Ngaahi Kautaha ʻa e Kau Talavoú

Naʻe fokotuʻu ʻe ʻEletā Hiipa C. Kimipolo lolotonga ha fakataha mo e toʻu tupú ʻi Nāvū, ʻIlinoisi, ʻi he 1843, ke nau faʻu ha kulupu ke maʻu ai ha fakahinohino fakalaumālie. Ne toe fokotuʻu atu ai ʻe Siosefa Sāmita ke fokotuʻutuʻu kinautolu ki “ha sosaieti ki hono tokoniʻi ʻo e masivá.” Ne muimui ʻa e kulupú ki he faleʻi ʻa Siosefá ʻo kamataʻi e Kautaha Tokoni ʻa e Kau Finemui mo e Kau Talavou ʻo Nāvuú maʻá e kau taautaha kei talavou tangata mo fefine siʻi hifo ʻi he taʻu 30.¹ Ka neongo ia, ne ʻikai fuoloa e kautahá ni ʻi he pekia ʻa Siosefa Sāmita ʻi he 1844 mo e tokanga ange ʻa e Kau Māʻoniʻoní ke nau mavahe mei Nāvū ʻi he 1846.

Hili ha meimei taʻu ʻe hongofulu mei ai ʻi Sōleki Siti, ne ui ʻe ʻEletā Hiipa C. Kimipolo e kau talavou kotoa ʻi he ngaahi nofoʻanga ofi ki aí ke nau fakatahataha ki ha ngaahi fakatahaʻanga fakamoʻoni makehe. Ne toe faʻu foki mo ha ngaahi kulupu tauʻatāina mo e ngaahi taumuʻa faitatau ke fakasōsiale, alea, fakafiefiaʻi, mo teuteuʻi e kau talavoú ki he ngāue lakanga fakataulaʻeikí mo e ngāue fakafaifekaú. ʻI he 1870 tupú, ne lahi ha ngaahi uooti naʻa nau fokotuʻu ha ngaahi kulupu pehē, hangē ko e ngaahi kulupu ako fakapaʻanga ʻa e kau finemuí, ke fakatupulaki e “fakalakalaka” ʻa e toʻu tupu ʻo e Siasí.² ‘I he 1875 ne fakahinohinoʻi ai ʻe Pilikihami ʻIongi ʻa Sinuasi F. Uele ke ne fokotuʻu mo tokangaʻi e meʻa ne ʻiloa kimui ange ko e Kautaha Fakalakalaka ʻo e Mutuale ʻa e Kau Talavoú (KFMKT). Ne fakahinohino ʻe ʻIongi ʻa Uele ʻo pehē, “ʻOku tau fie maʻu ke kau atu mo fokotuʻutuʻu lelei e kau talavoú ʻi he Siasí hono kotoa, kae lava ke tau kole meiate kinautolu ʻi ha faʻahinga taimi pē ha faʻahinga tokoni ʻe ala fie maʻu.”³ Naʻe fuʻu fie maʻu moʻoni ha kautaha pehē ʻi ha taimi ne ʻikai fakanofo ai e tokolahi taha ʻo e kau talavoú ki he ngaahi tuʻunga Lakanga Taulaʻeiki Faka-ʻĒloné. Naʻe fakamamafaʻi ʻe Uele mo e kau taki kehé e fakalakalaka fakaeʻulungāngá mo e fetokoniʻaki ke fakafepakiʻi e ngaahi tōʻonga kovi fakasōsialé mo e nofonoá ʻaki hono ako e moʻoni ʻo e ongoongoleleí mo kau atu ki he ngaahi ʻekitivitī fakasōsialé.

Ne poupouʻi ʻe he kau taki ʻo e Siasí e kau pīsopé ʻi he kamataʻanga ʻo e 1877 ke fakanofo e tokolahi taha ʻo e kau talavou ʻi he Siasí ki he ngaahi tuʻunga Lakanga Taulaʻeiki Faka-ʻĒloné. Ka neongo ia, tupu mei he tukufakaholo ʻo e kau atu ʻa e kakai tangata lalahí ki he ngaahi kōlomu Lakanga Taulaʻeiki Faka-ʻĒloné ʻo tokanga taha ki hono fakahoko e ngaahi fatongia lakanga fakataulaʻeikí, ne ʻikai pē ke kau atu e tokolahi taha ia ʻo e kau talavoú ki heʻenau ngaahi kōlomú. Naʻe hohaʻa e kau taki ʻo e Siasí naʻa fai ʻe he ngaahi Lautohi Faka-Sāpaté mo e KFMKT e “ngāue ʻoku totonu ke fakahoko ʻe he ngaahi kōlomú.” ʻI he 1908 ne fili ai ʻe he Kau Palesitenisī ʻUluakí ha kōmiti ke nau fakaivia e ngāue ʻa e ngaahi kōlomu ʻo e lakanga fakataulaʻeikí. Naʻe fokotuʻu ʻe he kōmití ha ngaahi liliu ʻe niʻihi ʻo kau ai hono fokotuʻu ʻo ha fakalakalaka mei he tuʻunga ki he tuʻunga ʻi ha taʻu motuʻa pau, mo faʻu ha naunau fakalēsoni ʻo fakafeʻunga ki he toʻu takitaha. Lolotonga iá, ne hokohoko atu e ngāue māvahevahe pē ʻa e KFMKT ia.⁴

ʻI he 1913, ne maʻu ai ʻe he KFMKT ha aleapau fakafonua mei he Sikauti ʻa e Fānau Tangata ʻo ʻAmeliká. Ne ueʻi ʻe he ngāue fakataha ko ʻeni mo e Kau Sikautí e kau taki KFMKT ke fokotuʻutuʻu e ngaahi polokalama Mutualé ʻo fakatoʻu: ko e fānau tangata taʻu 12 ki he 16 ko e toʻu iiki (pe kau Sikauti MIA), fānau tangata 17 ki he 21 ko e toʻu lalahi (ne faʻa ui ko e Kau M Meni [M Men]), pea ko e kau taʻu 22 pe lahi angé ko e toʻu lalahi makehe ia. Ne liliu e ngaahi vahevahe fakatoʻu ko ʻení ʻi he ʻalu ʻa e taimí pea toki fakatatau ia kimui ange ki he ngaahi taʻu ʻo e hiki ʻi he Lakanga Taulaʻeiki Faka-ʻĒloné, ʻo liliu e ngaahi hingoa fakakulupú ki he ngaahi tuʻunga lakanga fakataulaʻeikí. Ne kau atu e kau mēmipa KFMKT ki ha ngaahi ʻekitivitī kehekehe ʻo fakafou he polokalama Sikautí. Naʻa nau kau atu foki ki he ngaahi konifelenisi fakataʻú mo e ngaahi ʻekitivitī kehe mo e Kautaha Fakalakalaka Mutuale ʻa e Kau Finemuí.

‘I haʻanau ʻamanaki atu ke fakatupulaki e kau fakalūkufua atu ʻa e kau talavoú ʻi he Siasí he 1931, ne fanongonongo ai ʻe he Kau Taki Māʻolungá e Palani Fengāueʻaki ʻa e Lakanga Taulaʻeiki Faka-ʻĒloné ke fakamālohia e fengāueʻaki ʻa e ngaahi kōlomú, ko e KFMKT, Fānau Tangata Sikautí, mo e seminelí. Ko e kamataʻanga ʻeni ʻo ha ngāue taimi lōloa ke fakafekauʻaki e ngaahi polokalama ʻa e kau talavou ʻo e Siasí mo e lakanga fakataulaʻeikí.⁵

ʻI he 1970 tupú, ne fakafeʻiloaki hokohoko ai ʻe he ongo Palesiteni ko Hāloti B. Lī mo Sipenisā W. Kimipoló ha ngaahi liliu ke ngāue lelei ange e ngaahi polokalama ʻa e kau talavou ʻo e Siasí, pea ʻomi kinautolu ki he “malumalu ʻo e lakanga fakataulaʻeikí.”⁶ Ne fakangata leva e ngaahi uiuiʻi ki he poate fakalūkufua ʻo e KFMKT, ngaahi poate fakasiteikí, mo e kau taki KFMKT fakauōtí, pea naʻe fakamāvahevaheʻi leva e polokalama ki he kau talavou lalahi hake he taʻu 18 mei he polokalama maʻá e kau talavou kei īkí. ʻI he taimi ʻe taha, ne tokangaʻi ai ʻe he Kau Pīsopeliki Pulé e kau MIA Lakanga Taulaʻeiki Faka-ʻĒloné, ʻa ia ne kau ai e ngaahi polokalama maʻá e kau talavoú mo e kau finemuí fakatouʻosi. ‘I he 1974 ne ʻikai ke toe fakaʻaongaʻi ai e hingoa Kautaha Fakalakalaka Mutualé, pea ʻi he 1977 ne toe fakatahaʻi lahi ange ai mo toe fakahingoa e polokalamá ko e Kau Talavoú mo e Kau Finemuí, pea toe fokotuʻu e kau Palesitenisī Lahí mo e ngaahi poate lahí.

Ne tauhi ʻe he Siasí ʻene aleapau mo e Fānau Tangata Sikauti ʻo ʻAmeliká ʻi he ʻIunaiteti Siteití, mo ʻoatu ha meʻa ʻe niʻihi ke fili mei ai e ngaahi fonua kehé. ʻI he 2018, ne fanongonongo ai ʻe he Siasí ʻene palani he ʻikai toe kau atu ki he Sikautí mo fokotuʻu ha polokalama toʻu tupu foʻou ʻo kamata ʻi he 2020.⁷

Ngaahi Maʻuʻanga Tokoni ʻa e Siasí

“Toʻu Tupú,” youth.ChurchofJesusChrist.org.

Maʻuʻanga Fakamatalá

ʻOku ʻoatu ʻe he pulusinga ko ʻení ha fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he maʻuʻanga tokoni ko ʻení, ʻoku ʻikai ke mau fakamoʻoniʻi pe fakapapauʻi atu e kanotohí pe ngaahi fakakaukau ʻa e kau faʻu tohí.

Scott C. Esplin, “Tying It to the Priesthood: Harold B. Lee’s Restructuring of the Young Men Organization,” ʻi he David J. Whittaker and Arnold K. Garr, eds., A Firm Foundation: Church Organization and Administration (Provo, Utah: Religious Studies Center, 2011), 463–84.

Richard O. Cowan, “Church Programs in Transition,” ʻi he Craig K. Manscill, Brian D. Reeves, Guy L. Dorius, and J. B. Haws, eds., Joseph F. Smith: Reflections on the Man and His Times (Provo, Utah: Religious Studies Center, 2013), 418–33.

Charles E. Mitchner and Mark E. Hurst, “Young Men,” ʻi he Daniel H. Ludlow, ed., Encyclopedia of Mormonism, 4 vols. (New York: Macmillan, 1992), 4:1613–15.

Ngaahi Tefito Fekauʻakí: Retrenchment; Ngaahi Kautaha ʻa e Kau Finemuí; Adjustments to Priesthood Organization

Maʻuʻanga Fakamatalá

1. J. M. Monroe, “A Short Sketch of the Rise of the Young Gentlemen and Ladies Relief Society of Nauvoo,” Times and Seasons, vol. 4, no. 10 (Apr. 1, 1843), 154–57.

2. Vakai, Ngaahi Tefitó: Retrenchment; Ngaahi Kautaha ʻa e Kau Finemuí.

3. Junius F. Wells, “Historic Sketch of the Y.M.M.I.A.,” Improvement Era, vol. 28, no. 8 (June 1925), 715.

4. William G. Hartley, My Fellow Servants: Essays on the History of the Priesthood (Provo, Utah: BYU Studies, 2010), 50–55, 58–64; vakai ki he Tefito: Adjustments to Priesthood Organization.

5. William G. Hartley, My Fellow Servants, 67.

6. Victor L. Brown, ʻi he “Priesthood MIA Era Opens,” Church News, vol. 43, no. 25 (June 23, 1973), 3.

7. “A Joint Statement from The Church of Jesus Christ of Latter-day Saints and the Boy Scouts of America,” Mē 8, 2018, newsroom.ChurchofJesusChrist.org.