Sione Teila
Naʻe hoko ‘a Sione Teila ko e Palesiteni hono tolu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ‘i he vahaʻa ʻo e taʻu 1880 mo ‘ene pekia ʻi he 1887. Naʻe fāʻeleʻi ʻi he 1808 ʻi Milenifoopi ‘i ʻIngilani, naʻá ne kau ki he Siasí ‘i he 1836 fakataha mo hono uaifi ko Leonola Kēnoni Teilá lolotonga ʻene nofo ‘i Tolonitō, Kānatá. Naʻá ne hao mei hono ʻohofi kinautolu ʻe he kau fakatangá ʻi he fale fakapōpula Kātesí ʻo fakapoongi ai ʻa Siosefa mo Hailame Sāmitá, ka naʻá ne lavea lahi. Lolotonga ‘a e taʻu ʻe 40 ʻo e hoko ʻa Teila ko ha ‘Aposetoló, naʻá ne fakatonutonu ha ngaahi nusipepa lahi ʻa e Siasí, pulusi ha ngaahi tohi mo ha ʻū tohi tufa, malanga ʻi Pilitānia Lahi mo ‘Amelika Noate, peá ne tokangaʻi e fuofua ngāue fakafaifekau ‘i Siamane mo Falaniseé. Hili ‘a e pekia ʻa Pilikihami ʻIongi ‘i he 1877, ne kamata tataki ʻe Teila e Siasí ko e Palesiteni ‘o e Kōlomu ʻo e Kau ‘Aposetolo ʻe Toko Hongofulu Mā Uá. Naʻe fakanofo ia ko e Palesiteni hono tolu ‘o e Siasí ʻi he 1880 mo ne toe fokotuʻutuʻu foʻou e kau Palesitenisī ‘Uluakí.
Tā valivali ‘o Sione Teila ʻi he fakamatalá.
Lolotonga hono tokangaʻi ʻe Sione Teila ko e Palesiteni ‘o e Kōlomu ʻo e Toko Hongofulu Mā Uá ʻa e Siasí, naʻá ne fakangofua hono fokotuʻutuʻu ʻo e houalotu Palaimelí pea mo vaheʻi e kau ʻuluaki Palesiteni Lahi ʻo e ngaahi houalotu ‘a e kakai fefiné ʻi he Siasí. ʻI heʻene hoko ko e Palesiteni ‘o e Siasí naʻá ne tokangaʻi hono tānaki mai ‘o e Mataʻitofe Mahuʻingá ke hoko ko e folofolá mo ha polokalama ʻo e mavahe mei he fakamoʻuá mo e ngaahi ngāue fakauelofea kehe maʻá e kau masivá ʻa ia ko ha konga ia ‘o e kātoanga siupeli fakafiefia ki he taʻu ʻe 50 ‘o e Siasí.
‘I he ngaahi taʻu 1880 tupú ne fakaʻau ke lahi ange ʻa e fakafepaki ‘a e puleʻangá ki he mali tokolahí, ne ʻikai ke tokanga ki ai ʻa Teila, he naʻá ne tali ʻa e mali tokolahí ‘i Nāvū, ʻi ‘Ilinoisi. Lolotonga ʻene moʻuí, naʻá ne mali mo ha kakai fefine ‘e toko valu. Naʻe fakaʻaongaʻi ʻe Palesiteni Teila ʻa e konga lahi ʻo e ngaahi taʻu fakaʻosiʻosi ʻo ʻene moʻuí ʻi he toitoi mei he kau maʻu mafai ʻo e puleʻanga [ʻo ʻAmeliká]. Naʻá ne pekia ‘i Siulai 1887.
Ke maʻu ha fakamatala lahi ange kau ki he moʻui ʻa Sione Teilá, vakai ki he ngaahi vitiō ‘o e Prophets of the Restoration ‘i he hisitōlia.ChurchofJesusChrist.org pe ʻi he Gospel Library app.