Klumech er a First Presidency, Ongeuid el buil 2010
Remeral Sechelei
A tara chetengakl el teletael el Osobel a sebechel meskid a omekedong er kid el “sechelei.” Kede medengei el kmo Ngii obang a klikiid el beltik el reng el mora rokui el Ngelekel a Demal er a Babeluades. Eng di tirkel blak a rengrir er a klemerang er a omesiungir el Obengkel, a mo nguu tial chetengakl el ngakl el Ngii. Kom locha lmatk a tekoi er a chelsel okai me a euang el bliongel er a Doctrine and Covenants: “E Ak lmuut el melekoi er kemiu el sechelik, chelechal taem el mong e Ak mo omekedong er kemiu el sechelei leng ngklou a belkul el kbeskemiu tial llach, me kemiu bom Sechelik ser a kubengterir, el merael lomerk er a ebangkelio loba Klisichek” (mesa D&C 84:77).
Kede mo Sechelil sel dosiou er a rebebil el Kirel. Ngii a klikiid el okesiu er a teletael er a sechelei el kired el oltirakl er ngii. Ngii a kmal di soal a klungiaol a lebora rengelekel a Demal er a Babeluades. A deuil a rengrir a deurreng er Ngii. Ngii omelchesiu a klengit el reng er tir ele Ngii el mla nguubet a rokui el kngterir, e ngmai a rokui el ringel er tir, e otekau a rokui el berraod el ngar tir, e omelchesiu aikel rokui el urungulir. Ng bliochel a omeltkel Ngii. Ng diak el osiik a chetengakl el di kirel Ngii ng bai ngmai a rokui el klebkall el msang a Demal er a Babeluades. A bliochel el sechelei, el Jesus Kristo, a kmal diak a bechechelingaol reng er ngii el kirel a deurreng er a rebebil.
A derstang er kid el mla soiseb er a telbiil er a techolb e chelid a mla tibir el mo otirakl er a okesiu er Ngii el mo chemol a chelngelir er a rebebil el di uaia Ngii (mesa Mosiah 18:8).
Chelsel aikal merael mei el sesei el klebesei eng mor ngii a techeliu el mo sechelei el kirel Ngii. Ng locha sel taem el morael er a hokori el rael. Ng locha sel taem el mdengchokl er a elsel a ksia. Ng locha sel taem el mosiik er a kingellem er a chelsel a Ikelesia. Sel bom ungil el omes, eke mesang a chad el oberaod achelngelel. Ng locha berraod er a klengit el reng, klesabisi, malechub e ngasech e reng. Ng locha mo sebechem el mesang alsekum eke mla meluluuch me a Chedaol Reng a meskau a mad el omes a rengrir e mla tibir el mo mesebachkl er tir.
A nger er a nglunguchem a locha medal a meketeketang el sechelim, el meketeketang el rak el diak mesang eng di aikel ngelsengesel a mei er a uldesuem me a rengum eke mo omelchesiu el diuaia le ngelsengesem. Tiang a mla duubech el mei er ngak. A remeketeketang el sechelik el ngara cheroid a mla ngosukak el kmal uaia dil tal Dios a mle sebechel subedeterir er a chelngelek.
A re kiei el profet er a Dios a mla melekoi er kid me bo de meral sechelei el mo er tirkel mla obult el mei er a Ikelesia e mo osiik er tirkel kuk mla merael mor cheroid. Ng sebeched el rullii, e kid a mo rullii alsekum e kede blechoel melbedebek er a Osobel. Se detobed el mo olngeseu e dongebekakl a berraod, e Ngii a kuk ngosukid. Ngii a mo omekrael er kid el mor tirkel ousbech a ngesou. Ngii a mo omekngeltengat er kid el mo omelchesiu aiekl tir omelchesiu. Mesel doutekangel er a blak el reng el mesiou er tir, e kede merael mo omelchesiu er a beltik el reng er Ngii el mor tir. Tiang a meskid a blekeu me a klisiich el lemuut el mo blak a rengud el olngeseu.
Me sel, taem er a diak a ulebengelel el klengar, e kede mo melchesuar a deurreng el mo soiseb el mo teloi er a rebetok el ungil Sechelil. Me ak meluluuch el kirel tial klengeltengat el kired el rokui me tirkel bo dosiou er tir.
© 2010 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/09. Kengei er a oidel: 6/09. Oidel a Klumech er a First Presidency, July 2010. Palauan. 09367 881
Olisechakl er Tial Klumech
A rechad er a telungalek a kmal mo dmolech omesubir sel sekum te osiik er a kmong ngerang sel longuiiu a chedaol llechukl me a tekingir a reprofet (mesa Teaching, No Greater Call [1999], 55). Me sel monguiiu er tial klumech, e moker er a rechad er a telungalek me losiik a osisechakl el ngosuterir el mo sebecherir el okedongall el sechelil a Rubak.
Teaching, No Greater Call a kmo: “Alsekum e kobang a Beltik el Reng er a Kristo, e ke mo ungil kldmokl el olisechakl er a ebangkelio. Ng mo sebechem el ngosuterir a rebebil el mo medengelii a Osobel e oltirakl er Ngii” (12). Mngilt osisechakl er tial klumech el sebechel ngosukau el mo ungil el home teacher. Mosaod lobengkel a kldemem, e mngara nglunguuch el lomdasou el kmo komekerang e mo “ungil sechelei” el mor tirkel mosiou er tir.