“Fakalelei ʻo e 1856–57,” Ngaahi Tefito ʻi he Hisitōlia ʻo e Siasí
“Fakalelei ʻo e 1856–57”
Fakalelei ʻo e 1856–57
Fakafuofua ki ha ngaahi māhina ʻe fitu mei Sepitema ʻo e 1856 ki ʻEpeleli ʻo e 1857, naʻe malangaʻi ʻe Pilikihami ʻIongi mo e niʻihi kehe ʻo e kau taki ʻo e Siasí ʻi he kotoa ʻo e Vahefonua ʻIutaá ke fakatupu ha tukupā fakalotu ʻoku lahi angé ʻi he lotolotonga ʻo e Kāingalotú. Ko e faʻahitaʻu ko ʻeni ʻo e ʻekitivitī fakataha lotú, ʻa ia ne hoko ʻo ʻiloa “ko e Fakalelei ʻa e Māmongá,” naʻá ne fakafofongaʻi ha liliu lahi maʻá e tokolahi ʻa ia ne nau lipooti ʻenau aʻusia ha fakafoʻou fakalaumālie mo ha tupulaki ʻi he loto-falala ʻi honau tukui koló.1
ʻI he feinga ʻa e Kāingalotú ke langa hake ʻa e puleʻanga ʻo e ʻOtuá mo teuteu ki he Hāʻele ʻAnga Ua Mai ʻa Sīsū Kalaisí, ne nau faʻa fakahaaʻi ʻa ʻenau taʻefiemālie ʻi he ngaahi tōnounou ne nau ʻiloʻi ʻi hono moʻui ʻaki ʻo e ongoongolelei kuo toe fakafoki maí. ʻI heʻenau langa hake e tukui kolo ʻi he konga fonua foʻou ʻo e Vahefonua ʻIutaá, naʻa nau tomuʻa aʻusia ha ngaahi faingataʻa lahi mo e ngaahi fakatamaki fakaenatula, tautautefito ki he mate ʻa e ngaahi ngoué, ngaahi vela ʻi he vaotaá, fakaʻauha ʻo e ngoué ʻe he heʻé, mo ha honge ʻi he faʻahitaʻu momokó. Ne fakakaukau ʻa Pilikihami ʻIongi ki he ngaahi faingataʻa ko ʻení ko ha valoki fakalangi, pea ʻi he konifelenisi lahi ʻo ʻOkatopa ʻo e 1855 naʻá ne teke ʻa e Kāingalotú ke nau fakatomala “ke lava ʻo taʻofi hono tauteaʻi [kinautolú].”2 ʻI he faʻahitaʻu failau hono hokó, naʻá ne ui ha ngaahi malanga ke fakaongo lahi atu e “leʻo ʻo e maná” mo fakaʻaiʻai ke fakatomala fakataha ha tokolahi. ʻI Sepitema ʻo e 1856 naʻe fakahā ai ʻe Pilikihami ki he Kau ʻAposetolo tokolahi ha ngaahi palani ke “fakahoko ha fuʻu liliu lahi” ʻi he kotoa ʻo e vahefonuá.3 ʻI he ngaahi ʻaho ne hoko maí, ne tuku atu ʻe Setetaia M. Kalānite, ko e tokoni ʻi he Kau Palesitenisī ʻUluakí, ʻa e feinga ko iá ʻi ha konifelenisi ʻi he fakatokelau ʻo Sōleki Sití. Tuaiekemo hili e malanga ʻa Kalānité, naʻe toe papitaiso fakafoki mai ha Kāingalotu ʻe toko 500 ke fakahaaʻi e fakafoʻou ʻenau mateakí.4
Naʻe ʻoatu ha ngaahi malanga tatau ʻi he kotoa ʻo e ngaahi nofoʻangá. ʻI he ngaahi ʻēlia ʻe niʻihi, naʻe ʻaʻahi ʻa e “kau faifekau fakaʻapí” ki he ngaahi ʻapi ʻi he uooti takitaha mo ha lisi ʻo e ngaahi fehuʻi naʻe fakataumuʻa ke ueʻi ha fakakaukauloto mo e talangofua ki he ngaahi tuʻunga moʻui māʻolungá. Ko e taha ʻo e ngaahi fehuʻi ne ʻeké, “Kuó ke mānumanu ki ha faʻahinga meʻa pē ʻoku ʻikai ʻaʻau?” ʻa ia ne fakaongo atu ai ʻa e taha ʻo e Ngaahi Fekau ʻe Hongofulú. Ne fakamamafaʻi ʻe he niʻihi ʻa e fakaʻapaʻapaʻi ʻo e ngaahi totonu ʻo e koloá mo e faivelenga ki he fāmilí mo e Siasí: “Kuó ke fakaʻilongaʻi ha monumanu naʻe ʻikai ke ke ʻiloʻi ke ʻaʻau ia? … ʻOkú ke lotu ʻi ho fāmilí ʻi he efiafí mo e pongipongí mo fakahoko ʻa e lotu liló?” Naʻe poupouʻi foki ʻe he kau faifekau fakaʻapí ʻa e mātuʻa tangatá ke mali mo ha toe ngaahi uaifi kehe ke fakahaaʻi ha fakapapau lahi ange ki he tuí.5
Naʻe kamataʻi ʻe he fakakaukauloto mo e faivelenga fakalotu fakavavevavé ʻa e lahi ange ʻa e maʻulotú mo e ngaahi foaki vahehongofulú. Hili ha ngaahi māhina ʻe nima mei he kamata ʻo e fakaleleiʻí, ne fakaʻilongaʻi ʻe Pilikihami ʻIongi hono tali ʻe he ʻOtuá ʻa e fakatomala ʻa e kakaí. ʻI he taimi ne fakakakato ai ʻe he kau faifekau fakaʻapí ʻenau ngaahi ʻaʻahí ʻi ʻEpeleli ʻo e 1857, ko e tokolahi taha ʻo e Kāingalotu ʻi Sōleki Sití ne toe papitaiso fakafoki kinautolu.6
Naʻe hoko ha ngaahi nunuʻa naʻe ʻikai ha ʻamanaki ki ai hili e vahaʻataimi ʻo e fakaleleí. ʻI ha ngaahi taimi, naʻe fakatokanga ai ʻa Pilikihami ʻIongi, Setetaia Kalānite, mo ha kau taki kehe fekauʻaki mo e kau angatuʻú mo e kau hē mei he moʻoní. Ne ngāue ʻaki ʻe he kau taki ko ʻení ha ngaahi potufolofola fakatohitapu, tautautefito ʻi he Fuakava Motuʻá, naʻa nau akoʻi foki ko e ngaahi angahala ʻe niʻihi naʻe fuʻu koví ʻe toki lava pē ʻo fakamolemoleʻi ia ʻi hano lilingi ʻo e toto ʻa e tokotaha faiangahalá. Ne aʻu ki he palesiteni ʻo e ʻIunaiteti Siteití ha ʻū lipooti ʻo e fakalalahi ʻa e ngaahi ongoongo mo e talanoa sasala ʻo e “Fakafetau ʻa e Māmongá” ki he puleʻanga fakafonuá, ʻa ia naʻá ne ngāue fakakautau ai ke taʻotaʻofi ʻa e angatuʻu ne laú. Naʻe toe fakautuutu ange ʻa e ngaahi fekeʻikeʻí ʻi he vahaʻa ʻo e ngaahi kulupu kehekehe koeʻuhí ko e fakatuʻutāmaki ʻo e fepaki fakakautaú, pea ne hoko mo ha fakamamahi fakalilifu ʻi ha ngaahi ʻēlia ʻo e Vahefonua ʻIutaá. Ne ʻosi ʻa e vahaʻataimi ko ʻeni, ʻa ia ne ʻiloa ko e Tau ʻi ʻIutaá, hili hono aleaʻi ʻe he kau ʻōfisa fakapuleʻangá ha aleapau melino mo Pilikihami ʻIongi mo e kau taki fakavahefonua kehé.7
ʻI he fakaʻau ke siʻisiʻi e toutou hohaʻa fekauʻaki mo e fiekaiá mo e hao moʻuí, naʻe fakaʻehiʻehi lahi ʻa e Kāingalotú mei he founga malanga fakakautau mālohí ʻi he konga loto ʻo e 1850 tupú. Naʻe liliu ʻe Pilikihami ʻIongi e ngaahi tuʻutuʻuní ke hoa ange mo e tupu tokolahi ʻo e kau nofo fonuá peá ne lea ʻo fakafepakiʻi hono tuli e niʻihi kehé mei he fonuá. Naʻe hokohoko atu e fefakamaamaʻaki ʻa e Kāingalotú ke ʻelito ʻaki ʻe honau tukui koló ʻa e tuí mo e līʻoá, ko ha konga ia ʻo e fakaleleiʻí ne ongona atu ʻi he ngaahi nofoʻanga lahi ʻi he Fakatokelau ʻo ʻAmelika Hihifó. 8
Ngaahi Tefito Fekauʻakí: Fanga Heʻé mo e Fanga Talá, Tau ʻi ʻIutaá, Fakapō Fakatokolahi ʻi he Moʻunga Mētoú