Feia apî
Hoê hi‘oraa na te vahi teitei a‘e
Ei feia apî, e rave rahi taime to‘u raveraa i te mau bapetizoraa no te feia pohe i roto i te hiero no San Diego, Kalifonia. Noa’tu e ua farii tamau noa vau i te hoê iteraa rau maitai, te vai ra râ hoê tere taa è tei vai papû i roto i to‘u feruriraa.
E 16 matahiti to‘u e to‘u teina ra, no ti‘a-noa-hia a‘e nei to’na e 12 matahiti, e ua ineine roa oia no to’na tere matamua no te rave i te bapetizoraa no te feia i pohe. No te mea teie to’na taime matamua, ua opua matou e haere e ori-haere na rapae i te hiero i muri a‘e ia oti ta matou ohipa.
Te vai ra te tahi mau vahi mata‘ita‘iraa nehenehe roa i te tahi pae o te aua o te hiero, no reira ua haere matou i reira. No te mea ho‘i e, e mea fatata roa te hiero no San Diego i te purumu rahi, ia ti‘a ana‘e oe i te vahi mata‘ita‘iraa, e ite atu oe i te purumu rahi i raro.
I to‘u ti‘araa i te vahi teitei a‘e o te aua hiero i taua mahana ra, ua farii au i te hoê hi‘oraa apî i ni‘a i te oraraa. Te hi‘o nei au i ni‘a i te ao nei e to’na mau pereoo tere vitiviti, te mau fare toa tei î roa i te taata, e te mau tapa‘o purumu tei papa‘ipa‘ihia.
I reira te mana‘o i tupu mai ai i roto i to‘u feruriraa e : « Eita oe e hinaaro ia riro ei tuhaa no te reira ; e ere tera te huru o te oraraa ». Ua haapii-tamau-noa-hia vau e te tumu o te oraraa o te ho‘iraa ïa e ora i piha‘i iho i te Metua i te Ao ra e ia riro mai Ia’na ra te huru. Ua ite au e, eita vau e hinaaro i te mau mea o te ao nei no te faaoti i taua tumu ra.
Ua huri au e ua hi‘o i te hiero nehenehe roa, e ua mauruuru vau i te iteraa i te evanelia e ta’na hi‘oraa i horo‘a mai ia‘u. Ua ite au e, i roto i teie ao arepurepu rahi e te ati, ua itehia ia‘u hoê vahi teitei a‘e i reira vau e ti‘a ai.
I taua mahana ra i te hiero ua fafau vau i to‘u Metua i te Ao ra e, e tamau noa vau i te ti‘a i To’na pae eiaha râ i te pae o te ao nei. Noa’tu eaha ta te ao e taora mai nei i ni‘a ia tatou, e nehenehe tatou e haavi i te reira na roto i te haapa‘oraa i te mau fafauraa o ta tatou i rave e na roto ho‘i i te ti‘araa i te mau vahi mo‘a (a hi‘o PH&PF 87:8).