Ņaan in Katak an Kōra Ro, O̧kwōj 2010
Kōļapļo̧k Tōmak im Jim̧we ko Ad Make
Katak jerbal in, im ilo kōnono kake ilo ekkar ippān jejtōr ro kwōj loļo̧k. Kōjerbal kajjitōk ko n̄an jipan̄ eok kōkajoorļo̧k jejtōr ro im n̄an kōm̧m̧an bwe Doulul eo an Kōrā en m̧ōttan mour eo am̧ make.
Tōmak •Baam̧le • Jerbal in Jipan̄
Jān Jeje ko Rekwojarjar
Eddo eo ad ej Erom Erreo n̄an Kabun̄ ilo Tampeļ
“Bujen ko jej kōm̧m̧ani ippān kain̄i ko jej bōki ilo tampeļ rej erom peba ko kōmālimi n̄an ad deļōn̄ im̧aan mejān Anij. Bujen kein rej etale kōj itulikin jon̄an kajoor im imminene ko ad make. Jej kōm̧m̧ane bujen ko n̄an kwaļo̧k ujlepļo̧k ko ad n̄an kalōk aelōn̄ in kiin̄ eo. Jej erom armej in bujen ko āinwōt jej pād iumin bujen ko n̄an Anij. Aolepen kōjeram̧m̧an ko kar kalim̧m̧ur kaki rej jān ad tōmak n̄an bujen kien. …
“Ta eo kōrā ro ilo Kabun̄ eo remaron̄ kōm̧m̧ane n̄an bōk kōjeram̧m̧an ko an tampeļ eo?
Jen Rikanaan ro an, Irooj eaar karwaineneik ro rejjan̄in bōk kōjeram̧m̧an ko an tampeļ n̄an kōm̧m̧an jabdewōt menin aikuj ko eļap tokjāer n̄an bōki. E eaar karwaineneik ro emōj aer bōk kōjeram̧m̧an kein an tampeļ n̄an bar jepļaak āinwōt an emakijkij n̄an m̧ōņōņō bar juōn alen kōn en̄jake in, n̄an kōļapļo̧k ettōn̄ak ko aer im meļeļe in karōk in lo̧mo̧r eo An n̄an indeeo.
“Kōtlok bwe jān erreo n̄an kabwijer juōn peba in mālim an tampeļ ekāāl. Kōtļo̧k bwe jān etal n̄an tampeļ eo n̄an liāp ippān baam̧le ko ad n̄an indeeo. Kōtļo̧k bwe jān bar rooļ n̄an tampeļ eo emakijkij āinwōt an jekjek ko ad naaj kōtļo̧k. Kōtļo̧k bwe jān leļo̧k n̄an rimej ro ad iien ko rem̧m̧an n̄an bōk kain̄i ko ijo eutiej tata. Jen m̧ōņōņō kōn kajoor eo ilo jetōb im m̧adenļo̧k eo jej bōke ilo ad etal n̄an tempeļ aolep iien. Kōtļo̧k bwe jān tōmak im kōm̧m̧an im kōjparok bujen ko an tampeļ n̄an bōk tallep in kōjeram̧m̧an ko an Pinmuur.”1
Silvia H. Allred, rikakpilōklōk eo kein kajuōn ilo būreejtōnji eo eutiej an Doulul eo an Kōrā ro.
Jān Bwebwenato ko Ad
Būreejtōn Gordon B. Hinckley (1901–2008) eaar katakin Doulul eo an Kōrā kōļapļo̧k kōņaan ko an jejtōr ro n̄an kabun̄ ilo tampeļ ko:
“Ilo iien ekkal eo an Kirtland Tampeļ kar kūr kōrā ro n̄an kiji eran tepōl ko aer n̄an men ko reddikļo̧k n̄an iiōk e ippān kōmtāļ eo kōjerbale n̄an dapin tampeļ eo, eo emaron̄ bōk meram in al im allōn̄ im romaak eo ej kōmeram aiboojoj eo ej waļo̧k ilo em̧ in ekilep.
“Ilo iien ko, eļan̄n̄e ewōr jidik jāān ak wūjleplok tōmak, em̧m̧aan ro rej jerbal rej leļo̧k kajoor ko aer im menin jeram̧m̧an ko n̄an ekkal eo an im̧ōn Irooj. Kōrā ro rej boktok n̄an er m̧ōn̄ā ko, jon̄an eo wōt remaron̄ kōpooje. Edward W. Tullidge eaar kwaļo̧k ke ilo iien eo kōrā ro raar kiji repeen nuknuk an tampeļ, Joseph Smith, eaar lale er, ar ba, ‛Em̧m̧an jejtōr, kōm̧ij aolep iien pojak. Jejtōr ro rej aolep iien m̧okta im im̧aantata ilo aolep jerbal ko rem̧m̧an. Mary eaar m̧okta ilo jerkakpeje eo; im jejtōr ro kiiō rej m̧okta n̄an jerbal ko iļowaan tampeļ eo.’ …
“Bar juōn alen ilo Nauvoo, ke tampeļ eo ej pād wōt ilo an ekkal, jet kōrā rekar koba ippān doon n̄an kōm̧m̧an jōōt n̄an em̧m̧aan ro rej jerbal. Itok wōt jān kar jekjek kein ron̄ouļ iaer raar koba ippān doon ilo Taije, 17 raan in Maaj 1942, ilo po eo iļōn̄in im̧ōn wia eo an Rikaanan eo.”2 Doulul eo an Kōrā eaar ejaak.
Ta Jemaron̄ Kōm̧m̧ane?
-
Jipan̄ ta imaron̄ leļo̧k n̄an jipan̄ jejtōr ro aō n̄an aer kōppojak n̄an im aer pād ilo tampeļ?
-
Ewi wāween aō bōk jolet eo an jejtōr ro m̧okta ro raar ujlepļo̧k mour ko aer n̄an bōk kōjeram̧m̧an ko an tampeļ?
-
Ewi wāween aō bōk kōjeram̧m̧an ko an tampeļ?
© 2010 by Intellectual Reserve, Inc. Aolep jim̧we rej pād ippān. Jeje ilo Amedka. Kōmālim ilo kajin English: 6/09. Kōmālim an ukok: 6/09. Ukok in Visiting Teaching Message, August 2010. Marshallese. 09368 874