Kau Taautaha Lalahí

Naʻe feinga ha Kāingalotu tokolahi ʻi he lolotonga ʻo e Kuonga Fakalakalaka ʻo e konga kimuʻa ʻo e senituli 20 ke fakaleleiʻi e sōsaietí ʻo fakafou ʻi he ngaahi houalotú mo e ngaahi polokalamá. Naʻe faʻu ʻe kinautolu ne nau kau ʻi he ngaahi houalotu kehekehe ʻo e Siasí ha ngaahi polokalama ke fakafeohi mo poupouʻi ʻa e kāingalotu taautaha lalahí ʻa ia naʻe faifai pea tupulaki ia ʻo hoko ko ha ngaahi uooti mo ha siteiki ki he kau taautaha lalahí. ʻI he 1913, naʻe fakapaʻanga ʻe he Fineʻofá ha ʻapi maʻá e kau fefine taautaha kei talavou ne nau haʻu ki Sōleki Siti ʻo kumi ha ngāue pe nofoʻangá. Naʻe fakalahi ʻa e feinga ke ʻoange ha nofoʻanga maʻá e kakai fefine ʻe malava ke faingataʻaʻiá ʻi he 1920 ʻi hono fakaleleiʻi ʻo e Beehive House (Fale Punungahoné), ʻa ia naʻe ʻuluaki nofo ʻi ai ʻa Pilikihami ʻIongi mo hono fāmili tokolahí, ko ha fale mohe maʻá e kau fefine taautaha kei talavoú. ʻI he taimi tatau pē, naʻe ʻomi ʻe ha ngaahi kalapu fakatangata mo fakafefine ʻe niʻihi maʻá e Kāingalotu ʻi he Ngaahi ʻAho Kimui Ní ha kau ako ʻunivēsiti mo ha kau ʻosi ngāue fakafaifekau ki ha ngaahi kulupu fakasōsiale naʻe lele fakataha mo e “ngaahi semineli fakakolisi” foʻoú, ʻa ia naʻe hoko ko e ngaahi ʻInisititiuti Fakalotú, ʻa ia naʻe fokotuʻu ʻe he kau taki ʻo e Siasí ʻi ha ngaahi ʻapiako ʻunivēsiti ʻe niʻihi. Naʻe tupulaki ʻa e ngaahi polokalama ʻekitivitií ʻi he fakaʻau ke tokolahi e kakai lalahi kei talavou naʻa nau ako ʻi he ʻunivēsití.

Ko e Paaka Hanitingitoní, Kalefōnia, ko ha kulupu ʻo e Gleaner Girls, ko ha kautaha mei he kamataʻanga ʻo e Siasí maʻá e kau fafine taautaha ʻo e Kau Māʻoniʻoni ʻi he Ngaahi ʻAho Kimui Ní, ʻi heʻenau fakafiefiaʻi ʻenau kātoanga fakataʻú, 1930.

ʻI he 1950 tupú, naʻe fakakaukauʻi ʻe he kau taki ʻo e Siasí ha ngaahi founga ke fakatahaʻi ai ʻa e fokotuʻutuʻu fakalotu ʻo e ngaahi uōtí mo e ngaahi siteikí ki he fānau ako he ʻunivēsití. ʻI he 1956, naʻe fakataumuʻa hono fokotuʻu ʻa e Siteiki BYU maʻá e kakai lalahi kei talavou teʻeki mali naʻe ako ʻi he ʻUnivēsiti Pilikihami ʻIongí. Naʻe ʻikai fuoloa kuo kau atu ki hono ngaahi uooti ʻe hongofulu mā uá ʻa e fānau ako ne toki kamata faʻu fāmilí pea nau tauhi ʻa e konga lahi ʻo e ngaahi houalotu tatau naʻe maʻu ʻi he ngaahi uooti angamahení, hangē ko e Lautohi Faka-Sāpaté mo e Palaimelí. Mavahe mei he ngaahi ʻapiako ʻo e ʻunivēsití, naʻe tokangaʻi ʻe he ngaahi siteiki kehé ha ngaahi uooti naʻe fakatefito hono fokotuʻú maʻá e kau taautaha lalahí.

ʻI he tupulaki ʻa e ngaahi houalotu fakafeohi naʻe fekauʻaki mo e ʻapiakó, naʻe ʻiloʻi ʻe he kau taki ʻo e Siasí ʻi he 1970 tupú ha ngaahi founga ʻe lava ke maʻu ai ʻe he kau taautaha lalahi ʻo e ngaahi toʻu kotoa pē ha lelei mei he ngāue fakaetauhi ʻoku fakafeʻungaʻi ki heʻenau ngaahi fiemaʻú, ngaahi meʻa ʻoku nau saiʻia aí, mo e ngaahi meʻa ʻoku nau tokanga ki aí. Naʻe fakahaaʻi ʻe ha kakai lalahi teʻeki mali tokolahi ʻenau ongoʻi tuenoa mei he kau ʻi ha komiunitī ʻoku faʻa lave ki he tuʻunga mali ʻo ha taha. Naʻe fakamatala kimui ʻe ha fefine uitou lolotonga e taimi ko ʻení ʻa e “ʻikai ke tatau moʻoni” ʻa e maʻulotu ʻi he Siasí ki he kāingalotu teʻeki malí. Naʻe faʻu ʻe he Mutual Improvement Association - MIA (Kautaha Fakalakalaka ʻo e Mutualé - MIA) ha ngaahi kulupu “M Men” mo e “Gleaner Girls” maʻá e kau tangata mo e kau fefine lalahi kei talavoú. ʻI he 1972, naʻe tupu mei he ngaahi feinga ke fakafehokotaki ʻa e MIA mo e ngaahi kōlomu ʻo e lakanga fakataulaʻeikí ha polokalama foʻou maʻá e kau taautaha lalahí. ʻI hono fakafeʻiloaki ʻo e polokalamá ni, naʻe fakamatala ʻa ʻEletā Sēmisi E. Fausi ki heʻene fanongo ki he lipooti ʻa e Kāingalotu taautaha ʻoku nau ongoʻi liʻekina mo loto-foʻi. Naʻá ne pehē, “Kuo pau ke tau kamata ʻaki ʻetau feinga ke aʻu ki he fakafoʻituituí. ʻOku mau fiemaʻu ke ongoʻi ʻe he tokotaha kotoa ʻoku nau kau ki he Siasí.” Naʻe fakakulupu ʻa e kāingalotu taʻu 18 ki he 25 teʻeki malí ko e “Kau Taautaha Lalahi Kei Talavou” pea ko kinautolu naʻe taʻu 26 mo motuʻa angé naʻe fakakulupu ia ko e “Kau Manakoa Makehe.” Naʻe fokotuʻu ʻe he kau pīsope fakalotofonuá ha ngaahi kulupu efiafi fakafāmili ʻi ʻapi maʻá e kāingalotu taautaha ʻoku ʻikai nofo mo honau ngaahi fāmili totonú. ʻI he ngaahi feituʻu ne tokolahi feʻunga ʻi ai ha kau taautaha lalahi kei talavoú, naʻe fokotuʻutuʻu ʻe he kau palesiteni fakasiteikí mo e kau pīsopé ʻi he taimi ʻe niʻihi ha ngaahi kulupu Lautohi Faka-Sāpate mo e Fineʻofa. ʻI he lahi ange ʻa e tokolahi ʻo e ngaahi uooti ʻo e kau taautaha lalahi kei talavoú (YSA) ʻi he ngaahi uooti ʻo e fānau akó ʻi he kamataʻanga ʻo e senituli 21, naʻe fakangata leva ʻa e ngaahi uooti ʻo e fānau akó. ʻI he aʻu ki he 2016, naʻe kau ʻa e kau taautaha lalahi kei talavoú, ʻo tatau ai pē pe ʻoku nau ʻalu ki he ngaahi ʻapiakó pe ʻikai, ʻi ha ngaahi ʻiuniti YSA ʻe 1,300 tupu ʻi he funga ʻo e māmaní.

ʻI he aʻu ki he 2021, naʻe liliu ʻa e vakai fakatemokālafi ki he kāingalotu lalahi ʻo e Siasí ki he tokolahi taha ʻo kinautolu ʻoku nau kei taautaha. ʻI he 1980 tupú pē, naʻe ʻamanaki ʻa e kau takí ke fakalahi ʻa e ngaahi houalotu YSA mo e Manakoa Makehé ke lava ʻo feau ha liliu pehē. Naʻa nau fakahoko ha ngaahi feinga ʻi he ngaahi taʻu ʻe hongofulu tupu hono hokó ke fakaleleiʻi e ngaahi polokalama fakafeohí mo e ngaahi ʻekitivitií ke fakakau mo poupouʻi lelei ange ai ʻa e kau taautaha lalahí. ʻI ha fakamafola Face to Face ʻi he 2021 maʻá e kāingalotu taautaha ʻoku motuʻa ange ʻi he taʻu 30, naʻe lea ai ha kau taki mei he Kōlomu ʻo e Toko Hongofulu Mā Uá mo e Kau Palesitenisī Lahi ʻo e Fineʻofá ki he liliu ʻo e tuʻunga mēmipasipi ʻi he Siasí ʻi he funga ʻo e māmaní. Naʻe pehē ai ʻe Seuloni ʻIupangikē, “Ko e mēmipa kotoa pē, tatau ai pē pe ko e hā honau tūkungá ʻoku lahi fau e meʻa ke tokoni ki aí pea ʻoku mau ʻamanaki ke ʻiloʻi lelei ange ʻeni ʻe he kāingalotu ʻo e Siasí.”

Ngaahi Maʻuʻanga Tokoni ʻo e Siasí

Kakai Lalahi Kei Talavoú, ChurchofJesusChrist.org.

Ngaahi Maʻuʻanga Fakamatalá

ʻOku ʻomi ʻe he ngaahi pulusinga ko ʻení ha fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he ngaahi maʻuʻanga tokoni ko ʻení, ʻoku ʻikai ke mau poupouʻi pe fakapapauʻi atu ʻa e kanotohí pe ngaahi fakakaukau ʻa e kau faʻu tohí.

Lawrence A. Young, “Single Adults,” ʻi he Daniel H. Ludlow, ed., Encyclopedia of Mormonism: The History, Scripture, Doctrine, and Procedure of The Church of Jesus Christ of Latter-day Saints, 5 vols. (New York: Macmillan, 1992), 3:1316–19.

Ngaahi Tefito Fekauʻakí: Seminelí mo e ʻInisititiutí

1. Natalie Kaye Rose, “‘Our Utah Girls’: Girls and Young Women in the Transitional Mormon Church” (PhD diss., Michigan State University, 2016), 240–41.

2. Laura Lee Smith, “The LDS ‘Greeks’: Lambda Delta Sigma and Sigma Gamma Chi,” Ensign, Sept. 1986, 27–31; By Study and Also by Faith: One Hundred Years of Seminaries and Institutes of Religion (Salt Lake City: The Church of Jesus Christ of Latter-day Saints, 2015), 33–84; vakai ki he Tefito: Seminelí mo e ʻInisititiutí. Vakai foki Thomas W. Simpson, American Universities and the Birth of Modern Mormonism, 1867–1940 (Chapel Hill: University of North Carolina Press, 2016).

3. R. Scott Lloyd, “Church’s First Student Stake Commemorated in Special Devotional,” Church News, Jan. 10, 2016, 3–4.

4. Elizabeth J. Mott, “Singlehood,” ʻi he Claudia L. Bushman and Caroline Kline, eds., Mormon Women Have Their Say: Essays from the Claremont Oral History Collection (Salt Lake City: Greg Kofford Books, 2013), 45–71.

5. Mott, “Singlehood,” 51–52.

6. “Ward M Man-Gleaner Council,” Priesthood Bulletin, Aug. 1972, 9–10; Rebecca de Schweinitz, “Holding on to the ‘Chosen Generation’: The Mormon Battle for Youth in the Late 1960s and Early 1970s,” ʻi he Patrick Q. Mason and John G. Turner, eds., Out of Obscurity: Mormonism since 1945 (New York: Oxford University Press, 2016), 278–301.

7. James E. Faust, ʻi he Conference Report, Apr. 1973, 112–15.

8. “Meetings for Single Adult Women,” and “Guidelines for Young Adult Sunday School Classes,” Priesthood Bulletin, Oct. 1973, 2–3, 8–10. Vaki ki he Tefito: Efiafi Fakafāmili ʻi ʻApí.

9. Lloyd, “Church’s First Student Stake,” 3–4.

10. “Single Adult Face to Face with Elder Andersen, Sister Bingham and Sister Eubank,” Newsroom, June 13, 2021, newsroom.ChurchofJesusChrist.org.