Ang Mahinungdanong Plano sa Atong Dios
Gikan sa usa ka debosyunal nga pakigpulong nga gihatag sa Brigham Young University pagka Oktubre 30, 2007.
Diha sa kapaspas nga dagan sa kalibutan karon, daghan kaayo sa mga tawo ang mitugyan sa kadaghanan nga kasinatian sa kinabuhi ngadto sa pamasin, nga walay saktong pagplano ug pagpangandam. Akong nabantayan nga kon mangutana ko sa pipila ka mga estudyante kon unsay ilang kursong kuhaon, ang kanunay nga tubag nga akong madawat, “Wala pa ko ka hukom. Unya na lang ko mohimo niana nga desisyon.” Akong nakita ang mga pamilya ug mga indibidwal nga nasulod sa mga laang sa utang tungod kay napakyas sila sa paghimo og usa ka maayong paglano sa pinansyal ug nagpuyo lapas pa sa ilang kinitaan. Ang uban sobra nga migahin sa ilang mga kaugalingon diha sa mga kalihokan, mga leksyon, mga club, ug mga paugnat sa kusog. Samtang ang pag-apil sa ingon nga mga organisasyon sa tinuoray maayo, ang pag-apil niini daling makapataranta kon kita mapakyas sa pagplano. Sa pagkapakyas sa pagplano, mawala ang atong panan-aw sa atong mahangturong kapalaran.
Kita makakita sa sukaranang ehemplo sa pagplano pinaagi sa pagbasa sa mga kasulatan. Diha sa Moises 1:39, ang Ginoo namahayag, “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.” Ang Iyang mahinungdanong plano, nga naglakip sa maulaong sakripisyo, mao ang paghatag og imortalidad ngadto sa tanang katawhan. Pinaagi sa gasa ug gahum sa priesthood, kadtong kinsa mouyon ug mosunod sa Iyang plano makadawat og kinabuhing dayon, ang labing mahinungdanong gasa nga mahatag sa Dios ngadto sa Iyang mga anak (tan-awa sa D&P 14:7). Ang mga kasulatan naglangkub og daghan nga mga pakisayran alang niini nga plano.
Ang usa ka kasaysayan sa proseso sa pagsunod niana nga plano tinuod nga nagpamatuod sa kahingpit ug kamakanunayon niini. Ang Ginoo mainampingon nga mipahimangno sa Iyang mga anak mahitungod sa plano sa ebanghelyo atol sa mga yugto sa panahon nga gitawag og mga dispensasyon, mga yugto nga “ang Ginoo sa labing menos adunay usa ka gihatagan og katungod nga sulugoon sa ibabaw sa yuta kinsa naghupot sa mga yawe sa balaan nga priesthood. …
“… Kon ang Ginoo mag-organisar og usa ka dispensasyon, ang ebanghelyo ipadayag pag-usab aron ang mga tawo niana nga dispensasyon dili magdepende sa nangaging mga dispensasyon alang sa kasayuran sa plano sa kaluwasan.”1
Ang matag dispensasyon adunay usa ka espesyal nga leksyon nga atong malakip sa atong personal nga mga plano samtang kita nangandam alang sa atong mahangturong kapalaran.
Ang Dispensasyon ni Adam: Pagkahimong Sama sa Atong Amahan sa Langit
Sa unang dispensasyon, ang Ginoo milalang nila ni Adan ug Eva, mibutang kanila ibabaw sa yuta, ug mihatag kanila og mga kahigayonan sa pagpili (tan-awa sa Moises 3:17). Sila gimandoan nga dili mokaon sa bunga sa kahoy sa kahibalo sa maayo ug sa dutan, kay sila giingnan nga sila papahawaon sa tanaman kon buhaton nila kini. Apan ang pagkaon sa bunga makahatag kanila og mortalidad. Sila mikaon sa bunga.
Ang Pagkapukan dili usa ka katalagman. Dili kadto usa ka sayop o usa ka aksidente. Kadto usa ka tinuyo nga bahin sa plano sa Ginoo sa kaluwasan. Isip resulta sa Pagkapukan, anaa kita ubos sa tintasyon ug kaalaot isip bugti aron masabtan ang tinuod nga hingpit nga kalipay. Kon dili makatilaw sa pait, kita dili gayud makasabut sa tam-is (tan-awa sa 2 Nephi 2:15). Atong gikinahanglan ang mortalidad nga pagdisiplina ug paghapsay alang sa sunod nga ang-ang sa atong paglambo nga mas mamahimong sama sa atong Amahan.
Unsa man ang gitudlo niining unang dispensasyon ngari kanato? Kita literal nga espirituhanong mga anak sa atong Langitnong Amahan. Sa dihang kita gipakatawo dinhi sa mortalidad, nakadawat kita og pisikal nga mga lawas nga gilalang diha sa Iyang panagway (tan-awa sa Genesis 1:27). Kita gisaaran nga kon atong madawat ang gikinahanglang mga ordinansa, motuman sa mga pakigsaad, ug mosunod sa mga sugo sa Dios, makasulod kita ngadto sa kahimayaan ug mamahimong sama Kaniya.
Atong nakat-unan usab nga isip mga anak nga mga lalaki ug mga babaye sa usa ka Amahan sa Kahangturan, kita makaistorya Kaniya pinaagi sa pag-ampo ug makadawat sa mga tubag pinaagi sa pagdasig ug pagpadayag. Apil sa atong plano sa kinabuhi kinahanglang dili mausab og makanunayong pag-istorya sa atong Amahan.
Ang mga Dispensasyon nila ni Enoch ug Noe: Pilia ang Pagkamatarung Ibabaw sa Pagkadautan
Ang ikaduha nga dispensasyon nailhan sama kang Enoch, kinsa “naglakaw uban sa Dios” (Genesis 5:24). Siya mitukod sa siyudad sa Zion, nga nahimong usa ka gamhanang simbolo sa pagkamatarung nga mahimong makab-ot ibabaw sa yuta ingon man usab sa langit (tan-awa sa Moises 7:18–21).
Nagsunod sa linya mao ang dispensasyon ni Noe. Si Noe nagpuyo sa mga panahon nga grabe ang kadautan, ug bisan og siya misangyaw og paghinulsol ngadto sa mga tawo, sila wala maminaw sa iyang mga pulong. Sa dihang ang lunop miabot, si Noe ug ang iyang pamilya lamang ang naluwas (tan-awa sa Genesis 7:23).
Ang ikaduha ug ang ikatulo nga mga dispensasyon nagtudlo kanato og mahinungdanong mga leksyon mahitungod kon unsay resulta sa pagpili sa maayo ibabaw sa dautan. Si Enoch ug ang tanan kinsa mikuyog kaniya napanalanginan sa hilabihan isip usa ka resulta sa ilang pagkamatarung. Ang mga tawo kinsa wala mosunod ni Noe nakamatngon nga ang kalaglagan mosunod sa makasasala.
Kining duha ka mga dispensasyon nagtudlo kanato sa pagpangita nianang maayo ug mapuslanon. Diha sa atong plano sa kinabuhi, sa pagkatinuod ang atong mga tumong mao ang pagbaton og daghang kaayohan kutob sa atong makita dinhi sa yuta. Atong makit-an ang daghan niining kaayohan pinaagi sa pagsiksik sa kasulatan matag adlaw. Kini modala kanato ngadto sa kinabuhing dayon.
Ang Dispensasyon ni Abraham: Paghimo ug Pagtuman sa mga Pakigsaad
Ang sunod nga dispensasyon mao ang kang Abraham. Sama nila ni Adan, Enoch, ug Noe, si Abraham nakadawat og usa ka balaan nga sugo gikan sa Ginoo. Ang Ginoo mihimo usab og mga pakigsaad—o pagbugkos, lig-on nga mga kauyunan—tali kang Abraham:
“Pahawa gikan sa imong nasud, ug gikan sa imong banay, ug gikan sa balay sa imong amahan, ngadto sa usa ka yuta nga Ako mopakita kanimo. …
“Ug Ako mobuhat gikan kanimo og usa ka dako nga nasud, ug Ako mopanalangin kanimo sa walay sukod, ug mohimo sa imong ngalan nga bantugan sa tanan nga mga nasud, ug ikaw mahimo nga panalangin ngadto sa imong binhi nga mosunod kanimo, nga sa ilang mga kamot sila modala niini nga pagpangalagad ug Pagkapari ngadto sa tanan nga mga nasud;
“Ug Ako mopanalangin kanila pinaagi sa imong ngalan; kay kutob sa modawat niini nga Ebanghelyo pagatawgon sunod sa imong ngalan, ug pagaiphon nga imong binhi, ug mobarug ug mopanalangin kanimo, ingon nga ilang amahan;
“Ug Ako mopanalangin kanila nga nagpanalangin kanimo, ug motunglo kanila nga nagtunglo kanimo; ug diha kanimo (nga mao, ang imong Pagkapari), ug diha sa imong binhi (nga mao, ang imong Pagkapari), kay Ako mohatag nganha kanimo og usa ka saad nga kining katungod mopadayon diha kanimo, ug diha sa imong binhi nga mosunod kanimo (nga ang gipasabut, ang tinuod nga binhi o binhi sa lawas) mahimo nga ang tanan nga mga banay sa yuta pagapanalanginan, gani uban sa mga panalangin sa Ebanghelyo, diin mao ang mga panalangin sa kaluwasan, gani sa kinabuhi nga dayon” (Abraham 2:3, 9–11).
Ang mga Santos sa Ulahing mga Adlaw mga tawo sa pakigsaad. Kita adunay mga kauyunan uban sa Ginoo diin Siya nagsaad kanato og daghan nga mga panalangin sa kondisyon nga kita mopasalig sa atong mga kaugalingon nga mosunod sa Iyang mga balaod ug mga sugo. Ang atong plano alang sa kinabuhi kinahanglang maglakip sa paghimo ug pagtuman sa mga pakigsaad. Kita makahimo niini nga bahin pinaagi sa pagpuyo kanunay nga takus sa paghupot og usa ka bag-o nga temple recommend.
Ang Dispensasyon ni Moises: Sunda ang mga Propeta sa Ginoo
Si Moises usa sa pinakabanggiitan nga tawo kinsa nagpuyo sukad. Siya naglakaw ug nakig-istorya uban sa Dios. Siya gipili sa Dios aron sa pagpagula sa Israel gikan sa pagkaulipon sa Ehipto (tan-awa sa Exodo 6:13). Siya adunay pribilehiyo sa pagdawat sa mahinungdanon nga balaod alang sa katawhan nga anaa diha sa Napulo ka mga Sugo (tan-awa sa Exodo 19; 20). Pinaagi niini ug sa uban nga mga leksyon gikan sa Ginoo, si Moises nahimong usa ka epektibong lider.
Kita usab mahimong epektibo nga mga lider. Ang pagpangulo nagkinahanglan og balanse diha sa atong mga kinabuhi. Si Presidente Gordon B. Hinckley (1910–2008) milatid sa mga responsibilidad nga kinahanglan natong hunahunaon kon magbahin-bahin o magbalanse sa atong panahon aron makaangkon sa kalampusan:
-
Ang responsibilidad ngadto sa atong mga pamilya.
-
Ang responsibilidad ngadto sa atong mga employer.
-
Ang responsibilidad ngadto sa buhat sa Ginoo.
-
Ang responsibilidad ngadto sa atong mga kaugalingon. Kini pihong nakapainteres ngari kanako. Si Presidente Hinckley mitino nga kita kinahanglan nga maggahin og panahon alang sa pagpahulay, pag-ehersisyo, paglingaw-lingaw, pagtuon, pamalandong, ug pag-ampo sa templo aron sa pagbalanse sa atong mga kinabuhi.2
Ang dispensasyon ni Moises nagtudlo kanato ug nag-andam kanato sa pagsunod sa mapanagnaon nga pagpangulo ug sa pagpalambo sa atong mga kaugalingon ngadto sa mas epektibo nga mga himan diha sa pagtukod sa gingharian sa atong Amahan sa Langit ibabaw sa yuta.
Ang Kinatung-an sa Panahon: Pasigaa ang Inyong Kahayag
Sa ingon ang labing mahinungdanon nga dispensasyon mao ang kinatung-an sa panahon, sa dihang ang Manluluwas mianhi sa yuta. Si Jesukristo mao ang pinakamahinungdanong tawo diha sa atong doktrina. Mas labaw pa siya kay sa pagkawalay sala, pagkamaayo, ug pagkamahigugmaon. Mas labaw pa siya kaysa usa ka magtutudlo. Siya nangalagad ibabaw sa yuta isip usa ka tawo, bisan Siya Anak sa Dios. Siya namatay, gilubong, ug nabanhaw sa ikatulo nga adlaw aron sa paghimo sa maulaong sakripisyo alang sa tanang katawhan aron ang kamatayon dili na maghupot og permanente nga gahum. Tungod niana nga buhat, ang tanan magmaya ug makatagamtam sa imortalidad.
Uban sa daghang mga butang nga gitudlo sa Manluluwas kanato mao nga kita ang kahayag sa kalibutan ug atong pasigaon ang atong kahayag sa atubangan sa uban (tan-awa sa Mateo 5:14–16). Kita napanalanginan nga nakadawat sa Iyang ebanghelyo. Pasigaa ninyo ang inyong kahayag aron makita sa uban ang inyong maayong mga buhat ug gusto nga makat-on pa og dugang kabahin sa mahangturong plano sa Dios.
Ang Dispensasyon sa Kahingpitan sa mga Panahon: Pagmaya diha sa Kahingpitan sa Ebanghelyo
Kita nagpuyo sa talagsaong panahon sa dispensasyon sa kahingpitan sa mga panahon, nga ang ebanghelyo ni Jesukristo gipahiuli diha sa kahingpitan niini (tan-awa sa D&P 27:13). Ang atong henerasyon nakapahimulos usab sa tanang nangagi nga mga dispensasyon diin kita makahimo sa pagtukod sa atong mga kinabuhi samtang kita nakasabut sa mga pagtagad sa Dios uban sa Iyang mga Anak.
Ang mga pulong sa Ginoo, ingon nga kini gihatag ngari kanato pinaagi sa mga kapanahonan gikan sa Iyang balaan nga mga propeta, migiya kanato diha sa plano nga gitukod sa Ginoo alang kanato. Kana nga plano hingpit na gikan pa sa sinugdan sa panahon hangtud nga kita adunay oportunidad, kon kita magpuyo nga takus, nga mopuyo uban Kaniya sa mga kahangturan nga moabut.
Kamo mga anak sa saad. Ako manghinaot nga kamo dili magplano aron mahimong ordinaryo lamang apan nga kamo magplano aron magmalampuson. Walay luna niining kalibutana ang pagka-ordinaryo; kita kinahanglan nga maninguha alang sa pagkahingpit. Kamo makabaton sa kahingpitan diha sa daghan nga mga dapit samtang kamo nangita ug nagbuhat paingon ngadto sa mga tumong nga inyong na-establisar.
Kamo adunay usa ka bililhong kabilin; ayaw kahadlok sa paghunahuna ug sa pagbuhat sumala sa mga baruganan sa ebanghelyo ug sa pagtagamtam sa mga panalangin niini samtang kamo nagtuman sa inyong katuyoan sa inyong paglalang isip usa ka anak sa Dios. Ang Dios mopanalangin kaninyo nga kamo unta adunay tinguha sa pagpadayon ug sa pagpangita sa kaluwasan ubos niining mahinungdanong plano nga Iyang gihatag kanato.
Adan
Enoch
Noe
Abraham
Moises
Jesukristo
Joseph Smith
Tuo: Panagway ni Kristo, ni Heinrich Hofmann, sa maayong kabubut-on sa C. Harrison Conroy Co.; ubos, gikan sa wala: Adan ug Eva diha sa Tanaman, ni Lowell Bruce Bennett; Siyudad sa Zion Nabalhin, ni Del Parson; Pagsangyaw ni Noe Gibugal-bugalan, ni Harry Anderson
Gikan sa wala: Si Abraham sa Kapatagan sa Mamre, ni Grant Romney Clawson; Si Moises Mitunga sa Pulang Dagat, ni Robert Barrett; Kahayag ug Kamatuoran, ni Simon Dewey; Brother Joseph, ni David Lindsley; Si Kristo sa Getsemani, ni Heinrich Hofmann, sa maayong kabubut-on sa C. Harrison Conroy Co.
Joseph Smith, ni Alvin Gittins
Ang labing mahinungdanon nga dispensasyon mao ang kinatung-an sa panahon, sa dihang ang Manluluwas mianhi sa yuta. Si Jesukristo mao ang pinakamahinungdanong tawo sa atong doktrina.
Ang Manluluwas namatay, gilubong, ug nabanhaw sa ikatulo nga adlaw aron sa paghimo sa maulaong sakripisyo alang sa tanang katawhan aron ang kamatayon dili na maghupot og permanente nga gahum. Tungod niana nga buhat, ang tanan magmaya ug makatagamtam sa imortalidad.
Kita nagpuyo sa talagsaong panahon sa dispensasyon sa kahingpitan sa mga panahon, nga ang ebanghelyo ni Jesukristo gipahiuli diha sa kahingpitan niini.