Vahe 17
‘Ikai ha Toe Foki
ʻI he pongipongi ʻo e ʻaho 10 ʻo ʻOkatopa 1975, naʻe moʻui ai ha ngaahi kā ngingila mo motuʻa ʻi he ʻUnivēsiti Pilikihami ʻIongí, ko e fakaʻilonga ia ʻo e kamata ʻo e laka ʻi he ʻAho fakamanatu ʻo Kinautolu Naʻa Nau Fokotuʻu ʻa e ʻApi Akó. Naʻe laka fielaka ʻa e kau faiakó, fānau akó, mo e kau kolisi tutuku ʻe lauiafe, ʻo fakafofongaʻi ʻa e ngaahi vaʻa mo e ngaahi kautaha ʻa e fānau ako ʻo e ʻunivēsití, ʻI he mamaʻó, ʻi he tafaʻaki moʻunga fakahahake ʻo e ʻapi akó, naʻe fetapaki ai ha fuʻu “Y” lanu hinehina ʻi he ulo ʻo e laʻaá.
ʻOku fakamanatua ʻe BYU hono fokotuʻú ʻi he fahaʻitaʻu fakatōlau kotoa, ka ʻi he taʻu ní ʻoku fakamanatu ai ʻe he ʻunivēsití hono taʻu teaú. Ke fakamanatu ʻa e meʻá ni, naʻe heka ʻa Palesiteni Sipenisā W. Kimipolo mo hono uaifi ko Kamilá, ʻi he kā muʻomuʻá, ko ha Katileki (Cadillac) kulokula ʻo e 1906. Naʻe tui ʻe Palesiteni Kimipolo ha tatā fakakuongamuʻa motuʻa mo ha kote matohitohi, ke kei maʻu ʻa e manatu fakafiefia ʻo e laká. Lolotonga iá, naʻe pukepuke ʻe Sisitā Kimipolo ia ha kiʻi fakamalu leisi lanuʻuliʻuli ʻi hono funga ʻulú.
Neongo naʻe fakamanatu ʻe hono valá ʻa e kuo hilí, ka naʻe sio pē ʻa Palesiteni Kimipolo ki he kahaʻú. Kuo hoko vave ʻeni ʻa e Siasí ko ha kautaha fakamāmani lahi, naʻe ʻikai leva ke ngali lelei ke fai ha ngaahi polokalama maʻa ha Kāingalotu ʻe niʻihi kae ʻikai ki he toengá. Kuo ʻosi taʻofi foki ʻe he kau takí ia ʻa e ngaahi feʻauhi sipoti fakakātoa ʻa e Siasí ʻi Sōleki Sití. Pea ʻi he 1974, naʻe fanongonongo ai ʻe he Kau Palesitenisī ʻUluakí ʻe tukuange ʻe he Siasí ʻa e ngaahi falemahaki ʻe hongofulu mā nima naʻá ne fakalele ʻi he fakahihifo ʻo e ʻIunaiteti Siteití. Pea, ʻi he taʻu hono hokó, naʻe fanongonongo ai ʻe Palesiteni Kimipolo ko e ngaahi konifelenisi fakataʻu kotoa pē ʻa e ngaahi houalotú—MIA, Lautohi Faka-Sāpaté, Palaimelí, mo e Fineʻofá—ʻe fakangata he ʻoku fakahoko ʻi Sōleki Siti pea ʻoku meimei ke ʻaonga pē ia ki he Kāingalotu ʻi loto pea mo e feituʻu ʻIutaá.
Naʻá ne fakamatala, “ʻI heʻetau vāmamaʻo ange pea mo tokolahi ange ʻa e kāingalotú, ʻoku ngali ko ha taimi totonu ʻeni ke tau fakahoko ha fakalakalaka lahi ange ʻo ʻikai ki ha feituʻu pē taha.
Ko hono mahuʻinga ʻo e konifelenisi lahí naʻe hā mahino ai ʻa e tukupā ʻa e Siasí ki hono kāingalotú fakamāmani lahi. ʻI he 1975 ʻataʻatā pē, naʻe tokangaʻi ai ʻe Palesiteni Kimipolo ha ngaahi konifelenisi lalahi ʻi Palāsila, ʻĀsenitina, Siapani, ʻOtu Filipainí, Taiuani, Hongo Kongo, mo Kōlea Tonga. Pea naʻe ui ʻe he Siasí ha kau faifekau tokolahi ange ʻi ha toe taimi kimuʻa. Lolotonga ʻene fefonongaʻaki ko e ʻaposetoló, naʻe foaki ʻe Palesiteni Kimipolo ha ngaahi paʻanga maka ʻe taha siliva ki he fānau naʻe feʻiloaki mo iá, mo kole ange ke ne kamata ha paʻanga faifekau. ʻI heʻene hoko ko ʻeni ko e palesiteni ʻo e Siasí, naʻe kole ai ki he kau talavou kotoa pē ke nau ngāue fakafaifekau pea mo fakalotolahiʻi ʻa e Kāingalotu ʻi he fonua kotoa ke nau ʻomai ʻenau kau faifekaú.
Lolotonga haʻane ʻi Siapani, naʻá ne fakahā ai ha palani ke langa ha temipale ʻi Tōkiō, ko e ʻuluaki ia ʻi ʻĒsiá: Pea kimui ʻaupito maí, naʻá ne ui ʻi he konifelenisi lahí ha kau tangata ke nau ngāue ʻi ha kōlomu foʻou ʻo e lakanga fakataulaʻeikí, ko e ʻUluaki Kōlomu ʻo e Kau Fitungofulú. Fakatatau mo e Tokāteline mo e Ngaahi Fuakavá, ʻe ui ʻa e Kōlomu ʻo e Kau ʻAposetolo ʻe Toko Hongofulu Mā Uá “ki he Kau Fitungofulú, ʻi he taimi ʻoku nau fiemaʻu ai ha tokoní.” ʻE poupouʻi ʻe he kau mēmipa ʻo e kōlomú ʻa e Toko Hongofulu Mā Uá, tokangaʻi ʻa e ngaahi konifelenisi fakafeituʻú, mo fokotuʻu ha ngaahi siteiki foʻou ʻi he funga ʻo e māmaní. Neongo ko ha kau tangata tokosiʻi pē naʻe ʻosi ui ki he kōlomu foʻoú, ka ʻe lava ke aʻu ʻa e kau mēmipá ki he toko fitungofulu.
Naʻe fakatupu foki ʻe he hoko ʻa e ʻaho ʻo BYU ke fakakaukau ai ʻa Palesiteni Kimipolo ki he kahaʻu ʻo e ʻapiakó. ʻI he meimei aʻu ki he toko uamano nima afe ʻa e fānau akó, naʻe hoko ai ʻa BYU ko e ʻinisititiuti tokolahi taha ʻi he ngaahi ʻinisititiuti ʻo e ako māʻolunga ange ʻa e Siasí, ʻa ia ʻoku toe kau ki ai ʻa e Kolisi Likí (Ricks College) ʻi ʻAitahō, BYU-Hauaiʻi ʻi ʻOahu, mo e Kolisi Pisinisi LDS ʻi Sōleki Siti. Naʻe toe hoko foki ia ko e ʻunivēsiti tauʻatāina tokolahi taha ʻi he ʻIunaiteti Siteití. Ko e fānau ako ʻi aí, pea ʻi he ngaahi akoʻanga kotoa ʻa e Siasí, ʻoku nau tauhi ha tōʻonga fakaʻeiʻeiki ʻoku fiemaʻu ai ha ngaahi tuʻunga moʻui angamaʻa, faitotonu, mo fakaʻapaʻapaʻi.
ʻI he 1971, naʻe fetongi ai ʻe Tāleni ʻOakesi (Dallinn Oaks), ko ha palōfesa lao kei talavou Siasi mei he ʻUnivēsiti ʻo Sikākoó, ʻa e palesiteni ʻo BYU ko ʻĒnesi Uilikinisoní (Ernest Wilkinson). ʻI he malumalu ʻo e taki ʻa Palesiteni ʻOakesí, naʻe ʻomi ʻe he ʻunivēsití ha ngaahi faingamālie lelei ange ki ha kau faiako fefiné, mo e fānau akó, ʻi hono fokotuʻu ʻo e Akoʻanga Lao J. Lūpeni Kalaké (J. Reuben Clark), mo fakalahi ha ngaahi polokalama fakaʻeketēmika kehe.
Ka, kimuí ni maí, naʻe vakaiʻi fakaʻāuliliki ai ʻa e akoʻangá koeʻuhí he ko ha niʻihi ʻo hono ngaahi tuʻutuʻuni he tōʻonga fakaʻeiʻeikí naʻe hangē naʻa nau maumauʻi ʻa e ngaahi lao fakafonua ʻo e tuʻunga faingamālie tataú (equal opportunity laws). Naʻe hohaʻa ʻa Palesiteni Oakesi mo e poate ʻo e kau talāsití fekauʻaki mo e ngaahi tuʻutuʻuni, ʻoku pehē ai te nau lava ʻo fakamālohiʻi ʻa BYU ʻi he faʻahinga meʻa hangē ko e fale mavahevahe kia tangata mo fafiné. Naʻa nau haʻisia ki he tefitoʻi moʻoni ʻo e faingamālie tatau ʻi he akó mo e ngāue maʻuʻanga moʻuí. Ka naʻa nau fakafepakiʻi ha faʻahinga lao oku fiemaʻu ai ʻa e ʻunivēsití ke fakangaloku ʻa e tauʻatāina fakalotú ʻaki hano ohi mai ha ngaahi tuʻutuʻuni te ne ala uesia ʻa e ngaahi tui mo e angafai ʻa e Siasí.
ʻO aʻu mai ki he taimí ni, ʻoku teʻeki ai pē ke fakaleleiʻi ʻa e palopalemá. Ka naʻe kei tuʻukāivi pē ʻa Palesiteni Kimipolo, ko e sea ʻo e poate ʻo e kau talāsití, ke pukepuke ʻa e ngaahi tuʻunga ʻo e Siasí. Naʻe tui ko e tukupā ʻa BYU ki he ako fakatuʻasinó mo fakalaumālié ko e kī ia ki heʻene lavameʻa ʻi he kahaʻú, tatau ai pē kapau ʻe fakamavaheʻi ʻe he founga ko iá ʻa e akó mei he ngaahi ʻunivēsiti kehé.
Naʻe lea ʻa Palesiteni Kimipolo ʻi he hili ʻo e laka he ʻAho ʻo Kinautolu naʻa nau Fokotuʻú, ki ha fakataha tokolahi fekauʻaki mo ʻene vīsone ki he senituli hono ua ʻo BYU. Naʻá ne pehē, “ʻOku tui tatau ʻa e ʻunivēsití ni mo e ngaahi ʻunivēsiti kehé ʻi he ʻamanaki mo e ngāue ʻoku fai ke fakaava ʻa e ngaahi ngataʻanga ʻo e ʻiló pea toe lahi ange, ka ʻoku tau toe ʻilo foki ʻo fakafou ʻi he fakahaá, ʻoku ʻi ai ha ngaahi meʻa lalahi mo mahuʻinga ʻe foaki ki he faʻahinga ʻo e tangatá ʻa ia ʻe ʻi ai hano ngaahi ʻaonga fakaʻatamai mo fakalaumālie ʻoku mahulu atu mei he kiʻi meʻa ʻe mafakakaukaua ʻe he tangatá.”
Naʻá ne fakalotolahiʻi ʻa e kau faiakó mo e fānau akó ke nau “fakatou katea” ange ʻi heʻenau akó. Naʻá ne pehē, “ʻI he pau ko ia ke lea ʻa e kau mataotao ʻo e Siasí ʻi he mafai mo e lelei taha ki homou kaungā palofesinalé ʻi he lea ʻo e tuʻunga fakapotó, kuo pau ke mou toe poto foki ʻi he lea ʻo e ngaahi meʻa fakalaumālié.”
Naʻá ne tapou ki he ʻunivēsití ke nau tali ʻa e kahaʻú ʻi he tui, ʻo muimui ki he fakahinohino ʻa e ʻEikí, ʻi he ʻotu lea ki he ʻotu lea. Naʻá ne fakamoʻoni ko e ʻunivēsití ʻe laka kimuʻa. Naʻá ne pehē, “ʻOku mahino kiate kitautolu ko e akó ko ha konga ia ʻo e fakahoko ʻo e ngāue ʻa ʻetau Tamaí pea ʻoku ʻi he folofolá ʻa e ngaahi fakakaukau pule ki he faʻahinga ʻo e tangatá.”
Naʻá ne hoko atu, “ʻOku tau fiemaʻu—ʻoku ʻikai ko ʻetau ʻamanaki pē—ʻe hoko ʻa e ʻUnivēsiti Pilikihami ʻIongí ko ha taki ʻi he ngaahi ʻunivēsiti maʻongoʻonga ʻo māmaní,” “Te u tānaki atu ki he ngaahi fiemaʻu ko iá: Hoko ko ha ʻunivēsiti makehe ʻi he māmaní kotoa!”
ʻI he meimei taimi ko ʻení, naʻe ōmai ha kau fakafofonga mei ha siasi faka-Palotisani ʻi he ʻIunaiteti Siteití ki Keipi Kousi, Kana ʻo kumi ʻa Pili Sionisoni. Naʻa nau fanongo naʻe fakahoko ʻe Pili ha ngaahi mana lahi, pea naʻa nau ʻamanaki ke fakalotoʻi ia mo hono kau muimuí ke kau ki honau siasí. Naʻe fakafuofua ki ha kakai Kana ʻe fā-afe ʻi ha ngaahi haʻofanga lotu ʻe fāngofulu mā taha naʻa nau ui ʻa kinautolu ko e Kau Māʻoniʻoni ʻi he Ngaahi ʻAho Kimui Ní. Naʻe tokangaʻi ʻe Pili ha haʻofanga lotu ʻe nima. Naʻe fiemaʻu ʻe he kau fakafofongá ha taha ke ne puleʻi honau ngaahi haʻofanga lotu ʻi Kaná, pea naʻe hangē kiate kinautolu ko Pili ʻa e tangata tonu ke takí.
Naʻe loto ʻa Pili mo hono kau muimuí ke lotu fakataha mo e kau ʻaʻahí ʻi ha senitā fakakolo ʻi he kolo lahí. Naʻe talitali kinautolu ʻe he kau ʻAmeliká ʻaki ha ngaahi meʻaʻofa ko e koa mo e ngaahi meʻateuteu. Naʻa nau pehē, “Kuo pau ke hoko ʻa e kakai angaʻofa ko kimoutolú ko homau ngaahi tokoua, pea ʻoku totonu ke tau taha.” Naʻa nau fakalotoʻi lahi ʻa Pili mo e toengá ke tuku ʻenau toe tatali ki he kau faifekaú. “ʻOku ʻikai ke nau ōmai kinautolu.”
Naʻe kole ʻe ha taha ʻo e kau ʻaʻahí kia Pili ke kau mo kinautolu ko ha taki ʻi honau siasí. Naʻá ne pehē, “Te mau totongi koe.” “Te mau totongi hoʻo kau faifekaú.” Naʻa nau toe talaange foki te nau tokoniʻi ʻa Pili ke ʻaʻahi ange ki he ʻIunaiteti Siteití mo palōmesi ke ʻoange ki hono kāingalotú ha ngaahi meʻalea fakamūsika mo ha falelotu foʻou.
ʻI he pō ko iá, naʻe fakaafeʻi ʻe Pili ʻa e kau ʻaʻahí ke nofo ʻi hono ʻapí ka ne fakakaukauʻi ʻenau meʻaʻofá. ʻI he tuʻunga masiva naʻe ʻi aí. naʻá ne fakakaukauʻi fakamātoato ʻa e fokotuʻú. Ka naʻe ʻikai ke loto ke ne lavakiʻi ʻa e ʻOtuá pe ko ʻene tui ki he ongoongolelei kuo fakafoki maí.
Naʻe tangi ʻa Pili, ʻi heʻene tokotaha ʻi hono loki mohé. Naʻá ne lotu, “Eiki, ko e hā ʻoku totonu ke u faí?” “Kuó u tatali ʻo fuoloa fau, ka kuo teʻeki ōmai hoku ngaahi tokouá.”
Naʻe talaange ʻe ha leʻo ki ai, “Sionisoni, ʻoua naʻá ke teitei puputuʻu pe ko ho kāingalotú.” “Nofo maʻu ʻi he Siasí pea ʻe vavé ni ʻaupito ha ōmai ho ngaahi tokouá ke tokoniʻi koe.”
Naʻe fakaʻosi ʻe Pili ʻene lotú pea mavahe mei hono lokí. ʻIkai fuoloa, kuo hū mai ha taha ʻo e kau ʻaʻahí mei ha loki ʻe taha. Pehē ange ʻa e tangatá, “Sionisoni, ʻoku ʻikai ke ke mohe?”
Tali ange ʻe Pili, “ʻOku ou fakakaukauʻi ʻa e founga ke fakatonutonu ai ʻa e ngaahi meʻá.”
Talaange ʻe he tangatá, “Misa Sionisoni, naʻá ku fie haʻu ʻo tukituiki ʻi ho matapaá ke talaatu ko ho siasí ʻoku ʻosi fokotuʻu ia. ʻOku ʻikai totonu ke u fakaveiveiuaʻi koe.” Naʻá ne pehē naʻe fakahā ange ʻe he ʻEikí kiate ia ʻa e foʻi moʻoni ko ʻení. Naʻā ne pehē, “ʻOku totonu ke u hoko pē ko ha tokoua kiate koe.” “Tokangaʻi pē ho siasí.”
Pehē ange ʻa Pili, “Kuo folofola mai mo e ʻEikí kiate au foki.” “Ko e Siasi ia ʻo e ʻEikí.” He ʻikai ke u lava ʻo foaki ʻa e siasí ki ha taha.”
Naʻe ōmai kimui ange ha kau fakafofonga mei ha ngaahi siasi faka-ʻAmelika kehe mo ha ngaahi fokotuʻu tatau. Ka naʻe fakasītuʻaʻi kotoa ʻe Pili kinautolu. ʻIkai fuoloa, kuo ʻilo ʻe he kau taki mei hono haʻofanga lotú naʻá ne fakasītuʻaʻi ʻa e paʻanga mo e ngaahi meʻaʻofa mei he kau ʻAmeliká. ʻI heʻenau ʻitá, naʻa nau feʻohofi atu ki hono ʻapí. Pehē ange ha taha ʻo e kau tangatá, “Kuo ōmai ʻa e kakai ko ʻení ke tokoni.” “Te nau totongi kitautolu.”
Tali ange ʻe Pili, “He ʻikai ke u fakatau ʻa e siasí.” “Kapau te u tali ʻi ha taʻu ʻe uofulu, te u tali pē ki he ʻEikí.”
Pehē ange ha tangata ʻe taha, “ʻOku ʻikai haʻo paʻanga.” “ʻOku nau loto ke totongi kitautolu.”
Talaange pē ʻe Pili, “ʻikai, ʻikai.”
Naʻe hangē naʻe mateuteu ʻa e kau tangatá ke taaʻi iá, ka naʻe fakafisi pē ke liliu ʻene fakakaukaú. Fāifai, pea nau mokomoko hifo, pea nau mavahe, pea naʻe fāʻofua taha taha ʻa Pili kiate kinautolu. Ko e tangata fakamuimuí naʻe tangi ʻa loʻimata ʻi he taimi naʻe puke mai ai ʻe Pili ia ki hono umá.
Talaange ʻe he tangatá, “Kole fakamolemole atu he ʻoku ou fakaloto-mamahiʻi koe.” “Fakamolemole ʻo kole ki he ʻOtuá ke ne fakamolemoleʻi ʻeku ngaahi angahalá.”
Naʻe tangi ʻa Pili mo ia. Naʻá ne lotu ai, “Tamai, fakamolemoleʻi muʻa ia.”
ʻI ʻAokosi ʻo e 1976, ʻi ha potu ʻe taha ʻo ʻAfilika Hihifo, naʻe ʻave ai ʻe ʻAnitoni ʻOpina (Anthony Obinna) ha tohi kia Palesiteni Kimipolo. ̄Naʻá ne tohi ʻo pehē, “Ko kimautolu ʻi hení ʻoku mau fakaʻamu ke liliu mai hoʻo tokangá ki Naisīlia, pea fakatapui ʻa e fonuá ki hono akoʻi ʻo e ongoonglelei moʻoni ʻo hotau ʻEiki ko Sīsū Kalaisí.”
Kuo ʻosi ha taʻu ʻe ua mei he fetuʻutaki fakamuimui taha ʻa ʻAnitoni mei he potungāue fakafaifekaú, mo Lamā Uiliami (Lamar Williams). Lolotonga iá, kuo ngāue ʻa Loli Laitingi (Lorry Ryting), ko ha palōfesa Siasi mei he ʻIunaiteti Siteití, ʻo faiako ʻi he ʻunivēsiti ʻi Naisīlia, ʻi ha taʻu ʻe taha. Naʻe ʻosi talanoa ʻa ʻAnitoni mo ha kau tui kehe mo Loli, pea naʻa nau ʻamanaki ʻe iku ʻene ʻaʻahi angé ki ha fetuʻutaki fakahangatonu lahi ange mo e hetikuota ʻo e Siasí—pea mahalo mo ha kamataʻanga ʻo ha misiona. Naʻe foki ʻa Loli ki ʻIutā ʻo ne ʻoange ki he kau taki ʻo e Siasí ha lipooti lelei ʻo e mateuteu ʻa Nasīlia ki he ongoongoleleí, ka kuo teʻeki maʻu ha meʻa ia mei ai.
Naʻe loto ʻa ʻAnitoni ia ke tuku ā. Naʻe faitohi leva kia Palesiteni Kimipolo, “ʻOku fakasino ʻe he ngaahi akonaki ho siasí ha ngaahi meʻa lelei he ʻikai ke lava ʻo maʻu ʻi he toengá.” “ʻOku fiemau ʻe he ʻOtuá ke fakahaofi kimautolu, pea ʻoku mau fakaʻamu ke ke fakavaveʻi muʻa ʻa e ngāué.”
Naʻe ʻikai fuoloa kuo maʻu ʻe ʻAnitoni ha tali meia Kuleni Pengiketā (Grant Bangerter), ko e palesiteni ʻo e Misiona Fakavahaʻa Puleʻanga ʻo e Siasí, ʻokú ne tokangaʻi ʻa e ngaahi feituʻu ʻoku nofo ai ʻa e kau mēmipa ʻo e Siasí naʻe teʻeki fokotuʻu fakaʻofisiale ai ʻa e Siasí. Naʻe talaange ʻe Palesiteni Pengiketā kia ʻAnitoni ʻoku poupou ki hono tūkungá ka ne talaange ʻoku teʻeki pē ke ʻi ai ha palani ia ke fokotuʻu ʻa e Siasí ʻi Naisīlia.
Naʻá ne tohi, “ʻOku mau fakalotolahi atu pē ʻi he ongoʻi ʻofa fakatokoua ke ke muiaki hono tauhi hoʻo tuí ʻaki ʻa e lelei taha ʻokú ke lavá kae ʻoua kuo aʻu ki ha taimi ʻi he kahaʻú ʻe malava ai ʻa e Siasí ke fakahoko ha ngāue fakahangatonu.”
ʻI he meimei taimi ko ʻení, kuo ʻilo ʻe ʻAnitoni mo hono uaifi ko Fitelá (Fidelia), ʻoku fakakinaʻi mo fakamaaʻi siʻena fānaú ʻi he ʻapiakó koeʻuhí ko ʻenau tui fakalotú. Naʻe talaange ʻe heʻena kiʻi taʻahine taʻu valú hono ui ia kimuʻa mo hono fanga kiʻi tokouá, ʻe he kau faiakó, ʻi he lolotonga ʻo e ngaahi lotu ʻa e akó, ʻo fakamālohiʻi ke nau tūʻulutui pea hiki honau nimá ki ʻolunga, kae tā honau nimá ʻaki ha vaʻakau.
Hili hono ʻilo ʻe ʻAnitoni mo Fitela ʻa e meʻa ʻoku hokó, naʻá na ō leva ke talanoa mo e kau faiakó. Naʻá na ʻeke ange, “Ko e hā ʻoku mou fai ai ha faʻahinga meʻa peheé?” “ʻOku tau maʻu ʻa e tauʻatāina ke lotú ʻi Naisīlia.”
Naʻe tuku ʻa e taá, ka naʻe kei hoko atu pē fehangahangai ʻa e fāmilí mo honau kaungā tuí mo e fakafepaki mei honau kakaí. Naʻe tohi ai ʻa ʻAnitoni kia Palesiteni Pengiketā ʻi ʻOkatopa 1976, “Kuo ʻai ʻe he ʻikai ha ʻaʻahi mei kau maʻu mafai ʻi Sōlekí Sití ke mau hoko ko ha meʻa fakakata ki ha kakai ʻe niʻihi ʻi heni.” “ʻOku mau fakahoko e meʻa kotoa pē ʻoku mau lavá ke fokotuʻu ʻa e moʻoní ʻi he lotolotonga ʻo ha fānau tokolahi ʻo ʻEtau Tamai Hēvaní ʻi he konga ko ʻeni ʻo e māmaní.”
Naʻe tatali ʻa ʻAnitoni ki ha tali, ka naʻe ʻikai maʻu. Naʻe aʻu nai ʻene ngaahi tohí ki Sōleki Siti? Naʻe ʻikai ke ne ʻilo, ko ia naʻe toe faitohi pē.
̄Naʻá ne pehē ai, “He ʻikai ke mau helaʻia ʻi he tohi mo kole ke fakaava ʻa e Siasí ʻi heni ʻo hangē ko ia kuo mou ʻosi fai ʻi he funga ʻo e māmaní.” “Ko kimautolu ʻi heʻemau kulupú ʻoku mau muimui faivelenga ki he ngaahi akonaki hotau Fakamoʻui, ko Sīsū Kalaisí. He ʻikai pē ha toe foki.”
Ko e taimi naʻe fuofua ʻilo ai ʻa Kefilini Uōleni (Catherine Warren) ki he ongoongolelei kuo fakafoki maí, naʻe lolotonga hoko ko e tokoni neesi ʻi he ʻapi ʻo ha fefine ʻi he fakatokelau hahake ʻo e ʻIunaiteti Siteití. ʻI ha ʻaho ʻe taha, naʻá ne fakaava ai ʻa e matapaá, ʻi ha tukituki, peá naʻe tuʻu ai ha ongo faifekau ʻo e Kau Māʻoniʻoni ʻi he Ngaahi ʻAko Kimui Ní.
Naʻe talaange ʻe Kefilini kiate kinaua, “Ko e fefine ʻo e ʻapí ʻoku kei mohe.”
Naʻá na tali ange, “Talaange pē ki ai naʻe ōmai heni ʻa e ongo faifekau ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní,” mo ʻoange he kiʻi tohi tufa ʻoku ʻi ai e fakamoʻoni ʻa e palōfita ko Siosefa Sāmitá. Naʻe toʻo ʻeni ʻe Kefilini, pea hoko atu e fononga ʻa e ongo faifekaú ia.
Naʻe fakaʻofoʻofaʻia ʻa Kefilini ʻi he ongo faifekaú. Ka ko e taimi naʻe ʻilo ai ʻe hono pulengāué fekauʻaki mo kinauá, naʻá ne toʻo ʻa e kiʻi tohi tufá mei he nima ʻo Kefiliní ʻo lī ki he kapa vevé.
Naʻe kei fieʻilo pē ʻa Kefilini ia, peá ne toʻo ʻa e kiʻi tohi tufá. Ko e taimi naʻe lau ai he konga kimui ʻo e ʻaho ko iá fekauʻaki mo e ʻUluaki Mata Meʻa-hā-Mai ʻa Siosefa Sāmitá mo e Tohi ʻa Molomoná, naʻe tui ia ki he meʻa kotoa.
Naʻe fakamatala ʻe Kefilini ki hano kaungāmeʻa, ʻi ha taimi nounou mei ai ʻa e kiʻi tohi tufá. Naʻe talaange ʻe hono kaungāmeʻá, “ʻOku ou tui ʻoku ou maʻu ʻa e Tohi ʻa Molomoná, pea ʻe lava ke ʻoatu ia maʻau.”
Naʻe tui ʻa Kefilini kuo taki ia ʻe he ʻEikí ke ne fekumi ki ha meʻa ʻoku mahuʻinga. Pea ʻi heʻene kamata pē ke lau ʻa e Tohi ʻa Molomoná, naʻá ne ʻiloʻi ko e meʻa ia naʻe finangalo ʻa e ʻEikí ke ne ʻiló. Ko e taimi naʻe fepaki ai ha niʻihi ʻo e ngaahi meʻa ʻokú ne akoʻí mo e meʻa naʻá ne ako ʻi heʻene tupu haké, naʻá ne ongoʻi ha leʻo ʻoku naʻinaʻi mai ke ʻoua te ne liʻaki ia. Naʻe talaange ʻe he leʻó, “Tui ki he meʻa kotoa pē.”
ʻIkai fuoloa mei ai kuo hiki ʻa Kefilini ki Ni ʻŌlini, ko ha kolo lahi ʻi he tafaʻaki fakatonga ʻo e siteiti ko Luisianá, ʻo mali. ʻI heʻene vēkeveke ke lotu mo e Kau Māʻoniʻoni ʻi he Ngaahi ʻAko Kimui Ní, naʻá ne kumi ʻa e Siasí ʻi he tohi telefoní pea ʻalu ki he uooti ʻo e feituʻú. Naʻá ne ongoʻi fiefia ʻi he lotú, pea kamata ke ʻalu maʻu pē ki ai. Ka, ʻi heʻene hoko ko e fefine ʻUliʻulí, naʻe kehe pē hono ngāhí. Naʻe ʻi ai ha kakai ʻe niʻihi naʻe ʻikai ke nau ongoʻi fiemālie ʻi heʻene ʻi aí pea aʻu ʻo ʻikai ke nau fie lea ki ai. Naʻe fāifai pea fetaulaki mo ha fefine ʻUliʻuli ʻi he uōtí, ko Filita Piliu (Freda Beaulieu). Neongo naʻe saʻia ʻa Filita ʻi he ongoongoleleí mo ne hoko ko ha mēmipa ʻo e Siasí talu mei heʻene kei siʻi, ka naʻe ʻikai ke ʻalu maʻu pē ki he uōtí.
Naʻe ʻosi atu ha ngaahi taʻu, pea loto ʻa Kefilini ke kau ki he Siasí, ka naʻe ʻikai ke ne ʻilo pe ʻe founga fēfē. Naʻe faitohi leva kia Palesiteni Kimipolo fekauʻaki mo ʻene fakaʻamú, peá ne ʻave ʻa e tohí ki he kau taki ʻo e Siasí ʻi Luisianá. Naʻe ō leva ha ongo faifekau naʻá na ngāue mo palesiteni Lamā Uiliami (LaMar Williams), ki hono ʻapí.
Naʻe akoʻi ʻe he ongo faifekaú ʻa Kefilini ʻi he ngaahi lēsoni fakafaifekau angamahení, pea ʻikai hano taimi kuo loto ke papitaiso. Ka ʻi he taimi ko ʻení, naʻe ʻi ai ha tuʻutuʻuni ʻa e Siasí he ʻikai ke lava ʻo papitaiso ha fefine kapau ʻoku ʻikai loto ki ai hono husepānití, ke taʻofi ha hoko ʻa ha fepaki ʻi he nofomalí. Pea naʻe ʻikai fie loto ʻa e husepāniti ʻo Kefiliní ki ai.
“Sisitā Uōleni, ko ho siasí ʻeni. Naʻe talaange ʻe he ongo ʻeletaá, ʻi he taimi naʻá ne talaange ai ʻa e ongoongo fakamamahí ni, “Te ke lava pē koe ʻo hokohoko atu ke haʻu ki heni.” “Mahalo naʻa taʻu ʻe nimangofulu peá ke toki papi, kae hokohoko atu pē hoʻo haʻu ki he lotú.
Ko ia, naʻe hoko atu e maʻulotu ʻa Kefiliní. Ko e taimi naʻe ōmai ai ʻa e ongo faifekau foʻoú ki he feituʻú, naʻá na kamata ke toe akoʻi foʻou ia, ka naʻá ne ʻosi ʻilo ʻe ia ʻa e tali kotoa ki heʻena ngaahi fehuʻí. Naʻá na talaange, “Naʻá ma ōmai ke akoʻi koe, ka ʻokú ke akoʻi ʻe koe kimaua.”
ʻI heʻene kei fakaʻamu ke papitaisó, naʻe toe kole ai ʻe Kefilini e ngofua mei hono husepānití. Ka naʻá ne ʻoange he taimi ko ʻení ki ai ha foomu naʻe hiki ʻe he ongo faifekaú ke fakamoʻoni ai. Naʻá ne talaange, “Kapau ko e meʻa ʻeni ʻokú ke fiemaʻú, te u fakamoʻoni ai.”
Ka ʻi he fononga atu ʻa Palesiteni Uiliami ki Niu ʻŌlini ke ʻinitaviu ʻa Kefilini ki he papitaisó, naʻe ʻikai tukuange ʻe hono husepānití ia ke ʻalu ʻo talanoa mo ia. Naʻe lotofoʻi ʻa Kefilini pea meimei foʻi. Naʻá ne ʻilo naʻe taki ia ʻe he Laumālié ki he Siasí, ka ko ʻene feinga ke kau ki aí ʻoku ʻikai toe ʻosi ʻa e palopalemá ia. Naʻe ʻaonga nai ʻene feingá?
Naʻe fakakaukau leva ke ʻaukai, pea ʻi he lolotonga ʻene ʻaukaí, naʻá ne maʻu ha vīsone. Naʻe haʻu ha taha suti lanu tukumisi ki hono ʻapí. Naʻe fakakaukau ʻi he kamataʻangá ko ha faifekau, ka naʻá ne fakatokangaʻi vave ko ha ʻāngelo. Naʻe malama hono fofongá, ka naʻe ʻikai ke lea ange ki ai. Naʻá ne puke pē hono nimá. Naʻá ne ongoʻi ke ne fakaafeʻi ʻa Palesiteni Uiliami mo e ongo faifekaú ke ʻinitaviu ia ʻi hono ʻapí. Naʻe ʻikai fiemaʻu ke nau tokanga ki ha kaunoa hono husepānití.
Naʻe haʻu ʻa Palesiteni Uiliami ki Niu ʻŌlini ʻo ʻinitaviu ʻa Kefilini. Pea naʻe toki papitaiso leva ia ʻi he ʻaho Kilisimani ʻo e 1976.
Ko e taimi naʻe tali kakato ai ʻe Kefilini Uōleni ʻa e ongoongolelei kuo fakafoki maí, naʻe tukupōpula ʻa e palesiteni ʻo e Kolo Saikoní, ʻa Ngueni Veni ʻi Tani Ongi Nemi (Thanh Ong Nam), ko ha kolotau Vietinemi ʻuli ʻaupito naʻe hoko ko ha ʻapi pōpula Naʻe holiholivale ki ha ongoongo fekauʻaki mo hono uaifí mo siʻena kiʻi fānaú, ka naʻe tuʻusi fakaʻaufuli ia ʻe he ʻapi pōpulá mei māmani. Ko e meʻa pē naʻá ne ʻilo fekauʻaki mo e feituʻu ʻoku ʻi ai hono kiʻi fāmilí naʻe maʻu mei ha mākoni mei he palesiteni ʻo e Misiona Hongo Kongó: “Sai pē ʻa Lieni mo e fāmilí. Mo e Siasí.”
Naʻe maʻu ʻe Tā ʻa e mākoní kimuʻa pea toki hū ki he ʻapi pōpulá. ʻI heʻenau feinga ke maau ʻi he hili hono kapa ʻa Saikoní, naʻe fiemaʻu ai ʻe he puleʻanga ʻo Vietinemi Tokelaú ʻa e kau mēmipa tutuku kotoa ʻo e kau tau Vietinemi Tongá ke nau tukulolo ki ha kalasi “toe akoʻi foʻou” ʻi he ngaahi tefitoʻi moʻoni mo e founga ngāue ʻa e puleʻanga foʻoú. Koeʻuhí naʻe ʻosi hoko ʻa Tā ko ha ʻōfisa tokoni mo ha faiako lea faka-Pilitānia maʻa Vietinemi Tonga, naʻe ʻalu ai ʻo fakahā ia kiate kinautolu, mo ʻamanaki ʻe ʻaho pē ʻe hongofulu ʻa e toe akoʻi foʻoú. Ko e ʻosi ʻeni ha taʻu ʻe taha, pea fifili pe koe fē ʻa e taimi ʻe toe tukuange aí.
Ko e moʻui ʻi Tani Ongi Nemí naʻe mātuʻaki fakamā. Naʻe fokotuʻutuʻu ʻa Tā mo hono kaungā pōpulá ki ha ngaahi ʻiuniti mo nau nofo ʻi ha nofoʻanga fakakautau mohu he kumaá. Naʻa nau mohe ʻi he falikí ʻataʻatā pē kae tālunga hono ʻai ʻe honau kau selá ke nau faʻu ha ngaahi mohenga ʻaki ha ngaahi kongokonga ukamea. ʻI he siʻisiʻi mo e mafu ʻa e meʻakaí, fakataha mo e ngaahi tūʻunga ʻuli ʻi he nofoʻangá, naʻe iku ai ʻa e kau tangatá ke maʻungofua ʻe he puke ʻi he tuʻu totó (dysentry) mo e fakaʻauʻausinó (beriberi).
Naʻe toe kau foki ʻi he toe akoʻi foʻoú ha ngāue lahi fau mo hano akoʻi fakapolitikale. Ko e taimi naʻe ʻikai ke nau tutuʻu ai ʻa e ʻuluʻakaú pe tokangaʻi ʻa e ngoué ke fafangaʻaki ʻa e nofoʻangá, naʻe fakamālohiʻi ʻa e kau tangatá ke nau ako maʻuloto ha tokāteline mo vete ʻenau ngaahi faihia ki Vietinemi Tokelaú. Ko ha taha pē te ne maumauʻi ʻa e ngaahi tuʻutuʻuni ʻo e nofoʻangá ʻe ʻamanaki ki hano tā fakamamahiʻi pe tuku pōpula ʻi ha puha veve - hangē ha puha ukameá.
Kuo moʻui mai ʻa Tā ʻaki ʻene fakalongolongo pē mo pīkitai ki heʻene tuí. Naʻe feinga ke talangofua ki he ngaahi tuʻutuʻuni ʻo e nofoʻangá mo fakaʻaongaʻi fakapulipuli pē ʻene tui fakalotú. Naʻá ne tauhi ʻa e Sāpate ʻaukaí, neongo ʻene fasimanavá, mo ne lau fakalongolongo pē ʻa e ngaahi potu folofolá mei heʻene manatú ke fakamālohia ʻene tuí. Ko e taimi naʻe ʻoange ai ʻe hano kaungā Kalisitiane ha Tohi Tapu naʻe fakafufuuʻi maí, naʻá ne lau kakato tuʻo ua ʻa e tohí ʻi he māhina ʻe tolu, mo fakamahuʻingaʻi ʻa e faingamālie ke toe lau e folofola ʻa e ʻOtuá.
Naʻe fakaʻānaua ʻa Tā ke tauʻatāina. ʻI ha taimi ʻe taha, naʻe fakakaukau ai ke hola mei he nofoʻangá. Naʻá ne fakapapauʻi te ne lava ʻo fakaʻaongaʻi hono akoʻi fakakautaú ke hao mei hono kau pule pōpulá, ka ʻi heʻene lotua ha tokoni ʻi he holá, naʻá ne ongoʻi naʻe taʻofi ia ʻe he ʻEikí. Naʻe fanafanga ange ʻa e Laumālié, “Kātakiʻi pē.” ʻE lelei ʻa e meʻa kotoa “ʻi he taimi totonu ʻo e ʻEikí.”
ʻI ha taimi kimui ange, naʻe ʻilo ai ʻe Tā ko siʻono tuofefine ko Paá, ʻe fakangofua ke ʻaʻahi ange ki ai ʻi he nofoʻangá. Kapau te ne lava ʻo mono fakafufū ange ha tohi, te ne lava ʻo ʻave ia kia Palesiteni Uite (Wheat) ʻi Hongo Kongo, pea te ne lava ʻo ʻave ia kia Lieni mo e kiʻi fānaú.
ʻI he ʻaho ʻo e ʻaʻahi mai ʻa Paá, naʻe tatali ʻa Tā ʻi he lainé kae tomuʻa sivi fakaʻauliliki ʻe he kau leʻó ʻa e sino ʻo e kau pōpula naʻe ʻi muʻa ʻiate iá. ʻI heʻene ʻilo ʻe fakafoki hangatonu ia ʻe he kau leʻó ki he feituʻu malú, naʻá ne fufuuʻi ʻa e kiʻi pōpoakí ʻi he tupenu haʻi ʻi loto ʻo hono tataá. Naʻá ne faʻo leva ha kiʻi pepa mo e peni ki he loto tataá pea tuku ki he kelekelé. Ka monūʻia, ʻe taki ʻe he kiʻi pepá ʻa e tokanga ʻa e kau leʻó ʻi ha kiʻi taimi feʻunga ke tohoakiʻi ai kinautolu mei hano hua ʻa e toenga ʻo e tataá.
Ko e taimi naʻe hoko mai ai e taimi ke fā iá, naʻe feinga ʻa Tā ke nonga pē. Ka ʻi he sivi ia ʻe he kau leʻó, naʻe kamata ke tetetete. Naʻe fakakaukau ki he tuku pōpula malu ʻoku tuʻunuku mai kapau ʻe maʻu ʻe he kau leʻó ʻa e tohí. Naʻe ʻosi atu ha ngaahi mōmēniti faingataʻa, pea hiki e tokanga ʻa e kau leʻó ki hono tataá. Naʻa nau sivi ʻa e pení mo e kiʻi pepá, ka ʻi he ʻikai ke nau maʻu ha meʻa faikehé, naʻe ʻikai ke nau toe tokanga kia Tā ka nau tuku ia ke ʻalu.
ʻIkai fuoloa kuo sio ʻa Tā ki siʻono tuofefiné, ʻoku haʻu, ko ia naʻá ne toʻo fakalelei leva ʻa e tohí mei hono tataá ʻo kukuʻi ia ki hono nimá. Naʻe siʻi tangi ʻi he taimi naʻe ʻoange ai ʻe Pā ha meʻakai mo ha paʻangá. Naʻá ne fakalele mo hono husepānití ha pisinisi ngaohi koloa, pea naʻe ʻikai ke na maʻu ha meʻa lahi fēfē. Naʻe fakahoungaʻi ʻe Tā ʻa e meʻa kotoa naʻá ne lava ʻo foakí. Naʻe falala ʻi heʻena māvaé, te ne lava ʻo ʻave ʻene tohí kia Lieni.
ʻOsi ha māhina ʻe ono, kuo foki mai ʻa Pā ki he nofoʻangá mo ha tohi. Naʻe ʻi loto ha tā ʻo Lieni mo e kiʻi fānaú. Naʻe fakatēloʻimata ʻa Tā ʻi heʻene sio fakamamaʻu ki honau ngaahi fofongá. Kuo lalahi ʻaupito ʻene kiʻi fānaú. Naʻá ne ʻiloʻi heni he ʻikai ke toe lava ʻo tatali.
Naʻe pau ke ne kumi ha founga ke hola ai mei he nofoʻangá ke aʻu ki siʻono fāmili.