“Josef Smit mo Fasin blong Maredem Fulap Woman long Semtaem,” Ol Jos Histri Topik
“Josef Smit mo Fasin blong Maredem Fulap Woman long Semtaem”
Josef Smit mo Fasin blong Maredem Fulap Woman long Semtaem
Ol Lata-dei Sent oli biliv se monogami—mared blong wan man wetem wan woman—i loa ia blong God, we i loa we i stanap tedei, long saed blong mared.1 Long taem blong Baebol, Lod i bin givim oda long sam long ol pipol blong Hem blong oli praktisim fasin blong maredem fulap woman—mared blong wan man wetem moa long wan woman long semtaem.2 Sam long ol fas memba blong Jos Ia blong Jisas Kraes Ia blong Ol Lata-dei Sent oli bin kasem, mo oli bin obei long komanmen ia we God i bin givim tru long ol profet.
Afta we hem i bin kasem wan revelesen we i givim komanmen long hem blong hem i maredem ol nara woman, nao, Josef Smit i bin maredem sam moa waef mo i mekem se sam we oli wok kolosap long hem oli folem praktis ia. Prinsipol ia, i wan long ol taem we i gat moa jalenj long taem blong Restoresen ia—long Josef Smit hemwan, mo tu, long ol nara memba blong Jos. Fasin ia blong maredem fulap woman long sem taem i bin testem fet, mo i mekem se i gat raorao, mo fasin blong agens. Samfala Lata-dei Sent, long fas ples, oli bin agri we bae oli putumbak praktis ia blong baebol, mo oli no save gud se bae i minim wanem. Be afta, plante oli bin testifae long ol eksperiens we i bin givim olgeta strong paoa, mo i bin helpem olgeta blong oli winim tu tingting blong olgeta mo i bin givim paoa long tingting blong olgeta blong oli akseptem kaen praktis ia.
Plante ditel abaot ol fasfala praktis blong fasin blong maredem fulap woman long sem taem, oli no save olgeta, hemia from se oli bin askem olgeta we oli stap mekem blong oli no talemaot ol samting ia, be i stap konfidensiol nomo. Histri rekod blong ol fasfala kaen mared ia, i smol nomo: samfala rekod blong tetaem ia i givim ol ditel, mo afta, ol memori oli no bin stap. Ol Sent i stap talembak samfala impoten stori long saed blong praktis blong maredem fulap woman, we Josef Smit mo ol nara fasfala Lata-dei Sent oli bin stap folem. Blong gat moa infomesen long saed blong fasin blong maredem fulap woman long sem taem, luk long “Plural Marriage in The Church of Jesus Christ of Latter-day Saints,” Gospel Topics Essays, topics.churchofjesuschrist.org.
Ol Topik we Oli Go Wetem: Joseph Smith Jr., Emma Hale Smith, Fanny Alger, Nauvoo Expositor