Iango Ibukin te Kainutu n te Tairiki
Te bwai ae taekinaki aio kanoana bwaai ao mwakuri ake ana kona ni kamanenaaki ibukin te botaki ni utu n te tairiki. Aikai taiani kakairi aika oti imwina.
“Kakabwaiaki man Nakoau,” iteraniba 11: Ngkana ko anga te reirei, iangoia ni kabwarabwaraa aron te Uea ni kabebetea uotan te tia koroia ngke e karaoia ma nanona ni kabane. Kaoia kain te utu n tibwa aron kakabwaiakiia ngkai a beku ibukin te Uea.
“Tera ae a Uotia Baeoniia?”, iteraniba 16: Iangoa karinanakin iango ni wanawana aika a ua iroun Beretitenti Stephen L Richards ake e korei n ana koroboki. Maroroakinna bwa e kanga maroro aikai ni kakorakora am utu ao ni kakabwaiai maiuia naake ko katotongi.
“Tibwauaan te Euangkerio ma te Aki Nanokokoraki,” iteraniba 30: Iangoia ni kaoia am utu ni maroroakina aron karaoan nanon maroro man te koroboki: Taiaoka uringnga bwa ko aki kainnanoia n namakinna aron bairean am koaua; ko tii kainanoaki bwa kona kabwarabwarai n tamnein te tangira ao te akoi. Te koaua n tainako e na tokanikai ngkana e taekinaki reirei aika a koaua.”
“E Tuangai, ‘I Aki Kona ni Karaoia,’” iteraniba 58: Imwiin warekan ke kakimototoan te karaki, iangoia, kawai ni kaotioti ni kaeka ngkana iai te kaitara ma te kaririaki. Kain utu a kona ni kataneiaia n takarua n taekina, “Akea,” n aron are e karaoia Chase
Ao te Kainutu n te Tairiki?
“Ao te kainutu n te tairiki? Ti aki karaoaia n tairiki?” natiu te aine, Leilani, e titiraki. Namakinan te bure e a tokarai. Ngai ma kainnabau ti a tia ni kataia ni karaoa ara kainutu n te tairiki, ma a bati bwai aika a riki n ara tai, ao tia bwaka man te taneiai ni kakaraoia. Ana kauring Leilani e manga kamatoa nanora ni kabaeaki n aki katinanikua te kaunutu n te tairiki ibukin bwaai tabeua.
Ngke Leilani ao tarina, Nadia, a ikawai riki, a tangiria ni kan angareirei n tain te kainutu n te tairiki n aron are a reiakinna n te Moanrinan. A korea naba oin aia tamnei ni kabwarabwara te koaua are a kan reirei iaona. Ti kukurei ngaira kaaro n nooriia n taetae iaon te euangkerio ao n tabetai a kona ni karababai iango iaon reirei are a rineia.
“Ao te kainutu n te tairiki? Ti aki karaoaia n tairiki?” ao taeka aika I kabanea au tai ni kataia n aki kaokiokii. I ataia bwa ngkana a uarereke ataei bon te tai ae tamaroa n reireiniia. E na kataia ni bita maiuia te aonaaba, ma ngkana ti mwakuri ao ni mena irarikiia ara ataei n aia tai ni ikawai rake, ti kona ni kakoroi bukin ara kouru ni kaikawaia mwaane ao aine n te moan tua.
Patricia Cárdenas de Prado, Guatemala