Ngeasek
Beches el Chad
Ng mle meringel er ngak el teloi er a seked. A telungalek er ngak a dirk millukl el mora bitang el beluu. Tial ward el ki blo er ngii a kmal klou a chelechad er a rengeasek er ngii, eng di tiang a mle kot el taem uaia “kbeches el chad.” Sel kmal mekngit er ngii a mle kirek el mora beches el skuul, e tial uldasou a mle mereched el melcheluches er a uldesuek, “Ng techang a bok dengchokl el obengkel sel temel a sueleb?” Ak locha mesang a kmo ngtechang er a ikelesia, eng di ng dimlak el soak el kora di merael mo dengchokl er a tebelel a tara rechad er a temel a sueleb, oumesingd er ngii sel lak kudengei el kmo te locha sorir ngak ak teloi er tir ng diak!
Tial kot el sils er a skuul a uaia lsal kmal kora mle meoud. Eng mechesmang a kambalang er a temel a sueleb. Ak milkekokak el tmuu er a blil a blengur, ak milluluuch el mora Chedam er a Babeluades me lengesukak el metik er a chad el kudengelii. A kulmerk er a osengek el meliuekl lomes el kmo ngtechang a kudengelii. Ng dimlak a chad. Mak milrael er a delongelel a kingall el kmal mora kora cheroid e mocha ousueleb.
Uriul er a temel a klas er a ochur, eak milsang a medal a kudengelii el chad. Ak milsang a David er a seminary er sel tutau. Ngullengit lomes er a babilengek e mlo medengei el kmo ngosisiu a temel a sueleb er kemam. “Ea, kau ke mlar ker er a temel a sueleb er chelechal sils?” ngii a uleker.
A kulenger el kmo, “ak mlar sel kora mocheuekl el delmerab.”
Ng dilul kmo, “a klukuk e kebai mei e dengchokl lobengkek er a temel a sueleb.”
Ng dmeu a renguk er a oubeltik el reng el Chedam er a Babeluades, el medengei a bekel ngelsengesed e onger a bekel el nglunguched. Ng dirrek el dmeu a renguk er a chad el uldersii a chim er a klausechelei. A beot el tekoi el uaia ongit a kmal ngarngii a lrellii.