Jodikdik
Juōn Wateļo̧k jān Jikin Eutiej
Āinwōt juōn jodikdik ekar wōr aō iien ko rem̧m̧an n̄an kōm̧m̧an peptaij ko n̄an rimej ro ilo San Diego California Tampeļ. Men̄e aolep iien ekar wōr aō juōn en̄jake em̧m̧an, juōn baj tūreep ilo kile eaar jako jān kōļmenļo̧kjeņ eo aō.
Iaar 16 iiō dettan, im leddik eo edik jatū eaar 12 an iiō im kar kōm̧mane tūreep eo an m̧oktata n̄an kōm̧m̧an peptaij ko kōn ro rimej. Kōnke ej kab iien eo an m̧okta, kōm̧ kar ļōmņak n̄an etetal peļaakin tulikin tampeļ eo ālikin am kar dedeļo̧k.
Pedped ko an tampeļ ewōr jet aer jikin kaloojoj ilo m̧ōttan eo juōn, innām kōm kar etetal ļo̧k n̄an ijo. Kōnke San Diego Temple ej pād ilo iturinļo̧k juōn ial eo eutiej im boub, eļan̄n̄e kwonaaj jutak ilo jikin kaloojoj eo, kwonaaj reilaļļo̧k n̄an iaļ eo.
Jutak ioon jikin eo eutiej an tampeļ eo raan eo eaar letok n̄an eō juōn maron̄ kāāl kōn mour Iaar reiļlaļok n̄an laļ eo ippān wa ko emōkaj aer itoitak, obrak kōn mōn kaikujkuj ko, im jeje ko rej kalibubuik kōkkaļein iaļ ko.
Innām ļōmņak eo eaar itok n̄an kōļmenļo̧kjeņ eo aō: “Kwōjjab kōņaan bwe kwōn juōn m̧ōttan men eņ; ejjab ta eo wūnin mour in.” Aolep iien iaar katak ke wūn eo an mour ej n̄an bar ro̧o̧l n̄an mour ippān Jemedwōj Ilan̄ im erom āinwōt E. Ijeļā ke ijjab aikuji men ko an laļ in n̄an tōpar kōtōpar eo.
Iaar oktak im reiļo̧k n̄an tampeļ aiboojoj eo, im iaar kam̧m̧oolol kōn jeļālokjeņ kōn ko̧jpōļ eo im imminene ko kar letok n̄an eō. Ijeļā ke iaļ in dān ko rej pād ioļap in kauwōtata ko an laļ in, iaar lo jikin eo eutiej n̄an jutak ioon.
Raan eo ilo tampeļ iaar kalim̧m̧ur e Jemedwōj Ilan̄ bwe aolep iien inaaj jutak ioon tōrere eo An im jab an laļ in. Jekdoon ta ko ļal in ej letok n̄an kōj, jemaron̄ eļļā jāni ilo ad kōjparok bujen ko jaar kōm̧m̧ani im jān ad jutak ilo jikin kwojarjar ko (laleD&C 87:8).