Naan in Katak an Kōra, Maaj 2010
Kakajoorļo̧k Tōmak ilo Anij Jemān im Jisōs Kraist ilo Ekkatak An Juōn Make jān Jeje ko Rekwojarjar
Katakin eoon kein im ālij ko ak, eļan̄n̄e emenin aikuj, bar juōn katak im enaaj kōjeram̧m̧an jejtōr ro kwōj loļo̧k. Kwaļo̧k am̧ naan in kam̧ool kōn katak eo. Jiron̄ ro kwōj loļo̧k n̄an aer kwaļo̧k en̄jaake ko aer im ta ko raar katak.
“Ke iaar juōn kōrā eo ej kab m̧ōj an m̧arre, … kar karuwaineneik eō n̄an juōn mōn̄ā in raelep n̄an aolep jejtōr ro ilo Doulul eo an Kōrā ilo ward eo aō ro me emōj aer kar riiti n̄e ejjab Bok in Mormon ekwe juōn bwebwenato jidikdik kōn Kabun̄ eo jem̧aan. Iaar jino aō makoko ļo̧k in riiti jeje ko rekwojarjar, innām iaar maron̄ in pād ilo mōn̄ā in ilo aō riiti bok eo ekadu kōnke epidodo ļo̧k im ebōk jidik iien. Ke iaar mōn̄ā in raelep, eaar wōr juōn aō en̄jaake bwe men̄e bok in bwebwenato in jem̧aan eo eaar em̧m̧an, ij aikuj kar riiti Bok in Mormon. Jetōb Kwojarjar eaar im̧we eō n̄an aō ukōt wāween aō riiti jeje ko rekwojarjar. Ejja raan eo wōt iaar jino aō riiti Bok in Mormon, im ijjan̄in bōjrak. … Kōnke iaar jino riiti jeje ko rekwojarjar aolep raan, iaar katak kōn Jemedwōj Ilan̄, Eo Nejin Jisōs Kraist, im ta eo ij aikuj kōm̧m̧ane n̄an erom āinwōt Er. …
“… Kajjojo kōrā remaron̄ in erom jet rikōmļeļe ro ilo m̧weo im̧ōn, im aolep jejtōr ro ilo Kabun̄ rej aikuj jeļāļo̧kjen kōn kojpeļ eo āinwōt juōn ritōl im rūkaki. Eļan̄n̄e kwōjan̄in kar ejaake juōn imenene in katak jān jeje ko rekwojarjar aolep raan, jino kiiō im ekkatak wōt bwe n̄an maron̄ pojak n̄an eddo ko am̧ ilo mour in im mour indeeo.”1
Julie B. Beck, Būreejtōn eo eļap ilo Doulul eo an Kōrā.
“Juōn ekkatak in jeje ko rekwojarjar enaaj jipan̄ kam̧ool ko ad im kam̧ool ko kōn ro uwaan baam̧le ko ad. Ajri ro nejid rainin rej eddōkļo̧k im jepool er kōn ainikien ko rej iuunļo̧ker n̄an joļo̧k men eo ejim̧we im n̄an pukōt, ijjeļo̧kin, m̧ōņōņō ko an laļ in. Eļan̄n̄e ewōr aer juōn pedped eo epen kōn kojpeļ eo an Jisōs Kraist, juōn kam̧ool kōn m̧ool eo, im juōn ikdelel n̄an mour jim̧we, renaaj itok wōt n̄an po ilo kabo kein. Ej ad eddo n̄an kakajoorļo̧k im kōjparok er.”2
Būreejtōn Thomas S. Monson.
“Jekōņaan bwe jejtōr ro ad ren erom rijeļāļo̧kjeņ kōn jeje ko rekwojarjar. … Kwōj aikuj epaakļo̧k eo kōn m̧ool indeeo n̄an em̧m̧an ļo̧k eo am, im n̄an un ko n̄an katakin ajri ro nejūm make im aolep ro jet rej itok kōn kajoor eo am.”3
“Jekōņaan bwe moko imōd ren jeram̧m̧an kōn jejtōr ro rejeļāļo̧kjeņ kōn jeje ko rekwojarjar—mekarta Kwōj make iaam ak rim̧arre, dik ak rūtto, ejjeļo̧k ippam ak kōj jokwe ippān juōn baam̧le. … Erom rijeļāļo̧kjeņ kōn jeje ko rekwojarjar—ejjab n̄an lelaļ ļo̧k ro jet, ak n̄an lelōn̄ ļo̧k er!”4
Būreejtōn Spencer W. Kimball (1895–1985).
©2009 jen Intellectual Reserve, Inc. Aolep jim̧we ko rej pād ippān. Jeje ilo Amedka. Kōmālim ilo kajin English: 6/09. Kōmālim n̄an ukōte: 6/09. Ukok eo an Visiting Teaching Message, March 2010. Marshallese. 09363 874
Jipan̄ Ko n̄an Katakin Loļo̧k Ko
Ilo iien loļo̧k eo am, uwaak kajjitōk im kwaļo̧k jeļā ilo kōjerbal jeje ko rekwojarjar. Kwaļo̧k am̧ kam̧ool kōn ewi wāween an katak jān jeje ko rekwojarjar kakajoorļo̧k tōmak eo am̧. Kajjitōk jejtōr eo kwōj loļo̧k n̄an an kwaļo̧k ewi wāween an katak jān jeje ko rekwojarjar kakajoorļo̧k m̧weo im̧ōn im baam̧le eo an.
Kōpopo Ko an Juōn Make