Vahe 31
Ngaahi Founga Fakamisiteli
ʻI he ʻaho 26 ʻo ʻOkatopa 1999, naʻe tatali ai ʻa Siaosi A. Pōneti kia Palesiteni Kōtoni B. Hingikelī ke tuʻu ki ʻolunga. Ko e toki ʻosi ia ha fakataha patiseti mo e Kau Palesitenisī ʻUluakí, Kau Pīsopeliki Pulé, mo e kau taki māʻolunga mo e kau pule kehekehe ʻo e Siasí ʻi he ʻŌfisi Pule ʻo e Siasí ʻi Sōleki Sití. Naʻe ʻikai faʻa ʻalu ʻa Siaosi ki he fakatahá—naʻá ne ʻi aí ʻo fetongi ʻa e talēkita pule ʻo e Potungāue ʻo e Ngaahi Naunau Fakatuʻasinó—ka naʻá ne ʻiloʻi naʻe ʻikai ke ʻosi ʻa e fakatahá kae ʻoua kuo tuʻu ʻa Palesiteni Hingikelī ʻo lue ki he matapaá.
Pea naʻe hangē naʻe ʻikai ngāue ʻa e palōfitá ia ke ʻalu ki ha feituʻú. Ka naʻá ne sio fakahangatonu atu kia Siaosi peá ne fehuʻi ange, “Ko e hā te tau fai ki he Temipale Ghana?” Naʻe fotu mei hono fofongá ha fiemaʻu ki ha tali.
Naʻe ʻikai ʻiloʻi ʻe Siaosi ʻa e meʻa ke ne lea ʻakí. Naʻe fakaʻohovale ʻaupito kiate ia ʻa e fehuʻí. ʻI he meimei taʻu ʻe hongofulu kimuʻá, lolotonga ʻene hoko ko e talēkita ki he ngaahi meʻa fakatuʻasino ʻi ʻAfiliká, naʻá ne tokoni ke fakangata hono taʻofi fakaʻaufuli ʻe he puleʻanga Kaná ʻa e ngaahi ʻekitivitī kotoa ʻa e Siasí ʻaki ʻene fakalotolahiʻi ʻa ʻAisake ʻEti, ko ha mēmipa ʻo e Siasí ʻi ʻAkalā, ke fakalelei mo hono tokouá (half-brother), ko e palesiteni ʻo Kaná, Seuli Lōlingi.
Naʻe fakaʻapaʻapaʻi ʻa Siaosi ʻe he kau taki ʻo e Siasí ʻi heʻene ngāue ʻi Kaná. Ka kuo ʻi ai ʻeni haʻane ngāue foʻou ʻi he Siasí, pea naʻe ʻikai fekauʻaki ia mo ʻAfilika. Ko e meʻa pē naʻá ne ʻilo fekauʻaki mo e Temipale Ghana ko hono fanongonongo ia ʻe Palesiteni Hingikelī ʻi Fēpueli ʻo e 1998.
Naʻe faifai pea pehē ange ʻe Siaosi, “Kātaki, ka ʻoku ʻikai ke u kau ʻi he ngāué.”
Naʻe tangutu maʻu pē ʻa Palesiteni Hingikelī, mo kei hā mei hono fofongá ʻokú ne fiemaʻu ha tali. Naʻá ne talaange kia Siaosi ʻoku tuʻu maʻu ʻa e ngāue ki he temipalé. ʻI he kamataʻangá, naʻe hangē naʻe poupouʻi ʻe he puleʻanga Kaná ʻa e ngāué, pea naʻe fakatau ʻe he Siasí ha kelekele ʻi ha veʻe hala lahi ʻi ʻAkalaá. Ka kimuʻa siʻi pē pea palani hono tanupou ʻo e kelekelé ʻi ʻEpeleli 1999, naʻe ʻikai tali ʻe he puleʻangá ke foaki ha ngofua langa ki he Siasí. Naʻe ʻikai ʻilo ʻe ha taha hono ʻuhingá.
Hili ʻa e fakatahá, naʻe lue foki ʻa Siaosi ki he ʻŌfisi ʻo e Siasí mo e Pīsope Pulé, Pīsope H. Tēvita Peatoni mo hono tokoni uá, Kiifi B. Mekimalini. Naʻa nau vēkeveke ke ʻiloʻi ʻa e meʻa naʻe fakakaukau ʻa Siaosi naʻe pau ke fai ʻe he Siasí ke maʻu ai ha ngofua ke langa ʻa e temipalé ʻi ʻAkalaá.
Naʻe fehuʻi ange ʻe ha taha ʻo kinaua, “Te ke loto pē ke ke ʻalu ki Kana?”
Naʻe tali ange ʻe Siaosi, “Loto-lelei ʻaupito. Te u fiefia ke ʻalu.”
Hili ha ngaahi uike siʻi mei ai, naʻe tūʻuta ʻa Siaosi ki Kana ʻo ʻiloʻi ʻoku tupulaki ʻa e Siasí ʻi ai. ʻI he taimi ʻo e taʻofi fakaʻaufulí, naʻe meimei toko hiva afe ʻa e kāingalotu ʻo e Siasí pea teʻeki ai ha ngaahi siteiki ʻi Kana. Ko e ʻosi ʻeni ha taʻu ʻe hongofulu mei ai, kuo ʻi ai ha siteiki ʻe nima ʻi he fonuá mo ha kāingalotu ʻe toko taha mano fitu afe tupu. Pea naʻe lotua fakamātoato ʻe he kāingalotu ko iá ha fakalakalaka ke hoko atu ʻa e ngāue ki he fale ʻo e ʻEikí. ʻI he taimi naʻe ʻaʻahi ai ʻa Palesiteni Hingikelī ki Kana ʻi he 1998, naʻe tuʻu mo fiefia ʻa e Kāingalotú ʻi he taimi naʻá ne fanongonongo ai ʻa e temipalé. Naʻe ʻikai fakakaukau ha taha ki ha ngaahi fakatoloi.
Naʻe fakataha ʻa Siaosi ʻi ʻAkalā mo e tokotaha tā palani ʻo e temipalé, kau loea ʻa e Siasí, mo ha kau ʻōfisa fakapuleʻangá. Naʻá ne fakataha foki mo ʻEletā Keleni L. Peisi, ko e palesiteni ʻo e ʻĒlia ʻAfilika Hihifó, ʻa ia naʻá ne houngaʻia ʻi he tokoni ʻa Siaosí. Naʻe lava ke tala ʻe Siaosi naʻe loto-hohaʻa ʻaupito ʻa ʻEletā Peisi ʻi he meʻa naʻe hokó. Ka naʻá ne ʻamanaki lelei pē. Kimuí ni maí, naʻe fakahoko ʻe he Kāingalotu ʻi ʻAfilika Hihifó ha ʻaukai makehe maʻá e temipalé, pea naʻe tui ʻa ʻEletā Peisi naʻe vave pē ke ʻi ai ha liliu.
Hili ha uike ʻe taha ʻo e ngaahi fakatahá, naʻe fakalōloa ʻe Siaosi ʻene folaú ʻaki ha uike ʻe taha ke fakatahatahaʻi ʻa e ngaahi meʻa naʻá ne maʻú. Fakatatau mo e kakai naʻá ne fakatalanoa ki aí, naʻe fakaʻitaʻi ʻe he kau fakafofonga ʻo e Siasí ʻa e Potungāue Fakafonua ʻo ʻAkalaá, ko e kautaha fakapuleʻanga naʻa nau fakangofua ʻa e ngaahi ngāue langa ʻi he koló. Naʻe tui ʻa e AMA naʻe fuʻu hohaʻa mo siolalo ʻa e kau fakafofongá lolotonga ʻa e ngāue ke maʻu ha fakangofuá. Naʻe hange foki naʻe ʻi ai ha fakafepaki meia Palesiteni Lōlingí, ʻa ia naʻe ʻikai ke toe feleaʻaki mo hono tokouá, neongo ʻena fakalelei lolotonga ʻo e vahaʻataimi taʻofi fakaʻaufulí.
Naʻe vahevahe ʻe Siaosi ʻa e meʻa naʻá ne akó mo ʻEletā Peisi, pea naʻá na teuteu fakataha ha lipooti maʻá e Kau Pīsopeliki Pulé. Naʻe foki leva ʻa Siaosi ki ʻIutā mo ha lipooti, fiemālie kuó ne fakahoko ʻene tafaʻaki ʻi Kaná.
ʻI Fisí, naʻe fiefia ʻa Sulieti Tolo ʻi he polokalama ako mamaʻo ʻa BYU. Naʻe ʻikai tatau ʻene ngaahi kalasí mo ha faʻahinga meʻa kuó ne aʻusia. ʻI heʻene tupu haké, naʻá ne manavasiʻi maʻu pē ke fai ha ngaahi fehuʻi ʻi he akó, naʻá ne hohaʻa naʻa manukiʻi ia ʻe heʻene kau faiakó ʻi haʻane lea ʻaki ha meʻa hala. Ka naʻe vave ʻene ʻiloʻi naʻe poupouʻi ʻe he kau tokoni ʻi he loki akó ha ngaahi fehuʻi pea naʻe ʻikai ke nau teitei ʻai ia ke ne ongoʻi vale. Naʻá ne ongoʻi foki ʻa e Laumālie ʻo e ʻEikí ʻi he loki akó, ʻo tataki ʻene akó.
Naʻe mātuʻaki faingataʻa ʻaupito ʻa e ʻuluaki teemi ʻa Sulietí. Ko ʻene kalasi faingataʻa tahá ʻa e fakalele pisinisí. Neongo naʻá ne ʻosi ʻilo ha ngaahi meʻa angamaheni fakapisinisi, ka naʻe faʻa ongoʻi lōmekina ʻa Sulieti ʻi he ngaahi lea mo e fakaʻuhinga foʻou naʻá ne ako ʻi he kalasí. ʻI he fakaʻosinga ʻo e tēmí, naʻá ne ongoʻi naʻe fuʻu lahi ʻa e meʻa ke toe vakaiʻi ki he siví. Ka naʻe lelei ʻene siví peá ne maʻu ʻa e maaka māʻolunga tahá ʻi he kalasí.
Naʻe ʻi ai ha ngaahi pole kehe ʻi heʻene kalasi fakalotú mo e kalasi fakatauhi tohí. ʻI heʻene hoko ko ha mēmipa foʻou ʻo e Siasí, naʻe ʻikai ke ne maheni mo e Tokāteline mo e Ngaahi Fuakavá, ko ia naʻá ne maʻu ha tokoni mei hono kaungā ako ko Sela Palenangasaú, ko ha mēmipa fuoloa ʻo e Siasí naʻe ngāue fakafaifekau taimi kakato. ʻI heʻene kalasi tauhitohí, naʻá ne maʻu tokoni mei hono husepāniti ko ʻIliesá. Kimuí ni maí, naʻá ne ngāue ʻi ha pangikē, ko ia naʻe mahino lelei kiate ia ʻa e lēsoní pea lava ʻo tokoni ke ngāueʻi ʻa e ngaahi tūkunga fakafiká. ʻI he fakaʻosinga ʻo e tēmí, naʻá ne maʻu foki ʻa e ngaahi maaka māʻolunga taha ʻi he ngaahi kalasi ko ʻení.
Koeʻuhí naʻe tuʻu ʻa e fale ʻo Sulietí ʻi he kauhala ʻe taha mei he ʻapiakó, naʻe hoko ia ko ha feituʻu ke fakataha ki ai ʻa e fānau akó ʻo ako. Naʻe faʻa tokoni hono kaungāakó ʻi hono teuteuʻi ʻo e meʻakaí mo fakamaʻa ʻa e ʻapí. Naʻe fiefia ʻa Sulieti ke maʻu kinautolu ko hano ngaahi kaungāmeʻá pea naʻá ne fiefia ʻi heʻenau loto-fiemālie ke tokoni kiate ia mo hono fāmilí. Naʻe hangē ʻene sio kiate kinautolú ko haʻane mamata ki he ngāue ʻa e ongoongoleleí.
Naʻe kamata ʻa e teemi hono uá ʻi he ʻaho 1 ʻo Sepitema, 1999. Naʻe fiemaʻu ʻe he niʻihi ʻo e kau akó naʻe ʻikai lelei ʻenau siví ke toe fakahoko ʻa e siví ke fakaleleiʻi honau māká, ko ia naʻe faʻu ai ha ngaahi kalasi fakanounou maʻanautolu. Pea koeʻuhí naʻe lelei ʻa e teemi ʻuluaki ʻa Sulietí, naʻe ʻohake ia ko ha tokotaha tokoni ki he fānau ako fakalele pisinisí.
ʻI he māhina ʻe tolu hono hokó, naʻe fakahoko fakataha pē ʻe Sulieti ʻene akó mo hono ngaahi fatongia kehe ko ha tokotaha tokoni mo ha faʻeé. Naʻá ne tokangaʻi ʻa e kau talavou ʻe toko nima ʻi heʻene kalasi fakalele pisinisi naʻe fakanounouʻí ʻo hangē ko hano ngaahi fohá. ʻI he hokohoko atu ʻa e tēmí, naʻá ne lava ʻo tala naʻa nau ongoʻi fiemālie ange ʻi he feohi mo iá ʻi heʻenau kau tokoni mei BYU. Naʻa nau lea tauʻatāina ʻi he kalasí pea hangē naʻe ʻikai ke nau momou ke fakahoko ha ngaahi fehuʻí. ʻI he fakaʻosinga ʻo e tēmí, naʻa nau lavaʻi kotoa ʻa e siví.
ʻI ha ʻaho ʻe taha, naʻe fetuʻutaki ʻa e kau talēkita ʻo e polokalamá kia Sulieti ʻo talaange ko ia ʻa e kapitení (valedictorian).
Naʻá ne ʻeke ange, “Ko e hā ia?”
Naʻá ne ʻohovale ʻi heʻene maʻu ʻa e tuʻunga fakaako lelei taha ʻi heʻene kalasí ʻi he taʻu ko iá. Naʻe tupulaki ʻene loto-falalá. Naʻá ne pehē loto pē, “Ko ia. Te u lava pē ʻo fakahoko ʻeni.”
Hili ha taimi nounou mei ai, naʻe fakahoko ʻe he polokalamá ha fakaʻosinga ako maʻá e fānau akó pea naʻe meimei ke toko fāngeau ʻa e ngaahi fāmilí mo e ngaahi kaungāmeʻá. Naʻe fakalāngilangiʻi ʻa kinautolu naʻe ʻosi mei he akó ʻi heʻenau fakakakato ʻa e polokalamá, ʻaki ʻenau tui ha ngaahi tatā lanu pulū mo ha teunga fakaʻosi ako mei he Kolisi Fakatekinikale ʻa e Siasí ʻi Fisí,. Naʻe maʻu foki ʻe Sulieti mo ha niʻihi kehe ha ngaahi tohi fakamoʻoni talateu ki he pisinisí mei BYU–Hauaiʻi. Naʻe fakahoko ʻe Sulieti ʻa e lea ʻa e tokotaha tuʻukimuʻá.
Hili iá, naʻe fakahaaʻi ʻe ʻIliesa ʻene houngaʻia mo Sulietí ʻi ha tohi kia ʻEletā Henelī B. ʻAealingi, ko e komisiona ʻo e ako ʻa e Siasí. Naʻá ne tohi ʻo pehē, “Naʻá ku fifili maʻu pē mo hoku uaifí pe te ma lava nai ʻo hoko atu ʻema akó. ʻOku hangē kuo tali mai ʻema ngaahi lotu fakalongolongó. Ko e moʻoni ʻoku ngāue ʻa e ʻEikí ʻi ha ngaahi founga fakamisiteli.”
ʻI he ʻaho 1 ʻo Sānuali 2000, naʻe tuku mai ai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló,” ko ha fanongonongo kuo fakamoʻoni hingoa ki hono fakalāngilangiʻi ʻo e Fakamoʻuí hili ha taʻu ʻe uaafe mei Hono ʻaloʻí. Naʻe fakahoko ʻe he Kau Palesitenisī ʻUluakí ha faleʻi ʻo pehē, “ʻOku mau poupouʻi kimoutolu ke fakaʻaongaʻi ʻa e fakamoʻoni kuo tohí ni ʻi he tokoni ke langaki ʻa e tui ʻa e fānau ʻa ʻetau Tamai Hēvaní.”
Naʻe fakahaaʻi ʻi he fanongonongó ha fakamoʻoni fakalūkufua ki he misiona fakalangi ʻo Sīsuú ʻi he kotoa ʻo e moʻuí ni pea mo ʻitāniti. Naʻe pehē ʻe he kau ʻaposetoló, “ʻOku mau fakahoko atu ai ʻemau fakamoʻoni ki he moʻoni ʻo ʻEne moʻui taʻe mafakatatauá, pea mo e haohaoa ʻo ʻEne feilaulau fakalelei maʻongoʻongá. Kuo teʻeki ke ʻi ai ha taha kuo ʻi ai hano mālohi pehē kia kinautolu kotoa kuo moʻui, pe ʻe moʻui he funga ʻo māmaní.”
Hili ha māhina ʻe tolu mei ai, lolotonga ʻo e konifelenisi lahi ʻo ʻEpeleli 2000, ne tuku mai ai ʻe he Siasí ʻa e Kau Fakamoʻoni Makehe ʻo Kalaisí, ko ha filimi houa ʻe taha ʻoku ʻi ai ha fakamoʻoni fakataautaha ʻa e mēmipa takitaha ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ki he Fakamoʻuí.
ʻOku kamata ʻa e foʻi filimí ʻaki ha lue atu ʻa Palesiteni Hingikelī ʻi he ngaahi holo maamangia ʻo e Senitā BYU Selusalemá. Naʻá ne pehē ʻi haʻane tuʻu ʻi ha fakapalepale, “Kuo hoko maʻu pē ʻa e fuʻu kolo lahi mo fakakuonga muʻa ko ʻení ko ha fakafiefia kiate au. ʻOku pehē ia koeʻuhí he ʻoku fakahoʻata ʻe he feituʻú ni ʻa e ʻAlo ʻo e ʻOtuá.”
Naʻá ne fakahoko leva ʻa e talanoa ʻo Sīsuú, mei Hono ʻaloʻi ʻi Pētelihemá ki Heʻene Toetuʻu mei he fonualotó. Naʻe fakamoʻoni ʻa e palōfitá ʻo pehē, “He ʻikai lava ke mahino kakato ki ha taha ʻa e fakaʻeiʻeiki ʻo ʻEne moʻuí, ʻa e fakaʻeiʻeiki ʻo ʻEne pekiá, ʻa e fakaʻeiʻeiki ʻo ʻEne meʻaʻofa ki he faʻahinga ʻo e tangatá. ʻOku mau fakahā fakataha mo e ʻeikitaú, ʻa ia naʻá Ne folofola ʻi Heʻene pekiá, ʻKo e moʻoni ko e tangatá ni ko e ʻAlo ia ʻo e ʻOtuá.’”
Hili ʻa e talateu ko ʻení, naʻe hiki ʻa e filimí mei he fakamoʻoni ʻa ha ʻaposetolo ʻe taha ki ha fakamoʻoni ʻe taha. Naʻe hulu ʻa e foʻi vitiō takitaha ʻi ha feituʻu kehe. Naʻe lea ha kau ʻaposetolo ʻe niʻihi ʻi muʻa ʻi ha ngaahi temipale kae lea ha niʻihi ʻi ha ngaahi feituʻu fakahisitōlia hangē ko Palemaila, Ketilani, mo Nāvuú.
ʻI lalo ʻi ha meʻa-fakaʻata lahi ʻi ha loki fakaʻata, naʻe fakamoʻoni ʻa ʻEletā Niila A. Mekisuele ki he tākiekina fakaemāmani lahi ʻa e Fakamoʻuí. Naʻá ne fakamoʻoni ʻo pehē, “Kimuʻa pea ʻaloʻi Ia ʻi Pētelihema ʻo ʻiloa ko Sīsū ʻo Nāsaletí, naʻe hoko hotau Fakamoʻuí ko Sihova. ʻI muʻa atú, fakatatau mo e fakahinohino ʻa e Tamaí, ko Kalaisi ʻa e ʻEiki ʻo e ʻunivēsí, ʻa ia naʻá ne fakatupu ha ngaahi māmani taʻefaʻalaua—ʻa ia ʻoku taha pē ai hotau māmaní.”
Naʻe hoko atu ʻa ʻEletā Mekisuele ʻo pehē, “Ka ʻi he lahi ʻo ʻEne ngaahi fakatupú, ko e ʻEiki ʻo e ʻunivēsí, ʻa ia ʻokú Ne fakatokangaʻi e tō ʻa e kiʻi foʻi manupuna kotoa peé, ko hotau Fakamoʻui fakatāutahá ia.”
Naʻe lea ʻa ʻEletā Henelī B. ʻAealingi, ko e mēmipa foʻou taha ʻo e Kōlomu ʻo e Kau ʻAposetolo ʻe Toko Hongofulu Mā Uá, mei he ngaahi sitepu fakahahake ʻo e Temipale Salt Lake. Naʻá ne pehē, “Ko e ngaahi temipale kuo fakatapuí ko ha ngaahi feituʻu toputapu ia ʻe lava ke hāʻele mai ki ai ʻa e Fakamoʻui kuo toe tuʻú. ʻOku fakahaaʻi ʻe he konga kotoa ʻo e ngaahi fale ko ʻení mo e meʻa kotoa pē ʻoku ʻi lotó ʻa e ʻofa ʻa e Fakamoʻuí kiate kitautolú pea mo ʻetau ʻofa kiate Iá.”
Naʻe fakamoʻoni ʻa Palesiteni Sēmisi E. Fausi ʻi heʻene luelue loto-ʻapasia ʻi he fakavaʻe ʻo e Temipale Nauvoo motuʻá, ki he Fakamoʻuí mo ʻEne feilaulaú. Naʻá ne pehē, “ʻOku ou ʻilo ʻe lava ke fakamolemoleʻi ʻa e tangatá mo e fefiné mei heʻenau ngaahi angahalá, kapau te nau fakatomala, ʻo fakafou ʻi he mamahi taʻe-mafakamatalaʻi ʻo e Fakaleleí. Koeʻuhí ko e mana ʻo e Toetuʻú, ʻe toe tuʻu ʻa e kakai kotoa pē mei he maté. ʻOku ou ongoʻi ʻEne ʻofá mo fakatumutumu ʻi he totongi naʻá Ne fai maʻatautolu takitahá.”
ʻOku tāpuni ʻa e foʻi filimí ʻaki ha fakamoʻoni fakaʻosi meia Palesiteni Hingikelī ʻi heʻene tuʻu mo hono kaungā-ʻaposetoló ʻi muʻa ʻi he tā tongitongi ʻo Kalaisí ʻi he Temipale Sikueá.
Naʻe pehē ʻe he palōfitá, “Ko Ia ʻa Sīsū Kalaisi, ʻa ia ʻoku ʻulu ki he Siasí ni, ʻa ia ʻoku ui ʻaki Hono huafa toputapú.” “ʻI Heʻene hoko ko ʻEne kau ʻaposetolo kuo fakamafaiʻi mo fekauʻi ke nau fai iá, ʻoku mau fakamoʻoni ʻokú Ne moʻui pea te Ne toe hāʻele mai ke maʻu Hono puleʻangá mo pule ko e Tuʻi ʻo e ngaahi tuʻi mo e ʻEiki ʻo e ngaahi ʻeikí.”
ʻI he ʻaho 19 ʻo Mē 2000, hili ia ha māhina ʻe ono mei he fakaʻosi ako ʻa Sulieti Toló, naʻe fakamālohiʻi kinautolu ʻe ha kau pule fakapuleʻanga tokolahi ʻo nau hū ki he Fale Alea ʻo Fisí ʻo taki fakamālohiʻi ʻa e palēmiá mo ha kau ngāue fakapuleʻanga tokolahi. Naʻe vave ʻa e fakalalahi ʻa e meʻa ne hokó ki ha liukava kakato. Naʻe tolonga ʻa e fakamamahí mo e maumau lao ʻi he fonuá ʻi ha ngaahi ʻaho lahi.
Naʻe tangi ʻa Sulieti ʻi heʻene mamata ki he ngaahi lipooti ʻo e liukavá ʻi he televīsoné. ʻI he kamataʻangá, naʻe taʻofi fakaʻaufuli ʻa e tokotaha kotoa pē ke nofo maʻu. Naʻe tāpuni ʻa e ngaahi pisinisí, tāpuni ʻa e ngaahi ʻapiakó, pea ʻikai toe fai ha lotu ʻa e ngaahi siasí. Ne faifai pē pea kiʻi fakangaloku ʻa e ngaahi fakataputapuí, pea ʻalu ʻa e ongo tamaiki lalahi ʻa Sulietí ki ha heleʻuhila mo ha niʻihi hona ngaahi kāsiní mo ha kaungāmeʻa mei he lotú. Ka ʻi he hili pē ʻenau mavahé, naʻe toe kamata ʻa e fetāʻakí ʻi Suva, ʻo moveuveu ʻa e koló. Naʻe loto-hohaʻa ʻa Sulieti ʻi heʻene fanongo ʻi he ongoongó. Naʻe ʻosi atu ha houa ʻe tolu. ʻI he faifai pea aʻu atu ʻene fānaú ki ʻapí, naʻá ne puke maʻu mai kinaua.
Naʻe kamata ʻa e liukavá hili hono langa ʻo e Temipale Suva Fiji, pea naʻe teuteu ʻa e Kāingalotú ki ha ʻoupeni hausi mo ha fakatapui ʻi Sune. Kuo fifili ʻeni ha kāingalotu tokolahi ʻo e Siasí pe ʻe toloi nai ʻa e ngaahi meʻa ko ʻení kae ʻoua kuo ʻosi ʻa e fekeʻikeʻí.
ʻI he ʻaho 29 ʻo Meé, naʻe fakafisi ʻa e palesiteni ʻo Fisí, pea puleʻi ʻe he ngāue fakakautaú ʻa e puleʻangá. Hili ha ʻaho ʻe ua mei ai, naʻe fetuʻutaki ʻa Palesiteni Hingikelī kia Uloi Paua, ko e palesiteni ʻo e Misiona Suva Fisí, ke fehuʻi ange fekauʻaki mo e ngaahi tūkunga ʻi aí. Naʻe talaange ʻe Palesiteni Paua kiate ia kuo nonga mai ʻeni ʻa e fonuá ʻi he malumalu ʻo e ngāue fakakautaú, neongo ʻa e kei hokohoko atu ʻa e tūkunga fakangatangatá. Naʻe toe fakaava ʻa e malaʻe vakapuna ʻi Suvá, pea toe malava ʻa e fefonongaʻaki takai ʻi he koló.
Naʻe fiemālie ʻa Palesiteni Hingikelī. Naʻá ne pehē ange, “Tau toki sio ʻi he māhina katuʻú.”
Naʻe fakahoko ʻe he Kāingalotu ʻi Fisí ha kiʻi ʻoupeni hausi temipale ʻi he konga kimuʻa ʻo Suné, ʻo kau atu ki ai ha kau ʻaʻahi ʻe toko taha mano ono afe tupu.
ʻI ha ʻaho Tokonaki ʻe taha, naʻe aʻu atu ha pasi ʻe tolu ki he ʻoupeni hausí mo ha kakai mei he ngaahi tui fakalotu kehé. ʻI he hifo ha fefine ʻe taha mei heʻene pasí, naʻá ne maʻu ha ongo fakaʻofoʻofa naʻe toe mālohi ange ʻi heʻene fakaofi atu ki he temipalé. ʻI he kuohilí, naʻá ne lea fakafepaki ki he Siasí. Naʻá ne fakaʻiseʻisa ʻi he taimí ni ʻi heʻene ngaahi leá, pea naʻá ne lotua ha fakamolemole kimuʻa peá ne hū ki he temipalé.
Naʻá ne talaange ki ha taha ʻo e Kāingalotu naʻá ne fetaulaki mo ia lolotonga ʻa e ʻaʻahí, “ʻOku ou ʻiloʻi he ʻahó ni ko e siasi moʻoni ʻeni ʻo e ʻEikí. Kātaki ʻo ʻomi ʻa e kau faifekaú kiate au.”
Koeʻuhí ko e liukavá, naʻe fakakaukau ai ʻa e Kau Palesitenisī ʻUluakí ke fakahoko ha sēsini fakatapui pē ʻe taha kae ʻikai ko e faá, ʻo fakangatangata ai ʻa e tokolahi ʻo e kakai ʻe lava ke kau atu ki he ouaú. Ka ʻi he ʻaho 18 ʻo Suné, ko e ʻaho ia ʻo e fakatapuí, naʻe tuʻu ai ʻa Sulieti mo ha Kāingalotu Fisi kehe ʻi tuʻa ʻi he temipalé ʻi he hala lahí.
Naʻe tuʻu ʻa e temipalé ʻi he tumutumu ʻo ha tafungofunga ʻoku hanga hifo ki he ʻŌseni Pasifikí. ʻI he lele māmālie hake ʻa e kā naʻe heka ai ʻa Palesiteni Hingikelī mo hono uaifi ko Māsilií, naʻe taʻataʻalo ʻaki ʻe he Kāingalotú ha ngaahi holoholo hinehina ʻi he ʻeá mo kaila hosana. Naʻe malimali ʻa e palōfitá peá ne taʻataʻalo atu kiate kinautolu. Naʻe langaki ʻe he mamata ki he palōfitá ʻa e laumālie ʻo e tokotaha kotoa pē. Naʻe maamangia ʻa e langí, pea naʻe lava ke ongoʻi ʻe Sulieti ha fiefia mo ha loto-vēkeveke.
ʻI he lea ʻa Palesiteni Hingikelī ʻi he fakatapuí, naʻá ne lea ai fekauʻaki mo e mahuʻinga ʻo e ngaahi temipale liliu foʻoú. Kuó ne ʻosi fakatapui ha ngaahi temipale ʻe uofulu mā fā ʻi he funga ʻo e māmaní. Naʻá ne pehē ʻi ha tuʻunga malanga ʻi he loki silesitialé, “Ko e fale ia ʻo e ʻEikí. Te ke lava ʻo fakahoko ʻa e fufulú mo e paní mo e ʻenitaumení pea haʻu ki he loki ko ʻení, kuo fakanāunauʻi fakaʻofoʻofa, ʻo fakalaka atu ʻi he veilí ko ha fakataipe ʻo ʻetau fononga mei he moʻuí ki ha moʻui foʻoú.”
Naʻá ne hoko atu ʻo pehē, “Ko ha ongo loki sila ʻeni ʻoku ʻi ai ha ongo ʻōlita fakaʻofoʻofa te ke lava ʻo sio ki ai ʻi he ngaahi sioʻatá mo ongoʻi ʻa e ongo ʻo ʻitānití. ʻOku ʻikai ha meʻa ia ʻe tatau mo ia ʻi he funga kotoa ʻo e māmaní.”
Naʻe ʻikai fuoloa kuo fakaava ʻa e temipalé ki he ngāue ouaú. Pea hili ʻa e teuteu ʻa e fāmili Toló ke hū ki he fale ʻo e ʻEikí, naʻe silaʻi fakataha kinautolu ki taimi mo ʻitāniti.
ʻI he ʻaho 10 ʻo ʻAokosi 2000, naʻe ongoʻi tuenoa ʻaupito ʻa Siaosi Pōneti. Hili ha māhina ʻe hiva mei heʻene folau ki Kaná, naʻá ne foki mai ki he fonuá—ke hoko ko e talēkita ʻo e Siasí ki he ngaahi meʻa fakatuʻasinó ʻi he ʻĒlia ʻAfilika Hihifó. ʻE vavé ni pē ha kau fakataha mo ia ʻi ʻAkalā ʻa hono uaifi ko Kalolainé mo ha toko tolu ʻo ʻena fānaú. Ka ʻi he taimi ní, naʻá ne nofo toko taha pē.
Naʻe kei tuʻu maʻu pē ʻa e ngāue ʻi he Temipale Accra, pea naʻe fakaʻamu ʻa e kau taki ʻo e Siasí ʻe lava ke tokoni ʻa Siaosi, ʻi hono ongoongo ko ha takimuʻa ʻiloʻilo mo mahuʻinga ʻi ʻAfiliká, ke ʻunuakiʻi ki muʻa ʻa e ngāué. ʻI he ongoʻi ʻe Siaosi ʻa e mafatukituki ʻo ʻene ngāué, naʻá ne fakaʻamu ke lava ʻo ikunaʻi ʻa e ngaahi faingataʻa ʻoku hanganaki mai mei muʻá. Naʻá ne feinga ke ongoʻi mo fakakaukau kia Sīsū Kalaisi mo ʻEne feilaulau fakaleleí.
Naʻá ne tohi ʻi heʻene tohinoá ʻo pehē, “Neongo ʻoku ou tui mālohi ki he ngaahi mālohi ʻo e Fakaleleí ke ʻomi ʻa e melinó ki he laumālié, ka ʻoku ʻikai ha veiveiua, ki he ngaahi mālohi mo e ngaahi tāpuaki kehe mei he Fakaleleí ʻoku teʻeki ke u aʻusiá.”
ʻI he tūʻuta pē ʻa Siaosi ki ʻAkalaá, naʻá ne ʻiloʻi vave ko e taha ʻo e ngaahi meʻa mahuʻinga naʻe fiemaʻu ke ne tokanga ki ai ʻi ʻAfilika Hihifó ko hono maʻu ko ia ha ngofua ke langa ʻa e temipalé.
ʻI he kamataʻangá, naʻá ne maʻu ha loto-falala te ne lava ʻo fuesia ʻa e ngāué, ʻa ia naʻe kau ai ha ngaahi ngāue langa lalahi kehe mo ha temipale ʻi ʻApa, Naisīlia. Naʻá ne pehē loto pē, “Kuó u ngāue heni kimuʻa. Te u lavaʻi pē ia ʻe au.” Pea ʻi he taimi ne kau fakataha atu ai hono fāmilí mo iá, naʻe siʻisiʻi ange ʻene ongoʻi tuenoá.
Ka ʻi he hili ha māhina ʻe taha, naʻe ʻikai ke ne fuʻu fakapapauʻi ʻene ngāué. Naʻe tupu mei he lahi hono ngaahi fatongia kehé ʻa e siʻisiʻi ʻa e taimi ke tokanga ai ki he ngofua langa ʻo e Temipale Accra. Neongo naʻe teuteu faivelenga ʻa e Kāingalotu ʻi Kaná kotoa ke hū ki he fale ʻo e ʻEikí, ka naʻe hangē naʻe ʻikai ʻilo ʻe ha taha—ʻi loto pe ʻi tuʻa ʻi he Siasí—ʻa e founga ke fakangata ai ʻa e tuʻutuʻuní. Ko e meʻa ʻe taha naʻe fakakaukau taha ai ʻa e kakaí, ko e kau ʻa Seuli Lōlingi, ko e palesiteni ʻo Kaná, ʻi he ʻuhinga ʻo e fakatoloí.
ʻI he ongoʻi tuenoa ʻa Siaosí, naʻá ne lotu. Naʻá ne pehe, “ʻoku fuʻu lahi e ngaahi palopalemá, fuʻu lahi e ngaahi fakafeʻātungiá. ʻE ʻEiki, ko e hā Ho finangalo ke u fai hení? Te u fai ha meʻa pē te ke finangalo ki ai. Te u hoko ko hoʻo meʻangāue, ka he ʻikai ke u lava ʻo fai toko taha ia.”
Hili ha taimi nounou mei ai, naʻe kamata fengāueʻaki fakataha ʻa Siaosi mo e ʻōfisi ʻo e uaifi ʻo e Palesiteni ʻo Kaná ke fokotuʻutuʻu ha ngaahi ngāue tokoni ʻofa fakaetangata. Naʻá ne fakaʻamu ʻe tokoni ʻene fakahoko iá ke ʻiloʻi lelei ange ai ʻe he fāmili Lōlingí ʻa e Siasí mo hono misioná. Naʻe kamata foki ke ne ʻaukai ʻi he Sāpate kotoa pē.
ʻI he vaeuaʻanga mālie ʻo Nōvema 2000, naʻe fakatuʻamelie ʻa Siaosi. ʻIkai ko ia pē, ka naʻá ne tui naʻe mahuʻinga ʻa ʻAisake ʻEti, ko e tokoua ʻo e palesitení, ki hono fakaleleiʻi ʻa e tūkunga fakangatangatá, ʻo hangē pē ko ia naʻá ne fai lolotonga ʻa e vahaʻa taimi taʻofi fakaʻaufulí. Ka naʻá ne kiʻi momou ke kole kia ʻAisake ke ʻalu ki he palesitení ʻo fakafofongaʻi ʻa e Siasí.
Neongo naʻe fakalelei ʻa e ongo tautehiná lolotonga ʻa e vahaʻataimi taʻofi fakaʻaufulí, ka naʻe taimi nounou pe ʻena leleí. Naʻá ne fakamamahiʻi kia ʻAisake, ko e taʻoketé, ke kole ha toe tokoni. Ka naʻe poupou ʻa e uaifi ʻo ʻAisaké, Sune, ke falala kia Sīsū Kalaisi ke tokoni ke fakaleleiʻi hono vā fetuʻutaki mo hono tokouá. Ko ia, neongo ʻene mamahí, ka naʻe fakapapauʻi ange ʻe ʻAisake kia Siaosi ʻokú ne loto-fiemālie ke talanoa mo Seuli fekauʻaki mo e temipalé.
ʻI he ʻaho 3 ʻo Tīsemá, naʻe fetuʻutaki ʻa ʻAisake ki he ʻapi ʻo e fāmili Pōnetí mo ha ongoongo fakafiefia. Naʻe fetuʻutaki ange ha tokotaha tokoni ki he palesitení mo ha ngaahi fehuʻi fekauʻaki mo e temipalé, pea naʻe loto-lelei ʻa e palesitení ke poupouʻi ʻa e ngāué kapau ʻe lava ʻe he Siasí ʻo fai ha fanga kiʻi liliu iiki ki hono fokotuʻutuʻu ʻo e konga kelekelé. Ko ha Sāpate ʻaukai ia, pea naʻe teʻeki kai ʻa Siaosi mo ʻAisake ʻi he ʻahó kakato. Naʻe ʻikai vete ʻena ʻaukaí ʻi he efiafi ko iá, ka naʻá na ō fakataha ki he tuʻuʻanga ʻo e temipalé ke fakapapauʻi pe ʻe faingamālie nai ʻa e kole ʻa e palesitení.
ʻI heʻena lue holo ʻi he konga kelekelé, naʻá na ongoʻi ʻe faingamālie pē ke feau ʻa e ngaahi kolé. Naʻe pehē ange ʻe Siaosi, “ʻAisake, ko e feituʻu ʻeni ʻe tuʻu ai e temipalé. Ta kole ki he Tamai Hēvaní ke tokoni mai.”
Naʻá na tūʻulutui ʻo fai ha lotu, ʻo kole ki he ʻEikí ke tāpuekina ʻenau ngaahi feingá. Naʻá na ongoʻi mālohi ʻa e Laumālié, pea naʻá na fetuʻutaki leva ki he tokoni ʻo e palesitení ke talaange ʻokú na loto-fiemālie ke fai ha alea. Naʻe fakatou ongoʻi fiemālie ʻa Siaosi mo ʻAisake fekauʻaki mo e fepōtalanoaʻakí.
Hili ha ʻaho ʻe ua mei ai, naʻe fakataha fakafoʻituitui ʻa ʻAisake mo hono tokouá ʻi Kasolo ʻOsú, ko e ʻapi nofoʻanga fakapalesiteni ʻo Kaná. Kimuʻa siʻi pea fai ʻa e fakatahá, naʻe fetuʻutaki ʻa Siaosi kia ʻAisake ke fakamanatu ange ki hono tokouá ʻokú ne ʻofa kiate ia. Naʻe foki leva ʻa Siaosi ki ʻapi ʻo lotu mo felueʻaki holo pē, ʻo tatali ki ha fetuʻutaki meia ʻAisake. ʻI he taimi naʻe ʻikai fakahoko atu ai ha fetuʻutakí, naʻe ʻalu ʻa Siaosi ki he tuʻuʻanga ʻo e temipalé ʻo tatali ai. Naʻe faifai pea tatangi ʻa e telefoní hili ia ha haafe houa mei ai.
Naʻe pehē ange fiefia ʻe ʻAisake, “Kuo ʻosi ia.” Naʻá ne talanoa mo Seuli fekauʻaki mo e temipalé ʻi ha miniti ʻe hongofulu. Naʻá na fakaʻaongaʻi leva ʻa e toenga ʻo e taimí ke talanoa mo manatumelie ki hona fāmilí. ʻI he fakaʻosinga ʻo ʻena fepōtalanoaʻakí, naʻá na fofonga malimali, kakata, mo tangi fakataha. Naʻe pehē ʻe Seuli ʻe lava ke kamata ngāue leva ʻa e Siasí ki he temipalé.
Naʻe fehuʻi ange ʻe ʻAisake pe naʻe fiemaʻu ke nau tomuʻa talanoa mo e kōmiti palani ʻa e koló.
Naʻe pehē ange ʻe he palesitení, “ʻOua te ke hohaʻa ki ai. Te u tokangaʻi ia ʻe au.”