Klumech er a First Presidency, Ongelolem el buil 2010
Kanaria el Bedengel a Chab Osebekir
Ng kmeed el okolem el rak er a memong, er a dirk ngeasek el bisop, ea Kathleen McKee, el mla melakel dil ra ward er ngak, a mlad. A mle teloi er a kloklel a kldei el cheremel kanaria. A teblong, el klebokel el bibrurk a bedengel, a mle kirel mo er a rsechelil. A ongedei, el Billie, a mle bibrurk a bedengel e oubebiduch er a bedengel a chab osebekel. A Sister McKee a lilchesii a tekingel mei er ngak: “Ng sebechem kau ma telungalek er kau el kudmeklii a blil? Ng diak el kot el klebokel, eng di ng kmal ungil a cheliteklel.”
A Sister McKee a kmal di mle uaia ngkal cheremel el bibrurk el kanaria el bedengel a chab osebekel. Ng dimlak a kmal klebekelel, malechub el meduch er a ngerang, malechub el chetengakl er a klengelakel. Eng di a cheliteklel a ngilsuterir a rebebil el otekau a berraod e mo meduch el kudmokl a ngerchelir.
A beluulechad a mui ra rebibrurk el kanaria el bedengel a chab osebekir. A mekngit a rengud er ngii a kmo te mekesai a mla mesuub el mengitakl. A rebebil a ngeasek el chad el diak lodengei el kmo te techang, ngera sebecherir malechub e ngerang a sorir; tir el rokui el di sorir el mo kmong techang. A rebebil a mechudelang, e chellungel a berraod, malechub ete mui er a rraurreng— e kiei er a kmal ngariou el teletael er a klengar er a ikel sebecherir el remuul.
Me a bo de kiei el ngara klungiaol, eng kirel mo er ngii sel duch er kid el mo obangel a mondai loba mesisiich el reng, deurreng, e ngoriakl lobang a ngariou el reng. Me koker, “Kede locha mekerang e kudmokl aikal moktek?” Me a kunger, “Sel bol mui osenged er a klemerang el kmo kid kede kmal rua techang!” Kid a sechal me a redil el ngelekel a ngar el Dios, el mla obeob el uaia teletelel. Ka momdasou er tiang: obeob el uaia teletelel a Dios. Ng diak el sebeched el mo meral urrekodel er tial klemerang a lak bo dolchesuar a dmolech e beches el klisiich.
Chelsel tial beluulechad, ea melemalt e ungil blekerdelel a chad a blechoel uaia lak a belkul er a klebekelel a bedengel. Eng di kede rongesii osischeklel a Rubak el mo er a profet el Samuel er a ngara mong: “A Rubak a diak el uaia chad a lomes; ele chad omes er a ikrel, eng di Rubak omes er a rengul a chad” (1 Samuel 16:7).
A Osobel er a losiik er a chad el mesisiich a klaumerang er ngii, eng dimlak lolilt er a chad el teloi er tirkel oleko te melemalt el chad el mle blechoel ngara blil a nglunguuch. Ng bai, Ngii a milkedongii a chad er a omenged er a Capernaum. El rrau a rengul, diak a skulel, el Simon a mlo Petrus, el Apostol er a klaumerang. A bibrurk el kanaria el bedengel a chab osebekel a sebechel nguu sel mui el klaumerang ma beltik el reng er a Mastang.
A Osobel er a lolilt er a semeriar e mesisiich el misionari, eng dimlak lebetik er ngii er a delongelir a lekaodengei el chad ng bai miltik er ngii er a delongelir a recherreuel. A Saul el ulemtok e oldechelakl a mlo Paulus el misionari.
A Osobel a millilt er a rediak el melemalt el chad el mo olisechakl er a rael el mora llemalt. Ngii a mle uaisei. Me Ngii meng uaisei er chelechang—el uldimukl er a rebibrurk el kanaria el bedengel a chab osebekir. Ngii omekedong er kau me ngak el mo mesiou er Ngii er tial beluulechad. Ng kired el mo mui er a blak el reng. Me sel dolasem, ea lsekum kede ruebet, e dolengit: “Mokrolemam, mokrolemam, kau el ngarbab Lomeob er a rechad, el tuobed er a iilkolk e ki mluut el melasem.”1
Me a nglunguchek a kmo doltirakl er a okesiu er a Chad er a Galilee, el debetik er ngii el teloi er a remechebuul, a remoualech a rengrir, a rengara klengit el reng, me a rengara chelebuul. Mei me a meral chelitakl ltobed er a chelsel a rengud sel bo deuaisei.
© 2010 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/09. Kengei er a oidel: 6/09. Oidel a First Presidency Message, June 2010. Palauan. 09366 881
Osischeklel Tial Klumech
Sel molisechakl … , eng blechoel ungil er tirkal mesuub a lomes malechub e lorrenges er a chimol tekoi” (Teaching, No Greater Call [1999], 55). Me sel molngeseu er a rechad er a telungalek el mo medengelii a klemechel a President Monson, e momdasou oker tir el mo kldmokl el ouchais a losuub ruriul er a bla mdak el menguiiu er tial klumech. Molengit er a derstang el chad el mo ouchais el kmo ngerang lomelchesiu er ngii eng kot el klou a belkul tekoi ra chelsel tial klumech. Mongesimer el mo ouchais er a klaumerang er kau el kirel tial klemechel a President Monson.
A osischeklel a tekingel a Dios, el mla mocholt el mo er a reprofet er Ngii, a kmal ngarngii a klisichel er a klengar er tirkel dolisechakl er tir (mesa Teaching, No Greater Call, 50). A President Monson a kmul kmo ngarngii a klisichel sel dodengei el kmo kede ngelekel a Dios. Uriul er a mchiuii tial klumech, e molengit er a telungalek me louchais el kmo ngera ngosuterir el dobedebekii el kmo tir te techang.