iVaqa ni Veisiko, Feperueri 2010
Vakayagataki Vakavuku ni iVurevure ka Lako Tani mai na Dinau
Vakavuvulitaka na ivolanikalou kei na vosacavuti se, kevaka e gadrevi, e dua tale na ivakavuvuli ka na vakalougatataki ira na marama o dau sikova.Wasea na nomu ivakadinadina me baleta na vunau.Sureti ira ko vakatavulica tiko me ra wasea mai na veika era sa vakila ka vulica.
Vakayagataki Vakavuku ni iVurevure
“‘Na bula mamaroroi’ … sai koya na noda [maninitaka] na noda ivurevure, na tuvatuva vakavuku ni veika vakailavo, na kena vakataucokotaki na bula savasava vakayago, kei na vakavakarau taucoko baleta na vuli kei na toro cake ni cakacaka, kei na kena kakavakitaki tiko na iyaunibula e vale kei na mamaroroi ka vakakina na vakatorocaketaki ni tudei tu ni bula vakayalo. … Kevaka eda bula vakayalomatua ka vakavakarau, eda na taqomaki vakavinaka me vaka ena qeteqete ni Ligana.”1
Peresitedi Spencer W. Kimball (1895–1985).
“Na kila cava e dodonu me vukei keda meda bula rawati keda kina? … Ena gauna se qai tauyavu ga kina na Lotu, a kerea o Brigham Young vei ira na marama me ra vulica na kena tarovi na tauvimate vei ira na nodra matavuvale, tauyavutaki ni iyau ni veiqaravi e vale, ka me ra vulica na fika kei na vakaivolataki ni vakayagataki ilavo kei na kila ka tale eso. Na veiivakavuvuli oqori e se vakayacori tikoga edaidai. Na vuli sa rui ka bibi ka tudei. …
“Au a taroga eso na bisopi se na kila ka cava ni bula rawati koya era gadreva vakalevu cake tu o ira na marama ena nodra dui tabanalevu, ka ra kaya mai ni tuva ilavo. E dodonu me ra kila tiko na marama na ca ni volivoli ena dinau ka sega ni bula ga ena ilavo e tiko rawa. Na ikarua ni ka era tukuna mai na bisopi o ya na vakasaqa. Na kakana e vakasaqari ka laukana ga e vale e sau lailai, ka bulabula, ka vukea na kena vaqaqacotaki na veimaliwai vakamatavuvale.”2
Julie B. Beck, peresitedi raraba ni iSoqosoqo ni Veivukei.
Lako Tani Mai na Dinau
“Meu vakamacalataka mada e lima na ituvatuva bibi ni galala mai na ivesu vakailavo. …
“iMatai, sauma na nomu ikatini. …
“iKarua, me lailai na ka o volia mai na ilavo o rawata. …
“iKatolu, vulica mo mamaroroi. …
“iKava, doka na nomu bula vakailavo. …
“iKalima, vakavulici ira na luvemu me ra muria na nomu ivakarau.”3
Elder Joseph B. Wirthlin (1917–2008) ena Kuoramu ni iApositolo Le Tinikarua.
“Na gauna eda na dinau kina, eda sa solia yani na noda iyau levu, cecere duadua ni bula galala ka vakatara me da bula vesuki tu. Eda na solia na noda gauna, kaukauwa, kei na ivurevure kece meda sauma lesu kina na veika eda taura mai vakadinau—o ya na veiivurevure a dodonu me a vakayagataki me vukei keda, noda matavuvale, kei ira na tani. …
“Ena kena gadrevi meda sauma na noda dinau e nikua, ka lako tani mai na dinau, e sa gadrevi kina meda vakabauta na iVakabula—ka sega ni cakava walega ia meda vinaka cake. Sa gadrevi me kaukauwa na noda vakabauta meda kaya rawa kina, ‘E sega ni rauta na nodatou ilavo.’ E gadrevi na vakabauta meda nuitaka tiko ni na vinaka mai na bula ka da sega ni volia na veika wale ka meda rawata kina na veika yaga eda gadreva kei na veika era gadreva na tani.”4
Elder Robert D. Hales ena Kuoramu ni iApositolo Le Tinikarua.
© 2009 mai na Intellectual Reserve, Inc. Dodonu kece e taqomaki. Tabaki e Amerika.Vakadonui me Vakavalagi: 6/09. Vakadonui me vakadewa: 6/09. iVakadewa ni Visiting Teaching Message, February. 2010. Fijian. 09362 858
Veivuke Vei Ira na Dauveisiko
Drau veivosaki kei nomu itokani me baleta na kena vaqaqacotaki vakayalomatua na itukutuku oqo ki na nodra bula yadua na marama lewenilotu. Na kila ka cava ni bula rawati koya e rawa ni drau wasea vua?
Vakavakarau Yadudua
Me baleta na ikuri ni itukutuku, raica All Is Safely Gathered In: Family Finances (naba ni ivola 04007).