Hauati W. Hanitā
Naʻe hoko ʻa Hauati W. Hanitā ko e Palesiteni hono 14 ʻo e Siasí ʻi ha māhina ʻe hiva mei he 1994 ki heʻene pekia ʻi he 1995. Naʻe fāʻeleʻi ia ʻi he 1907 ʻi Poisi, ʻAitahō, kia Neli mo Uili Hanitā, ko e ʻuluaki ʻi ha fānau ʻe toko ua. ‘I he taimi na’e mali ai ‘a Neli mo Uilí, naʻe teʻeki ke kau ‘a Uili ki ha siasi neongo naʻe ‘ohake ia ‘i he lotu ‘Epikopoó. Lolotonga e kei siʻi ‘a Hauatí, naʻe ‘ikai ke fakafepakiʻi ‘e Uili ‘a e toenga ‘o e fāmilí ke nau ‘alu ki he ngaahi fakataha ‘a e siasí ka naʻá ne vili ke aʻu ‘ene fānaú ki he taʻu matuʻotuʻá kimuʻa pea nau toki papitaisó. ʻI hono taʻu 12, naʻe vilitaki ʻa Hauati ke ne maʻu ha ngofua mei heʻene tamaí ke ne papitaiso pea naʻe ola lelei. Naʻá ne kamata ngāue ʻi heʻene kōlomu ʻo e kau tīkoní lolotonga ia ʻene toe maʻu ha ngaahi ngāue ʻi ha ngaahi ngāueʻanga kehekehe, mei he vaʻinga tā pulú ki he ngaahi falekoloá.
Ko e ‘ekitivitī fakafiefia taha ‘a Hauati lolotonga ‘ene ‘i he ako mā‘olungá ko ‘ene fokotuʻu haʻane kau tāmeʻalea pē ‘a‘aná, ko e Hunter’s Croonaders (Kau Hiva ʻa Hanitaá), ‘a ia na‘a nau tā ʻi he ngaahi hulohula ‘i he vahefonua kotoa ʻo Poisí . Naʻá ne taukei ʻi ha ngaahi meʻalea lahi, kau ai ʻa e tā nafá, sekisafouní (saxophone), mo e kalānetí, pea ʻi he ʻosi ʻene ako māʻolungá, naʻá ne maʻu ha aleapau ke tā ʻi ha vaka uta pāsese. Hili ʻene foki ki ʻapí, naʻe heka ʻa Hauati ʻi ha meʻalele ki Kalefōnia ke ʻaʻahi ki ha kaungāmeʻa mo ha mēmipa ʻo ʻene kau tāmeʻalea kimuʻá peá ne fakakaukau ke nofo ʻaupito ai. Naʻe ʻikai fuoloa kuó ne fetaulaki mo Kelela Mei Seefi (ʻa ia naʻe ui ia ko Kelea), pea naʻá na teiti ʻi ha taʻu ʻe tolu kimuʻa peá na mali ʻi he 1931. ʻI ha ʻaho ʻe fā kimuʻa ʻi heʻena malí, naʻe fakakaukau ʻa Hauati ke tukuange ʻa e mūsika fakapalōfesinalé. Naʻe fāʻeleʻi ʻena ʻuluaki tamá, ko Hauati Uiliami Hanitā ko e Siʻí, ʻi he 1934 ka naʻá ne mate fakamamahi ʻi heʻene kei valevalé, ʻo tuku mai ʻa e ongomeʻa malí ni ke na “tēngihia mo ‘ikai toe ‘ilo ha me‘a.” ʻI he taʻu hono hokó, naʻe hū ʻa Hauati ki he Southwestern Law School (ʻApiako Lao ʻo e Tongahihifó) ʻo feinga ke maʻu haʻane ngāue ʻi he lao fakapisinisí. Hili ʻene ʻosi mei he akó ʻi he 1939, naʻá ne ngāue fakalao pea iku ʻo ne ngāue ʻi he ngaahi poate ʻo ha ngaahi kautaha ʻe uofulu mā fā.
Ko Hauati W. Hanitā, ʻi lotomālie, ʻokú ne pukepuke ha sekisafouni mo ʻene kau tāmeʻaleá, ko e Kau Hiva ʻa Hanitaá.
ʻI he 1940, ʻi hono taʻu 32, naʻe uiuiʻi ai ʻa Hauati ko e pīsope ʻo e Uooti ʻEle Seleno ne toki fokotuʻú, ko ha fatongia naʻe pehē ʻe Hauati naʻe “foʻou kotoa kiate au” pea mahalo ko ha faʻahinga misiona ia naʻá ne fakakaukau te ne ngāue ai ʻi ha ʻaho mo Kelela. ʻI he taʻu ʻe ono ʻo ʻene hoko ko e pīsopé, naʻe feinga ʻa Hauati ke langa hake ha feohi fakakaungāmeʻa ʻi he kotoa ʻo e uōtí, ʻa ia naʻe manatu ʻofa ki ai ʻa e kāingalotú ʻi he hili ha ngaahi taʻu mei ai. ʻI he 1950, naʻe uiuiʻi ai ia ko e palesiteni ʻo e Siteiki Pasatina Kalefōniá, ko ha feituʻu naʻe ʻamanaki ke tokolahi ʻaupito ai ʻa e kakaí ʻi he Vahefonua Losi ʻEniselesí. ʻI he taʻu ʻe hongofulu, ne laka hake ʻi he liunga uá ʻa e tokolahi ʻo e kakai ʻi he vahefonuá, ʻo ʻomi ai ha Kāingalotu tokolahi ki he feituʻú. ʻI he 1959, naʻá ne fuʻu ʻohovale ʻi hono fakahoko ange ʻe Palesiteni Tēvita O. Makei ʻa e uiuiʻi ke ne hoko ko ha ʻAposetoló. Naʻá ne tali ʻa e uiuiʻí, mavahe mei heʻene ngāue fakalaó, pea fakatapui ia ke ngāue taimi kakato ʻi he Siasí.
ʻI he kotoa ʻo ʻene ngāue fakafaifekau fakaʻaposetoló, naʻe fononga lahi ʻa ʻEletā Hanitā ke tokangaʻi ha ngaahi ngāue fakavahaʻapuleʻanga ʻe niʻihi ʻa e Siasí. Naʻá ne tokangaʻi ʻa e Genealogical Society (Sōsaieti Tohi Hohokó) (naʻe hoko kimui ange ko e Potungāue Hisitōlia Fakafāmili ʻo e Siasí) mo fokotuʻu mai ha ngaahi liliu ki he ngaahi tuʻunga moʻui ʻo e silá, tautautefito ki he founga ʻe lava ke fakahoko ai ʻe he kāingalotu ʻo e Siasí ʻa e silá maʻá e kāinga kuo pekiá. ʻI he fokotuʻu ʻa ʻEletā Hanitaá, naʻe fakangofua ai ʻe Palesiteni Tēvita O. Makei ha liliu ki he tuʻutuʻuní ʻa ia naʻe fakaʻatā ai e kāingalotú ke silaʻi e kāinga fefine kuo pekiá ki he ngaahi husepāniti kotoa pē ne nau mali mo ia lolotonga ʻenau moʻuí. Naʻe fakahoko foki ʻe ʻEletā Hanitā ha ngaahi ngāue ke ne tokangaʻi ʻa e Polynesian Cultural Center (Senitā Fakafonua ʻo Polinīsiá) ʻi Hauaiʻí pea kimui ange ʻi he Potungāue Hisitōlia ʻo e Siasí ʻi heʻene hoko ko e Faihisitōlia mo e Tauhi Lekooti ʻo e Siasí. Ko e taha ʻo ʻene ngaahi lavameʻa ʻiloá ko hono fakapapauʻi ʻa hono maʻu ʻo ha konga kelekele ʻi he Moʻunga ʻŌlivé ʻi ʻIsileli ki hono langa ʻo e Brigham Young University Jerusalem Center for Near Eastern Studies (Senitā Ako ki he Hahake Ofi Maí ‘a e ‘Univēsiti Pilikihami ‘Iongí ‘i Selusalemá) mo e Orson Hyde Memorial Garden (Ngoue Fakamanatu ʻo ʻOasoni Haití). Na‘e fakamo‘oni‘i ‘a e mahu‘inga ʻo ‘ene kaungāme‘a vāofi mo e pule kolo ‘o Selusalemá ko Teti Koleki ‘i hono tānaki ‘a e poupou ki he ngaahi ngāué.
ʻEletā Hauati W. Hanitā ʻi hono fakatapui ʻo e Ngoue Fakamanatu ʻo ʻOasoni Haití ʻi Selusalema, 1979, mo e Pule Kolo ko Teti Kolekí.
Kamata mei he 1972 ‘o faai mai ai, mo e puke hokohoko ‘a Kelea Hanitā ‘i ha mahaki ʻo e neavé ‘a ia na‘e fa‘a iku ai ki haʻane ʻikai lava ʻo ngaungaue holo. Hili ha fānoa ‘a e totó ‘i hono ‘utó ʻi he 1982, naʻe hā meia Kelea ha ngaahi fakaʻilonga ʻo e maumau tuʻuloa ʻo e ʻutó pea naʻá ne mālōlō hili ha māhina ʻe 18 mei ai. Lolotonga ʻo e taimi ko ʻení, naʻe aʻusia ʻe ʻEletā Hanitā ha ngaahi faingataʻa fakaemoʻui lelei ʻa ia naʻe kau ai ʻa e pala ngākau, mahaki mafu, mo ha mamahi lahi ʻi hono hui tuʻá. Naʻe hanga ʻe ha ngaahi tafa lahi mo ha faitoʻo fakatuʻasino fakaakeake ʻi he 1980 tupú ʻo ʻai ke ne toe moʻui lelei ange, neongo naʻá ne kei fekuki pē mo e ngaahi pole fakataimi ʻi he toenga ʻo ʻene moʻuí. ʻI he 1990, naʻá na mali ai mo ʻĪnisi Sitenitoni, ko hano maheni kimuʻa mei Kalefōnia. Naʻe faʻa ʻalu fakataha ʻa ʻĪnisi mo Palesiteni Hanitā ʻi he toenga ʻo ʻene ngāue ko e Palesiteni ʻo e Kōlomu ʻo e Toko Hongofulu Mā Uá pea kimui ange ʻi heʻene hoko ko e Palesiteni ʻo e Siasí.
Hili ha ʻaho ʻe ono mei he mālōlō ʻa Palesiteni ʻEselā Tafu Penisoni ʻi Mē 1994, naʻe vaheʻi ai ʻa Palesiteni Hauati W. Hanitā ko e Palesiteni ʻo e Siasí. Naʻe ui ʻe Palesiteni Hanitā lolotonga ʻene ngāue fakapalesiteni nounou ki he kāingalotu ʻo e Siasí ke nau kau kakato ange ʻi he lotu ʻi he temipalé pea fakatefito ʻenau moʻuí ʻia Sīsū Kalaisi. Naʻá ne fakamamafaʻi ʻa e fakataha ʻa e fāmilí mo fakahinohinoʻi ʻa e Siasí ke ʻoua naʻa nau fakataimitēpileʻi ha faʻahinga fakataha pe polokalama ʻi he pō Mōnité ke fakaʻatā ai ʻa e fakahoko ʻo e efiafi fakafāmili ʻi ʻapí. Naʻá ne ui ke fakavaveʻi ʻa e hisitōlia fakafāmilí mo e ngāue fakatemipalé.
Naʻe mālōlō ʻa Palesiteni Hanitā ʻi Māʻasi 1995. Neongo ʻene taimi nounou ko e Palesiteni ʻo e Siasí, ka naʻe hanga ʻe heʻene tōʻonga angamalū mo ʻene fakamoʻoni taʻe-ueʻiá ʻo ʻai ke ʻofaʻi ia ʻe he Kāingalotú. Naʻe fai ʻe hono fetongí, ʻa Palesiteni Kōtoni B. Hingikelī, ha fakaʻapaʻapa ki he tukufakaholo ʻa Palesiteni Hanitā, ʻo ne fakamamafaʻi ʻene līʻoa ki he ongoongoleleí mo e manavaʻofa naʻá ne fakahaaʻi ki he niʻihi kehé. Naʻe pehē ʻe Palesiteni Hingikelī ʻi he meʻafakaʻeiki ʻo Palesiteni Hanitaá, “Ko e taimi na‘e lea aí, na‘a mau fanongo kotoa. “Na‘á ne fakahā ‘i he tui pau ‘a ‘ene fakamo‘oni ki hono [faka-ʻOtua] ‘o e ‘Eiki ko Sīsū Kalaisí.”
Ki ha fakamatala lahi ange fekauʻaki mo e moʻui ʻa Hauati W. Hanitaá, vakai ki he ngaahi vitiō Prophets of the Restoration ʻi he history.ChurchofJesusChrist.org pe ʻi he polokalama Gospel Library.
Ngaahi Tefito Fekauʻakí: Efiafi Fakafāmili ʻi ʻApí, Ko e Langa Temipalé, Hisitōlia Fakafāmilí mo e Tohi Hohokó