Vahe 25
Koeʻuhí ko e Ongoongoleleí
ʻI he ʻaho 14 ʻo Sune 1989, naʻe fakatokangaʻi ʻe he ongo hoa faifekau ko ʻĀlisi Sionisoni mo Heti Pilimá ʻa hono siofi kinaua ʻe he kakaí ʻi heʻena lue foki ki hona fale nofo totongí ʻi Kofolitua, Kaná. “Ko e hā e ʻuhinga ʻoku siofi ai kitaua he kakaí?” Ko Heti ia ʻi heʻene fifilí.
Naʻe pehē ange ʻe ʻĀlisi, “ʻOkú ta ʻasi talavou”. Naʻe toki ʻosi pē hono ngaohi hona ʻulú ʻe ha tokotaha ngaohi ʻulu naʻá na akoʻi. Ko e hā ka taʻe moʻusioa mai ai e kakaí?
Ka ʻi he aʻu atu ʻa ʻĀlisi mo Heti ki hona fale nofo totongí, naʻe talaange ʻe he tokotaha ʻoku hoʻona e ʻapi ne na nofo aí ke na lipooti he vave tahá ki he tamai mo e faʻē-ua ʻa ʻĀlisí, ʻa ia naʻá na toe hoko foki ko e ongo faifekau ʻi Kofolituá.
Ko ʻĀlisí ko e ʻofefine ia ʻo Pili Sionisoni, ʻa ia naʻe tokoni ʻene līʻoa ʻi hono malangaʻi ʻa e ongoongolelei kuo fakafoki maí ke fokotuʻu ai ʻa e Siasí ʻi Kana. Naʻe kau ʻa Pili ʻi he fuofua kakai naʻe papitaiso ʻi he taimi naʻe omi ai ʻa e kau faifekaú ʻi he konga kimui ʻo e 1978. Naʻá ne maʻu leva ʻa e lakanga fakataulaʻeikí, hoko ko e fuofua palesiteni fakakolo ʻi Kaná pea hoko kimui ange ko ha palesiteni fakavahefonua. Ko e hili ʻeni ha taʻu ʻe hongofulu mei ai, kuo ʻi ai ha Kāingalotu Kana ʻe toko onoafe nai. ʻI he hoko ʻa Pili mo hono uaifí ko ha ongo faifekaú, naʻe vahe kiate kinaua ke na tokoniʻi ʻa e Kāingalotu naʻe ʻikai ke nau toe maʻulotu ʻi he ngaahi houalotu ʻa e Siasí.
Naʻe lue ʻa ʻĀlisi mo Heti ki he ʻapi fakamisiona ʻi he loto koló pea naʻe ʻi ai ʻa e ongomātuʻa Sionisoní. Naʻe fakamatalaʻi lelei ʻe he tamai ʻa ʻĀlisí kiate kinaua mo e kau faifekau kehé kuo tapui ʻe he puleʻanga Kaná—koeʻuhí ko ha ngaahi ʻuhinga naʻe taʻeʻiloa—ʻa e ngaahi ngāue kotoa pē ʻa e Siasí ʻi he fonuá. Naʻe tapui foki mo ha ngaahi siasi faka-Kalisitiane kehe mei haʻanau fakataha.
Naʻe pehē ange ʻe Pili, “ʻOku ou fiemaʻu ke mou toʻo kotoa homou piné.” Naʻe ʻosi fakamafola ʻi he letioó ʻa e ongoongo ʻo e tapú, ʻa ia ko e ʻuhinga ia naʻe siofi ai ʻe ha kakai tokolahi ʻa ʻĀlisi mo Hetí. Naʻe fakahinohino ange ʻe Pili, “Kuo pau ke mou foki ki homou ʻapí ʻo fakamāʻopoʻopo fakavavevave homou ngaʻotoʻotá. Ko e hengihengi ʻapongipongí, kuo pau ke tau lipooti ki he ʻapi fakamisiona ʻi ʻAkalaá.”
ʻI he tupu hake ʻa ʻĀlisí, naʻá ne tanganeʻia maʻu pē ʻi he faʻa lotu, angaʻofa mo e vēkeveke ʻene tamaí ki he ongoongolelei kuo fakafoki maí. Ko hono moʻoní, naʻe hoko ʻene tui mo e vilitaki ke ngāue maʻá e ʻOtuá ke fakalotoa ai ʻa ʻĀlisi ke ne ʻalu ʻo ngāue fakafaifekau ʻi hono taʻu hongofulu-mā-valú, ʻa ia naʻe ngofua ia ʻi ha ngaahi tapa ʻe niʻihi ʻo e māmaní.
Ko e taimi ní, ʻi he lea [ʻa Pili] fekauʻaki mo e tapui fakapuleʻangá, naʻá ne tapou kia ʻĀlisi mo e kau faifekau kehé ke nau ʻaukai mo lotu ke fakangata ia.
ʻI he pongipongi hono hokó, naʻe fononga ʻa ʻĀlisi mo Heti ʻi ha maile ʻe nimangofulu ki he tokelaú ki he ngaahi ʻuluʻi ʻōfisi fakamisiona ʻi ʻAkalaá. ʻI he taimi naʻá na tūʻuta aí, naʻe ʻosi fakatahataha ai ha kau faifekau tokolahi ʻaupito. Ko e tokolahi taha ʻo kinautolú ko ha kakai Kana pē, pea naʻe ʻilonga mei he fofonga ʻo e taha kotoa naʻa nau tangi. Naʻe hoko ʻa e tapú ke ʻohovale ai ʻa e taha kotoa ʻo kau ai ʻa e palesiteni fakamisioná. Naʻe faʻao ʻe he kau sōtia fakalotofonuá ʻa e ngaahi ʻapisiasi mo e ngaahi fale kehe ʻo e Siasí. Naʻe tuli ʻe he kau polisí ʻa e kau faifekaú mei honau ngaahi fale nofo totongí pea faʻao mo e ʻū meʻalele mo e pasikala ʻa e misioná. Pea naʻe tuʻu mo ha kau leʻo kuo fakamahafu ʻi tuʻa ʻi he ʻapi fakamisioná.
Naʻe fakahā ʻe he palesiteni fakamisiona ko Kilipeti Petilamaló ki he tokotaha kotoa pē ʻe pau ke tukuange kinautolu. Ko e ongomātuʻa pē ʻa ʻĀlisí te na kei hoko ko e ongo faifekau taimi kakato, ka te na ngāue ʻi ha tuʻunga ʻoku ʻikai fakaʻofisiale. Te na kei ngāue fakaetauhi pē ki he Kāingalotú, ka te na tui pē ʻa e vala fakaʻahó pea ʻikai tui hona pine hingoá.
Hili hono tukuange ʻo ʻĀlisí, naʻá ne ʻalu ʻo nofo mo hano kaungāmeʻa ʻi Keipi Kousi. Naʻá ne ongoʻi taumuʻavalea mo puputuʻu. Naʻe hoko ʻa hono fakangata fakafokifā ʻene ngāue fakafaifekaú ke ne ongoʻi taʻepauʻia ai ʻi hono kahaʻú. Naʻe hangē ia naʻe fakafokifā pē kuo fakangata ʻa e meʻa kotoa pē ne mahuʻinga ʻi heʻene moʻuí.
Hili hono tapui e ngaahi ngāue kotoa pē ʻa e Siasí ʻi Kaná, naʻe vivili ʻa e mēmipa ʻo e Siasí ko Viliami ʻAkauaá ke ne fanongo ki ha ongoongo [fekauʻaki mo e tapú]. Naʻá ne lau ʻa e nusipepa fakalotofonuá mo fakafanongo maʻu pē ki he letioó, lolotonga iá naʻá ne ʻamanaki te ne ʻilo ha meʻa lahi ange fekauʻaki mo e “taʻofi fakaʻaufulí,” ʻa e hingoa ne ui ʻaki ʻa e tapú. Ko e taimi ʻe niʻihi naʻá ne fakataha mo ha Kāingalotu kehe ke fakafehoanaki ʻa e meʻa kuo nau ʻiló.
Naʻe hoko ʻa e laui taʻu ʻo e pule fakakoloniá ke fakaalaala ai ha kakai Kana ʻe niʻihi mei he ngāue mo e kakai mulí, pea naʻe hangē naʻe hohaʻa ʻa e kau ʻōfisa fakapuleʻangá ki he ʻuluʻi ʻōfisi ʻa e Siasí ʻi ʻAmeliká pea mo e ʻilonga ʻene tuʻumālié. Naʻe tokolahi foki mo ha kakai ʻi he fonuá naʻa nau sio ʻi ha filimi naʻe fakafōtunga ai ʻoku kovi mo angaʻuli ʻa e Siasí, pea naʻe tafunaki ai ha tailiili fekauʻaki mo e Kāingalotú. Naʻe tui ʻa e puleʻangá ko hono fakangatangata ko ia ʻo e Siasí, naʻá ne maluʻi ai ʻa e kakai Kaná. Naʻe hangē naʻe ʻikai loto ʻa e kau ʻōfisá ke fakangata ʻa e taʻofi fakaʻaufulí kae ʻoua kuo nau fai ha fakatotolo fakaʻauliliki ki he Kāingalotú mo ʻenau ngaahi ʻekitivitií.
Naʻe nofo ʻa Viliami ʻi Keipi Kousi. Naʻe kau hono uaifi ko Sāloté ʻi he fāmili ʻAnito-Kēsoní, ʻa ia naʻa nau hoko ko e kau ʻuluaki poupou ʻo e malanga ʻa Pili Sionisoní. Naʻe fakafeʻiloaki ʻe Sālote ʻa Viliami ki he ongoongolelei kuo fakafoki maí ʻi he 1978, ka naʻe laka hake ʻi he taʻu ʻe tahá ʻa e tali ʻa Viliami kae toki papitaiso iá. Naʻá ne haʻu mei ha fāmili ʻiloa ʻi he vāhengá, pea naʻe hoko ʻene ako mo e ngaahi aʻusia ʻi heʻene kei talavoú ke ne taʻefalala ai ki he ʻOtuá. Naʻe kamata ke fakamolū hono lotó ʻi he taimi naʻe fakafeʻiloaki ai ʻe Sālote ia kia Liti mo Naomi Kelekí, ko ha ongo faifekau ʻosi mali ʻi Keipi Kousi. Naʻá na faʻa kātaki ʻi heʻene ako ʻa e Tohi ʻa Molomoná mo e ʻū tohi kehe ʻa e Siasí, ʻo ne maʻu ai ha taimi ke fakatupulaki ha fakamoʻoni mo fai ʻa e fili ke papitaisó.
ʻI he kamata ʻa e taʻofi fakaʻaufulí, naʻe fakamafaiʻi ʻe he kau taki ʻo e Siasí ʻa e Kāingalotu Kaná ke nau fakahoko ʻa e sākalamēnití mo e Lautohi Faka-Sāpaté ʻi honau ngaahi ʻapí. Naʻe fai ʻeni ʻe Viliami mo Sālote he Sāpate kotoa pē mo ʻena fānaú. Hili iá, naʻe faʻa mavahe ʻa Viliami mei ʻapi ke ʻaʻahi ki he Kāingalotu kehé mo fakapapauʻi naʻa nau sai pē.
ʻI he Sāpate ko e ʻaho 3 ʻo Sepitema 1989, naʻe ʻilo ʻe Viliami ha kulupu ʻo ha kāingalotu ʻo e Siasí naʻa nau tuʻu matanga ʻi ha veʻe tekisī. Naʻa nau talaange naʻe toki puke pōpula pē ha ongo ongo mēmipa ʻo e Siasí, ko ʻAto mo ʻElisapeti ʻAmipia, koeʻuhí ko ʻena fakahoko ha fakataha ʻa e Siasí ʻi ʻapi. Naʻe heka vave ʻa Viliami ki he tekisií fakataha mo e toengá, pea naʻa nau lele ki he ʻapi polisí.
Ko e falé ko ha fōtunga langa fakakuonga muʻa ia mei he kuonga ne kolonia ai ʻa Kaná. ʻI lotó, naʻe tuʻu ha ʻōfisa ʻi ha veʻe kānita. ʻI mui ʻiate iá, naʻe tangutu laʻilaʻivaʻe ʻa e ongomātuʻa ʻAmipiá ʻi ha sea ʻi muʻa ʻi he pā ukamea ʻo e pilīsoné.
Naʻe sio ʻa e ʻōfisá kia Viliami. Naʻá ne fehuʻi ange, “Ko ha mēmipa mo koe ʻo e Siasí”.
Naʻe pehē ange ʻe Viliami, “ʻIo.”
Naʻá ne ʻomai ʻa Viliami ki mui he kānitá. Naʻá ne fekau ange, “Vete ho suú. Mai ho vesa uasí.” Naʻá ne fai e tuʻutuʻuni tatau ki he kau tangata kehe naʻe omi mo Viliamí. Naʻe kole ange ʻe ha taha ʻiate kinautolu pe ʻe lava ke ne tā ki hano kaungāmeʻa, ko ha ʻōfisa fakalotofonua he puleʻangá. Naʻe ʻita lahi ʻa e ʻōfisá.
Naʻá ne kaila, “Hū ki he loto seló!”
Naʻe fakafokifā pē ha nāmuʻi ʻe Viliami ha meʻa namu haʻahaʻa ʻi heʻene hū atu he matapaá. Naʻe fonu ʻa e kiʻi lokí ʻi ha kau nofo pōpula naʻa nau ʻuli mo valasiʻi pea ne nau ʻohovale ke nofo fakataha ʻi ha loki pilīsone mo ha kulupu Kāingalotu naʻa nau keu tui vala lotu.
Naʻe fehuʻi ange ʻe ha pōpula ʻe taha, “Ko e hā e meʻa ʻoku hoko ʻi hotau fonuá, ʻoku ʻomi ai e kau faifekau ko kimoutolu ʻoku ʻikai hamou kovi ki hení?”
Neongo honau fōtunga taʻeteuteú, ka naʻe fakaʻataʻatā ʻe he kau pōpulá ha feituʻu moʻo e Kāingalotú pea naʻa nau fakaʻapaʻapaʻi kinautolu. Ko ha Sāpate ʻaukai ia, pea ʻi he aleaʻi ʻe Viliami mo hono ngaahi kaungā-ngāué ʻa e tūkungá, naʻa nau fakakaukau ke hoko atu ʻenau ʻaukaí. Naʻa nau hohaʻa mo ilifia, ka naʻe mafola e ongoongo ʻo hono puke pōpula kinautolú, pea naʻe ngāue ʻa e kau mēmipa kehe ʻo e Siasí ke tukuange kinautolu.
ʻI he hoʻatā ko iá, naʻe haʻu e tokoua ʻo e tamai ʻa Viliamí ki he ʻapi polisí. Ko ha tangata toulekeleka ia naʻe nonga mo anga-fakaʻapaʻapa pea naʻe ʻikai ke ne kau ki he Siasí. Naʻá ne talanoa mo e polisí ka naʻe ʻikai ke ne lava ʻo fakalotoʻi kinautolu ke tukuange mai ʻa Viliami. Naʻe pehē ʻe he kau ʻōfisá naʻe fakatuʻutāmaki ʻa e Kāingalotú ki he malu ʻa e fonuá pea he ʻikai lava ke totongi-maluʻi kinautolu ki tuʻa mei pilīsone.
Naʻe ʻosi atu ha ngaahi houa pea kuo aʻu ki he efiafí. Naʻe omi ha ngaahi kaungāmeʻa mei he lotú ki he pilīsoné ʻo toe kole pē ke tukuange ʻa e kau pōpulá, ka naʻe fakamanamana ange ʻa e kau ʻōfisá ke puke pōpula foki mo kinautolu. ʻI he faifai pea mahino ʻe nofo ʻa Viliami mo e Kāingalotu kehé ʻi pilīsone he pō ko iá, naʻa nau piki nima ʻo fai ha lotu.
ʻI he pongipongi hono hokó, naʻe talaange ʻe he ʻōfisa pule ʻo e ʻapi polisí ki he Kāingalotú naʻá ne tatali ki ha tuʻutuʻuni fekauʻaki mo e meʻa ʻe fai kiate kinautolú. Naʻe femoʻuekina ʻa Viliami he talanoa mo e toenga ʻo e kau pōpulá, ʻo vave ai e ʻalu ʻa e taimí. Ko ha niʻihi ʻo kinautolu naʻe ʻi ai honau fāmili ne nofo ofi mai pea ne nau fakaʻamu ke fetuʻutaki kiate kinautolu. Naʻe ako maʻuloto ʻe Viliami honau tuʻasilá pea naʻá ne palōmesi ange te ne ʻave ha ngaahi pōpoaki kiate kinautolu. Naʻe fakalotoa ia ʻi heʻene fakakaukau ki he ʻaposetolo ko Paulá ʻi he Fuakava Foʻoú pea mo hono puke pōpula ia koeʻuhí ko e ongoongoleleí.
Naʻe ʻosi atu ha ʻaho ʻe taha, pea ʻi he ʻaho Tūsité, naʻe faifai pea ʻomi ʻa Viliami mo e Kāingalotú ke nau sio ki he ʻōfisa pulé. Naʻá ne pehē ange, taʻe toe ʻi ai ha fakamatala kehe, “ʻOku mou ʻatā ke mou ʻalu.” Naʻá ne feinga ke leʻo fakakaumeʻa, ka naʻá ne fakatokanga ange ke ʻoua naʻa nau tala ki ha taha ʻa hono puke pōpula kinautolú.
Naʻe ʻikai toe lea ange ha taha. ʻI he kānitá, naʻe fakafoki ange ʻe he polisí ʻenau ngaʻotoʻotá pea fekau ke nau ō.
ʻI he efiafi ʻo e ʻaho 18 ʻo Nōvema 1989, naʻe tatali ʻa ʻOlokā Kovalova ʻi ha tauʻanga pasi ʻi Peano, Sekisolovākia ʻi he taimi naʻá ne fakatokangaʻi ai ha ʻū meʻalele polisi ʻoku nau takatakaiʻi ha fale faiva ofi mai. Naʻá ne fakakaukau, “Pau pē ʻoku hoko ha vela.”
Naʻe ʻikai fuoloa kuo aʻu mai e pasí. Naʻe kaka hake ʻa ʻOlokā ki he pasí peá ne fakatokangaʻi atu he taimi ko iá hano kaungāʻapi kei talavou naʻá na faʻa kaungā-heka fakataha. Naʻá ne mata fiefia.
Naʻá ne fehuʻi ange, “Ko e hā ho fakakaukaú?”
“Ko e hā ho ʻuhingá?” Ko ʻOlokā atu ia.
Naʻe lea fakaleʻosiʻi hifo hono kaungāmeʻá. “ʻA e liliú!”
“ʻI fē?”
“ʻI Sekisolovākia, ʻi Palaki—ʻi heni!”
Naʻe kata ʻa ʻOlokā. Naʻá ne fehuʻi ange, “Ko e hā ha toe fakakata ʻokú ke fai mai?”
Naʻe talaange ʻe hono kaungāmeʻá, “Naʻá ke sio ki he ʻū meʻalele polisi ʻi he fale faivá? Naʻe kamata laka fakahāhā e kau ʻeti faivá, pea kuo ʻilo lahia ia.”
Naʻe kei taʻetui pē ʻa ʻOlokā. Kuo laka hake ʻi he taʻu ʻe tahá ʻa e hoko ha ngaahi laka fakahāhā loto-melino ʻi he kakaí pea mo ha ngaahi fakahāhā kehe ke tupu ai ha liliu fakapolitikale ʻi Pōlani, Hangakali, ko e Lepapulika Fakatemokālati ʻo Siamané, pea mo e ngaahi fonua kehe naʻe kau fakataha mo e Sovieti ʻIunioní. ʻI Pealiní, ʻi he ngaahi ʻaho siʻi kimuʻá, naʻe kamata ke fakaʻauha ʻe he kakai mei he ongo tafaʻakí fakatouʻosi ʻo e koló, ʻa e fuʻu holisi sima lahi naʻá ne fakamāvahevaheʻi kinautolu ʻi ha meimei taʻu ʻe tolungofulu.
Kae ʻi Sekisolovākiá, kuo teʻeki ke fakavaivai ʻa e puleʻangá ki he kole ʻa hono kakaí ki ha tauʻatāina lahi angé.
Naʻe fakaʻānaua ʻa ʻOlokā ke moihū tauʻatāina, pea kuó ne ʻaukai mo lotu mo ʻene kaungā Kāingalotú ki he tāpuaki ko ʻení. Lolotonga iá, naʻe ngāue ʻa ʻEletā Lāsolo M. Nalesoni mo e puleʻanga Sekisolovākiá ke fakatokangaʻi fakaʻofisiale ʻa e Siasí ʻi he fonuá.
Naʻe fai ʻe ʻOlokā hono lelei tahá ke fakaʻaongaʻi ʻene tuí. Ko e meʻamālié, naʻe hokohoko atu ke tokoniʻi ia ʻe he ongoongoleleí ke ne aʻusia e fiefiá. ʻI he 1987, naʻá ne ʻalu meʻalele mo ʻene ongomātuʻá ki he Lepapulika Fakatemokālati ʻo Siamané ke maʻu ʻenitaumeni mo silaʻi fakataha honau fāmilí ʻi he Temipale Freiberg. Naʻe fakaivia ia ʻe he aʻusia ko iá. Naʻá ne fakakaukau, “Ko ha fakavaʻe fakaʻofoʻofa moʻoni ʻeni, ʻoku hangē ʻoku hiki hake kita ʻe he aʻusia ko ʻení, pea ʻokú te lava leva ʻo langa ʻi he aʻusia ko iá.”
Ko e ʻosi ʻeni ha taʻu ʻe ua mei he aʻusia ko iá, naʻe foki mai ʻa ʻOlokā ki hono ʻapi nofo totongí ʻo fakamoʻui ʻa e televīsoné mo e letioó ke fanongo ki he ongoongó. Naʻe ʻikai ke ne fanongo ki ha meʻa. ʻOku liliu moʻoni nai e ngaahi tūkungá?
ʻI he pongipongi hono hokó, naʻe aʻu mai ʻa ʻOlokā ki he senitā ʻa e toʻu tupú naʻá ne ngāue aí ʻo sio ki he felueʻaki holo hono kaungā-ngāué. Naʻe fofonga taʻefiemālie hano kaungā-ngāue tokolahi. Naʻe talaange ʻe he pule ʻa ʻOlokaá, “ʻOku ʻi ai e meʻa kāfakafa ʻoku hoko ʻi Palaki. ʻOku ʻi ai ʻeku fakataha fakavavevave he taimí ni pē.”
Naʻe ʻikai fuoloa kuo aʻu mai e kaungā-ngāue kehé mo e ongoongo ʻo e liliú. Naʻe fakakaukau ʻa ʻOlokā, “ʻOku moʻoni pē.”
ʻI he hili pē ha ngaahi ʻaho siʻi, naʻe fanongonongo mai ʻi he ʻū papa fakaʻilonga he sioʻata ʻo e ʻū falekoloá ha laka fakahāhā fakalūkufua ke fakafepaki ki he puleʻangá. Naʻe kau ʻa ʻOlokā ʻi he kakai ʻe lauiafe naʻa nau laka ki he sikuea lahi ʻi he loto koló, naʻá ne vēkeveke ʻi heʻene siotonu ki he hoko ʻa e liliu fakahisitōliá. Naʻá ne fakakaukau ki he ngaahi faingataʻa kotoa pē kuo fuesia ʻe heʻene ongomātuʻá mo e ngaahi kuí. Naʻá ne ongoʻi e Laumālie ʻo e ʻOtuá ʻi he uouangataha mo e ʻofa ʻa e kakai naʻa nau kau fakatahá.
Hili ha ngaahi ʻaho ʻo e laka fakahāhaá, naʻe fakafisi ʻe he puleʻangá hono mālohí, pea naʻe kamata ke faʻu ha puleʻanga foʻou. Naʻe liliu ʻa e ongo fakalūkufua ʻi he fonuá. Naʻe talanoa tauʻatāina ʻa e kakaí ʻi he veʻe halá. Naʻa nau fofonga malimali mo fetokoniʻaki. Naʻe fakatuʻamelie ʻa e Kāingalotú ʻi he lotú ki he kahaʻú, pea naʻa nau fiefia ke fakataha fakatokolahi mai ko e fuofua taimi ia ʻi he hili ha ngaahi taʻu lahi.
ʻI he meimei taimi tatau pē ko ʻení, naʻe ʻaʻahi ai ʻa ʻOlokā kia ʻOtakā Vosikuvuka ʻi hono ʻapí. Naʻá ne ʻalu atú ʻokú ne lolotonga tangi. Naʻá ne fiefia lahi ʻe lava ʻe he kakai hangē ko ʻOlokaá ʻo moʻui mo lotu tauʻatāina.
Naʻá ne talaange kia ʻOlokā, kuó ne tatali heʻene moʻuí kotoa ke hoko e meʻá ni.
Naʻe loto-hohaʻa ʻa Tikanatino ʻEsepai, ko e ʻōfisa pule ʻi he kau leʻo ʻi he Temipale Manila Philippines, ʻi heʻene aʻu ki he ngāué ʻi he efiafi ʻo e ʻaho 1 ʻo Tīsema 1989. ʻI he pongipongi ʻo e ʻaho ko iá, naʻe fokotuʻutuʻu ʻe ha kau tangata ʻi Manila ne nau toʻo meʻa tau ke fai ha fakafepaki, ʻo fakafokifā ai e hoko ha moveuveu ʻi he loto koló. Ko e feinga ʻaki ia hono fitu ke liua e puleʻanga Filipainí ʻi ha taʻu ʻe fā.
Neongo e moveuveu fakapolitikalé, ka naʻe fiefia ʻa e Siasí ʻi he fakavaʻe mālohi ʻi he ʻOtu Filipainí. ʻI he taʻu ʻe tolungofulu kuohilí, kuo tupu e kāingalotú mei ha kiʻi kulupu tokosiʻi ʻo ha kau Filipaini ne nau maʻu e tuí ki ha Kāingalotu ʻe toko uakilu tupu. Kuo ʻi ai ʻeni ha ngaahi siteiki ʻe tolungofulu-mā-valu ʻi he fonuá mo ha ngaahi misiona ʻe hiva. Pea talu mei hono fakatapui ʻo e Temipale Manila Philippines ʻi Sepitema 1984, kuo hoko ia ko ha maʻuʻanga ʻo e fiefia lahi mo e mālohi fakalaumālie.
Naʻe ʻilo ʻe Tikanatino ʻa hono kaungā-ngāue ko Filipe Lamosi mo Lēmeki Hulianí ʻi he fale leʻo ʻo e temipalé. Neongo naʻá na fakaʻosiʻosi ʻena houa ngāué, ka naʻe ʻikai fie foki ʻa e ongo tangatá ki hona ʻapí. Naʻe hanga mai mei he kauhala ʻe taha ʻo e temipalé ʻa e ʻApitanga ʻAkuinaló, ko ha ʻapitanga lahi fakakautau. ʻI he ʻiloʻi ʻe he ongo leʻó ʻe lava ke hoko ʻa e ʻapitangá ko ha tāketi ki he kau tangata kuo fakamahafú, naʻá na hohaʻa naʻa faifai peá na mavahe mei hona tuʻuʻangá pea maʻukovia kinaua ʻi he fekeʻikeʻí. Naʻá na saiʻia ange ke na nofo ʻo tokoni ke tauhi ʻa e toputapu ʻo e fale ʻo e ʻEikí pea mo hono kelekelé.
Fakafuofua ki he hoko e tahá hengihengi, naʻe taʻofi ʻe he kau sōtia ʻo e puleʻangá ʻa e foʻi hala fetaulakiʻanga naʻe ofi ki he temipalé. Hili ha ngaahi houa mei ai, naʻe teke mai ʻe ha fuʻu tangikē tau ʻa e meʻa naʻe taʻofi ʻaki e halá ‘o maumauʻi ai ʻa e holisi takai ʻi he temipalé.
ʻI he hoko fakafokifā ʻa e fetāʻakí ʻi he halá, naʻe fakangāueʻi ʻe Tikanatino mo e kau ʻōfisa leʻo kehé ʻa e ongo tauhi ʻapi ʻo e temipalé ke tokoni ange ki hono tauhi e falé mo hono kelekelé ke malú. Naʻe maumauʻi ʻe ha kau tangata ʻa e ʻā ʻo e temipalé ʻi heʻenau hae ia ʻo fakaava ke nau hola mei he fana ʻa e kau sōtia fakapuleʻangá. Naʻe feinga ʻa Tikanatino ke fakamālohiʻi kinautolu ke nau ʻalu, ka naʻe ʻikai ke nau loto ki ai.
ʻI he konga kimui ʻo e hoʻatā ko iá, naʻe talanoa ʻa Tikanatino mo e palesiteni temipale ko Foloiti Houkení pea mo e palesiteni fakaʻēlia ko Siaosi I. Kēnoní ʻi he telefoní. Naʻe faleʻi ange ʻe Palesiteni Kēnoni kiate ia pea mo e kau ngāué ke nau ō ki loto he temipalé ʻo hao ki ai. ʻI ha kiʻi taimi nounou pē mei ai, naʻe mate ʻa e ʻū laine telefoní.
Ko e pongipongi hono hokó ko ha Sāpate ʻaukai ia, pea naʻe kamata ʻe he kau ngāué ʻenau ʻaukaí ʻaki ʻenau kole ki he ʻOtuá ke fakahaofi e fale ʻo e ʻEikí mei hono ʻuliʻí pe maumauʻí.
Naʻe ʻosi atu e ʻaho ko iá. Naʻe puna holo ʻa e ʻū helikopetá ʻo fana mahafu mai ki he temipalé. Naʻe fakatō pomu ha vakapuna ʻi ha feituʻu ofi mai pē, pea naʻe momo ai e ʻū matapā sioʻata ʻo e fale tufakiʻanga naunau ʻa e Siasí ʻo maumauʻi ai mo ha ngaahi fale kehe. ʻI ha taimi ʻe taha naʻe fanaʻi ai ʻe ha tokotaha ha foʻi lōketi ʻe ua ʻo fakalaka he funga temipalé ʻo ne fakatupunga ai ha vela ʻi ha lotoʻataʻatā ofi mai.
ʻI he kei hoʻatā pongipongí, naʻe maʻu ʻe Tikanatino ha kau tangata toʻo meʻa tau ʻe toko hongofulu ne nau lafi holo pē he hūʻanga ʻo e temipalé. Naʻe talaange ʻe Tikanatino, “Ko e meʻa te mou maʻu ʻi loto he temipalé ʻoku fakalotu kotoa pē ia pea ʻoku toputapu hono natulá.” Naʻá ne tailiili, ka naʻe hoko atu pē ʻene leá. Naʻá ne pehē ange, “Kapau ʻoku mou kikihi ke hū fakamālohi ki he falé, ʻe mole hono tuʻunga toputapú. Te mou kaihaʻasi nai e ngaahi tāpuaki ko ʻení meiate kimautolu?” Naʻe fakalongolongo e kau tangatá, pea ʻi heʻenau tafoki ʻo ʻalú, naʻe ʻiloʻi ʻe Tikanatino naʻe ongo lahi ʻene leá ki honau lotó.
ʻI he efiafi ko iá, naʻe fakatahatahaʻi mai ʻe Tikanatino ʻene kau ngāué, pea ne nau toe kumi hūfanga ʻi he loto temipalé. Naʻá ne fai ha lotu fakamātoato, ʻo ne falala ki he ʻEikí ke Ne fakahaofi Hono falé.
Naʻa nau tatali ʻi he pō kakato ko iá ke ngangana hifo e ʻū pomú, ka naʻe ʻosi atu e taimí ʻoku teʻeki hoko ha meʻa. ʻI he mafoa ʻa e atá he pongipongi Mōnité, naʻa nau hū fakaalaala mai ki tuʻa mei he temipalé ke sivisiviʻi ʻa e tūkungá. Naʻe puli ʻa e kau tangata naʻe fakamahafú. Naʻe ʻikai ha meʻa ʻe toe, ka ko ha ʻū meʻatau, mahafu mo e ʻū teunga sōtia pē kuo liʻaki.
Naʻe vakaiʻi ʻe Tikanatino mo e kau tangatá ʻa e feituʻú pea nau ʻilo ai ha ngaahi maumau ki ha konga lahi ʻo e ʻū fale ʻi tuʻá. Ka naʻe ʻikai ha maumau ki he temipalé.
ʻI he konga kimui ʻo e ʻaho 7 ʻo Sune 1990, naʻe lue foki ai ʻa Manuela Navalo mo hono hoa fakafaifekau ko Kuilamoa Sukuimangó, ki hona fale ʻi Hualasi, Peluú. Naʻe kamata e ngāue fakafaifekau ʻa Manuelá ʻi Māʻasi 1989 ʻi he Senitā Akoʻanga Fakafaifekau ʻi Limá, ko e taha ʻo e ʻū Akoʻanga Faifekau ʻe hongofulu-mā-fā ʻi he funga ʻo e māmaní. Naʻá ne fiefia ʻi heʻene hoko ko ha faifekaú—ʻa e ngāue mālohí, ʻaʻahi ki he ngaahi vāhenga kehekehe ʻi he fonuá, mo hono ʻomi e kakaí kia Sīsū Kalaisí.
Ka neongo iá, naʻe faʻa fakatuʻutāmaki hono feituʻu lolotongá he poʻulí. Naʻe ʻi ai ha kulupu fakafepaki naʻe ui ko e kau Senitelo Luminosó, pe ko e Hala Maamangiá, kuo nau tau ʻeni mo e puleʻanga Peluú ʻi ha taʻu ʻe hongofulu tupu. Kimuí ni maí, naʻe fakaʻau ke fakamālohi ange ʻenau fakafepakí ʻi he hoko ʻa e fakautuutu ʻi he hikihiki e totongi koloá mo e faingataʻaʻia fakaʻekonōmiká ke uesia ai e puleʻanga ʻAmelika Tongá.
Naʻe ʻiloʻi ʻe Manuela mo Kuilamoa, ko ha Pelū totonu mo ia ʻe taha, ʻa e ngaahi fakatuʻutāmaki naʻá na fehangahangai mo iá ʻi heʻena mavahe mei ʻapi he pongipongi kotoá. Naʻe faʻa tāketiʻi ʻe he ngaahi kulupu hangē ko e Senitelo Luminosó ʻa e Kāingalotu ʻo e Siasí he naʻe fakafekauʻaki [ʻe he kulupú] ʻa e Siasí mo e ngaahi tuʻutuʻuni ki tuʻapuleʻanga ʻa e ʻIunaiteti Siteití. Naʻe ʻi ai ʻeni ha kāingalotu ʻo e Siasí ʻe miliona tupu ʻi he ngaahi fonua lea faka-Sipeiní, pea mo ha 160,000 nai ʻi Pelū. ʻI he ngaahi taʻu kimuí ni maí, naʻe fakamamahiʻi ʻe he kau fakafepakí ʻa e kau faifekau ʻo e Siasí pea fakapā pomu mo e ngaahi ʻapisiasi ʻi ʻAmelika Latiná. ʻI Mē 1989, naʻe hanga ʻe he kau fakafepakí ʻo fanaʻi mo tāmateʻi ha ongo faifekau ʻe toko ua ʻi Polīvia. Talu mei ai, mo e fakaʻau ke toe kovi ange ʻa e tūkunga fakapolitikalé, pea fakalalahi mo hono ʻohofi ʻo e Siasí.
Naʻe fakahoko ʻe he ngaahi misiona ʻe nima ʻi Peluú ha tali ki he fetāʻakí ʻaki ʻenau fokotuʻu ha ngaahi taimi fakataputapui mo fakangatangata ʻa e ngāue fakafaifekaú ki he taimi ʻahó pē. Ka ʻi he efiafi ko ʻení, naʻe ongoʻi fiefia mo longomoʻui ʻa Manuela mo Kuilamoa. Naʻe toki ʻosi pē ʻena akoʻi ha lēsoni ʻo e ongoongoleleí pea naʻe toe haʻana miniti ʻe hongofulu-mā-nima ke na foki ai ki ʻapi.
ʻI heʻena lue mo talatalanoá, naʻe fakatokangaʻi ʻe Manuela ha ongo talavou ʻe toko ua naʻá na kiʻi mamaʻo siʻi atu pē. Naʻá na teke ha kiʻi kā lanu engeenga pea naʻe hangē naʻá na fiemaʻu tokoní. Naʻe fakakaukau ʻa Manuela ke fai ha tokoni, ka naʻe taimi nounou kuo fakamoʻui ʻe he ongo tangatá ʻa e kaá ʻo na lele.
Hili ha taimi nounou mei ai, naʻe aʻu atu e ongo faifekaú ki ha paaka naʻe ofi ki hona ʻapí. Naʻe tau ʻa e kā lanu engeengá ʻi he laʻisimá fakafuofua ko ha fute ʻe nima nai mei he feituʻu naʻá na lue atu aí. Naʻe ofi mai he tafaʻakí ha kulupu ʻo ha kau sōtia.
Naʻe pehē ange ʻe Kuilamoa, “ʻOku hangē mai ha pomú.” Naʻe sio atu ʻa Manuela ki he hola ʻa e kakaí, pea ʻi he mōmeniti pē ko iá, naʻe pā ʻa e kaá.
Naʻe taaʻi ʻe he mālohi ʻo e pā ʻa e foʻi pomú ʻa Manuela, ʻo hikiʻi ia ki he ʻataá lolotonga iá ʻoku punakaki holo e mofele mei he pomú ʻi hono tafaʻakí. ʻI he taimi naʻá ne tō ai ki he kelekelé, naʻá ne ilifia. Naʻá ne fakakaukau ki hono hoá. Naʻá ne ʻi fē nai? Kuo tō nai kiate ia e nunuʻa kovi taha ʻo e pomú?
ʻI he taimi ko iá, naʻá ne ongoʻi hono hiki hake ia ʻe Kuilamoa mei he kelekelé. Naʻe hangē mai e pāká ha feituʻu ʻoku fai ai ha taú he naʻe hanga ʻe he kulupu ʻo e kau sōtiá—ʻa kinautolu naʻe fakataumuʻa ki ai e pomú—ʻo fana ʻenau meʻafaná ki he toetoenga ʻo e kaá. Naʻe fakafalala ʻa Manuela ki hono hoá, pea naʻá ne lava ʻo lue ʻo aʻu ki ʻapi.
ʻI heʻena aʻu ki ʻapí, naʻá ne hū ki he falekaukaú ʻo sio he sioʻatá. Naʻe fetotoʻi hono matá, ka naʻe ʻikai ke lavea hono ʻulú. Naʻá ne ongoʻi pē ʻokú ne ninimo.
Naʻá ne talaange ki hono hoá, “Tuku haku tāpuaki.” Naʻe hili ʻe Kuilamoa, ʻa ia naʻe siʻisiʻi pē hono ngaahi kafó, hono ongo nima teteteté ʻi he ʻulu ʻo Manuelá peá ne tāpuakiʻi ia.
Hili pē ha taimi nounou mei ai, naʻe haʻu e polisí ki he falé. ʻI he fakakaukau ʻa e kau ʻōfisá ko e ongo faifekaú ʻa e ongo talavou naʻá na tau e pomú, naʻa nau puke ai kinaua ʻo ʻave ki ʻapi polisi. ʻI ʻapi polisí, naʻe sio ha taha ʻo e kau ʻōfisá ki he tūkunga ʻo Manuelá, peá ne pehē ange, “ʻE mate tama ia ko ení. Tau ʻave ia ki he senitā moʻuí.”
ʻI he senitā moʻui ʻa e kau polisí, naʻe fakatokangaʻi ai ʻe he ʻōfisa pulé ʻa e ongo ʻeletaá. Naʻe toki ʻinitaviu ia kimuí ni ʻe Manuela ke papitaiso. Naʻá ne talaange ki he kau ʻōfisa kehé, “ʻOku ʻikai ko ha ongo tautoitoi ʻeni. Ko e ongo faifekau kinaua.”
Naʻe tokangaʻi ʻe he ʻōfisa pulé ʻa Manuela, ʻi he tafitafi ʻe Manuela hono matá, naʻe faifai peá ne ʻilo ha lavea loloto ʻi lalo ʻi hono foʻi mata toʻomataʻú. ʻI he sio pē ʻa e ʻōfisa pulé ki aí, naʻá ne leleakiʻi ʻa Manuela mo Kuilamoa ki he falemahakí. Naʻá ne fakamatalaʻi ange, “He ʻikai ke u lava ʻo fai ha meʻa heni.”
Hili pē ha taimi nounou mei ai, naʻe pongia ʻa Manuela koeʻuhí ko e lahi e toto kuo molé. Naʻá ne fiemaʻu fakavavevave ha foʻi toto. Naʻe ō mai ʻa e Kāingalotu mei Hualasí ki he falemahakí, ʻo ʻamanaki te nau foaki ha toto, ka naʻe ʻikai ha taha ʻiate kinautolu te ne maʻu e faʻahinga toto totonú. Naʻe sivi leva ʻe he kau toketaá ʻa e toto ʻo Kuilamoá pea naʻe ʻilo ai ʻokú ne maʻu e toto totonú.
Ko e tuʻo ua ʻaki ia he pō ko iá, ʻa hono fakahaofi ʻe Kuilamoa e moʻui hono hoá.