Fakamatalá

1. Louisa Barnes Pratt, memoirs, 1858–1859, in S. George Ellsworth, ed., The History of Louisa Barnes Pratt: Being the Autobiography of a Mormon Missionary Widow and Pioneer (Logan: Utah State University Press, 1998), 268.

2. Snowflake Arizona Stake Young Women’s Mutual Improvement Association minutes and records, volume 1, December 30, 1882, 7, Church History Library, Salt Lake City. Vakai foki ki he Tefito: Ngaahi Houalotu ʻa e Kau Finemuí.

3. Maria S. Ellsworth, ed., Mormon Odyssey: The Story of Ida Hunt Udall, Plural Wife (Urbana: University of Illinois Press, 1992), 3–18; Eastern Arizona Stake, Manuscript History and Historical Reports, Church History Library, Salt Lake City; Snowflake Arizona Stake Young Women’s Mutual Improvement Association minutes and records, vol. 1, 22.

4. Pearl Udall Nelson, Arizona Pioneer Mormon: David King Udall; His Story and His Family (Tucson: Arizona Silhouettes, 1959), 97–105.

5. Ida Hunt Udall, journal, May 21, 1882, 26, Church History Library, Salt Lake City.

6. Roberta Flake Clayton, Catherine H. Ellis, and David F. Boone, eds., Pioneer Women of Arizona, 2nd ed. (Provo, Utah: BYU Religious Studies Center, 2017), 744–45.

7. Clayton, Ellis, and Boone, Pioneer Women of Arizona, 745–46.