Kumi Koloá

Naʻe faʻa feinga e kau fakaanga ʻo Siosefa Sāmitá ke fakangalikoviʻi ia ʻaki ʻenau tala ʻokú ne kumi paʻanga pe kumi koloa. Naʻe ʻikai ke fakaʻikaiʻi ʻe Siosefa ia e tukuakiʻi ko ʻení, ka naʻá ne fakaʻasi ʻi hono hisitōlia totonú naʻe fakangāueʻi ia ʻe Sosaia Sitoeli ʻi he 1825 ke tokoni ki ha ngāue kumi koloa, ʻi he fakatokelau ʻo Penisilivēniá.¹ Naʻe fie maʻu ʻe Sitoeli e tokoni ʻa Siosefá he naʻe tala ʻe hono kaungāʻapí ko Siosefá ko e “tangata kikite”—ko ha taha te ne lava ʻo sio ki ha maka makehe peá ne ʻiloʻi ai ha meʻa naʻe puli pe fufuuʻi.²

Ne hoko ʻa e “mamatá” mo e “tangata kikité” ko e konga ia ʻo e anga fakafonua ne tupu hake ai ʻa Siosefa Sāmitá. Naʻe tui ha kakai ʻi he konga kimuʻa ʻo e senituli 19, naʻe malava ʻe ha kakai mohu talēnitiʻia ʻo sio ki ha meʻa naʻe mole, ʻaki ʻenau fakaʻaongaʻi ha meʻa hangē ko e maká. Naʻe tali lelei ʻe Siosefa Sāmita mo hono fāmilí, ʻa e ngaahi founga motuʻa mo angamaheni ko ʻení, tatau pē mo ha tokolahi honau feituʻú.

ʻI he ngaahi taʻu 1820 tupú, naʻe hanga ʻe ha fakamatala kau ki ha tukuʻanga makakoloa mei Sipeini, ʻo toʻo e loto ʻo ha kakai hangē ko Sosaia Sitoelí, ke ne fakangāueʻi ha kau tangata kikite hangē ko Siosefá, ʻi heʻenau fekumi ki he makakoloá.³ Naʻe falala ʻa Sitoeli kia Siosefa, feinga ke maʻu ʻene tokoní ʻi he kumi makakoloá, peá ne tali ʻene faleʻi ke tuku ā e kumi koloá. Naʻe lau ʻe Siosefa Sāmita ko e Lahí ko ha meʻa toputapu e talēniti hono fohá, mo ne fakaʻamu he ʻikai ke ne toe fakaʻaongaʻi ia ke kumi ʻaki e makakoloa ʻo e māmaní.⁴ ʻI he teuteu ʻa Siosefa ke liliu e Tohi ʻa Molomoná, naʻe toe fekau kiate ia ke ʻoua naʻá ne toe kau ki he niʻihi ʻoku kumi makakoloá ka ne fakaʻaongaʻi ʻene meʻafoakí ki he liliu leá mo e maʻu fakahaá.

Neongo naʻe ʻikai ko ha meʻa foʻou he taimi mo e feituʻu ne ʻi ai ʻa Siosefá ke fetaulaki mo ha kakai ne nau tala naʻa nau fakaʻaongaʻi e maká ke kumi ʻaki e koloa mole pe fufuú, ka naʻe teʻeki ai fanongo ha taha ia ʻi hono fakaʻaongaʻi e maka kikité ke liliu ʻaki ha lekooti fakakuonga muʻa. Naʻe foaki ʻe he ʻOtuá kia Siosefa Sāmita e mālohi ke liliu e Tohi ʻa Molomoná, mo ne toe fakahinohino mai ke fakaʻaongaʻi ʻe Siosefa e maka kikité ki ha ngāue ʻoku fakalaumālié.

Ngaahi Maʻuʻanga Tokoni ʻa e Siasí

Richard E. Turley Jr., Robin S. Jensen, and Mark Ashurst-McGee, “Joseph the Seer,” Ensign, Oct. 2015, 48–55.

“Seer stone,” josephsmithpapers.org.

Ngaahi Tefito Fekauʻakí: Liliu ʻo e Tohi ʻa Molomoná, Maka Kikité, Hopo ʻa Siosefa Sāmitá ʻi he 1826

Maʻuʻanga Fakamatalá

1. Joseph Smith, “History, 1838–1856, volume A-1 [23 December 1805–30 August 1834],” 7–8, josephsmithpapers.org; see also Elders’ Journal, vol. 1, no. 3 (July 1838), 43, josephsmithpapers.org.

2. Vakai ki he Ngaahi Tefito ʻi he Hisitōlia ʻo e Siasí ʻoku nau fekauʻakí, “Hopo ʻa Siosefa Sāmitá ʻi he 1826” mo e “Maka Kikité.”

3. Alan Taylor, “The Early Republic’s Supernatural Economy: Treasure Seeking in the American Northeast, 1780–1830,” American Quarterly, vol. 38, no. 1 (Faʻahitaʻu Failau 1986), 6–34.

4. William D. Purple, “Joseph Smith, the Originator of Mormonism,” Chenango Union, vol. 30, no. 33 (May 2, 1877), 3.