ʻĀtafi G. Kepa

Naʻe hoko ʻa ʻĀtafi Kulini Kepa ko e Palesiteni Lahi hono hiva ʻo e houalotu ʻa e Kau Finemui ʻo e Siasí mei he 1984 ki he 1992. Lolotonga ‘ene ‘i he lakanga ko ‘ení, naʻá ne takimuʻa ai ‘i he ngaahi feinga ke fakaleleiʻi ‘a e ngaahi polokalama mo e ngaahi ʻekitivitī ‘a e houalotú, pea pehē ki he ngaahi aʻusia ‘a e kau finemuí ‘i ha ngaahi fonua fakavahaʻapuleʻanga lahi angé.

ʻI he 1931, naʻe fāʻeleʻi ai ʻa ʻĀtafi ʻi ha komiunitī vāofi ʻi Keleniuti, ʻAlapeeta, Kānata, ʻa ia naʻe fakalele ai ʻe hono fāmilí ha faama mo ha falekoloa lahi. Talu ‘ene kei si‘í, mo e si‘i ‘a e ngaahi koloa fakamatelie ‘a ‘ene ongomātu‘á, ‘a ʻEtiuini mo Sūlia Kuliní, ka na‘á na vahevahe tauʻatāina ʻa e meʻa naʻá na maʻú. Neongo naʻe ongoʻi ʻe ʻĀtafi naʻe ʻikai ke ne fuʻu tuʻu-ki-muʻa ʻi heʻene kei akó, ka naʻá ne fakatupulaki ha ʻofa ki he akó. ʻI hono taʻu 16, naʻe fai ai ha tafa lahi ki hono telingá, ʻa ia naʻe uesia lahi ai ʻene akó. Naʻe tokoniʻi ia ʻe ʻEtuini mo Sūlia ke ne hiki ki Polovo, ʻIutā, ʻo hū ki he Brigham Young High School (ʻApiako Māʻolunga ʻo Pilikihami ʻIongí). Kimuʻa peá ne ʻosi mei he akó, naʻá ne kamata teiti mo Hiipa Kepa, ʻa ia naʻá na fetaulaki kimuʻa ʻi he taimi naʻe faʻa kau ange ai ʻa Hiipa ki he maʻu meʻatokoni efiafi ʻa e fāmili ʻo ʻĀtetí, ʻi he taimi naʻe kei ngāue fakafaifekau ai ʻa Hīpá. Naʻe mali ʻa ʻĀtafi mo Hiipa ʻi he 1950.

Ko ʻĀtafi G. Kepa ʻokú ne tuʻu ʻo puke ʻa e tohi Fakalakalaka Fakataautaha kuo fakafoʻoú ʻi he tafaʻaki ʻo ha fakaʻilonga kuo tuitui ʻo e houalotu ʻa e Kau Finemuí.

Naʻe ngāue fakapalōfesinale ʻa ʻĀtafi Kepa ʻi he ngaahi maʻuʻanga tokoni fakaetangatá mo e akó ʻo aʻu ki he hoko atu ʻene akó ʻi he ako tokamuʻá mo e faʻu ʻo e polokalama akó. Naʻá ne ʻosi mo ha fakaʻilonga ako BA mei he ʻUnivēsiti ʻo ʻIutaá ʻi he 1964 mo ha fakaʻilonga ako MA mei he ʻUnivēsiti ʻo Pilikihami ʻIongí ʻi he 1971. Mei he 1972 mo e 1978, naʻá ne hoko ko ha tokoni ua kia Palesiteni Lute Haati Fangikē ko e Palesiteni Lahi ʻo e Kau Finemuí. Lolotonga e taimi ko ení, na‘e aʻusia ‘e he houalotú ha ngaahi liliu mahu‘inga lahi. Naʻe ʻomi ʻa e ngaahi kautaha ʻa e toʻu tupu ʻo e Siasí, kau ai ʻa e ngaahi houalotu maʻá e kau finemuí, ki he malumalu ʻo e tuʻunga takimuʻa fakahangatonu ʻo e lakanga fakataulaʻeikí fakataha mo ha ʻiuniti foʻou ne fokotuʻu taimi nounou pē ʻa ia naʻe ui ko e Aaronic Priesthood Mutual Improvement Association (Kautaha Fakalakalaka ʻo e Mutuale ʻa e Lakanga Taulaʻeiki Faka-ʻĒloné). Hili ha taʻu ʻe nima mei ai, naʻe tokoni ʻa Kepa kia Fangikē ʻi hono teuteu mo fakafeʻiloaki ha polokalama lavameʻa foʻou, Ko ʻEku Fakalakalaka Fakatāutahá.

ʻI he 1984, naʻe uiuiʻi ai ʻa Kepa ko e Palesiteni Lahi ʻo e Kau Finemuí. Naʻe fakahaaʻi ʻe he fakatotolo ʻi he taimi ko iá kuo holo hifo ʻa e maʻulotu ʻa e kau finemuí. Ko ia ʻi he kamataʻanga pē ʻo ʻene ngāué, naʻe faaitaha ʻa Kepa mo hono ongo tokoní ʻi heʻenau lotu ke fekumi ki ha ueʻi fakalaumālie ki he founga ke poupouʻi ai ʻa e kau finemuí ʻi hono fakatupulaki ha ongoʻi mālohi ʻo e tuʻunga fakafoʻituitui ko ha ngaahi ʻofefine ʻo e ʻOtuá pea teuteu ke ngāue ʻi he puleʻanga ʻo e ʻOtuá. Naʻe poupouʻi ʻe Kepa ʻa e kau takí ke fakalahi ʻa e ngaahi ʻekitivitií mo e ngaahi polokalamá ke fakakau ki ai ʻa e kau finemui ʻo e ngaahi puipuituʻa kehekehe. Makatuʻunga ʻi heʻene aʻusia fakangāue kimuʻa ʻi he puleʻi ʻo makatuʻunga ʻi he ngaahi tuʻunga mahuʻingá, naʻe ʻomi ʻe Kepa ki hono ongo tokoní ha fakakaukau ke faʻu ha kulupu ʻo e ngaahi tuʻunga ʻulungaanga mahuʻinga maʻá e kau finemuí. Naʻe fakaʻamu ʻa e kau palesitenisií ʻe hoko ʻa e ngaahi tuʻunga ʻulungaanga mahuʻinga ko ʻení ko ha fakavaʻe mālohi ke ongoʻi ai ʻe he taʻahine takitaha ko ha ʻofefine ia ʻo e ʻOtuá mo ha natula faka-ʻOtua pea tokoniʻi ia ke ne teuteu ki he ngaahi faingamālie toputapu ke fai ha ngaahi fuakava ʻi he temipalé.

Naʻe toe fakaʻaongaʻi foki ʻe Kepa ʻa e tekinolosiá ke faʻu ha ngaahi polokalama fakangalongataʻa ʻi he mītiá mo ha ngaahi aʻusia fetuʻutaki maʻá e kau finemui ʻi he funga ʻo e māmaní. ʻI he ʻaho 10 ʻo Nōvema 1985, naʻe fakahoko ai ʻe heʻene kau palesitenisií ʻa e fuofua fakamafola satelaite ʻa e Siasí maʻá e kau finemuí, ʻa ia naʻe ʻasi ai ha niʻihi ʻo e kau maʻu fakatahá ko ha kau fakafofonga honau ngaahi puleʻanga kehekehé ʻi heʻenau fakafeʻiloaki ʻa e ngaahi tuʻunga ʻulungaanga mahuʻinga mo e kaveinga ʻo e houalotú. Naʻe ʻamanaki ʻa Kepa, ʻe lava ʻe he feohi fakakaungāmeʻa vāofi ʻi he kotoa ʻo e houalotú fakataha mo e polokalama Fakalakalaka Fakataautaha kuo fakafoʻoú, ʻo tokoni ki he kau finemuí ke nau mateuteu ke hū ki he temipalé mo maʻu ha moʻui ʻoku fakakoloa ʻaki ʻa e fuakavá. Naʻe feinga ʻa ʻene kau palesitenisií ke fakamālohia ʻa e feohi fakaetokoua fakaemāmani lahí ʻo fakafou ʻi ha kātoanga fakaemāmani lahi naʻe fakahingoa “Ko e Toʻu Tangata kei Tupu Haké.” ʻI he ʻaho 11 ʻo ʻOkatopa 1986, naʻe fakapipiki ʻe ha kau finemui ʻe lauiafe ʻi he funga ʻo e māmaní ʻenau ngaahi fakamoʻoni kuo tohí ki he ngaahi afo ʻi ha ngaahi foʻi pula kuo fakafonu ʻaki ʻa e hiliumé (helium) pea tukuange ʻa e ngaahi foʻi pulá ki he ʻataá. Ko e ngaahi liliu kehe lolotonga e palesiteni ʻa Kepá naʻe kau ai ha moto foʻou, “Moʻui ʻAki ʻa e Moʻoní mo e Angatonú,” mo ha fakaʻilonga foʻou maʻá e houalotú ʻoku ʻi ai ha fakatātā ʻo ha finemui ʻi he fōtunga ʻo ha ama kuo tutu ʻo fakataipe ʻa e maama ʻo Kalaisí. Naʻe toe tokoni lahi foki ʻa Kepa ʻi hono fakafoʻou ʻo e kiʻi tohitufa Ki Hono Fakamālohia ʻo e Toʻu Tupú ʻi he 1990 pea mo hono pulusi ha tohi lēsoni kemi foʻou ʻi he 1992.

Ko e kau palesitenisī ʻa ʻĀtafi Kepá ko e fakamuimuitaha ia ke ngāue ʻo fuoloa ange ʻi ha teemi taʻu ʻe nimá. Naʻe kei hoko pē ʻa e ngaahi liliu naʻá ne fakafeʻiloaki mo hono ongo tokoní ko e polokalama tefito ia ki he houalotu ʻa e kau finemuí ʻi he taʻu ʻe tolungofulu hono hokó, ʻo fakatupulaki ai ha tukufakaholo naʻe aʻusia ʻe ha kau finemui ʻe laui miliona ʻi he funga ʻo e māmaní. Naʻe pekia ʻa ʻĀtafi Kepa ʻi Māʻasi 2024 ʻi hono taʻu 93.

Ngaahi Maʻuʻanga Tokoni ʻo e Siasí

Ardeth G. Kapp, General Conference Talks, ChurchofJesusChrist.org/study/general-conference/speakers/ardeth-g-kapp.

Ngaahi Maʻuʻanga Fakamatalá

ʻOku ʻomi ʻe he ngaahi pulusinga ko ʻení ha fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he ngaahi maʻuʻanga tokoni ko ʻení, ʻoku ʻikai ke mau poupouʻi pe fakapapauʻi atu ʻa e kanotohí pe ngaahi fakakaukau ʻa e kau faʻu tohí.

Anita Thompson, Stand as a Witness: The Biography of Ardeth Greene Kapp (Salt Lake City: Deseret Book, 2005).

Mary Jane Woodger and Jessica Wainwright Christensen, “Ardeth Greene Kapp’s Influence on the Young Women Organization,” ʻi he David J. Whittaker and Arnold K. Garr, eds., A Firm Foundation: Church Organization and Administration (Provo, Utah: Religious Studies Center, Brigham Young University, 2011), 443–62.

Jennifer Reeder and Kate Holbrook, eds., At the Pulpit: 185 Years of Discourses by Latter-day Saint Women (Salt Lake City: Church Historian’s Press, 2017), 193–203.

Ngaahi Tefito Fekauʻakí: Ngaahi Houalotu ʻa e Kau Finemuí, Fakamafola ʻi he Mītiá

1. Anita Thompson, Stand as a Witness: The Biography of Ardeth Greene Kapp (Salt Lake City: Deseret Book, 2005), 9, 18–24, 42, 45, 48, 64–73, 95; Ardeth G. Kapp, “Drifting, Dreaming, Directing,” ʻi he Jennifer Reeder and Kate Holbrook, eds., At the Pulpit: 185 Years of Discourses by Latter-day Saint Women (Salt Lake City: Church Historian’s Press, 2017), 193.

2. Thompson, Stand as a Witness, 212, 262–63; Mary Jane Woodger and Jessica Wainwright Christensen, “Ardeth Greene Kapp’s Influence on the Young Women Organization,” ʻi he David J. Whittaker and Arnold K. Garr, eds., A Firm Foundation: Church Organization and Administration (Provo, Utah: Religious Studies Center, Brigham Young University, 2011), 450–52.

3. Thompson, Stand as a Witness, 262–305; Woodger and Christensen, “Ardeth Greene Kapp’s Influence,” 443–59.

4. Thompson, Stand as a Witness, 273, 297–99; Brent D. Fillmore, “Promoting Peculiarity: Different Editions of For the Strength of Youth,” Religious Educator, vol. 8, no. 3 (2007), 80; Young Women Camp Manual (Salt Lake City: The Church of Jesus Christ of Latter-day Saints, 1992).